1 Au sa tinia oqo na noqu itukutuku me baleta na nodra vakarusai na noqu tamata, ko ira na Nifaiti. Ka sa yaco ni keimami sa dro tani mai vei ira na Leimanaiti.

2 Ia ko i au ko Momani, au sa vola e dua na ivola vua na nodra tui na Leimanaiti, ka kerea me vakadonuya me keimami soqoni ira vata na neimami tamata ki na vanua ko Kumora; io ena yasa ni delana ka vakatokai ko Kumora me keimami na vala vata kei ira mai kea.

3 Ka sa yaco ni sa vakadonuya na nodra tui na Leimanaiti na noqu kerekere.

4 Ka sa yaco ni keimami sa qai lako ki na vanua ko Kumora, ka birika na neimami vale laca me vakavolivolita na delana ko Kumora; ia sa levu ena vanua ko ya na wai, na uciwai, kei na wai vure; raica keimami sa nuitaka tu ni keimami na rawai ira eke na Leimanaiti.

5 Ia ni sa oti yani na ikatolunadrau walusagavulu kava ni yabaki, keimami sa vakasoqoni ira kece na vo ni neimami tamata ki na vanua ko Kumora.

6 Ka sa yaco ni keimami sa vakasoqoni ira vata kece na neimami tamata ena vanua ko Kumora, raica ko i au ko Momani, au sa qase sara mai; ka’u kila ni oqo e sa iotioti ni nodra vala na noqu tamata, ka sa vakaroti au na Turaga me’u kakua sara ni laiva na ivolatukutuku tabu sara, ka vakadewataki sobu mai vei ira na neimami qase, me ra lutu ki na ligadra na Leimanaiti, (de ra na vakarusa na Leimanaiti), o koya au sa vola kina na itukutuku oqo ena peleti i Nifai, ka vunitaka ena delana ko Kumora na ivolatukutuku kece sara a soli vei au mai na liga ni Turaga, ka vakavo ga e vica na peleti oqo, ka’u sa solia vei Moronai na luvequ.

7 Ka sa yaco ni ra sa raica na noqu tamata, kei ira na watidra kei na luvedra, ni ra sa lako tiko mai vei ira na nodra mataivalu na Leimanaiti; era sa waraki ira tu ena rere vakadomobula na mate, ka dau vakasinaita na yalodra na tamata ca.

8 Ka sa yaco ni ra sa lako mai me vala kei keimami, a sa vakasinaiti na yalo kecega ena domobula ni ra sa rui lewe vuqa sara.

9 Ka sa yaco ni ra sa kabai ira mai na noqu tamata ena iseleiwau, kei na dakai titi, kei na imatau kei na veimataqali yaragi kecega ni ivalu.

10 Ka sa yaco ni ra sa ravuti ira kece na noqu tamata, era sa bale mate na noqu lewe tini na udolu, ia au a mavoa tale ga ko i au ka bale ena kedra maliwa; ia era a lako siviti au na meca ka sega ni vakaotia na noqu bula.

11 Ia ni ra sa ravuti ira kece na noqu tamata ka keitou vo wale ga e lewe ruasagavulu kava, (ka dua vei keitou ko Moronai na luvequ), ia ena mataka ni ra sa lesu na Leimanaiti ki na nodra keba, keitou a qai raica mai na delana ko Kumora na yagodra na lewe tini na udolu ka’u a liutaki ira.

12 Keitou a raica tale ga na yagodra na lewe tini na udolu na noqu tamata ka a liutaki ira ko Moronai na luvequ.

13 Keitou raica tale ga na yagodra na lewe tini na udolu nei Kitikitona ni ra sa bale koto, ka davo talega ena kedra maliwa ko koya.

14 E sa mate talega vata kei na nona tini na udolu ko Lama; ka vakakina ko Kilikali kei na nona tini na udolu; ka vakakina ko Limia kei na nona tini na udolu; ka vakakina ko Joneami kei na nona tini na udolu; kei Kamenaia, kei Moronaia, kei Anitionumi, kei Sipulomu, kei Semi, kei Josa, eratou sa bale talega kei na nodratou tini na udolu.

15 Ka sa yaco ni ratou lewe tini tale era a mate vata kei na nodratou yatini na udolu; era sa mate kece sara na noqu tamata, ka keitou bula wale ga ko i keitou na lewe ruasagavulu kava oqo kei na vica era sa dro vaka ki na vanua ena ceva, ka vica tale era sa toki vei ira na Leimanaiti; a sa robota na delai vuravura ko ya na yagodra, na suidra kei na nodra dra, a ra sa biuti ira tu mai ko ira era a vakamatei ira, me ra vuca ka lesu tale ki vua na tinadra ko vuravura.

16 Sa bikai na yaloqu ena yaluma ena nodra vakamatei na noqu tamata, ka’u sa tagi kina vakaoqo:

17 Oi kemudou sa mata vinaka, a cava dou a vuki tani kina mai na sala ni Turaga! Oi kemudou sa mata vinaka, a cava dou a cati Jisu kina ni sa dodoka tu yani na ligana me vukei kemudou!

18 Raica, kevaka dou a sega ni kitaka oqo, ke dou a sega ni bale. Ia oqo dou sa bale, ka’u sa lolositaka na nomudou sa yali.

19 Oi kemudou na gone tagane kei na gone yalewa mata vinaka, oi kemudou na tama kei na tina, na tagane kei na yalewa, oi kemudou sa mata vinaka, a cava mo dou bale kina!

20 Ia raica, dou sa lako yani, ia ena sega ni kauti kemudou lesu tale mai na noqu rarawa.

21 Ka sa voleka mai na siga ena vakaisulu kina na yagomudou mate oqo ena yago e tawa mate rawa, ka na vakaisulu na yago era sa vuca tiko oqo ena yago e sega ni vuca rawa; ia dou na qai tu ena mata ni tikotiko ni veilewai i Karisito mo dou lewai ena nomudou ivalavala; ia kevaka dou sa ivalavala dodonu, dou na vakalougatataki vata kei ira na nomudou qase era sa liu yani.

22 O ke dou a veivutuni mada ga ni sa bera ni yaco vei kemudou na veivakarusai levu oqo. Ia raica, dou sa yali yani, ka sa kila na lomamudou ko Tamada, io na Tamada Tawamudu sa tiko mai lomalagi; ka na lewai kemudou ko koya ena lewa dodonu kei na loloma cecere.