1 Mpindiewu monayi, biakalua ne mema, Yakoba, mumana kulongesha bantu banyi mudimu wa bungi ne dîyi, (ne ndi mua kufunda amu mêyi anyi makesa, bualu bua bukola bua kukanuna mêyi etu pa bitata), ne tudi bamanya ne malu atudi tufunda pa bitata adi ne tshia kushala;

2 Kadi bintu bionsu bitudi tufunda pa bintu bikuabu bidi kabiyi bitata nebinyanguka ne nebijimina; kadi tudi mua kufunda mêyi makesa pa bitata, alua kufila kudi bana ba betu balela, ne kabidi kudi bana betu bananga, tshipimu tshikesa tshia dimanya bitutangila, anyi bitangila batatuetu—

3 Mpindiewu, mu bualu ebu tudi tusanka; ne tudi tuenza mudimu ne dinanukila bua kukanuna mêyi â pa bitata, tutekemena ne bana betu bananga ne bana betu balela neba’apeta ne mitshima ya dianyisha, ne neba’atangila bua balonga ne disanka kadi kabiyi ne dibungama to, anyi ne kadiwu, bitangila baledi babu ba kumpala.

4 Bualu, bua kipatshila aka ki mutudi bafundila bintu ebi, bua bikala mua kumanya ne tuvua bamanya bua Kilisto, ne tuvua ne ditekemena dia butumbi buenda nkama ya bidimu kumpala kua dilua dienda; ne katuvua tuetu nkayetu ne ditekemena dia butumbi buenda, kadi kabidi baprofete bansantu bonsu bavua kumpala kuetu.

5 Monayi, bakitabuja mu Kilisto ne bakatendelela Tatu mu dîna dienda, ne kabidi tudi tutendelela Tatu mu dîna dienda. Ne bua kipatshila aka tudi tulama mikenji ya Mose, yoyi idi itangidisha anyima yetu kudiye; ne bua bualu ebu idi mijididibua kutudi bua buakana, mena bu muvuabi bibadila kudi Abalahama mu tshipela ne uvua mutumikidi wa mikenji ya Nzambi mu dilambula dia muanenda Isaka, tshidi tshikala tshifuanyikijilu tshia Nzambi ne Muanenda Umuepela Mulela.

6 Bua nanku, tudi tukebulula baprofete, ne tudi ne mabuluila a bungi ne nyuma wa buprofete; ne bikala ne bijadikilu bionsu ebi tudi tupeta ditekemena, ne ditabuja dietu didi dilua kadiyi dinyungana to, mua ne tudi bulelela mua kupa mukenji mu dîna dia Yezu ne mitshi menamena itutumikila, anyi mikuna, anyi mavuala a mu mbuwa.

7 Nansha nanku, Mukalenga Nzambi udi utuleja buteketa buetu bua tumanya ne nku ngâsa wenda, ne ku bupuekela buenda bunena kudi bana ba bantu, nkutudi ne bukola bua kuenza bintu bionsu ebi.

8 Monayi, midimu ya Mukalenga idi minena ne ya dikema. Bu mudiyi kayiyi mua kukebuluka ndondu ya malu masokoka enda; ne kakuena mushindu bua muntu ajandula njila yenda yonsu. Ne muntu nansha umua kena mumanya njila yenda amu yoyi mimubuluibua; bua nanku, bana betu, kanupepeji mabuluila a Nzambi.

9 Bualu monayi, ku bukola bua dîyi dienda muntu wakalua pa mutu pa mpala wa buloba, buina buloba buvua bufukibua ku bukola bua dîyi dienda. Bua nanku, bu Nzambi ne bua kuakula ne buloba kuikalaku, ne bua kuakula ne muntu kufukibua, Ô nanku, bua tshinyi kena bua kutuma mukenji kudi buloba, anyi kudi mudimu wa bianza bienda udi pa mpala wabu, bilondeshila disua dienda ne disanka dienda?

10 Bua nanku, bana betu, kanukebi bua kubela Mukalenga to, kadi bua kuangata mubelu kudi tshianza tshienda. Bualu monayi, nuenu nkayenu nudi bamanya ne udi ubela mu lungenyi, ne mu bululama, ne mu lusa lunena, pa midimu yenda yonsu.

11 Bua nanku, bana betu bananga, umvuanganayi nenda mu bupikudi bua Kilisto, Muanenda Umuepela Mulela, ne nenuikala mua kupeta dibîka, bilondeshila ku bukola bua dibîka didi munda mua Kilisto, ne kuikala baleja bu mamuma a kumpala a Kilisto kudi Nzambi, bikala ne ditabuja ne bikala bapeta ditekemena dimpa dia butumbi munda muenda kumpala kua yeya kudimuenesha mu musunyi.

12 Ne mpindiewu, bana betu bananga, kanukemi bu mundi nnuambila bintu ebi; bualu bua tshinyi kupanga kuakula bua bupikudi bua Kilisto ne kufika ku dimumanya dijima, momumua ne kufika ku dimanya dia dibîka ne dia moyo utshilualua?

13 Monayi, bana betu, ewu udi wamba mêyi a buprofete, lekelayi amba mêyi a buprofete bua ngumvuilu wa bantu; bualu Nyuma udi wamba bulelela ne kena ushima to. Pananku, udi wamba malu bu mudiwu bushuwa, ne malu bu muikalawu; bua nanku, malu â adi amueneshibua kutudi patoka, bua lupandu lua anyima yetu. Kadi monayi, katuena nkayetu bajadiki ba malu â to; bualu Nzambi uvua muamba kabidi kudi baprofete ba ku kala.

14 Kadi monayi, Bena Yuda bavua bantu ba nshingu miumisha; ne bavua bapepeja mêyi a butoka, ne bavua bashipa baprofete ne bavua bakeba bintu bivuabu kabayi mua kumvua. Bua nanku, bua bumpofu buabu, bumpofu buvua buluila ku ditangila dia muamua dia kipatshila, bavua ne tshia kupona; bualu Nzambi mumbusha butoka buenda kudibu ne mubapesha bintu bia bungi bidibu kabayi mua kumvua to, bualu bavua banjinga nanku. Ne bualu bavua bajinga nanku, Nzambi wakebuenza bua balenduka.

15 Ne mpindiewu mema, Yakoba, ndi mulejibua njila kudi Nyuma bua kuamba mêyi a buprofete; bualu ndi mona ku midimu ya Nyuma udi munda muanyi, ne ku ditetuka dia Bena Yuda nebimansha dibua didibu mua kuibakila ne kupetela tshishimikidi tshishindama.

16 Kadi monayi, bilondeshila mifundu, dibua edi nedilua tshishimikidi tshinena, ne tshia ndekelu, ne tshimuepela tshishindama, padi Bena Yuda mua kuibakila.

17 Ne mpindiewu, bananga banyi, bidi mua kuenzeka munyi ne bobu aba, bamana kubenga tshishimikidi tshishindama, badi mua kuibakilapu kabidi, bua tshilua mutu wa ditumba diabu?

18 Monayi, bana betu bananga, nennujingulula bualu busokoka ebu; mema ntshiyi mubukudibua mu dikamakana dianyi mu Nyuma mu mushindu mukuabu, ne ntshiyi mutetuka bualu bua dipampakana dianyi dipita bua bualu buenu.