1 Tan natan, nia, mansalita ak onkana ed saray nakdaan ed saya a totoo a sikara so niligyas, no bilang say Dios iter to ed sikara so saray salitak, pian nakabatan da so saray beñgatla a nipaakar ed kaamaan da; on, mansalita ak ed sikayo, sikayo a nakdaan ed kailalakan na Israel; tan nia so saray salita a salitaen ko:

2 Kabaten yo a sikayo so wala ed kailalakan na Israel.

3 Kabaten yo a sikayo so nakaukolan a mambabawi, odino ag kayo nilaban.

4 Kabaten yo a nakaukolan ya igaton yo so saray agamil yo ed bakal, tan ag yo la panliketan so pampaterter na dala, tan saraya so ag yo la dedemeten lamet, likud no sikayo so ganganen na Dios.

5 Kabaten yo a nakaukolan yo a naamtaan so nipaakar ed kaamaan yo, tan mambabawi kayo ed amin a kasalanan tan karelmeñgan yo, tan manisia kayo ed si Jesu Cristo, a sikato so Anak na Dios, tan sikato so pinatey na saray Judio, tan lapu ed pakapanyari na Ama sikato so inmoli lamet, a dia ed saya agamoran to so taluna ed lubok; tan dia ed sikato met say sakit na patey so naakmon la.

6 Tan inawit to so idalan na kioli ed bilay na saray inaatey, a dia ed saya say too so nakaukolan ya ombañgon ya ontalindeg ed arap na yuroñgan na panañgokoman to.

7 Tan inawit to ya indalan so kadundon na mundo, a dia ed saya siopaman a naalmo ya angapo so kasalanan ed arap to ed agew na panañgokom niiter ed sikato so piayam to ed kawalaan na Dios diman ed panarian to, pian mancancionan ya andi-tonda a pandayew a kaiba to so saray koro diman ed tagey, onkana ed Ama, tan say Anak, tan say Espiritu Santo, a sikara so saksakey a Dios, ed kipapasen na liket ya angapo so angaan.

8 Dia ed ontan mambabawi kayo, tan mampabiniag kayo ed ñgaran nen Jesus, tan bembenan yo so evangelio nen Cristo, a saya so niiter ed arap yo, aliwa lambeñgat dia ed saray kasulatan balet ontan met dia ed kasulatan ya onsabi ed saray Gentiles a manlapu ed saray Judio, a saya a kasulatan so manlapu ed saray Gentiles ya onla ed sikayo.

9 Tan nia, saya so nisulat ed gagala pian sikayo komon so manisia ed saman; tan no manisia kayo ed saman manisia kayo met ed saya; tan no manisia kayo ed saya nakabatan yo so nipaakar ed kaamaan yo, tan ontan met ed saray makapakelaw a kimey a saraya so agawa ed panamegley na pakapanyari na Dios ed limog da.

10 Tan nakabatan yo met a sikayo so nakdaan ed boleg nen Jacob; dia ed ontan sikayo so nibilang ed limog na saray totoo na unaan a paknaan; tan no sikayo so manisia ed si Cristo, tan sikayo so nabiniagan, onuna ed danum, ontumbok dia ed apoy tan dia ed Espiritu Santo, a tumboken so pañgaligan a ginawa na Manañgilaban tayo, unong ed saman so ingangan to ed sikatayo, saya so pankamaoñgan yo ed sikayo ed agew na panañgokom. Amen.