Fare Babyor ku Helaman

1 Ere chiney e musap gaed, i yibi buch ni tabab e bin aningeg i ragag e duw ko fare lung ko fapi tapuf-oloboch nga dakean e gidiiʼ ku Nephi, me tabab ba gafgow nga fithikʼ fapi gidiiʼ ko Nephites.

2 Ya musap gaed, Pahoran e yimʼ, ke yaen ke chuw u fayleng; ere yibi tabab e maleʼeg thin u morngaʼagen ko miniiʼ rokʼ fapi walag, ni fapi pagael ni fak Pahoran e nge paer ko fare gilʼ e tapuf-oloboch.

3 Chiney e baʼaray fithingan e piʼin ni yaed be leleʼeg fare gilʼ e tapuf-oloboch, ni ku yaed e ruguyed rogon fapi gidiiʼ ngar togopluw gaed: Pahoran, Paanchi, nge Pacumeni.

4 Chiney e gathi kemus oren e pi pagael ni fak Pahoran aray (ya boʼor e bitir rokʼ), machane ireray e piʼin ni yaed be leleʼeg fare gilʼ e tapuf-oloboch; ere, ra sunmiyed dalip e ulung nga fithikʼ fapi gidiiʼ.

5 Machane, yibi buch ni Pahoran e ni dugliy u lungun e gidiiʼ ni yoʼor ni nge mang gaaʼ ko tapuf-oloboch nge am ko gidiiʼ ku Nephi.

6 Me yibi buch ni Pacumeni, e napʼan ni guy ni dabiyog ni nge fek fare gilʼ e tapuf-oloboch, me pag ir nge un nga lungun e gidiiʼ ni yoʼor.

7 Machane musap gaed, Paanchi, nge tin baʼaram e gidiiʼ ni yaed baʼadag niʼir e nge mang am roraed, e ra puwaenʼ gaed nib gel; ere, yaen i sabaenbaen nag e tinem e gidiiʼ ni ngar puw gaed ngalang ngar togopluw gaed ngakʼ pi walagraed.

8 Me yibi buch u napʼan ni be yaen ni nge rinʼ e rannʼey, ma musap gaed, arame ni koel ngan fek, min mʼag ni boed ni ke yoeg e gidiiʼ ni yoʼor, min dugliy ni ngan liiʼ ngemʼ; ya ke puw ngalang nga fithikʼ e togopluw nibe gay rogon ni nge gatheay e paer nib puf-rogon ko gidiiʼ.

9 Ere chiney e napʼan ni guy fapi gidiiʼ ni ur athapeged niʼir e nge mang am roraed ni arame ke dugil ni ngan liiʼ ngemʼ, ma arame ra puwaenʼ gaed, ere musap gaed, mar piiʼed Kishkumen nge yaen, nge yaen ko fare gilʼ e tapuf-oloboch ku Pahoran, me thang e pogofan ku Pahoran u napʼan ni ke paer nga gilʼ e tapuf-oloboch.

10 Ma fapi tapigpig ku Pahoran e ra lʼoelʼoeged; machane musap gaed, ri miil fare Kishkumen ni rib papay ni dariy beeʼ ni yog ni koel.

11 Me sul ngakʼ e fa piʼin nra lʼoeged, ma yaed gubin ni kar og niged yaed ni yaed gubin nga lan ba mʼag, arragon, ni yaed be micheg u dakean e chaʼ ni Sunmiy raed, ni dab roeged ni Kishkumen e thang e pogofan rokʼ Pahoran.

12 Ere, Kishkumen e dannang morngaʼagen u fithikʼ e gidiiʼ ku Nephi, ya ing ir ko ngiyalʼ i nʼen ni thang e pogofan ku Pahoran. Ere Kishkumen nge ulung rokʼ, ni kar falʼeg ba mʼag u thilraed ngakʼ, e ra maʼathuk gaed nga fithikʼ fapi gidiiʼ, u ba dodow ni yaed gubin ni dab kun pirʼeg raed; machane gubin e piʼin ni pirʼeg raed e liiʼraed ngar mʼaed.

