1 Ut kik’ulman naq kiyo’la laj Omer choq’ ralal, ut laj Omer ki’awa’b’ejin sa’ xna’aj. Ut laj Omer kiyo’la laj Jared choq’ ralal, ut laj Jared ke’yo’la ralal ut xrab’in.

2 Ut laj Jared kixpo’resi xch’ool rik’in lix yuwa’, ut kichal ut kiwan sa’ li ch’och’ Het. Ut kik’ulman naq kixsahob’resiheb’ xch’ool naab’al, xb’aan xseeb’al li raatin, toj reetal naq kixtaw xyijach li awa’b’ejihom.

3 Ut chirix naq kixtaw xyijach li awa’b’ejihom, kixpleeti lix yuwa’, ut kixk’am lix yuwa’ chi preexil, ut kixk’e chi k’anjelak sa’ preexil.

4 Ut anajwan, sa’ xkutankil li rawa’b’ejil laj Omer, a’an kiwan chi preexil chiru xyijach lix kutan. Ut kik’ulman naq ke’yo’la ralal ut xrab’in, ut sa’ xyanqeb’ kiwan laj Esrom ut laj Koriantumr;

5 Ut eb’ a’an numtajenaqeb’ xjosq’il xb’aan lix b’aanuhom laj Jared li raseb’, jo’kan naq ke’xwaklesi jun teep aj pleet ut ke’xpleeti laj Jared. Ut kik’ulman naq ke’xpleeti chi q’eq.

6 Ut kik’ulman naq chirix naq ke’xkamsi li teep aj pleet re laj Jared, okeb’ raj re chixkamsinkil ajwi’ a’an; ut a’an kixtz’aama chiruheb’ naq ink’a’ te’xkamsi, ut a’an tixq’axtesi li awa’b’ejihom re lix yuwa’. Ut kik’ulman naq ke’xkanab’ chi kole’k xyu’am.

7 Anajwan ut, laj Jared numtajenaq xrahil xch’ool xb’aan naq kisach chiru li awa’b’ejihom, xb’aan naq a’an kixk’e chaq xch’ool chirix li awa’b’ejihom ut chirix nimaak xloq’al xb’aan li ruchich’och’.

8 Anajwan lix rab’in laj Jared xtawom xseeb’al chi numtajenaq, ut naq kiril xrahil xch’ool lix yuwa’, kixk’oxla xk’uub’ankil jun na’leb’ li taaruuq wi’ chixk’ulb’al wi’chik li awa’b’ejihom choq’ re lix yuwa’.

9 Anajwan lix rab’in laj Jared numtajenaq xchaq’al ru. Ut kik’ulman naq ki’aatinak rik’in lix yuwa’, ut kixye re: K’a’ru aj-e naq k’a’jo’ xrahil xch’ool inyuwa’? Ma ink’a’ rilom li tz’iib’anb’il esil ke’xk’am chaq li qayuwa’ chiru li nimla chamal ha’? K’e reetal, ma ink’a’ wan resil chirixeb’ li ke’wan najter, naq eb’ a’an rik’in lix ^amuqmuukil k’uub’anb’il na’leb’eb’ ke’xtaweb’ li awa’b’ejihom ut xnimaleb’ lix loq’al?

10 Anajwan ut, chi jo’kan chixtaqla lin yuwa’ xb’oqb’al chaq laj Akix, ralal laj Kimnor; ut k’e reetal, ch’ina-usin, ut laa’in ^atinxajoq chiru, ut tinwulaq chiru, jo’kan naq tinraj choq’ rixaqil; jo’kan ut wi tixtz’aama chawu naq tinaak’e choq’ rixaqil, rik’in a’an taaye: Tink’e aawe wi taak’am chaq we lix jolom lin yuwa’, li rey.

