Momani 4
    iVakamacala e botona e ra
    Theme

    Wase 4

    Sa tomani tiko ga na ivalu kei na veivakamatematei—Era sa totogitaki ira na dau caka ca ko ira na dau caka ca—Sa qai levu cake ga na caka ca mai na kena ka sa bau kila ko Isireli taucoko—Era sa cabori na yalewa kei na gone me isoro ki na matakau—Sa tekivu me ra vakasavi ira na Nifaiti ko ira na Leimanaiti. Rauta na 363–75 S.K.

    1 Ka sa qai yaco ni ena ikatolunadrau onosagavulu katolu ni yabaki, era sa biuti Vanualala kina na Nifaiti kei na nodra mataivalu me ra la’ki valuti ira na Leimanaiti.

    2 Ka sa yaco ni ra sa mani vakasavi lesu tale na mataivalu ni Nifaiti ki Vanualala. Ia ni ra sa oca tu ga, era sa kabai ira mai e dua tale na nodra mataivalu vou na Leimanaiti; ka sa kaukauwa sara na nodra vala, ka ra sa mani taura kina na Leimanaiti na koro ko Vanualala, ka ra kauta vakavesu e vuqa ka vakamatea tale ga e vuqa na Nifaiti.

    3 Era sa dro yani na kena vo ka la’ki to vata kei ira na lewe ni koro ko Tenikamu; Sa koto na koro ko Tenikamu ena iyalayala ni vanua ki matasawa; ka volekata na koro ko Vanualala.

    4 Raica era sa yaviti na Nifaiti ena avuku ni nodra a la’ki valuti ira na Leimanaiti na nodra mataivalu; ia kevaka me a sega ko ya, ke ra a sega ni rawai ira ko ira na Leimanaiti.

    5 Ia, raica, ena toboki ira na tamata ca na lewa ni Kalou; ka ra na atotogitaki na tamata ca mai vei ira na tamata ca; ni sa i ira na tamata ca sa vakayavalati ira na luve ni tamata me ra vakadave dra.

    6 Ka sa yaco ni ra sa vakavakarau na Leimanaiti me ra kaba na koro ko Tenikamu.

    7 Ka sa yaco ni ena ikatolunadrau onosagavulu kava ni yabaki, era sa kaba kina na koro ko Tenikamu ko ira na Leimanaiti, me ra na taukena tale ga.

    8 Ka sa yaco ni ra a vakadrukai ka ra vakasavi lesu mai vei ira na Nifaiti. Ia ni ra sa raica na Nifaiti ni ra sa dro lesu na Leimanaiti, era sa dokadokataka tale na nodra kaukauwa; era sa lako yani ena nodra kaukauwa vakai ira ga ka taura tale na koro ko Vanualala.

    9 Ia sa vakayacori na veika kece oqo, era sa mate e udolu na tamata, vei ira na Nifaiti kei ira na Leimanaiti.

    10 Ka sa yaco ni sa oti yani na ikatolunadrau onosagavulu kaono ni yabaki, era sa mai valuti ira tale na Nifaiti ko ira na Leimanaiti; ia era sa sega ga ni veivutunitaka na ca era a vakayacora ko ira na Nifaiti, era sa ia tiko ga na caka ca.

    11 Ka sa sega ni rawa me vakamacalataka na yame, se me vola ka vakamacalataka rawa na tamata, na vakarerevaki ni vakadave dra kei na veivakamatei sa yaco tiko ena kedra maliwa na tamata, ko ira na Nifaiti kei ira na Leimanaiti; era sa vakaukauwataka na lomadra kecega, era sa taleitaka tiko ga na vakadavei ni dra.

    12 A sa sega vakadua na acaka ca levu vakaoqo ena kedra maliwa na kawa taucoko i Liai, se ena kedra maliwa na mataqali kece i Isireli, me vaka era sa kitaka na tamata oqo, me vaka na vosa ni Turaga.

    13 Ka sa yaco ni ra sa rawa na koro ko Vanualala ko ira na Leimanaiti, ni sa levu cake na kedra aiwiliwili mai na kedra iwiliwili na Nifaiti.

    14 Era sa rawa tale ga na koro ko Tenikamu ka vakasavi ira tani na lewena, era sa kauta vakavesu e vuqa na yalewa kei na gone, ka cabori ira me isoro vei ira na nodra akalou matakau.

    15 Ka sa yaco ni ena ikatolunadrau onosagavulu kavitu ni yabaki, era sa rarawataki ira sara na Leimanaiti ko ira na Nifaiti ni ra sa cabori ira na nodra yalewa kei na gone me ra isoro, era sa lako yani ena yalo cudrucudru ka valuti ira na Leimanaiti ka ra vakasavi ira tani kina mai na nodra vanua.

    16 A ra sa sega ni mai valuti ira tale na Nifaiti ko ira na Leimanaiti, me yacova na ikatolunadrau vitusagavulu kalima ni yabaki.

    17 Ena yabaki oqo era sa mai valuti ira kina na Nifaiti ena nodra mataivalu taucoko; ka ra sa sega ni wiliki rawa ni ra sa rui lewe levu.

    18 Ia me tekivu amai na gauna oqo ka lako yani era sa sega ni rawai ira tale na Leimanaiti ko ira na Nifaiti, sa tekivu me ra vaqeyavutaki mai vei ira na Leimanaiti me vaka na tegu sa cilava na siga.

    19 Ka sa yaco ni ra sa lako tale mai na Leimanaiti ka kaba na koro ko Vanualala; ka sa yaco e dua na ivalu kaukauwa sara ena vanua ko Vanualala, ka ra vakadruka kina na mataivalu ni Nifaiti.

    20 Era sa dro tani tale mai vei ira, ka lako ki na koro ko Poasa; ka ra a vorati ira vakaukauwa kina na Leimanaiti mai ke ya, era a sega ni vakadrukai ira kina ko ira na Leimanaiti, ia era a qai vakadrukai ira rawa ena ikarua ni nodra lako yani.

    21 Ia ena ikarua ni nodra lako yani, era a vakasavi ka vakamatei ena dua na veivakamatei levu na Nifaiti; era sa cabori tale me isoro na nodra yalewa kei na gone vei ira na kalou matakau.

    22 Ka sa yaco ni ra sa dro tale na Nifaiti mai vei ira ka ra kauti ira kece tale ga na lewe ni vanua, mai na veitauni kei na veikorokoro.

    23 Ia ko i au ko Momani, ni’u sa raica sa voleka me ra taura na vanua ko ira na Leimanaiti, au sa qai lako ki na delana ko aSimi ka kauta taucoko mai na ivolatukutuku sa maroroya tu kina ko Amaroni vua na Turaga.