Ma Suhmuhslah
Ether 14


Sapta 14

Ma koluk luhn mwet uh use sie selngawi nuh fin acn uh—Coriantumr el mweun laenuhl Gilead, na Lib, ac na Shiz—Srah ac mahno uh afuhnlah acn uh.

1 Ac inge muhtwacwacack in oasr sie selngawi upac fin acn ah nohfohn ke srihpen ma koluk luhn mwet uh, tuh, fin sie mwet likiyac kuhfa nahtuhl kuh katlas nahtuhl fin acn in loang lal, kuh fin acn ma el likiyac we, liye, ke lwen tok ah, el tiac kuh in konwacack, tuh upac na pwacye selngawi se fin acn uh.

2 Ohinge mwet nuhkwewa tuh sruokyac na ma lal sifacna, ke pahol sifacna, ac tiac nguhsr kuh tiac pac sang; ac mwet nuhkwewa sruokyac na katlas nahtuhl ke lwacpo lacyot lal, in karuhnguhnwacng ma lal ac moul lal sifacna ac luhn muhtwacn kiyacl ac tuhlihk nahtuhl.

3 Ac inge, tukun lusen yac luo, ac tukun misac lal Shared, liye, tamuhlwel lal Shared el tuyak ac som mweun nuh sel Coriantumr, ac Coriantumr el tuh kuhtanguhllah ac tuh ukwaclwack nuh ke innimac lal Akish.

4 Ac tukun ma inge tamuhlwel lal Shared el tuh som mweun nuh sel ke innimac lal Akish; ac mweun uh upaclah na pwacye, ac mwet tausin pucspucs misac ke katlas.

5 Ac tukun ma inge Coriantumr el tuh sruokyac innimac uh; ac tamuhlwel lal Shared el tuh fahsr som liki innimac ke fong ah, ac uniyac sie ip ke un mwet mweun lal Coriantumr, ke elos tuh sruhilac.

6 Ac el tuhkuh nuh ke fin acn lal Moron, ac muhta fin tron lal Coriantumr.

7 Ac tukun ma inge Coriantumr el wi un mwet mweun lal ke innimac ke lusen yac luo, ac el tuh eis kuh yohk nuh sin un mwet mweun lal.

8 Inge tamuhlwel lal Shared, suc inel pa Gilead, el oacyacpac eis kuh yohk nuh sin un mwet mweun lal, ke srihpen u lukmac lal.

9 Ac tukun ma inge mwet tol se lal ah unilyac ke el muhta fin tron lal.

10 Ac tukun ma inge sie sin u lukmac ah unilyac ke sie inkacnek lukmac, ac eis nuh sel sifacna tohkohsrahi uh; ac inel pa Lib; ac Lib el sie mwet yohk pihsac, yohk liki na kuhtwena mwet sahyac inmahsrlon mwet nuhkwewa.

11 Ac tukun ma inge ke yac se emet lal Lib, Coriantumr el tuhkuh nuh fin acn lal Moron, ac mweun nuh sel Lib.

12 Ac tukun ma inge el acnwuck nuh sel Lib, na Lib el tuh srihngihlyac pahol tuh el kihnetuh; ne ohinge, un mwet mweun lal Coriantumr tuh fahsr som nuh yohrohl Lib, tuh oruh el kahinglac nuh ke inmahsrol ke pe acn ah.

13 Ac tukun ma inge Coriantumr el ukwacl; ac Lib el som mweun nuh sel ke pe acn ah.

14 Ac tukun ma inge Lib el tuh srihngihlyac un mwet mweun lal Coriantumr, tuh elos sifilpac kahinglac nuh ke acn innimac lal Akish.

15 Ac tukun ma inge Lib el ukwacl ne ke na el tuhkuh nuh ke acn tuhpahsrpahsr lal Agosh. Ac Coriantumr el tuh us mwet nuhkwewa weluhl ke el kahinglac luhkwel Lib ke ipin acn ma el kahinglac nuh we.

16 Ac ke el tuh tuhkuh nuh ke acn tuhpahsrpahsr lal Agosh el som mweun nuh sel Lib, ac el sruhngluhl ne ke na el misac; ne ohinge, tamuhlwel lal Lib el tuh aholuhl in tuhkuh laenuhl Coriantumr, ac mweun ah upaclah na pwacye, ac Coriantumr el sifilpac kahinglac liki un mwet mweun luhn tamuhlwel lal Lib.

