Scriptures
Mormón 4


Capítulo 4

Nkeʼ jun kʼoj cyuʼn nefitas cyiʼj lamanitas te t-xel aj otak tzicyʼ cyiʼj. Minti cyipamal nefitas cyijke lamanita. Nchicyʼ lakʼeʼke storya cyʼiwlaʼn tiʼj witz Shim.

1. Banttzan, pwes, tuj abkʼi ox syent tucʼ sesenta y tres, nchex ok nefitas tuj tnam Kʼuchnaj tbiʼ cyucʼaj cy-soldado tuʼn cycub lamanitas.

2. Bix banttzan que ajke nefitas ijeʼx lajoʼn tuj tnam Kʼuchnaj; bix cucxtak sicynaj teʼtak, nxiʼ cyibaj jun cʼloj kʼojlel acʼaj cye lamanitas; bix oc jun kʼoj nach wena, que ajke lamanitas nchoc tajwil tnam Kʼuchnaj tbi que icub cybiyoʼn nimke nefitas bix itzyet nim pres.

3. Bix aj cabl cytxʼaban nefitas nchi okca bix oc cyjunan cyib cyucʼke xjal tej tnam te Teáncum, taʼtak twitz mojón, tuj mekʼmaj txʼotxʼ te mar, nakaʼyan tiʼj tnam Kʼuchnaj.

4. Bix tuʼnj ajke ejército cyeke nefitas ij oc ten kʼojlel cyiʼj lamanitas, que nkeʼ tuʼn cykʼucht; nokat miyaʼ icyjo, miyaʼwla cycub cyuʼn lamanitas.

5. Per lutzan luʼ, aj tsentens Dios cbel cyibaj aj nachke; bix tuʼntzanjke tnachal ajke nach nchi cub tuj sentens; tuʼnj akajo ncub cycʼuʼjke cycʼwaʼl xjal cyuʼn tuʼn tbekan chicyʼ.

6. Bix nbantzan cyten lamanitas tuʼn toc kʼoj tiʼj tnam Teáncum.

7. Bix banttzan que tuj abkʼi ox syent tucʼ sesenta y cuatro ncheʼx lamanitas kʼojlel tiʼj tnam Teáncum, ax tuʼntzan tcyetza tnamtl.

8. Per bant que ntiʼ oc cyxcyeʼ cyiʼj nefitas. Bix tcyiltzan nefitas que otak chi cub lamanitas cyuʼn, nkeʼ juntl el cycʼuʼj tiʼj cyipamal; bix nchetztzan, xiʼ keʼtak cycʼuʼj tiʼj cyex cyipamal, bix o cyetza juntl el aj tnam Kʼuchnaj.

9. Bix cyakilkaj cosas ajo otak chi baj, bix nimke mil xjal cyuj cʼloj ajo otak chi cyim, tzanx cyxol nefitas bix tzanx cyxol lamanitas.

10. Bix banttzan que otak baj abkʼi ox cyent tucʼ sesenta y seis, bix nchaʼjal meltzʼaj juntl el ke lamanitas cyiʼj nefitas; bix jatzan taʼ, ntiʼ otak tzʼajs tiʼj cyanma nefitas cyiʼj tnachal otak bant cyuʼn, tnejaltak kʼiʼnxaxtak cyuʼn aj nach.

11. Bix milay bant tuʼn t-xiʼ tmaʼn akʼbaj, bixmo tuʼn tcub ttzʼiban xjal jun t-xiʼlen cabal tiʼj aj tnachal telen chicyʼ bix biʼyan kʼinchaltak cyxol tnam, tzaʼncxka nefitas bix lamanitas; bix tzaʼnx cytenca anma icyiwax, que aj tuʼmal te cygana aj tuʼn tel chicyʼ cuxiʼ.

12. Bix mi jtojatak otak ten nim tnachal cyxol tcʼwaʼl Lehi, mix cyxol tzaʼnx cytenca ajke teʼtak tuj ja te Israel, según aj tyol Kajaw, icytzanj at cyxol tnam ajo.

13. Bix banttzan que nnoc cyetzan lamanitas aj tnam Kʼuchnaj, bix tuʼntzaj at icypun cybet mástl icytzan cye nefitas.

14. Bix ncheʼxtzan kʼojlel tiʼj tnam te Teáncum, bix ijextzan cylajoʼn ajke xjal nchi ankʼintak tuj, bix itzyet nim pres cyuʼn, tzanxke xuʼj bixke cʼwal, bix xiʼ cykʼoʼn icytzan oyaj te cye tiblal.

15. Bix tuj abkʼi ox syent tucʼ sesenta y siete bant que ajke nefitas, nchi kʼojl wena tuʼnj otak choc cyxuʼjal bix cycʼwaʼl te oyaj, ijeʼx tuʼn cyakil cykʼoj cyiʼjke, aj tuʼmal icub juntl elke lamanitas cyuʼn bix ijex cylajoʼn tuj cytxʼotxʼ.

16. Bix ntiʼ ijajtz meltzʼaj juntl el lamanitas cyiʼj nefitas asta tuj abkʼi ox syent tucʼ setenta y cinco.

17. Bix tuj abkʼi ajo ijeʼx cyibaj nefitas tuʼn cyakil cyipamal; bix ntiʼ i ajlet tuʼnj nimtak cybet wena.

18. Bix atxaxtzanjo ntiʼ icamban nefitas cyibaj lamanitas, sino que nkeʼ tuʼn cycub naj cywitzxke lonxa icytzaj tkʼab cheʼw nnaj tuʼn tkan kʼij.

19. Bix banttzan que ncheʼx lamanitas tibaj tnam Kʼuchnaj; bix banttzan que cycamba jun kʼoj junmajx nach jatuma icub nefitas cyuʼn.

20. Bix akajo nchel okl cywitz lamanitas bix icanan tuj tnam Boaz; bix atzan ikʼoj cyiʼj lamanitas tucʼ nim cyipan, que akajo ntiʼ icub cyuʼn asta cyajtz maktzʼaj tcaban elan.

21. Bix cytzyettzan tuj tcaban el, ntiʼ oc cyxcyeʼ nefitas bix ibaj kʼuchan nim bix nimke icyim; bixkej cyxuʼjal bix cycʼwaʼl ijeʼx juntl el te oyaj cyeke tiblal.

22. Bix banttzan que nchi ok juntl el nefitas, bix ijeʼx cyiʼn cyucʼal tzaʼnx cytencake xjal nchi ankʼintak tuj tnam bix tzaʼnx cyuj cojbil.

23. Bix wecyʼtzan, Mormón, toc nqueʼyina que cyjaʼtak toc cyetzan lamanitas aj país nchinxa, cyjaʼtzan jluʼ, max twiʼ witz Shim, bix ijatz wiʼna ajke storya otak cheʼx teʼwan Ammarón te naʼbl te Kajaw.