1 Im ālikin men kein ilo en̄oul im ruo iiō eo in tōl an riekajet ro, ālikin Moronaia eaar bar kōm̧m̧an aenōm̧m̧an ikōtaan riNipai im riLeman ro, lo eaar ejjeļo̧k juon n̄an ņa kobban jea in ekajet eo; kōn menin eaar jino juon bar aitwerōk ilubwiljin armej ro ekkar n̄an wōn eo en ņa kobban jea in ekajet eo.

2 Im ālikin men kein Hilamōn, eo kar ļeo nejin Hilamōn, kar jitōn̄ e n̄an ņa kobban jea in ekajet eo, jān ainikien armej ro.

3 A lo, ^aKiskumen, eo eaar uror e Peoran, eaar apād n̄an ko̧kkure Hilamōn barāinwōt; im eaar bōk rejetak jān kumi eo an, eo eaar deļo̧n̄ ilo juon bujen bwe ejjeļo̧k en jeļā an nana.

4 Bwe eaar wōr juon ^aKadiantōn, eo eaar kanooj tijem̧ļo̧k ilo elōn̄ naan, im barāinwōt ilo jerbal eo an, n̄an kōm̧m̧ani jerbal ko rettino an uror im an rakim; kōn menin eaar erom ritōl eo an kumi in Kiskumen eo.

5 Kōn menin eaar m̧oņe er, im barāinwōt Kiskumen, bwe eļan̄n̄e renaaj kar likūt e ilo jikin jea in ekajet eo enaaj kar leļo̧k n̄an ro raar pād ilo kumi eo an bwe ren pād ilo jikin in kajoor im maron̄ ilubwiljin armej eo; kōn menin Kiskumen eaar pukot n̄an ko̧kkure Hilamōn.

6 Im ālikin men kein ke eaar wōnm̧aanļo̧k n̄an jea in ekajet eo n̄an ko̧kkure Hilamōn, lo juon iaan ro karejeran Hilamōn, eaar pād inabōj ilo bon̄, im eaar bōk, kōn kōjakkōlkōl, jeļā eo kōn karōk ko kar likūti jān kumi in n̄an ko̧kkure Hilamōn—

7 Im ālikin men kein eaar iioon Kiskumen, im eaar leļo̧k n̄an e juon kakōļļe; kōn menin Kiskumen eaar kwaļo̧ke n̄an e jibadbad in kōņaan eo an, im eaar kōņaan bwe en tōlļo̧k e n̄an jea in ekajet eo bwe en maron̄ m̧ane Hilamōn.

8 Im ke eo karejeran Hilamōn eaar jeļā aolepān būruōn Kiskumen, im ekōjkan bwe eaar an jibadbad n̄an uror, im barāinwōt bwe eaar jibadbad an aolep ro raar pād ilo kumi eo an n̄an uror, im n̄an rakim, im n̄an bōk kajoor, (im en̄in eaar ^akarōk ittino eo aer, im aer kinejnej ittino) eo karejeran Hilamōn eba n̄an Kiskumen: Jen ilo̧k n̄an jea in ekajet eo.

9 Kiiō men in eaar kam̧ōņōņō otem kam̧ōņōņō Kiskumen, bwe eaar ļōmņak bwe en kar kōtōprak ļōmņak eo an, a lo, eo karejeran Hilamōn, ke raar wōnm̧aanļo̧k n̄an jea in ekajet eo, eaar ņate Kiskumen em̧ool n̄an menono eo an, bwe en kar wōtlo̧k im mej ilo ejjeļo̧k in̄n̄ūr. Im eaar ettōrļo̧k im ba n̄an Hilamōn aolep men ko eaar loi, im ron̄, im kōm̧m̧an.

10 Im ālikin men kein Hilamōn eaar jilkinļo̧k n̄an bōk kumi in rirakim ro im riuror ittino ro, bwe ren maron̄ kar m̧an er ekkar n̄an kien eo.

11 A lo, ke Kadiantōn eaar lo bwe Kiskumen eaar jab ro̧o̧lļo̧k eaar mijak n̄e ab kar ko̧kkure e; kōn menin eaar kōm̧m̧an bwe kumi eo an en ļoore. Im raar koļo̧k jān āneo, ilo iaļ ittino, ļo̧k ilo āne jem̧aden; im āindein ke Hilamōn eaar jilkinļo̧k n̄an bōk er kar jab lo er ijabdewōt jikin.

12 Im eļapļo̧k kōn Kadiantōn in naaj kōnono kake tokālik. Im āindein eaar jem̧ļo̧k iiō eo kein kaen̄oul im ruo in iien tōl an riekajet ro ioon armej in Nipai.

13 Im lo, ilo jem̧ļo̧kin bok in kom̧ naaj lo bwe ^aKadiantōn in eaar kam̧ool oļo̧k eo, aaet, enan̄in aolepān jeepepļo̧k eo an armej in Nipai.

14 Lo ej jab meļeļe in aō jem̧ļo̧k in bok in Hilamōn, ak meļeļe in aō jem̧ļo̧k eo an bok in Nipai, eo jān e iaar bōk aolep bwebwenato eo iaar jeje.