Ol Skripsa
Ita 3


Sapta 3

Brata bilong Jaret i lukim pinga bilong Bikpela taim em i tasim ol wanpela ten sikis ston—Krais i soim spirit bodi bilong em long brata bilong Jaret—Ol lain ol i gat trutru save ken lukluk insait long samting ol i pasim—Ol samting bilong tanim tok i bin redim long bringim rekot bilong ol lain bilong Jaret long ples klia.

1 Na em i kamap we brata bilong Jaret, (nau namba bilong ol baj ol i bin redim i eitpela) em i bin go antap long maunten, em ol i kolim maunten Selem, bikos em longpela tumas, na kukim na rausim long mama ston ol wanpela ten sikis liklik ston, na ol i kamap waitpela na klia, wankain olsem glas, na em i bin karim ol long han bilong em i go antap long maunten, na krai gen long Bikpela, olsem:

2 O Bikpela, yu bin tok olsem ol tait wara bai raunim mipela. Nau lukim, O Bikpela, noken belhat wantaim wokman bilong yu bikos em i no strong long ai bilong yu, bikos mipela save olsem yu em holi na i stap long ol heven, na mipela i no klinpela long ai bilong yu, bikos long pasin pundaun bilong mipela i bin kamap nogut olgeta taim, tasol, O Bikpela, yu bin givim mipela wanpela lo olsem mipela mas singautim yu, olsem mipela bai kisim long yu long laik bilong mipela.

3 Lukim, O Bikpela, yu bin givim pen long mipela, bikos long pasin nogut bilong mipela, na ronim mipela i go yet, na mipela i bin i stap long ples we nogat man i stap long ol dispela planti krismas, tasol, yu bin marimari long mipela. O Bikpela, lukluk long mi wantaim sore, na tanim belhat bilong yu go awe long ol dispela pipol, na noken larim ol i brukim dispela solwara nogut tru i go long tudak, tasol lukim ol dispela samting em mi bin kukim long mama ston.

4 Na mi save, O Bikpela, olsem yu gat olgeta pawa, na ken wokim wanem samting yu laikim long gutpela sindaun bilong man, olsem na, tasim ol dispela ston, O Bikpela, wantaim pinga bilong yu, na redim ol olsem ol bai givim lait long tudak, na ol bai givim lait long mipela insait long ol baj em mipela i bin redim, olsem mipela bai gat lait taim mipela brukim solwara i go.

5 Lukim, O Bikpela, inap yu ken wokim dispela. Mipela save olsem yu ken soim bikpela pawa tru, em i luk olsem liklik long save bilong ol man.

6 Na em i kamap we taim brata bilong Jaret i autim ol dispela toktok, lukim, Bikpela i taitim han bilong em na tasim wanwan ston wantaim pinga bilong em. Na samting bilong pasim i bin raus long ol ai bilong brata bilong Jaret, na em i bin lukim pinga bilong Bikpela, na em i olsem pinga bilong wanpela man, wankain olsem long skin na blut, na brata bilong Jaret i bin pundaun long pes bilong Bikpela, bikos em poret nogut tru.

7 Na Bikpela lukim olsem brata bilong Jaret i bin pundaun long graun, na Bikpela tokim em: Kirap, bilong wanem yu pundaun long graun?

8 Na em bekim Bikpela: Mi lukim pinga bilong Bikpela, na mi poret nogut em bai paitim mi, bikos mi no bin save olsem Bikpela i gat skin na blut.

9 Na Bikpela tokim em: Bikos long bilip bilong yu, yu bin lukim olsem mi bai kisim skin na blut, na nogat wanpela man i bin kam long pes bilong mi wantaim kain bikpela bilip tru bipo olsem yu bin wokim, long wanem, yu i no inap lukim pinga bilong mi sapos yu nogat bikpela bilip tru. Inap yu bin lukim moa long dispela?

10 Na em i bekim: Nogat, Bikpela, soim yu yet long mi.

11 Na Bikpela askim em: Inap yu bai bilip long ol toktok we mi bai autim?

12 Na em bekim: Ye, Bikpela, mi save olsem yu autim tok tru, bikos yu em God bilong tok tru, na i no inap giaman.

13 Na taim em i autim ol dispela toktok, lukim, Bikpela i bin soim em yet long em, na tok: Bikos yu save long ol dispela samting, yu em mi bin ridimim yu long pundaun, olsem na yu bin kam bek long pes bilong mi, olsem na mi soim mi yet long yu.

