Aj Uʼj Te Mormón

1. Jaʼlatzan áyina, Mormón, nbant wuʼna jun tuʼmal junx cyiʼj cosas oʼ chi wila bix ochi nbintaya; bix cocal tbi wuʼna aj Uʼj te Mormón.

2. Bix chʼix mi tuj tyemp aj t-xiʼlen teʼwan Ammarón ajke storya nabil te Kajaw, ul lol wecyʼ (tocxtak kina tuj laj abkʼi; nkeʼtak chʼin xnakʼtzbil tiʼj tzaʼn t-xiʼlen ntanmya), bix tzaj tmaʼn wecyʼ: Nnoc nqueʼyina que tbanal cʼwala, bix lista tuʼn tbant tuʼna.

3. Cyjaʼtzan jluʼ, wajbila tuʼn t-xiʼ tcʼujlaʼna kej cosas oʼ chi tila tiʼj tnam luʼ, octzan tocxa twiʼ veinte y cuatro abkʼi tabkʼiyala, txiʼya tuj tnam te Antum, twiʼ jun witz Shim tbi; atzan oʼ cheʼx ncʼuʼna ajke sant tzʼibant te nabil te Kajaw tiʼj tnam luʼ.

4. Bix lutzan luʼ chi xel tiʼna tucʼala ajka sleʼw cʼuxbil te Nefi, bix chi cyjel tkʼoʼntla demástl tuj ligar jatuma teʼ; bix cywitztzan sleʼw cʼuxbil te Nefi chi bel ttzʼibana cyakilke cosas otak chi tila tiʼj tnam luʼ.

5. Bix aj áyina, Mormón, elna let kina tiʼj Nefi (bix aj tbi nmana atzanj Mormón) bix xiʼ ncʼujlaʼcja ajke cosas otak cheʼx tsamaʼn Ammarón wecyʼ.

6. Bix bajtzan que tiʼnctaka tuj jun laj abkʼi wabkʼiyala, nchinx tiʼn nmana tuj tnam tcubil kʼij, icytzanjo, asta max tuj tnam te Zarahemla.

7. Tzaʼnx tenca tuj tnam nojnatak cyuʼn ja, bix ajke xjal nchi ankʼin tuj nimca lonxa icytzanj txatzʼaʼn tzi mar.

8. Bix banttzan que tuj abkʼi ajo njuctzʼaj jun kʼoj cyxol nefitas que akajo ajke nefitas, jacobitas, josefitas bix zoramitas; bix aj kʼoj ajo bant cyxol nefitas bix cyucʼ lamanitas, lemuelitas bix ismaelitas.

9. Ajke lamanitas, lemuelitas bix ismaelitas atzan cybi lamanitas; bix ajke caba cʼloj xjal akatzanj nefitas bix lamanitas.

10. Bix banttzan que nkeʼ kʼoj cyxol tuj cyakil t-tziʼ te Zarahemla, nakayan tnam aʼ Sidón.

11. Bix banttzan que ajke nefitas o chmet jun matij cyajlal xjal cyuʼn que icyʼ tibaj treinta mil. Bix bajtzan icamban cyiʼj juʼn kʼoj, jatuma i cub lamanitas bix nimke icyim cyuʼn nefitas.

12. Bix banttzan que nchi meltzʼaj lamanitas tuj cynabil, bix ten tzalajibil tuj tnam; bix ten tzalajibil tuj cyaj abkʼi, jatuma ntiʼ o bet chicyʼ.

13. Per o ten tnachal tuj cyakil tnam, que banttzan tuʼmal nchel tiʼnke txnakʼtzben Kajaw ajke nim tajbil cyiʼj, bix nnajtzan binchben nim tipamal bix kʼanbil nok tuʼnj tnachal tnam.

14. Bix ntiʼ toyaj Kajaw, bix ntiʼ tzaj Xewbaj Sant tibaj mijun, nok tuʼnj tnachal bix aj tocslabil ntiʼ.

15. Bix nchin pontzana tuj olaj abkʼi, bix aj nnabila icytzan jawna, ul aj Kajaw lol wecyʼ, bix xiʼ nnebeʼna bix oc ntzkiʼna aj tcʼuʼjlabil Jesús wiʼja.

16. Bix oc nnebeʼna tuʼn npacbana tuj tnam ajo, per omaket ntziʼya, bix ntiʼ kiyonjs tuʼn npacbana; tuʼnj lutzan luʼ, otak chaʼjal meltzʼaj cyuʼnx cyib tiʼj cyDios; bix ajke txnakʼtzben nim ncʼuje cyiʼj otak chel lakʼbaʼn tiʼj tnam nok tuʼnj tnachal tnam.

17. Per intena cyxol, banwtla ntiʼ okiyojs tuʼn npacbana nok tuʼn tlaj tcyiwal cyanma; bix tuʼntzanj tcyiwal cyanma, o tzaj cyʼiwlaʼn tuj tnachal aj tnam nok tuʼn cylaj.

18. Bix ajke alekʼ te Gadiantón, teʼtak cyxol lamanitas, nchi labtak tiʼj tnam cye ajke xjal nkeʼ tuʼn t-xiʼ cyeʼwan cykʼinamabl tjakʼ txʼotxʼ; bix otxiʼ cyewan cyib kʼinamabil tuʼnj otak tzaj tcyʼiwlaʼn Kajaw txʼotxʼ tuj tnachal que ntiʼ tuʼn t-xiʼ cycʼuʼntl mix tuʼn cyul juntl el.

19. Bix banttzan que attak magia kʼak, cyʼabil bix binchben cyeʼyax; bix aj tipamal tnachal o chmet tuj cyakil tnam, asta cyel tyol Abinadí twitz bix ax icyx te Samuel aj lamanita.