17 Inge inen tamuhlwel lal Lib pa Shiz. Ac tukun ma inge Shiz el tuh ukwacl Coriantumr, ac el tuh kuhtanglah siti pucspucs, ac el tuh uniyac kwewana muhtwacn ac tuhlihk, ac el tuh fuhrreack siti uh.

18 Ac mwet uh sahngweng sel Shiz fin acn ah nohfohn; ahok, sie pweng som nuh fin acn ah nohfohn—Suc kuh in tu ye muhtuhn un mwet mweun lal Shiz? Liye, el imohnlah acn el sun!

19 Ac tukun ma inge mwet uh muhtwacwacack in fahsrweni nuh sie nuh ke un mwet mweun, fin acn ah nohfohn.

20 Ac elos fahsrelihk; ac sie u lalos ah kahinglac nuh yurun un mwet mweun lal Shiz, ac sie u lalos ah kahinglac nuh yurun mwet mweun lal Coriantumr.

21 Ac arulacna upac ac loeslac mweun sac, ac arulacna loeslac pacl se liyeyuck ahkmas ac mahno misac, tuh oruh acn ah nohfohn afyucflac ke mahnon mwet misac.

22 Ac arulacna sa ac pihsrpihsr mweun ah oruh wacngihn mwet luhlah in pihkihnyac mwet misac ah, tuhsruhk elos tuh fahsr som liki ahkmas nuh ke ahkmas, fihliyac na kwewa mahnon mukul, muhtwacn, ac tuhlihk osrwaclihk fin acn uh, in mongolac sin wet ke mahno uh.

23 Ac fohloh ah fohlwelihk acn ah, finne acn ah nohfohn; ohinge mwet ah elyahyak ke lwen ac ke fong, ke srihpen fohloh sac.

24 Ne ohinge, Shiz el tiacna tui in ukwacl Coriantumr; tuh el tuh olwelah in fohlohksahk nuh sel Coriantumr ke srah luhn tamuhlwel lal, suc tuh acnwucki, ac kahs luhn Leum ma tuhkuh nuh sel Ether lah Coriantumr elac tiac misac ke katlas.

25 Ac ohinge kuht liye lah Leum El tuh fahsrelos ke fohnlah luhn kasrkuhsrak Lal, ac ma koluk ac ma sruhngwacyuck lalos tuh ahkoelah sie inkacnek nuh ke kuhnausyucklac ma pahtpaht lalos.

26 Ac tukun ma inge Shiz el tuh ukwacl Coriantumr nuh kuhtuhlacp, finne nuh ke inmahsrol ma oan sisken pe acn ah, ac el som mweun nuh sel Shiz we ke lusen lwen tolu.

27 Ac arulacna upac kuhnausyucklac inmahsrlon un mwet mweun lal Shiz tuh mwet uh muhtwacwacack in sahngweng, ac muhtwacwacack in kahing liki un mwet mweun lal Coriantumr; ac elos kahinglac nuh ke acn lal Corihor, ac onwelah mwet ma elos sun, elos nuhkwewa suc tiac weluhlosyang.

28 Ac elos kaskiyac lohm nuknuk selos ke infahlfahl lal Corihor; ac Coriantumr el kaskiyac lohm nuknuk sel ke infahlfahl lal Shurr. Inge infahlfahl lal Shurr oan sisken infahlfahl Comnor; ohinge, Coriantumr el tuh oracni nuh sie un mwet mweun lal nuh fin inging Comnor, ac tuh ukyac mwe ukuk nuh ke un mwet mweun lal Shiz in solwaclos in mweun.

29 Ac tukun ma inge elos tuhkuh, tuhsruhk elos sifilpac ukohkyak; ac elos tuhkuh pacl ahkluo, ac elos sifilpac ukohkyak pacl ahkluo. Ac tukun ma inge elos sifilpac tuhkuh pacl ahktolu, ac mweun ahktolu arulacna upaclah.

30 Ac tukun ma inge Shiz el kantwelyac Coriantumr tuh oruh el sang nuh sel kihnet loal pucspucs; ac Coriantumr, lihsr srah lal, el muhlallah, ac tuh utucklac oacna in muh el misac.

31 Inge misac luhn mukul, muhtwacn ac tuhlihk ke kwewana lacfahl uh arulacna puhslac tuh oruh Shiz el sapkihn mwet lal tuh elos in tiac ukwe un mwet mweun lal Coriantumr; ohinge, elos fohlohklac nuh ke nien monglac lalos.