1 Anajwan ut laa’in, aj Moroni, nin’ok wi’chik rik’in li esil nintz’iib’a. Jo’kan ut, k’ehomaq reetal, kik’ulman naq sa’ xk’ab’a’ lix ^amuqmuukil molam laj Akix ut eb’ li neke’ochb’eenink re, k’ehomaq reetal, ke’numta sa’ xb’een li rawa’b’ejihom laj Omer.

2 A’b’anan li Qaawa’ kiruxtaana ru laj Omer, ut jo’kaneb’ ajwi’ li ralal ut lix rab’in li ink’a’ ke’sik’ok xsachlijik a’an.

3 Ut li Qaawa’ kixye re laj Omer sa’ jun matk’ naq chi’elq chaq sa’ li ch’och’; jo’kan naq laj Omer ki’el chaq sa’ li ch’och’ rochb’een lix junkab’al, ut kib’eek chiru k’iila kutan, ut kiq’axon chaq ut kinume’ chi junpak’al li tzuul ^aXim, ut kiwulak chixk’atq li na’ajej ^bke’sache’ wi’ laj Nefita, ut chirix a’an xko’o sa’ releb’ saq’e, ut kiwulak sa’ jun li na’ajej Ablom yeeb’il re, chire palaw, ut aran kixyiib’ xmuheb’aal t’ikr, ut jo’kaneb’ ajwi’ li ralal ut eb’ lix rab’in, ut chixjunil lix junkab’al, ka’ajwi’ laj Jared ut lix junkab’al ink’a’.

4 Ut kik’ulman naq laj Jared kiyule’ choq’ rey sa’ xb’eeneb’ li tenamit, xb’aan ruq’ li maa’usilal, ut kixk’e re laj Akix lix rab’in choq’ rixaqil.

5 Ut kik’ulman naq laj Akix kixsik’ xyu’am lix yuwa’ li rixaqil; ut kixpatz’ xtenq’ankil rik’ineb’ li kiroksiheb’ chaq sa’ li xaqab’anb’il aatin reheb’ li najter winq, ut eb’ a’an ke’xtaw xjolom lix yuwa’ li rixaqil, naq chunchu sa’ xb’een lix k’ojarib’aal chixk’ulb’al xyehomeb’ lix tenamit.

6 Xb’aan naq k’a’jo’ xnimal lix jek’inkil li ink’a’ us ut muqmuukil molam a’in, jo’kan naq kixpo’ chaq li raameb’ chixjunil li tenamit; jo’kan naq laj Jared kikamsiik sa’ xb’een lix k’ojarib’aal, ut laj Akix ki’awa’b’ejin sa’ xna’aj.

7 Ut kik’ulman naq laj Akix ki’ok chixsowenankil li ralal, jo’kan naq kixtz’ap sa’ tz’alam, ut kixk’uula chi ka’ch’in ajwi’ li wa kixk’ul toj reetal naq kixnumsi li kamk.

8 Ut anajwan li riitz’in li kixk’ul chaq li kamk, (ut aj Nimrah xk’ab’a’) kijosq’o’ rik’in lix yuwa’ xb’aan li k’a’ru kixb’aanu chaq lix yuwa’ re li ras.

9 Ut kik’ulman naq laj Nimrah kixch’utub’ ka’ch’in xk’ihal li winq, ut ki’eelelik chaq sa’ li ch’och’, ut kiq’axon chaq ut kiwan rochoch rik’in laj Omer.

10 Ut kik’ulman naq laj Akix ke’yo’la chik li ralal, ut eb’ a’an ke’k’ulub’aman sa’ xch’ooleb’ li tenamit, us ta ke’xxaqab’ chaq aatin rik’in a’an naq te’xb’aanu li k’iila paay chi maa’usilal jo’ chanru li naraj a’an.

11 Anajwan lix tenamit laj Akix neke’xra xk’ulb’al tumin, jo’ chanru ajwi’ naq laj Akix naxra li wankilal, jo’kan naq eb’ li ralal laj Akix ke’xyeechi’i tumin reheb’, ut rik’in a’an ke’xk’am lix k’ihaleb’ li tenamit rik’ineb’.

12 Ut ke’ok chi wank sa’ pleet eb’ li ralal laj Akix rik’in laj Akix, ut kiwan a’an chiru xnumik k’iila chihab’, relik chi yaal, toj reetal lix sachlijik ka’ch’in chik ma chixjunileb’ li ani wankeb’ sa’ li awa’b’ejihom, relik chi yaal, chixjunileb’, ka’ajwi’ lajeeb’ xka’k’aal li aamej ink’a’ ke’kamsiik, ut eb’ a’an ke’eelelik rik’in lix junkab’al laj Omer.

