Chomsodel

A Babier er a Mormon a uldekial chedaol llechukl el diuai a Biblia. Ngii a ngesechel a cherechar er a omerellel a Dios el mo er a rechad er a irechar el kiliei er a Merikel, a ngar erngii el diuai a Biblia, a cherrengelel a diak a ulebengelel el ungil chais.

Tiang el babier a melluches er a rebetok el milkingel a Dios er a ngar er a mong el oeak a reng er a ulaoch me a ocholt. A tikingir a lluches er a kolt el tibereberk el klalo, el melluches e modak er a milkingel e melchesel a Dios el ngklel a Mormon. A ikang el ngesechel a cherechar a ouchais chisel erung el mesiich el chelechad. A tang a mla er a Jerusalem el mei er a 600 el rak er uchei er a Kristo, el uriul e ngulebii el mo erung el beluu el okodongall el rechedal a Nephi me a rechedal a Laman. Tirkei el bebil a mlei er a kmal ngar er a mong er a Rubak er a lecheuid a tekoi er a metongakl el Blai er a Babel. Tiang el cheldebechel a dodengelii el kmo te rechedal a Jared. A uriul er a telailael rak, a rokui a di ngilemed eldi mlo medechel a rechedal a Laman, el tir a kmal merang el ucherir a re Indians er a Merikel. A tokubets el dilubech el lluches er a Babier er a Mormon a osisecheklel ngii el Rubak el Jesus Kristo er a delongelir a rechedal a Nephi er a di mle mereched er uriul er a le bekiis er a kodall. Ngii a smodii chosisecheklel a ungil chais, e meketeklii a rolel a mo suobel, e ouchais er a rechad a kirir el mo meruul me bole nguu a budech er tiang el klengar, me a mo suobel el diak a ulebengelel er a klengar el dirke mei.

A uriul er a Mormon er a le merekong a lulluches, e ngilai ngii el cheldecheduch el msa ngelekel er a Moroni, me nguldak a bebil er a di tikingel e milart ngii el tibereberk el klalo er a ked er a Cumorah. A ongetiu el buil er a lluich me a tang, er a tal tellael me a eiai el dart me a lluich me a edei, ea osisiu el Moroni, el mla mukebkall e mekiis er a kodall el ngar, a mlo chemolt el mo er a melkingel a Dios el Joseph Smith, e ullisechakl er ngii el kirel a chuodel ngesechel a cherechar, me a dirke mei el oidel el mo tekoi er a English.

A bocha le belsechel ea tibereberk el klalo a mlodars el mo er a Joseph Smith el ulleiuid loeak a sengk me a klisiichel a Dios. Ngii el ngesechel a cherechar er chelechang a mla meluches el mo betok el tekoi, el beches, e lmuut el sioning el kmo, a Jesus Kristo a ngelekel a ngar el Dios, me tirkei el rokui el mei er ngii e mo oltirakl a llach me a ruoll er a osisecheklel, a mo sebechir el mo suobel.

Kirel tiang el ngesechel a cherechar ea melkingel a Dios el Joseph Smith a dilung: “Ak dilung er a rodam el kmo, a Babier er a Mormon a kot el ngaruchei el diak a cheleuid er ngii er a ngii dil babier er a beluulechad, e titech el bad er a klechelid er kid, me a chad a sebechel lmuut el mo kmeed er a Dios a bololtirakl a osisecheklel, er a ngii dile ngodech el babier.”

Nguldimukl er a Joseph Smith, ea Rubak a kildmeklii el mo er a teruich me a tang el bebil, el mlo omes ngii el kolt el tibereberk el klalo el di mletir, mete mlo ileakl el sioning er a klemerang me a mla er a Dios el Babier er a Mormon. A lluches el cheldechederir a uldimukl er tiang el “Chisir a re Tedei el Sioning.”

Aki mengemedaol er a rokui el chad er ker me ker, me bolonguiu er a Babier er a Mormon, e bo lorritel er a chelsel a rengrir a klumech el ngar er ngii, e solae loker er a Dios, el Diak a Ulebengelel Edam, elobang a ngklel a Kristo a lsekum a babier a klemerang. Tirkei el mo choltirakl er tiang el teletael e mo oker elobang klaumerang, a mo nguu a ocholt er ngii el klemerang el mla er a Dios loeak a klisiichel Edaol Reng. (Mosa Moroni 10:3–5).

Tirkei el nguu tiakid el mla er a Dios el sioning loeak Edaol Reng a dirrek el mo medengei loeak osisiu el klisiich el kmo, a Jesus Kristo a Osobelel a beluulechad, me a Joseph Smith a olecholt er ngii e melkingel er a ikang el uriul klebesei, me a Chelechad er a Jesus Kristo er a Uriul-klebesei el Santo a rengedel a Rubak el luutang el me mekedmokl er a beluuechand, el mengedmokl el kirel ongerung el lemei a Messiah.