Pi Chep nib Thothup
Mormon 6


Guruy Ni 6

Fapi Nephites e ra mukun gaed nga langgin fare binaw nu Cumorah ni fan ko tin tomur e mael—Mormon e mithaeg fapi chep nib thothup u dakean farengi falang nu Cumorah—Fapi Lamanites e ragel gaed, ma fare ulung ko Nephites e ni gathey—Yu miriʼay i biyuʼ e piʼin nlii raed ngar mʼaed ko sayden. Napʼan T.Y. 385.

1 Ere chiney e kug muʼ ko fare chep ni morngaʼagen e mogothgoth ni aw ko gidiiʼ rog, ni fapi Nephites. Me yibi buch ni arame guwaroed ni gamaed mʼon rokʼ fapi Lamanites.

2 Me gag, Mormon, e guyoloey bbabyor nge yaen ngakʼ fare pilung ko Lamanites, ni gube athapeg ni nge pagmaed nggu kunuyed e gidiiʼ romaed nga taʼabang nga dakean fare binaw nu Cumorah, u charen bangi falang ni kanoeg ni Cumorah, ma ireram e gin ni nggu mael gaed riy.

3 Me yibi buch ni fare pilung ko Lamanites e piiʼ ngog e nʼen ni gube athapeg.

4 Me yibi buch ni arame guwaroed iyaen ko fare binaw nu Cumorah, ma gamaed nʼuf ngalang e pi tent romaed nge liyeg farengi falang ni Cumorah; ni bay u lan bbinaw nib yoʼor e raen riy, nge lulʼ, nge alublub; ere ireray e gin nug athapeged ni ngug gelgaed riy ko fapi Lamanites.

5 Ma napʼan ni yaeni mʼay e bin dalip miriʼay nge meruk iragag nge aningeg e duw, ma kug kunuyed gubin e tin ni ke magaey ko gidiiʼ romaed nga dakean fare binaw nu Cumorah.

6 Me yibi buch u napʼan ni kug kunuyed gubin e gidiiʼ romaed nga lan taʼareb e ulung ko fare binaw nu Cumorah, ma musap gaed, gag, Mormon, e kug pilibthir iyaen; ma bachan e gumnang ni ireray e bin tomur e cham ko gidiiʼ rog, ma bachan e ke chiyliy Somoel ngog ni dab gupag fapi chep ni ke afiyib nga butʼ u paʼ e pi chitamangdaed, nib thothup, ni nge mul nga lani paʼ fapi Lamanites, (ya fapi Lamanites e yaedra gathey) ere gufalʼeg e re chep ney ko fapyungi plate ku Nephi, mug mithaeg u dakean farengi falang ni Cumorah gubin fapi chep ni ke pag Somoel gafalngin ngog, ma kemus ni chuʼuw ni baʼaray e plate niʼir e kug piiʼ ngakʼ fakag i Moroni.

7 Me yibi buch ni gidiiʼ rog, nge pi leʼengiraed nge pi bitir roraed, e ruguyed ni fapi salthaw ko Lamanites e yaed be yib iyib ngoraed e ngiyalʼ ney; mar pired u fithikʼ e murus ni boed ni ma oeb u lan ngorngoren e piʼin nib kireb, ngar soen niged raed.

8 Me yibi buch ni rabaed ni mael ngomaed, ma gubin e gidiiʼ make sug ko murus ni bachan faraed yoʼor.

9 Me yibi buch ni nra ogniged e sayden nga dakean e gidiiʼ rog, nge gatʼing nge gane gatʼing, nge tow, nge gubin mite talin e mael.

10 Me yibi buch ni salthaw rog e ni thʼaeb raed nga butʼ ngar mʼaed, arragon, ni fare ragag i biyuʼ ni yaed bay rog, man pageg ni kug madʼad u fithikʼraed;

11 Ma napʼan ni ka ranoed u fithikʼmaed iyaen ni kar thʼibed gubin e gidiiʼ rog nga butʼ ma kemus ni riliwʼ nge aningeg romaed e magaey, (ni fithikʼraed e bay fare pagael ni fakag i Moroni riy) ma gamaed e tin kug magaey gaed ni dag mʼaed u fithikʼ e gidiiʼ romaed, e gguyed ko bin migid e rran ngay, u tomuren ni ke sul fapi Lamanites ko pi tamagif roraed, u dakean farengi falang nu Cumorah, fare ragag i biyuʼ ko gidiiʼ rog ni kan thʼaeb raed nga butʼ, ni gag e ʼug gafaliy raed iyaen nga mʼon.

