U Libroil Mormon

1 Behlaeʼ ten, Mormon, quiʼn mentiʼc u dzíbilil tulácal baʼaxoʼob in wilmaʼh yétel in wuʼuymaʼh in dza u kabaʼeʼ U Libroil Mormon.

2 Maʼ hach oheʼlaʼan u kiniliʼ, baʼaleʼ nadzaʼan tiʼ u kinil le ca tu taacah Ammaʼron le u dzíbiloʼob le baʼaxoʼob úchilcoʼ, utiaʼal u baʼax kabét tiʼ c Yumtsil, tal u yilaheʼn (mín yan ten diez haʼaboʼob tán u cáhsic in canic tu yoʼolal u cambalil in cahal) yétel tu yaʼalaheʼ: Quin wilic de que techeʼ huntúl xíbpal yaʼab a naʼatiʼl yétel sébaʼan utiaʼal pácat.

3 Tu yoʼolaleʼ in kát ca kaʼahseʼ le baʼaloʼob ta hach ilah yoʼolal le cahal heʼelaʼ, le can u dza tech veintiʼcuatro haʼaboʼobeʼ xen tu luʼumil Antun, tiʼ humpʼél caʼanal luʼum bín u kabaʼte Xim, teʼeloʼ in taacmaʼh utiaʼal baʼax u kabét tiʼ Yumtsil tulácal le sagrado dzíboʼob yan baʼal yilaʼal yoʼolal le cahaʼ.

4 Heʼel túneʼ bín a bis ta wétel u laminaoʼob Nefi, ca pʼatiʼc le u kákoʼoboʼ tu cúchil tuʼux yanoʼoboʼ, tu yókol u laminaoʼob Nefioʼ bín a dzíbt tulácal baʼax bín wil tiʼ le cahoʼ.

5 Teneʼ Mormonen, teneʼ huntúlen u palal Nefi (u kabaʼ in tataeʼ Mormon caʼachiʼ) kahaʼan ten tulácal le baʼaxoʼob Ammaʼron tu túxtah ten.

6 Úch túneʼ, yan ten once haʼabeʼ in tataeʼ tu bisaheʼn tiʼ humpʼél u luʼumil nohol, tac tu luʼumil Zaraheʼmla.

7 Yókol tulácal u luʼumileʼ yan yaʼab nucuch nahoʼob, u maʼquiʼloʼobeʼ bey u xíxil le kaʼnaboʼ u sénquech yaʼabiloʼob.

8 Bey úchic túnoʼ tiʼ le haʼab heʼeloʼ anchah humpʼél baʼatel ichil letiʼ u palaloʼob Nefi letiʼoʼobaʼ u palal Nefi yétel u palal Jacob, u palal Jose yétel u palal Zoram, le baʼateloʼ ichil letiʼ u palal Nefioʼoboʼ yétel tiʼ u palal Laman, u kát yaʼaleʼ u palal Lemuel yétel u palal Ismaʼel.

9 U palaloʼob Laman yétel u palal Lemuel yétel u palal Ismaʼel, cu yaʼalaʼal tiʼoʼob tiʼ u palal Laman, le caʼa hatsoʼobaʼ, letiʼoʼobeʼ u palaloʼob Nefi yétel u palaloʼob Laman.

10 Úchul u caʼatén u cáhal le baʼatel ichiloʼoboʼ, tiʼ u hach náchil u luʼumil Zaraheʼmla, nadz tiʼ u haʼiloʼob Sidon.

11 Bey tún úchicoʼ le u palal Nefiaʼ tu múchʼquiʼntah yaʼab maʼcoʼob, cu maʼn tiʼ treinta mil. Bey úchic túnoʼ tiʼ le haʼab heʼeloʼ, anchah dzeʼedzec baʼateloʼob tuʼux letiʼ u palaloʼob Nefioʼ tu ganartoʼob u palal Lamanoʼoboʼ, quínsah yaʼaboʼob.

12 Beyoʼ, úch letiʼ u palal Lamanoʼoboʼ u kexpahal baʼax u kátoʼob, ca yanchah tún beyoʼ pax tu luʼumiloʼob; yanchah paz ichil le luʼumoʼ tu yoʼolal cuatro haʼaboʼob, bey túnoʼ maʼ wéc kiʼik xaniʼ.

13 Baʼaleʼ, yaʼabchah le kasoʼ tu yoʼolal tulácal tiʼ le luʼumeʼ, yanchah u luʼsic Yumtsil u yabilah meyhuloʼob yétel h xuʼul le meyahil baʼal cu haʼaksic yól maʼc yétel u dzac maʼc kohaʼaniloʼob, tu yoʼolal u hach kasaʼanil le cahoʼ.

14 Yumtsileʼ maʼ tu dzah u maʼalobiʼl tiʼoʼobiʼ, u hahil Pixaneʼ maʼ h ém tu yókol mixmaʼquiʼ, tu yoʼolal u kasaʼaniloʼob yétel maʼ tu creertoʼob maʼc.

15 Le cah anhi ten quiʼnce haʼaboʼob, in tuculeʼ maʼ kasiʼ, tu xímbatiʼc ten Yumtsil yétel tiʼn túmtah yétel tiʼn kahóltah u yutsil Jesus.

16 Ca tún tiʼn betah u meyahil Yumtsil teʼ cahaʼ bey cah maʼac in chiʼ cah aʼalaʼab ten in pʼat le meyhiloʼ, tumen tán caʼach u tʼanoʼob tu contra Dios, tu yoʼolaloʼ le yabilah meyahoʼob láh luʼsaʼaboʼob le luʼumoʼ yoʼolal u kebanil le cahoʼ.

17 Baʼaleʼ teneʼ pʼaʼaten ichiloʼob, quex bey aʼalaʼab ten maʼ in caʼansicoʼob tu yoʼolal hach chich u pucsiʼkaloʼob, h puʼul kas yókol le luʼumoʼ tu yoʼolal letiʼoʼob.

18 Leloʼobaʼ u ocoliloʼob Gadianton, ichil tiʼ u palal Laman yaʼaboʼob cahlahoʼob teʼ luʼumoʼ, u taacmoʼob u ayikaliloʼob teʼ luʼumoʼ, u ayikaliloʼobeʼ tu betubaoʼob hahalkiloʼob, tumen Yumtsileʼ tu pulah kas tu yókol le luʼumoʼ, bey túnoʼ maʼ páhchah u taacoʼobiʼ mix tu caʼa chʼahoʼobiʼ.

19 Anchah tún u meyhil h men u páhtalil quiʼsineʼ kúch tiʼ tulácal le luʼumoʼ, pʼis úchic u yúchul tulácal baʼax u yaʼalmaʼh Abinadieʼ yétel Samuel huntúl u palal Laman.