Kapitulu 4
Ing labanan at ing pamakamate misundu — Ding marok perusan dala ding marok — Ing mas maragul a karokan menibabo kesa kapilanman aniang minuna king anggang Israel — Ding babai at ding anak miain la karing dios-diosan — Ding Lamanite megumpisa dalang pete ngan ding Nephite a akit da.
1 At ngeni milyari a king katlung dalan at anam a pulu’t atlung banua ding Nephite tinuki la karing karelang hukbu bang lumaban karing Lamanite, ibat king labuad ning Ilang.
2 At milyari a ding hukbu da ring Nephite mitabi lang pabalik pasibayu king labuad ning Ilang. At kabang mapagal la pa, metung a bayung hukbu da ring Lamanite ing minta karela; at mika grabe lang labanan, angga king ding Lamanite asakup de ing siudad ning Ilang, at pete dala ding dakal karing Nephite, at dakal lang dela dang presu.
3 At ding mitagan tinakas la at mekiabe la karing manuknangan king siudad ning Teancum. Ngeni ing siudad ning Teancum atiu king angganan king lele dagat at ita malapit mu naman king siudad ning Ilang.
4 At uli na ning ding hukbu da ring Nephite ding minta karing Lamanite ania ila megumpisa lang mesambut; uling nung e uli na nita, ding Lamanite e la mika upaya karela.
5 Dapot, lawan, ding atul ning Dios miras karing marok; at king kapamilatan da ring marok a ding marok miparusan la; uling ing marok ya ing menamuyut karing pusu da ring tau king pamipatulu ning daya.
6 At milyari a ding Lamanite ginawa lang pamagsadia bang salake king siudad ning Teancum.
7 At milyari a king atlung dalan at anam a pulu’t apat a banua ding Lamanite sinalake la king siudad ning Teancum, bang karelang asakup mu naman ing siudad ning Teancum.
8 At milyari a ila apaurung at atabi dalang pabalik ding Nephite. At anyang ding Nephite ikit da a apaurung dala ding Lamanite migmaragul lang pasibayu king karelang sariling sikanan; at meko la king karelang sariling sikanan at ikua deng pasibayu ing siudad ning Ilang.
9 At ngeni ding anggang bage megawa nala, at ating libu-libung mete king misusumangid, ding pareung Nephite at ding Lamanite.
10 At milyari a ing atlung dalan at anam a pulu’t anam a banua milabas ya, at ding Lamanite minta lang pasibayu karing Nephite bang makilaban; at ding Nephite ela pa sinisi king karokan a agawa da, dapot pinilit dang sindu ing karelang karokan.
11 At ena agiung ilarauan ning amanu, o isulat ning tau ing ganap nang larawan ning makatakut a tagpu na ning daya at pamakamate a atiu busal da ring tau, pareu karing Nephite at karing Lamanite; at ing balang pusu sinias ya, bang ila maging matula la king misundung pamanulu ning daya.
12 At e kapilanman mika maragul a karokan busal ding anggang anak nang Lehi, ni anggiyang busal ding anggang bale ning Israel, agpang karing amanu na ning Guinu, anti ing atiu busal ding taung deni.
13 At milyari a ding Lamanite ikua de ing siudad ning Ilang, at iti uli ning karelang bilang a igit karing Nephite.
14 At sinalake la mu naman laban king siudad ning Teancum, at tinabi dalang palual ding manuknangan karin, at dakal lang delang presu pareung babai at anak, at inain dalang antimong ain karing karelang dios-diosan.
15 At milyari a king atlung dalan at anam a pulu’t pitung banua, ding Nephite bilang mua uling ding Lamanite inain dala ding karelang babai at ding karelang anak, anya sinalake la laban karing Lamanite maki lubus maragul a mua, angga king simbut dalang pasibayu ding Lamanite, at tinabi dalang palual karing karelang labuad.
16 At ding Lamanite e nala sinalake pasibayu laban karing Nephite angga king atlung dalan at pitungpulu’t limang banua.
17 At king banuang iti sinalake lang pasibayu laban karing Nephite king anggang karelang sikanan; at ila ela mabilang uli ning karagulan ning karelang bilang.
18 At ibat king panaun a ini ding Nephite e nala mika upaya laban karing Lamanite, dapot megumpisang leko dala anggiyang anti ing ambun king arap ning aldo.
19 At milyari a ding Lamanite sinalake la laban ning siudad ning Ilang, at mika lubus a grabing labanan a pilabanan king labuad ning Ilang, nung nukarin simbut dala ding Nephite.
20 At tinakas lang pasibayu ibat king arap da, at miras la king siudad ning Boaz; at karin minarap la laban karing Lamanite king maki lubus a katapangan, angga king ding Lamanite e dala simbut angga king sinalake lang pasibayu king kaduang ukdu.
21 At anyang sinalake la king kaduang ukdu, ding Nephite mitabi la at mete king metung a lubus maragul a pamakamate; ding karelang babai at ding karelang anak pasibayu lang miain karing dios-diosan.
22 At milyari a ding Nephite tinakas lang pasibayu king arap da, kayabe ding anggang manuknangan, pareu karing balen at bario.
23 At ngeni aku, i Mormon, akakit kung ding Lamanite malapit da nalang asakup ding labuad, anya pin minta ku king bunduk-bundukan ning Shim, at kinua ding anggang kasulatan a asalikut nang Ammaron angga king Guinu.