1 Ac inge nga, Moroni, suhmuhslah kahs ma sapkihnyuck nuh sihk, in fal nuh ke esam luhk uh; ac nga fahk nuh suwos ma suc nga tuh siliyac; ke ma inge nimet kahl ma inge tuh kowos in kuh in luhngas; tuh ma se ingacn tiac lwelah nuh suwos, sahyacn na ac fah ma ke lahlmwetmwet luhn God.

2 Ac liye, kowos in kuh in eis ma wo tuh kowos in kuh in ahkkahlwemye plwet inge nuh selos suc fah kahsruh in ahkfahsrye orekma se inge;

3 Ac nuh sin mwet tolu an ac fah ahkkahlwemyeyuck nuh selos ke kuh luhn God; ohinge elos fah etuh na pwacye lah ma inge pwacye.

4 Ac ke oalin mwet loh tolu ma inge fah akwucki; ac mwe fahkwack luhn luhlahlfongi luhn mwet tolu, ac orekma se inge, ma ac fah ahkkahlwemyeyuck ke kuh luhn God ac oacyacpac ke kahs Lal, kacn Pahpah, ac Wen, ac Nguhn Muhtahl ahklohye—ac ma inge nuhkwewa ac fah tu oacna sie mwe fahkwack luhn luhlahlfongi in lain facluh ke lwen sahflah.

5 Ac elos fin auliyak ac tuhkuh nuh yurun Pahpah ke inen Jisus, elos fah eisyuck nuh ke tohkohsrahi luhn God.

6 Ac inge, fin wacngihn wal luhk nuh ke ma inge, kowos nuhnuhnkuh; tuh kowos fah etuh lah oasr wal luhk ke kowos fah liyeyuc, ac kuht fah tu ye muhtuhn God ke lwen sahflah. Amen.