12 Ma kug guyed fare ragag i biyuʼ e gidiiʼ rog ni i gafaliy raed fare pagael ni fakag i Moroni.

13 Ma kug guyed, fare ragag i biyuʼ rokʼ Gidgiddonah ni kur mʼaed, ma kubay u fithikʼraed.

14 Nge Lamah e ki yimʼ nge birokʼ e ragag e biyuʼ; nge Gilgal e ki yimʼ nge birokʼ e ragag e biyuʼ; nge Limhah e ki yimʼ nge birokʼ e ragag e biyuʼ; nge Jeneum e ki yimʼ nge birokʼ e ragag e biyuʼ; nge Cumenihah, nge Moronihah, nge Antionum, nge Shiblom, nge Shem, nge Josh, e kur mʼaed nra bagyaed ma ir nge birokʼ e ragag e biyuʼ.

15 Me yibi buch ni kubay ragag niiʼ ni kur mʼaed ko sayden, nra bagyaed ma ragag e biyuʼ; arragon, gubin e gidiiʼ rog e kar mʼaed, ma kemus ni fa piʼin ni yaed riliwʼ nge aningeg ni ur moyed rog, nge buchʼuw e piʼin nra miil gaed nga lan e nam ko yimuch, nge buchʼuw ni kar miil gaed kar uned ngakʼ fapi Lamanites; ma ufin u doew e piʼin ni kar mʼaed, nge yil roraed, nge rachaʼ roraed e ba wagaey u dakean e buutʼ, ni ke pag e piʼin ni kar liiʼed raed ni nge meal u dakean o nam, nge bangbang nge sul ko butʼ u fayleng.

16 Me gag ni poloʼ e kug gafgow ko amith, ni bachan e gidiiʼ rog ni kar mʼaed, ere guyoer ni gube gaʼar:

17 O gimed e piʼin ni pichoʼay, mangfan ni ngam piiʼed keruʼmed nga pi woʼen Somoel! O gimed e piʼin ni pichoʼay, mangfan ni ngam feked yathin Yesus, ni ke paer nib kʼiyeg paʼ ni nge fekmed!

18 Musap gaed, faʼan manga dam rinʼed e biney, ma dab mʼaed. Machane musap gaed, kam mʼaed, ere gube yoer nagmed.

19 O gimed e pi pagael ni pichoʼay nge rugod ni pidorang, gimed e pi matam nge pi matin, gimed e pi figirngiy nge pi leʼengiy, gimed e piʼin ni pichoʼay, mang e rinʼ ma kam mʼaed!

20 Machane musap gaed, da kum moyed, ma kirbaenʼ rog e dabiyog nra sulwegmed.

21 Ma fare rran e be chugur ngay ni biney e dowef romed e bayi ngaelʼ nga rebo dowef ni dabi yimʼ biʼid, ma tiney e dowef nibe malaed nge kireb e dabki nʼuw napʼan me paer ni bogi dowef ni dabki kireb; ma arame thingar mu sakʼiy gaed nga mʼon u gilʼ e pufthin rokʼ Kristus, ni ngan pufthin nagmed u rogon e pi muruwel romed; ma faʼanra gimed ba matʼaw, ma arame ba felʼ waʼathmed u fithikʼ e pi chitamangmed ni kar mʼaed nib mʼon romed.

22 O faʼan manga mu kalgaed ngaenʼmed u mʼon ko biney e gafgow ni ubchiyaʼ ni nge yibi aw ngomed. Machane musap gaed, kam mʼaed kam chuw gaed, ma en Chitamangiy, arragon, fachaʼ ni Chitamangiy ni Manechubog nu tharmiy, e manang e dodow ni gimed bay riy; ma bay rinʼ ngomed u rogon e justice nge murnguy rokʼ.