14 Lukim, mi em man em i bin redim long taim graun i bin kamap long ridimim ol pipol bilong mi. Lukim, mi em Jisas Krais. Mi Papa na Pikinini. Olgeta manmeri bai kisim laip insait long mi, tru tumas, ol lain ol bai bilip long nem bilong mi bai kisim dispela laip oltaim, na kamap ol pikinini man na ol pikinini meri bilong mi.

15 Na mi no bin soim mi yet bipo long man em mi bin krietim, long wanem, nogat wanpela man i bin bilip long mi bipo wankain olsem yu bilip. Yu lukim olsem yu em mi bin krietim yu wankain olsem long pes bilong mi? Ye, tru tumas, olgeta man em mi bin krietim ol long i stat tru wankain olsem long pes bilong mi.

16 Lukim, dispela bodi, em yu nau lukim, em bodi bilong spirit bilong mi, na mi bin krietim man wankain olsem bodi bilong spirit bilong mi, na mi bai soim long ol pipol bilong mi long skin wankain olsem mi soim long yu long spirit.

17 Na nau, olsem mi, Moronai, i bin tok mi i no inap raitim olgeta stori bilong ol dispela samting mi bin raitim, olsem na em inap long mi long tok olsem Jisas i bin soim em yet long dispela man long spirit, tru tumas, wankain olsem long bodi em i soim em yet long ol lain bilong Nifai.

18 Na em minista long em wankain olsem em i bin minista long ol lain bilong Nifai, na em wokim olgeta long dispela, olsem dispela man bai save olsem em i God, bikos long planti bikpela wok tru em Bikpela i bin soim long em.

19 Na bikos long save bilong dispela man, em i no inap holim bek long lukluk insait long samting bilong pasim, na em i lukim pinga bilong Jisas, em, taim em i lukim, em pundaun bikos em i poret, long wanem, em lukim olsem em i pinga bilong Bikpela, na em i no moa gat bilip, bikos em i bin gat olgeta save.

20 Olsem na, bikos long dispela olgeta save bilong God, em i no inap holim bek long lukluk insait long samting bilong pasim, olsem na, em i bin lukim Jisas, na Jisas i bin minista long em.

21 Na em i kamap we Bikpela tokim brata bilong Jaret: Lukim, yu bai i no inap larim ol dispela samting em yu bin lukim na harim long go aut long graun, i go inap long taim we mi bai amamasim nem bilong mi long skin, olsem na, yu bai haitim gut tru ol samting we yu bin lukim na harim, na noken soim ol long wanpela man.

22 Na lukim, taim yu kam long mi, yu bai raitim ol na silim ol, inap long nogat wanpela man ken tanim tok long ol, long wanem, yu bai raitim ol long wanpela tok ples we ol i no inap ritim.

23 Na lukim, mi bai givim ol dispela tupela ston long yu, na yu bai silim ol wantaim ol samting em yu bai raitim.

24 Long wanem, lukim, mi bin paulim pinis tok ples yu bai raitim, olsem na mi bai givim long taim bilong mi stret olsem ol dispela ston bai mekim ai bilong ol man kamap bikpela long lukim ol samting em yu bai raitim.

25 Na taim Bikpela autim ol dispela toktok, em i soim long brata bilong Jaret olgeta pipol bilong graun ol i bin i stap, na tu olgeta pipol ol bai i stap, na em i no haitim long soim ol long em long lukim, tru tumas, long olgeta arere bilong graun.

26 Long wanem, em i bin tokim brata bilong Jaret planti taim bipo, long wanem sapos em i bilip long em, olsem em ken soim long em olgeta samting—olgeta samting bai soim long em, olsem na Bikpela i no inap holim bek wanpela samting long em, bikos em i bin save olsem Bikpela ken soim long em olgeta samting.

27 Na Bikpela tokim em: Raitim ol dispela samting na silim ol, na mi bai soim ol long taim bilong mi stret long lain pikinini bilong ol man.

28 Na em i kamap we Bikpela i bin tokim em olsem em mas silim ol tupela ston we em i bin kisim, na i no inap soim ol i go inap long Bikpela bai soim ol long lain pikinini bilong ol man.