11 Ut anajwan laj Omer wan sa’ chaab’ilal rik’in laj Akix; jo’kan ut, chirix naq laj Jared kixtaqla xb’oqb’al chaq laj Akix, lix rab’in laj Jared kixajok chiru re naq kiwulak chiru, jo’kan naq kiraj choq’ rixaqil. Ut kik’ulman naq a’an kixye re laj Jared: K’e we choq’ wixaqil.

12 Ut laj Jared kixye re: Tink’e aawe, wi taak’am chaq we lix jolom lin yuwa’, li rey.

13 Ut kik’ulman naq laj Akix kixch’utub’ sa’ rochoch laj Jared chixjunileb’ li rech alal, ut kixye reheb’: Ma teexaqab’ aatin chiwu naq xaqxooq eech’ool chiwu sa’ li k’a’ru tinwaj eerik’in?

14 Ut kik’ulman naq chixjunileb’ ^ake’xxaqab’ aatin chiru, sa’ xk’ab’a’ li Dios re choxa, ut sa’ xk’ab’a’ ajwi’ li choxa, ut jo’kan ajwi’ sa’ xk’ab’a’ li ruchich’och’, ut sa’ xk’ab’a’ lix jolomeb’, naq ani tixjal xb’e rik’in li tenq’ank kiraj laj Akix tixsach xjolom; ut ani taayehoq re anihaq jo’ k’ihal tixk’eheb’ chixnaw laj Akix, a’an taasachq xyu’am.

15 Ut kik’ulman naq chi jo’kan ke’xk’e rib’ sa’ aatin rik’in laj Akix. Ut laj Akix kixk’anjela reheb’ li ^axaqab’anb’il aatin li k’eeb’il chaq xb’aaneb’ li ke’wan chaq najter, li ke’sik’ok ajwi’ chaq re li wankilal, a’an li numsinb’il chaq chalen chaq laj ^bKain, li kiwan choq’ aj kamsinel chalen chaq xtiklajik.

16 Ut a’an kik’uulaman xb’aan xwankil laj tza, re xk’anjelankil li xaqab’anb’il aatin a’in reheb’ li tenamit, re te’kanaaq sa’ q’ojyin, re xtenq’ankileb’ li ani ke’sik’ok re li wankilal chixtawb’al wankilal ut chi kamsink, ut chi poqlenk, ut chi tik’ti’ik, ut chixb’aanunkil li k’iila paay chi maa’usilal ut ko’b’eetak yumb’eetak.

17 Ut a’an lix rab’in laj Jared li kik’ehok sa’ xch’ool a’an xsik’b’al li k’a’aq re ru a’in re najter; ut laj Jared kixk’e sa’ xch’ool laj Akix; jo’kan naq laj Akix kixk’anjela a’an reheb’ li rech alal ut li neke’ochb’eenink re, ut rik’in lix sahil yeechi’ihom kixjalb’ehiheb’ chixb’aanunkil jo’ k’ihal li k’a’ru kiraj.

18 Ut kik’ulman naq kixk’uub’ jun ^amuqmuukil molam, jo’eb’ ajwi’ li ke’wan chaq najter; ut a’ molam a’an q’axal wi’chik xtz’eqb’eetalil ut xmaa’usilal chiru chixjunil, sa’ rilob’aal li Dios;

19 Xb’aan naq li Qaawa’ moko nak’anjelak ta sa’ muqmuukil molam, chi moko naraj naq li winq taahoyoq kik’; sa’ chixjunil b’an li k’a’aq re ru kixye naq mi’uxman a’an, chalen chaq xtiklajik li winq.

20 Ut anajwan laa’in, aj Moroni, moko nintz’iib’a ta chan ru lix xaqab’anb’il aatin ut molameb’, xb’aan naq k’eeb’il chinnaw naq wan a’an sa’ xyanqeb’ chixjunileb’ li tenamit, ut wan sa’ xyanqeb’ laj Lamanita.

