Nephi, Helaman ne Babanyin no Nkɔnhyɛ—Nyankopɔn puw Nephi no nkorɔfo no dɛ ɔnam n’ebufuw mu rebɛsera hɔn, dze asɛɛ hɔn gyedɛ wonu hɔnho wɔ hɔn emumuyɛ ho korakora. Nyankopɔn dze ɔyardɔm ba Nephi no nkorɔfo do; wonu hɔnho na wɔsan ba ne nkyɛn. Samuel, Lamannyi, no hyɛ nkɔm kyerɛ Nephifo no.
Ofitsi etsir 7 dze kesi 16.
Tsir 7
Nkorɔfo a wɔwɔ etsifi afamu no pow Nephi na ɔsan n’ekyir ba Zarahemla—okegyina abantsentsen a ɔwɔ no ture mu do bɔ mpaa na ɔse nkorɔfo no dɛ wonnu hɔnho annyɛ dɛm a wɔbɛhera. Bɛyɛ mfe 23–21 Ansaana wɔbɔwo Christ.
1 Hwɛ, afei ɔbaa dɛ afe a ɔtɔ do eduosia akron no mu wɔ ber a atsɛmbuafo hwɛ Nephi no dɔm do no, Nephi a ɔyɛ Helaman ne babanyin no asaan n’ekyir fi etsifi mantam asaase no do baa Zarahemla asaase do.
2 Na ɔkɔr dɔm a wɔwɔ etsifi mantam asaase do kɛkãa Nyame n’asɛm kyerɛɛ hɔn, na ɔhyɛɛ ndzɛmba pii ho nkɔm kyerɛɛ hɔn;
3 Na wɔpoow ne nsɛm no nyina ma dɛm ntsi nna onntum nntsena hɔn mu, dɛm ntsi ɔsaan n’ekyir bio baa asaase a wɔwoo no wɔ do no do.
4 Na ohun dɔm no dɛ wɔwɔ emumuyɛdze a ɔyɛ hu gyinabew mu, na Gadianton edwotwafo no tsetse atsɛmbu-ngua no do, na wɔagye tum nye asaase no do tumdzi; na wɔdze Nyankopɔn ne mbrasɛm ato nkyɛn, na wɔnntsen koraa wɔ n’enyim; na wonndzi pɛrpɛr mma adasamba;
5 Na wobu atseneneefo fɔ osian hɔn tseneneeyɛ ntsi; na wogyaa afɔdzifo nye emumuyɛfo ma wɔfa hɔnho dzi osian hɔn sika ntsi; na mbrɛ ɔbor ne nyinara do nye dɛ wɔtsetse dzibew mu dɛ aban no ne tsir, na wɔhwɛ hɔn do na wɔyɛ hɔn apɛdze ama woeenya ahodze nye awiadze enyimnyam, kor so nye dɛ ama woenya ho kwan na wɔaato awar, na woeewia adze, na woeedzi ewu, na wɔaayɛ hɔnankasa hɔn apɛdze.
6 Afei dɛm emumuyɛ kɛse yi baa Nephifo do no, nna onndzii mfe dodow biara; na ber a Nephi hun dɛm no, awerɛhow hyɛɛ n’akoma mu mã; na ɔdze awerɛhow kɛse tseaa mu dɛ:
7 O, nkyɛ masan akɔ nda no a m’egya Nephi fii Jerusalem bae no mu, na nkyɛ menye no edzi dɛw wɔ anohoba asaase no do; dɛm aber no nna nkyerɛkyerɛ nnyɛ dzen, nna wodzi Nyankopɔn ne mbrasɛm do ketsee, na wɔyɛ nyaa wɔ emumuyɛ ne yɛ ho; na hɔn ho yɛ har wɔ Ewuradze ne nsɛm ne ntsiei mu—
8 Nyew, sɛ midzii me mber wɔ dɛm aber no mu a, nkyɛ me kra nyaa enyigye wɔ m’enuanom hɔn tseneneeyɛ mu.
9 Mbom hwɛ, wɔahyehyɛ ama me dɛ mo nkwa nda nyɛ mber yi mu, ama awerɛhow aahyɛ me kra mã osian m’enuanom hɔn emumuyɛdze yi ntsi.
10 Na hwɛ, afei ɔbaa dɛ nna ogyina abantsentsen a ɔwɔ Nephi no ture no a ɔbɛn kwan a wɔfa do kɔ gua kɛse no a ɔwɔ Zarahemla kuropɔn mu no do, nna Nephi abɔ no mu adze wɔ abantsentsen no a ɔwɔ no ture no mu no do, dɛm abantsentsen no so bɛn ture n’abobowano bea a odzi kɔ kwan n’ano.
11 Na ɔbaa dɛ mbarimba bi resen hɔ no wohun dɛ Nephi rowora n’akoma mu nsɛm kyerɛ Nyankopɔn wɔ abantsentsen no do hɔ; na wotuu enguan na wɔkɛkãa dza woehu kyerɛɛ dɔm no, na dɔmtutuw no baa bɔboaa hɔn ano wɔ hɔ dɛ wɔrobɔhwɛ siantsir a orisi nkrum kɛse wɔ dɔm no hɔn emumuyɛ ho.