13 Ere chiney e musap gaed, Pacumeni e ni dugliy, u lungun e gidiiʼ ni yoʼor, ni nge mang gaaʼ ko tapuf-oloboch nge am ko gidiiʼ, ni nge gagyeg u gilʼ Pahoran ni walagen; ma ri ire bay matʼawon ngay. Ere gubin e pinnʼey ma nrinʼ u lan e bin aningeg i ragag e duw ko fare lung ko fapi tapuf-oloboch; me yaeni mus aram.

14 Me yibi buch u lan e bin aningeg i ragag nge taʼareb e duw ko fare lung ko fapi tapuf-oloboch, ni fapi Lamanites e kar kunuyed nga taʼabang bogi gidiiʼ ni salthaw ni yoʼor, mi piiʼ e sayden ngoraed, nge sarey, nge gatʼing, nge gane gatʼing, nge orwach ko mael, nge madan e mael, nge gubin mit e fan e pilig ko urngin mit.

15 Marbaed bayay ni gomanga yog ni ngar og niged e mael ngakʼ fapi Nephites. Ma be powiʼiyraed beeʼ nib moʼon ni fithingan e Coriantumr; ma beeʼ ni gidiiʼ nu Zarahemla; ma beeʼ ni chuw ko fapi Nephites; ma ir beeʼ nib moʼon nib gaaʼ mab yargael.

16 Ere, fare pilung ko Lamanites, ni fithingan e Tubaloth, ni beeʼ nib pagael ni fak Ammoron, e be lemnag ni Coriantumr, e beeʼ nib moʼon nib yargael, ere rayog rokʼ ni nge togopluw ngakʼ fapi Nephites, nga gelingin nge gonop rokʼ nib gaaʼ, ni arame ra piiʼ nge yaen ma ra gel ko fapi Nephites—

17 Ere kʼaring e damomuw ngoraed, me kunuy nga taʼabang e pi salthaw rokʼ, me dugliy Coriantumr ni nge mang gaaʼ roraed, me guy rogon ni nga ranoed ko fare binaw nu Zarahemla ni ngar mael gaed fapi Nephites.

18 Me yibi buch ni bachan fini almarin e togopluw nge magawon ko fare am, ni arame dar tayed e matanag nib gaman u lan e binaw nu Zarahemla; ya ra lemniged ni fapi Lamanites e dabi thog roraed ni ngar baed nga kenggin e binaw ko pi binaw roraed ni ngar oggaed ko fare binaw nu Zarahemla.

19 Machane yibi buch ni Coriantumr e yaen niʼir e gireng ko salthaw rokʼ nib yoʼor, marbaed ra oggaed ko gidiiʼ ko fare binaw, ni rabaed nib gur ni arame dakiyog napʼan riy ko fapi Nephites ni ngar kunuyed nga taʼabang e salthaw roraed.

20 Ere Coriantumr e liiʼ e chaʼ nibe matangiy e garog ko fare binaw, ma ranoed e salthaw rokʼ ni gubin nga lan fare binaw, mar liiʼed gubin e piʼin ni togopluw ngoraed, ma arame ra koeled fare binaw ni gaʼangin.

21 Me yibi buch ni Pacumeni, niʼir e gaaʼ ko tapuf-oloboch, e miil rokʼ Coriantumr, iyaen nge madaʼ ko yoror ko fare binaw. Me yibi buch ni Coriantumr e koel nge piriʼiy nga doew e yoror, nib almarin me yimʼ. Ere aray rogon ni mus e pi rran rokʼ Pacumeni.

22 Ere chiney e napʼan ni guy Coriantumr ni ke koel fare binaw nu Zarahemla, me guy ni fapi Nephites e kar miil gaed roraed, ma yibe liiʼraed, ma yibe koelraed ngan fekraed, ma ku yibe yinʼraed nga kalbus, ma ke koel e gin thʼabi gel ko gubin yang e binaw, me athamgil laniyaenʼ me yaen nge togopluw ngakʼ gubin e binaw.