21 Ut a’an xk’amok chaq ^axsachlijik li tenamit a’in li yookin wi’ chi aatinak anajwan, ut xsachlijik ajwi’ lix tenamit laj Nefi.

22 Ut yalaq k’a’ru chi tenamit li taaxaqab’anq re xkomon li muqmuukil molam a’in, re xtawb’al wankilal ut tumin, toj reetal naq jek’inb’ilaq chiru li tenamit a’an, k’ehomaq reetal, te’sache’q; xb’aan naq li Qaawa’ moko tixkanab’ ta naq lix ^akik’eleb’ lix santil paab’anel, li hoyb’ilaq xb’aaneb’, taa’elajinq chaq chi ch’och’ junelik chiru a’an re ^btaa’eeqajumanq sa’ xb’eeneb’, chi ink’a’ ajwi’ tixk’e reeqaj.

23 Jo’kan ut, ex aj Gentil, a’an xchaab’ilal xna’leb’ li Dios naq li k’a’aq re ru a’in taak’ute’q cheru, re naq xb’aan a’an taaruuq teejal eek’a’uxl chirix lee maak, ut ink’a’ teekanab’ naq te’nume’q sa’ eeb’een li molam a’in aj kamsinel, li waklesinb’ileb’ re xtawb’al ^awankilal ut tumin—ut li k’anjel, relik chi yaal, li k’anjel ajwi’ re sachok taachalq sa’ eeb’een, relik chi yaal, li yok’leb’ ch’iich’ re lix raqb’a-aatin li Junelik Dios taat’ane’q ajwi’ sa’ eeb’een, re taaq’axe’q eeru ut texsache’q wi nekekanab’ chi wank li k’a’aq re ru a’in.

24 Jo’kan ut, li Qaawa’ nekexxtaqla, naq teeril li k’a’aq re ru a’in chi chalk sa’ eeyanq, naq taa’ajq eeru chireek’ankil xxuwajelil li wankex wi’, xb’aan li muqmuukil molam a’in li taawanq sa’ eeyanq; malaj ut rahilal chiwanq sa’ xb’een a’an, xb’aan lix kik’eleb’ li ani ke’kamsiik; xb’aan naq eb’ a’an neke’yaab’ak chaq sa’ poqs re taa’eeqajumanq sa’ xb’een, ut sa’ xb’eeneb’ ajwi’ li ke’waklesink chaq re.

25 Xb’aan naq nak’ulman naq ani nawaklesink re, naxsik’ xsachb’al li ^aach’ab’aak sa’ chixjunil li ch’och’, li tenamit, ut li na’ajej; ut a’in naxk’e chi uxmank lix sachlijikeb’ chixjunil li tenamit, xb’aan naq waklesinb’il xb’aan laj tza, a’an lix yuwa’il chixjunil li tik’ti’; a’an ajwi’ laj tik’ti’ a’an li ^bkib’alaq’ink re li xb’een qana’ qayuwa’; relik chi yaal, laj tik’ti’ ajwi’ a’an li kixk’eheb’ li winq chixb’aanunkil li kamsink chalen chaq sa’ xtiklajik; li kikawob’resink re li raameb’ li winq re naq ke’xkamsiheb’ li profeet, ut ke’xkutiheb’ chi pek, ut ke’risiheb’ chaq chalen chaq xtiklajik.

26 Jo’kan ut, laa’in, aj Moroni, taqlanb’ilin chixtz’iib’ankil li k’a’aq re ru a’in re naq taaruuq taak’ehe’q xraqik li maa’usilal, ut re naq taaruuq taachalq xq’ehil naq laj Satanas ^amaak’a’aq chik xwankil sa’ xb’een xch’ooleb’ li ralal xk’ajoleb’ li winq; re b’an taaruuq ^bte’q’unb’esiiq xch’ool chixb’aanunkil rajlal li chaab’il, re naq taaruuq te’chalq sa’ xyo’leb’aal chixjunil li tiikilal ut te’kole’q.