Guruy Ni 4
Mael nge puʼoeg rachaʼ e ki ʼulʼul iyaen—Piʼin kireb e gechig nag e piʼin kireb—Denen e ri ubchiyaʼ nga rogon ni immoy u gaʼangin yang yu Israel—Piʼin nib ppin nge bitir e ni piiʼraed ni maligach ko liyos—Fapi Lamanites e tabab i tuluf fapi Nephites iyaen. Napʼan T.Y. 363–375.
1 Ere chiney e yibi buch nu lan e bin dalip miriʼay nge nelʼ iragag nge dalip e duw ma fapi Nephites nge salthaw roraed e ranoed ko mael ngakʼ fapi Lamanites, nga wuruʼ fare binaw nu Kanpag.
2 Me yibi buch ni fapi salthaw ko Nephites e ni tulufraed ngar suloed bayay ko fare binaw nu Kanpag. Ma napʼan ni kar magaer gaed, me yib ba ulung i salthaw rokʼ fapi Lamanites ni kab pasig ngoraed ko mael, arame koel fapi Lamanites fare binaw nu Kanpag, mab boʼor fapi Nephites ni kar liiʼed, mar feked boʼor iyaed ni kalbus.
3 Ma tin ni magaey e ra miil gaed ngar manged ko fapi gidiiʼ ko fare binaw nu Teancum. Chiney e fare binaw nu Teancum e bay nga mathil u dappʼelʼay; ma kub chugur ko fare binaw nu Kanpag.
4 Min tabab i liiʼ fapi salthaw ko Nephites ni bachane ranoed ni mael ngakʼ fapi Lamanites; ya faʼan manga daranoed, ma fapi Lamanites e dabiyog ni ngar gelgaed ngoraed.
5 Machane, musap gaed, pi gechig rokʼ Got e ra aw nga dakean e piʼin kireb; ma aray rogon ni piʼin kireb e be gechig nagraed e piʼin ni kireb; ya piʼin kireb e ma kʼaring e damomuw nga lan gumʼirchaʼen e gidiiʼ ni ngar puʼoeged e rachaʼ.
6 Me yibi buch ni fapi Lamanites e ra falʼeged rogon e mael ni nge yib ko fare binaw nu Teancum.
7 Me yibi buch nu lan e bin dalip miriʼay nge nelʼ iragag nge aningeg e duw me yib fapi Lamanites ni mael ko fare binaw nu Teancum, ni gomanga yog ni kur koeled fare binaw nu Teancum.
8 Me yibi buch ni liiʼraed me tuluf raed fapi Nephites ngar suloed. Ma napʼan ni guy fapi Nephites ni kar tulufed fapi Lamanites mar ufanthin gaed bayay nga gelingraed; ma ranoed ni ke pagaenʼraed nga gelingraed, mar feked bayay fare binaw nu Kanpag.
9 Ere chiney ni gubin e pinnʼey ni kan rinʼ, make gaman yu biyuʼ e piʼin ni kan liiʼ u ruw rabaʼ, ni fapi Nephites nge fapi Lamanites.
10 Me yibi buch ni mʼay e bin dalip miriʼay nge nelʼ iragag nge nelʼ duw, ma fapi Lamanites e rabaed bayay ni mael ngakʼ fapi Nephites; machane de kalngaenʼ fapi Nephites ko tin nib kireb ni kar rinʼed, ya kur ululiyed irinʼ e tin kireb banʼen.
11 Ma rib math liyiben i weily rogon, ara ngakʼ beeʼ ni nge yoloey ni poloʼ rogon morngaʼagen gelingin e gafgow ni ke yib ko puʼoeg rachaʼ nge yamʼ u fithikʼ fapi gidiiʼ, ni fapi Nephites nge fapi Lamanites; ma gubin e gumʼirchaʼ make ʼelʼel, ni arame kar falaenʼ gaed i puʼoeg e rachaʼ ni gubin e ngiyalʼ.
12 Ma dariy bingyalʼ ni aram rogon fini gel e kireb u fithikʼ gubin e bitir ku Lehi, ara fithikʼ gubin e gidiiʼ ku Israel, ni rogon ni ke yoeg Somoel, ni woed rogon u fithikʼ e pi gidiiʼ ney.
13 Me yibi buch ni fapi Lamanites e ra feked fare binaw nu Kanpag, ni fan e biney e kar yoʼor gaed nga urngin fapi Nephites.
14 Ma arame kur thelep gaed iyaen ko fare binaw nu Teancum, mar tulufed e gidiiʼ riy nga wuruʼ, mar feked e ppin nge bitir nib yoʼor ni kalbus, mar piiʼed raed ni maligach ngakʼ e pi liyos ni got roraed.
15 Me yibi buch nu lan e bin dalip miriʼay nge nelʼ iragag nge medilip e duw, me damomuw fapi Nephites ni bachan e ke piiʼ fapi Lamanites e ppin roraed nge bitir roraed ni maligach, ma arame ranoed ngakʼ fapi Lamanites u fithikʼ e damomuw nib almarin, ma arame ra gelgaed bayay ngakʼ fapi Lamanites, mar tulufed raed nga wuruʼ e pi binaw roraed.
16 Ma fapi Lamanites e dakur baed bayay ni mael ngakʼ fapi Nephites nge yaeni madaʼ ko bin dalip miriʼay nge medilip iragag nge lal e duw.
17 Ma lan e re duw ney e rabaed ni mael ngakʼ fapi Nephites u poloʼ i gelingraed; ma dan thiʼeg raed ni bachan e kay gur yoʼor gaed.
18 Ma ngiyalʼ ney iyaen nga mʼon e dakiyog ni nge gel fapi Nephites rokʼ fapi Lamanites, ma arame ra tabab gaed ko yamʼ nga paʼaraed ni woed e garayuw u mite yalʼ.
19 Me yibi buch ni fapi Lamanites e rabaed ni mael ko fare binaw nu Kanpag; ma arame sum ba mael nib ubchiyaʼ ntay u lan fare binaw nu Kanpag, ni arame ra liiʼed fapi Nephites riy.
20 Mar miil gaed bayay roraed, marbaed ko fare binaw nu Boaz; mu roem e ra sakʼiy gaed riy ngar cham gaed fapi Lamanites ni rib almarin, ma arame fapi Lamanites e deyog ni ngar liiʼed raed nge yaeni madaʼ ko ngiyalʼ ni kur baed bayay ko yan lʼagruw yay.
21 Ma napʼan ni rabaed ko yan lʼagruw yay, ma fapi Nephites e ni tuluf raed ma yibe thʼethʼaeb raed nib noemow; min fek e pi ppin roraed nge bitir roraed ngan piiʼraed bayay ni maligach ngakʼ e pi liyos.
22 Me yibi buch ni fapi Nephites e ra miil gaed bayay roraed, ni kar feked gubin e gidiiʼ roraed ngar uned ngoraed, nu langgin nochi binaw nge yuyang i binaw.
23 Ere chiney e gag, Mormon, ni gumnang ni fapi Lamanites e arame ke chugur ni ngar gatheayed fare nam, ere guwaen ko farengi falang nu Shim, mug fek gubin fapi chep ni mithaeg Ammaron ngakʼ fare Somoel.