1 Ere chiney e yibi buch u napʼan ni yoeg Nephi e pi thin ney, ma musap gaed, immoy e piʼin pumoʼon ni yaed bogi tapuf-oloboch, ni yaed ba mang ko fare ulung ku Gadianton nib miith morngaʼagen, ni kar damomuw gaed, mar tolul gaed ngakʼ, ni yaed be gaʼar ngakʼ fapi gidiiʼ: Mangfan ni damur koeled e re moʼon ney ngam feked iyib, ni ngan gechig nag u rogon e oloboch ni ke bucheg?

2 Mangfan ni gimed be sap ma gimed be motoyil ko re moʼon ney ni be togopluw ngakʼ e pi gidiiʼ ney nge motochiyel rodaed?

3 Ya musap gaed, Nephi e kenon ngoraed ni morngaʼagen fare motochiyel roraed ni ke kireb; arragon, boʼor banʼen ni yoeg Nephi ni dabiyog ni ngan yoloey; ma dariy banʼen ni weliy nib togopluw ko fapi motochiyel rokʼ Got.

4 Ere pi tapuf-oloboch nem e ra damomuw gaed ngakʼ ni bachan e weliy ngoraed morngaʼagen e pi muruwel roraed nu milmor; machane, de thog roraed ni ngar math gaed ngakʼ, ya yaed be rus ni richey mar tolul gad nib togopuluw ngoraed.

5 Ere mar tolul gaed ngakʼ fapi gidiiʼ, ni yaed be gaʼar: Mangfan ni gimed be pag e re moʼon ney ni nge gathibthib nagdaed? Ya musap gaed ke piiʼ keruʼ ngakʼ gubin e pi gidiiʼ ney, nge yaeni madaʼ ko ngiyalʼ ni kar mʼaed; arragon, ma kiyoeg ni pi binaw rodaed ney nib gaaʼ e yira fek nge chuw rodaed, nge yaeni paer ni dakuriy tagilʼ daed riy.

6 Ere chiney e kad nanged ni biney e dariy liyiben, ya musap gaed, gadaed ba gel, nge pi binaw rodaed e bagaʼ, ere pi toʼogor rodaed e dabiyog ni ngar gelgaed ngodaed.

7 Me yibi buch ni aray rogon nra kʼarnged fapi gidiiʼ ngar damomuw gaed ngakʼ Nephi, mar tabolngin niged e togopluw u fithikʼraed; ya bay boechi yaed nra tolul gaed ni yaed be gaʼar: Mu fan gaed rokʼ e re moʼon ney, ya ir beeʼ nib moʼon nib mangil, ma fapinʼen ni ke yoeg e riyulʼ nra yibi buch ma kemus ni faʼan gadaed ra kalngaenʼ;

8 Arragon, musap gaed, gubin fapi gechig ma ra yibi aw dakeandaed niʼir e ke micheg ngodaed; ya gadaed manang nib matʼaw e tin ni ke micheg ngodaed ni morngaʼagen e pi denen rodaed. Ma musap gaed riyaed bayoʼor, ma manang gubin banʼen nra buch rodaed ni boed ni manang morngaʼagen e pi denen rodaed;

9 Arragon, ma musap gaed, faʼanra da imang ba profet ma dabiyog ni nge micheg morngaʼagen e pinnʼem.

10 Me yibi buch ni pi gidiiʼ nem ni ur gayed rogon ni ngar liiʼed Nephi e ratal gaed ni bachan e murus roraed, ni arame dar math gaed ngakʼ; ere me tabab bayay ko numon ngoraed, ni ke guy ni bay boechi yaed ni ke mʼagaenʼraed ngakʼ, ma arame tin ni magaey roraed e rrus gaed.

11 Ere ni wawliy ning ki yoeg boech ngoraed ni gaʼar: Musap gaed, pi walageg, dawor mu biʼeged ni Got e ke piiʼ gelingin taʼabee, ni boed Moses, ni nge toey e sog nga dakean ea day fare Red Sea, me sey nge yib barbaʼ aray me yaen barbaʼ aram, ni arame fapi Israelites, ni pi chitamangdaed, e ra thʼaebed nga barbaʼ u dakean e buutʼ nib malikʼ, ma fapi salthaw nu Egypt e tharey raed e daey ngar lumoch gaed?

12 Ere chiney e musap gaed, faʼanra Got e piiʼ ngakʼ e re moʼon ney gelingin, ere mangfan ni be wagagaey lungmed u fithikʼmed, ma gimed be yoeg ni dawori piiʼ gelingig niʼir e gura nang riy morngaʼagen e pi gechig ni ra yib ngomed ma kemus ni faʼan gimed ra kalngaenʼ?

13 Machane, musap gaed, gathi kemus ni yigoʼ thin rog e kam feked yathin, ya kum feked yathin gubin fapi thin ni ke weliy e pi chitamangdaed, nge ku aram rogon ko fapi thin ni yoeg e re moʼon ney, i Moses, niʼir e bay ba gelingin nib gel ni piiʼ ngakʼ, arragon, nge pi thin ni ke weliy ni morngaʼagen fare wub rokʼ fare Messiah.

14 Arragon, gathi micheg ni fachaʼ ni Fak Got e bay yib? Ma rogon ni tining ngalang fare porchoyog u lan wuruʼ e binaw, e ku aram rogon ni yira tining ngalang e en ni bay yib.