12 Na afei, aber a Nephi soɛree no ohun dɔmtutuw a wɔaboa hɔn ano wɔ hɔ.
13 Na ɔbaa dɛ obuee n’ano na ɔsee hɔn dɛ: Hwɛ, adɛn ntsi na hom aboa hom ano wɔ ha yi? Ama maakã hom emumuyɛ akyerɛ hom anaa?
14 Nyew, osiandɛ maba m’abantsentsen do ha ama meetum mawora me kra mu nsɛm akyerɛ me Nyankopɔn, osiandɛ awerɛhow ahyɛ m’akoma mu mã, osian hom emumuyɛ ntsi!
15 Na osian mo nkrumsi na mo kwadwom ntsi na ɔyɛ hom nwanwa ma hom aboa hom ano wɔ ha yi; nyew, na ohia kɛse ma hom dɛ hom bɔ mbubuw; nyew, hom mbɔ mbubuw osiandɛ hom egyaa hom ho ama abɔnsam ma ne nsa esuo hom akoma mu yie.
16 Nyew, ɔyɛ dɛn ntsi na hom egyaa homho ama ndaadaa a ofir onyia a ɔrohwehwɛ atwe hom akra akɔ daapem awerɛhow nye mbusu mu a onnyi ewiei yi?
17 O hom nnu homho, hom nnu homho! Ɔyɛ adɛn ntsi na hom bowu? Hom nsan, hom nsan mbra Ewuradze hom Nyankopɔn nkyɛn. Ebɛnadze ntsi na ɔapa hom?
18 Osiandɛ ahom epirim hom akoma; nyew, hom rinntsie boguanhwɛfo pa no ne ndze; nyew, hom hyɛ no ma no bo efuw hom.
19 Na hwɛ, nkyɛ ɔwɔ dɛ aɔboaboa hom ano no, ɔbɔbɔ hom apetse ma hom abɛyɛ afonam ama mbɔdɔm nye mbowa abɔyafo, gyedɛ hom nu homho.
20 O, ɔyɛ dɛn na hom werɛ fir hom Nyankopɔn a ɔgyee hom wɔ da yi mu ara yi?
21 Mbom hwɛ, ama hom eenya homho na adasa eyi hom ayɛw, nyew, ama hom eenya sika nye dwetɛ. Na hom dze hom akoma esi hom ahodze nye awiadze yi mu egyangyandze do, na iyi ntsi na hom dzi ewu, na hom bɔ epoo, na hom wia adze, na hom gye bdasewia tsia hom anyɛnkofo, na hom yɛ emumuyɛ ahorow pii.
22 Na iyi ho ntsi mbusu bɛba hom do gyedɛ hom nu homho. Na sɛ hom ennu homho a, hwɛ, dɛm kurow kɛse yi, nye nkurow akɛse a ɔwɔ hɛn egyanom asaase yi do ha nyina, wɔbɛgye efi hɛn nsamu dɛ hom rennya kwan biara wɔ mu; na hwɛ, Ewuradze remma hom aahoɔdzen dɛ mbrɛ ɔdze maa hom ma hom tumii nye hom atamfo dzii esi no.
23 Na hwɛ, dɛm na Ewuradze se: Merennda m’ahoɔdzen edzi nnkyerɛ omumuyɛnyi kor nngyaa no nua, gyedɛ hɔn a wonu hɔnho, na wotsie m’asɛm. Afei, dɛm ntsi, mepɛ dɛ hom hu, m’enuanom, dɛ aobeye koraa ama Lamanfo no asen hom, gyedɛ hom nu homho.
24 Na hwɛ, wɔyɛ atseneneefo koraa sen hom, osiandɛ wɔnnyɛɛ bɔn nntsiaa dɛm nyimdzee kɛse no a hom enya no; dɛm ntsi Ewuradze bohu hɔn mbɔbɔr; aɔbɛma hɔn nda awar na ɔama hɔn asefo adɔr, wɔ ber a bwɔbɛsɛɛ hom koraa no mpo, gyedɛ hom nu homho.
25 Nyew, hom ndue osian dɛm ebusudze kɛse a ɔaba hom mu no ntsi; na hom dze homho afam ho, nyew dɛm ansumaamu fɛkuw a Gadianton twetwee no!
26 Nyew, ampaa bɛba hom do osiandɛ hom ama kwan ma dɛm ahantanyɛ no ahɛn hom akoma mu, ɔno na ɔama hom do wɔ sor ma ɔabor dza oye do, osian hom bahonyadze mbordo ntsi!
27 Nyew, hom ndue osian hom emumuyɛdze nye hom ebusudze ntsi!
28 Na gyedɛ hom nu homho annyɛ dɛm a, hom bɛhera; nyew, hom asaase mpo wɔbɛgye efi hom nsamu, na wɔbɛsɛɛ hom efi asaase enyi do.
29 Afei hwɛ, nnyɛ mankasa na merekã dɛ dɛm ndzɛmba yi bɛyɛ hɔ, osiandɛ nnyɛ mankasa na amuhun dɛm ndzɛmba yi; mbom hwɛ minyim dɛ dɛm ndzɛmba yi yɛ nokwar osiandɛ Ewuradze Nyankopɔn na ɔdaa no edzi kyerɛɛ me, dɛm ntsi megye dase dɛ ɔbɛyɛ hɔ.