13 Jo’kan ut, laj Omer kik’ojob’aak wi’chik sa’ xch’och’il li reechanihom.

14 Ut kik’ulman naq laj Omer ki’ok chi tixk, a’ut sa’ xtiixilal kiyo’la laj Emer choq’ ralal; ut kixyul laj Emer re taawanq choq’ rey ut taa’awa’b’ejinq sa’ xna’aj.

15 Ut chirix naq kixyul laj Emer re taawanq choq’ rey kiril li tuqtuukilal sa’ li ch’och’ chiru xnumik wiib’ chihab’, ut kikam, chirix rilb’al numtajenaq xk’ihal li kutan, li nujenaq rik’in rahil ch’oolejil. Ut kik’ulman naq laj Emer ki’awa’b’ejin sa’ xna’aj, ut kib’eek sa’ li kib’eek wi’ chaq lix yuwa’.

16 Ut li Qaawa’ ki’ok wi’chik chirisinkil li majewank sa’ xb’een chaq li ch’och’, ut lix junkab’al laj Emer ki’usa chi numtajenaq rub’el li rawa’b’ejil laj Emer, ut chiru xnumik wiib’ xkaak’al chihab’ ak ke’kawu chaq xmetz’ew chi numtajenaq, jo’kan naq ke’b’ihomo’ chaq chi numtajenaq—

17 Ut wan rik’ineb’ li k’iila paay chi ru che’ ut chi iyaj nak’uxman, ut chi lemtz’ t’ikr, ut chi chaab’il q’unal t’ikr, ut chi oor, ut chi plaat, ut k’a’aq re ru terto xtz’aq;

18 Jo’ ajwi’ li k’iila paay chi wakax, chi b’ooyx, ut wakax, ut chi karneer, ut chi aaq, ut chi chib’aat, jo’ ajwi’ naab’al paay chik chi xul li neke’k’anjelak choq’ xtzakemqeb’ li winq.

19 Ut ke’wan ajwi’ ^axkawaay, ut xb’uur, ut ke’wan li elefante, ut li kurelom ut li kumom; chixjunil wi’ nak’anjelak reheb’ li winq, ut q’axal wi’chik eb’ li elefante ut li kurelom ut li kumom.

20 Ut chi jo’kan li Qaawa’ kixhoy li rosob’tesihom sa’ xb’een li ch’och’ a’in, li ^asik’b’il ru sa’ xb’een chixjunil chik li ch’och’; ut kixtaqla naq yalaq ani taa’eechaninq re li ch’och’ taareechani choq’ re li Qaawa’, malaj ut ^bte’sache’q naq q’ano’jenaqeb’ sa’ li maa’usilal; xb’aan naq re xkomoneb’ a’an, chan li Qaawa’, laa’in tinhoy xtz’aqalil injosq’il.

21 Ut laj Emer kixk’anjela li raqb’a-aatin sa’ tiikilal chixjunil lix kutan, ut ke’yo’la naab’al li ralal ut xrab’in; ut kiyo’la laj Koriantum choq’ ralal, ut a’an kixyul laj Koriantum chi awa’b’ejink sa’ xna’aj.

22 Ut chirix naq kixyul laj Koriantum chi awa’b’ejink sa’ xna’aj kiwan chi yo’yo chiru kaahib’ chihab’, ut kiril li tuqtuukilal sa’ li ch’och’; relik chi yaal, ut kiril ajwi’ li ^aK’ajolb’ej re Tiikilal, ut kisaho’ xch’ool ut kixk’ul xloq’al chirilb’al lix kutan; ut kikam sa’ tuqtuukilal.

23 Ut kik’ulman naq laj Koriantum kib’eek sa’ li kib’eek wi’ chaq lix yuwa’, ut kixyiib’ k’iila xninqal ru tenamit, ut kixk’anjela li k’a’ru chaab’il re lix tenamit sa’ chixjunil lix kutan. Ut kik’ulman naq maak’a’eb’ li ralal xk’ajol toj reetal naq q’axal tiix.

24 Ut kik’ulman naq kikam li rixaqil, chi ak jun cient rik’in wiib’ chihab’ xyu’am. Ut kik’ulman naq laj Koriantum kixk’ul choq’ rixaqil, sa’ xtiixilal, jun saaj tuq’ixq, ut ke’yo’la ralal ut xrab’in; jo’kan naq kiwan chi yo’yo toj reetal naq jun cient rik’in wiib’ roxk’aal chihab’ xyu’am.