15 Ma oren e piʼin ni yaedra sap ko re porchoyog nem e yaedra paer nib fos, ere ku aram rogon ni oren e piʼin ni yaedra sap ngakʼ fachaʼ ni Fak Got u fithikʼ e mich, ni bay e laniyaenʼraed ko kalngaenʼ, e rayog ni ngar pired ni yaed bafos, iyaen nge madaʼ ko yafos ni manechubog.

16 Ere chiney e musap gaed, Moses e gathi kemus ni micheg morngaʼagen e pinnʼey, ya ku aram rogon nga gubin fapi profet nib thothup, ko pi rran rokʼ iyaen nge madaʼ ko pi rran rokʼ Abraham.

17 Arragon, ma musap gaed, Abraham e guy e wub rokʼ, ma risug ko falaenʼ mari falfalaenʼ.

18 Arragon, ma musap gaed gube yoeg ngomed, ni Abraham e gathi kemus ni yigoʼ ir e manang e pinnʼey, ya ki immoy boech e gidiiʼ nga mʼon ko pi rran rokʼ Abraham nni piningraed u dakean fare yaram rokʼ Got; arragon, nrogon fare yaram rokʼ fachaʼ ni Fak; ma fan e biney e nge yog ni ngan dag ko gidiiʼ, ni bukun e biyuʼ e duw nga mʼon ko wub rokʼ ni nge tay, ma ku rayog e bayul ngoraed.

19 Ere chiney e gubaʼadag ni thingar munanged, ni mus ni aram ko pi rran rokʼ Abraham ma kub yoʼor e profet nra micheged e pinnʼey; arragon, musap gaed, fare profet i Zenos e ri micheg nib tamilang; ni aramfan nliiʼ nge yimʼ.

20 Ma musap gaed, ku aram rogon ngakʼ Zenock, nge Ezias, nge Isaiah, nge Jeremiah, (Jeremiah niʼir fare profet ni micheg morngaʼagen fare mogothgoth ni ra aw nga Jerusalem) ere chiney e kadnanged nu Jerusalem e ni gatheay ni boed rogon e thin rokʼ Jeremiah. O ere mangfan ni dabi yib fachaʼ ni Fak Got, ni boed rogon e prophecy rokʼ?

21 Ere chiney e rayog ni nge yoʼor lungmed riy ni kan gatheay yu Jerusalem? Rayog ni nga moeged ni fapi pagael ni fak Zedekiah e dan liiʼraed, ni gubin ma kemus ni yigoʼ Mulek? Arragon, ma damur guyed ni pifak Zedekiah e yaed bay rodaed, ma kan tuluf raed nga wuruʼ fare binaw nu Jerusalem? Machane musap gaed, dawori mus aray—

22 Ku chitamangdaed i Lehi ma ni tuluf nga wuruʼ fare binaw nu Jerusalem ni bachan e ki micheg morngaʼagen e pinnʼey. Mus ku Nephi ma ki micheg morngaʼagen e pinnʼey, ma kub chugur ni nge gubin e pi chitamangdaed, aram iyib nge madaʼ ko ngiyalʼ ney; arragon, kar micheged morngaʼagen fare wub rokʼ Kristus, ma kar sap gaed ngay nga mʼon, ma kar falfalaenʼ gaed ko fare rran rokʼ ni bay yib.

23 Ere musap gaed, ir Got, ma bay roraed, ma ki mʼug ngoraed, me bayuliyraed; mar oged e magaer ngakʼ, ni bachan e renʼen ni bay yib.

24 Ere chiney, ni gimed be guy ni gimed manang e pinnʼey ma dabiyog ni ngam feked yathin ma kemus ni faʼan gimed rabaen, ere kam denen gaed ko biney, ya kam feked yathin gubin e pinnʼey, ni yug aram rogon nib yoʼor e pi pow riy ni ke yog ngomed; arragon, ni boed ni ke thap ngomed urngin banʼen, ni lʼagruw yang tinu tharmiy banʼen, nge gubin banʼen nu fayleng, ni pow riy ni pinnʼey e ba riyulʼ.

25 Machane musap gaed, kam feked yathin e tin riyulʼ, ma kam togopluw ngad ngakʼ e Got romed nib thothup; iyib ke madaʼ ko ngiyalʼ ney, ni susun e ngam chaʼariyed ni fan ngomed e falaʼab nu tharmiy, niʼir e gin dariy banʼen ni ma kireb riy, nge gin dariy banʼen ni rayog ni nge yib ngay nib alit, ma kam kunuyed e pinʼen ni ngan damomuw riy ngomed ko fare rran ni pufthin.

26 Arragon, ni mus ko ngiyalʼ ney ma kam loel gaed ko kireb, ni bachan e pi mathang pogofan nge pi ʼiling u muchugbil nge pi ngongol ni kireb ni gimed be tay, ni bay mu awgaed nga ba gafgow ni dabimus biʼid; arragon, ma faʼanra dab mu kalgaed ngaenʼmed ma bay yibi aw ngomed ni dab ki nʼuw napʼan.

27 Arragon, musap gaed ri bay e chiney u langan e mab romed; arragon, mmaroed nga naʼun nga gilʼ e tapuf-oloboch, ngam gayed; ngam pirʼeged, e tapuf-oloboch romed ni kan thang e fan rokʼ, ni ke mol nga fithikʼ i rachaʼen; ma walagen e ke thang e fan rokʼ, niʼir e begay rogon ni nge paer nga gilʼ e tapuf-oloboch.

28 Ere musap gaed, yow lʼagruw ni yow buʼun ko ulung romed nib mith, ni Gadianton e ire sunmiy nge fare moʼoniyanʼ niʼir e begay rogon ni nge gatheay e yaʼel ko gidiiʼ.