23 Ma chiney e de paer u lan fare binaw nu Zarahemla, machane me yaen ni ke un e salthaw nib yoʼor ngakʼ, iyaen ko fare binaw ni Galwog; ya ireram e tanam rokʼ, ni nge mirbidiy ko sayden e gin ni nge yaen riy, ni nge yog ni koel e yungin ni bay e binaw nga leluʼoch ko fare binaw.

24 Ma be lemnag ni bay gelingraed u lukungun e nam, ere me yaen, ni dar piiʼ napʼan ngoraed ni ngar kunuy yaed riy nga taʼabang ya ngar pired ni yaed balich; ere aray rogon yalen nra oggaed ngoraed ngar thʼibed raed nga butʼ.

25 Machane musap gaed, biney e thelep ni tay Coriantumr u dakean lukungun e binaw e piiʼ woʼen ngakʼ Moronihah ni nge gel ngoraed, ni yug aram rogon nib yoʼor fapi Nephite ni kan liiʼraed.

26 Ya musap gaed, Moronihah e lemnag ni fapi Lamanites e dabi thog roraed ni ngar baed nga lukungun e nam, ya bay i mael ko tin baʼaray e binaw nib liyeg u mathil ni boed ni kuʼur rinʼed; ere Moronihah e ke guy rogon ni tin bagael ko salthaw roraed e ngar matangiyed e yungin baʼaram e binaw nib liyegey u mathil.

27 Machane musap gaed, fapi Lamanites e dar rus gaed ni aram rogon ni baʼadag, ya karbaed nga lukungun fare nam, ma kar koeled fare binaw ni gaaʼ niʼir fare binaw nu Zarahemla, mar thelep gaed u dakean e yungin baʼaray ni thʼabi gaʼfan e binaw, ni yaed be liiʼ e gidiiʼ nib almarin ni yibe thʼethʼaeb raed, ni pumoʼon, nge ppin, nge bitir ma yaed be koel e binaw nib yoʼor nge yungin tagilʼ e miith.

28 Machane napʼan ni pirʼeg Moronihah e biney, me guy rogon ni ku chingiyalʼ nem nge piiʼ Lehi nge buʼulung i salthaw ngar liyeged ngar ninged e thabey ngoraed u mʼon ni ngar taw gaed ko fare binaw ni Galwog.

29 Ere aray rogon ni rinʼ; me ning e thabey ngoraed u mʼon ni ngar taw gaed ko fare binaw ni Galwog, me ognag e mael ngoraed, nib almarin ni arame ra suloed riy nga tomur iyaen ko fare binaw nu Zarahemla.

30 Me yibi buch ni Moronihah e ning e thabey ngoraed u napʼan ni yaed be sul nga tomur, me ognag e mael ngoraed, ni arame ri yibi mang ba mael nib yoʼor e rachaʼ ni mapʼ riy; arragon, boʼor e piʼin nliiʼraed ngar mʼaed, ma fithikʼ e piʼin ni kar mʼaed e kun pirʼeg Coriantumr riy.

31 Ere chiney, e musap gaed, fapi Lamanites e dakuriy bang nra yog ni ngar miil gaed ngay, dabiyog ko leluʼoch, ara ko yimuch, ara ko ngek, ara ko ngael, ya ke liyeg raed fapi Nephites u butʼ.

32 Ere aray rogon ni Coriantumr e suruy fapi Lamanites iyaen nga fithikʼ fapi Nephites, mar awgaed nga lani paʼ fapi Nephites, ma arame nliiʼ ngemʼ, ere fapi Lamanites e ra piiʼed yaed nga lani paʼ fapi Nephites.

33 Me yibi buch ni Moronihah e sulweg fare binaw nu Zarahemla bayay, me guy rogon ni fapi Lamanites ni kan fekraed ni kalbus e ngar chuw gaed u lan fare binaw u fithikʼ e gapas.

34 Ere aray rogon ni mus e bin aningeg i ragag nge taʼareb e duw ko fare lung ko fapi tapuf-oloboch.