25 Ut kik’ulman naq kiyo’la laj Kom choq’ ralal, ut laj Kom ki’awa’b’ejin sa’ xna’aj; ut ki’awa’b’ejin chiru b’eleeb’ roxk’aal chihab’, ut a’an kiyo’la laj Het choq’ ralal, ut ke’yo’la ajwi’ chik ralal ut xrab’in.

26 Ut eb’ li tenamit ak ke’xjek’i wi’chik rib’ chiru chixjunil lix b’een li ch’och’, ut ki’ok wi’chik chi wank jun li maa’usilal numtajenaq nim chiru lix b’een li ch’och’, ut laj Het ki’ok wi’chik chixjilosinkil rib’ rik’in li muqmuukil k’uub’anb’il na’leb’ re najter, re xsachb’al lix yuwa’.

27 Ut kik’ulman naq kirisi chaq lix yuwa’ sa’ lix k’ojarib’aal; xb’aan naq kixkamsi rik’in tz’aqal lix yok’leb’ ch’iich’, ut ki’awa’b’ejin sa’ xna’aj.

28 Ut ke’chal wi’chik profeet sa’ li ch’och’, chixyaab’asinkil li jalb’a-k’a’uxlej chiruheb’—naq tento te’xkawresi lix b’e li Qaawa’, malaj ut taachalq jun li majewank chiru lix b’een li ch’och’; relik chi yaal, taawanq jun nimla we’ej, sa’ li te’sache’q wi’, wi ink’a’ te’xjal xk’a’uxl.

29 A’b’anan eb’ li tenamit ink’a’ ke’xpaab’ li raatineb’ li profeet; ke’risiheb’ chaq b’an, ut junjunq reheb’ ke’xkut sa’eb’ li jul ut ke’xkanab’eb’ re te’oso’q. Ut kik’ulman naq ke’xb’aanu chixjunil li k’a’aq re ru jo’ chanru lix taqlahom li rey, aj Het.

30 Ut kik’ulman naq ki’ok chi wank jun nimla we’ej chiru li ch’och’, ut eb’ li wankeb’ chi sa’ ke’ok chi sache’k chi q’axal sa’ junpaat xb’aan li we’ej, xb’aan naq maak’a’ li hab’ chiru lix b’een li ch’och’.

31 Ut ke’chal ajwi’ li k’anti’ wankeb’ xmay chiru lix b’een li ch’och’, ut ke’xkamsi rik’in xmay naab’al li tenamit. Ut kik’ulman naq lix ketomqeb’ ke’ok chi eelelik chiruheb’ li k’anti’ wankeb’ xmay, sa’ xjayal li ch’och’ sa’ xtz’e li saq’e, a’an li ch’och’ ^aTzarahemla yeeb’il re xb’aaneb’ laj Nefita.

32 Ut kik’ulman naq ke’wan naab’al reheb’ li ke’oso’ sa’ li b’e; a’b’anan ke’wan junjunq li ke’eelelik sa’ li ch’och’ sa’ xjayal lix tz’e li saq’e.

33 Ut kik’ulman naq li Qaawa’ kixk’e naq eb’ li ^ak’anti’ ink’a’ chik te’xtaaqeheb’, naq te’xram b’an ru li b’e re naq ink’a’ te’ruuq chi nume’k li tenamit, re naq ani tixyal nume’k taat’ane’q xb’aaneb’ li k’anti’ wankeb’ xmay.

34 Ut kik’ulman naq eb’ li tenamit ke’xtaaqe lix b’eenikeb’ li xul, ut ke’xk’ux lix tib’eleb’ li ke’t’ane’ sa’ li b’e, toj reetal naq ke’xk’uxeb’ chixjunil. Anajwan naq ke’ril li tenamit naq tento te’oso’q, ke’ok ^achixjalb’al xk’a’uxleb’ chirix lix maa’usilaleb’, ut chi elajink chiru li Qaawa’.

35 Ut kik’ulman naq chirix naq ^ake’xtuulanob’resi rib’ chi tz’aqal chiru li Qaawa’, a’an kixtaqla li hab’ chiru lix b’een li ch’och’; ut eb’ li tenamit ke’ok wi’chik chi chalk xyu’ameb’, ut ki’ok chi uuchink li ru che’ sa’eb’ li ch’och’ sa’ xnim li saq’e, ut sa’ chixjunileb’ li ch’och’ sa’ xsutam. Ut li Qaawa’ kixk’ut chaq xwankil chiruheb’ sa’ xkolb’aleb’ chiru li we’ej.