1 Im ālikin men kein Jered im ļeo jein, im ro nukwier, im barāinwōt ro jeran Jered im ļeo jein im ro nukwier, raar wanlaļļo̧k ilo kom̧laļ eo ituiōn̄, (im etan kom̧laļ eo eaar ^aNimrod, kōnke kar etņake juon rikakidudu ekajoor) kōn bwijin in mennin mour ko aer ko rekar aintok ippān doon, kom̧aan im kokōrā, jān mennin mour otemjeļo̧k.

2 Im rekar barāinwōt likūt aujiid ko im jān bao ko imejatoto; im rekar barāinwōt juon jāpe, ilo eo rekar bōk ippāer ek in dān ko.

3 Im rekar barāinwōt bōkļo̧k ippāer deseret, eo oktan, ej juon hōnni bi; im āindein raar bōkļo̧k ippāer bwijin in ko in bi ko, im aolep men ko otemjeļo̧k rekar pād ioon mejān āneo, ine ko kajjojo otemjeļo̧k.

4 Im ālikin men kein ke rekar wanlaļļo̧k ilo kom̧laļ in Nimrod Irooj eaar wanlaļļo̧k im kōnono ippān ļeo jein im jatin Jered; im Eaar pād ilo juon ^akōdo̧, im ļeo jein im jatin Jered eaar jab lo E.

5 Im ālikin men kein Irooj eaar jiron̄ er bwe ren ilo̧k ilo āne jem̧aden eo, aaet, ilo m̧ōttan emān in ijo ejjeļo̧k armej eaar ilo̧k ie. Im ālikin men kein Irooj eaar ilo̧k im̧aer, im kar kōnono ippāer ke Eaar jutak ilo ^akōdo̧ eo, im kar leļo̧k tōl ko ia ren aikuj ito-itak.

6 Im ālikin men kein rekar ito-itak ilo āne jem̧aden, im kar jeki wa baaj ko, ko ilowaer raar kijoone elōn̄ dān ko, im rekar bōk tōl iien otemjej jān pein Irooj.

7 Im Irooj ejamin kar kōtļo̧k bwe ren bōjrak im̧aanļo̧k lo̧jet ilo āne jem̧aden eo, a Eaar kōņaan bwe ren ilo̧k em̧ool n̄an ^aāneen kallim̧ur, eo eaar makeļo̧k ioon aolep laļ ko jet, ko Irooj Anij eaar ko̧koņ n̄an juon armej ejim̧we.

8 Im Eaar kanejnej ilo An illu n̄an ļeo jein im jatin Jered, bwe jabdewōt eo ej bōk āneen kallim̧ur in, jān iien eo m̧aanļo̧k im indeeo, ej aikuj ^ajerbal n̄an e, Anij em̧ool im emake, a naaj ^bbōkļo̧k er n̄e tarlep in An illu enaaj itok ioer.

9 Im kiiō, je maron̄ lo kean̄ ko an Anij kōn āne in, bwe e ej juon āneen kallim̧ur; im jabdewōt laļ enaaj bōk e enaaj jerbal n̄an Anij, a naaj bōkļo̧k er n̄e tarlep in An illu enaaj itok ioer. Im tarlep in An illu ej itok ioer n̄e rej kalo ilo jero̧wiwi.

10 Bwe lo, en̄in ej āneo e makeļo̧k ioon aolep laļ ko jet; kōn menin e eo ej bōk enaaj jerbal n̄an Anij a bok ļo̧o̧k; bwe e ej kean̄ ejjeļo̧k jem̧ļo̧k in an Anij. Im e ej jab m̧ae ^adipiio in jero̧wiwi ilubwiljin ro nejin āneo, n̄e naaj ^bpookļo̧k er.

11 Im men in ej itok n̄an kom̧, O kom̧ ro ^ariAelōn̄ ko, bwe kom̧in maron̄ jeļā kean̄ ko an Anij—bwe kom̧in maron̄ ukeļo̧k, im jab wōnm̧aanļo̧k wōt ilo jero̧wiwi ko ami m̧ae dipiio eo ej itok, bwe kom̧in maron̄ jab bōk laļtak dipiio in illu an Anij ioomi āinwōt ro riamņak ro ilo āne in m̧oktaļo̧k raar kōm̧m̧an.

12 Lo, en̄in ej juon āne e makeļo̧k, im jabdewōt laļ enaaj bōk e e naaj ^aanemkwōj jān kōm̧akoko, im jān jipo̧kwe, im jān aolep bar laļ ko jet ium̧win lan̄, eļan̄n̄e renaaj wōr ^bjerbal n̄an Anij eo an āne in, eo ej Jisōs Kraist, eo ej kar kwaļo̧ke jān men ko kōm ar jeje.

13 Im kiiō ij wōnm̧aanļo̧k kōn ļo̧o̧k eo aō; bwe lo, ālikin men kein Irooj eaar bōkļo̧k Jered im ro jein im jatin em̧ool n̄an lo̧jet eo eļap eo ej ajeje āne ko. Im ke raar itok n̄an lo̧jet raar kajutak im̧ōn kōppād ko aer; im raar ņa etan jikin eo Moriankōmōr; im raar jokwe ilo im̧ōn kōppād ko, im kar jokwe ilo im̧ōn kōppād ko ioon parijet eo kōn tōrean in emān iiō.

14 Im ālikin men kein ilo jem̧ļo̧k in emān iiō ko Irooj eaar bar itok n̄an ļeo jein im jatin Jered, im jutak ilo juon kōdo̧ im ekkōnono ippān. Im kōn tōrean in jilu awa ko Irooj eaar kōnono ippān ļeo jein im jatin Jered, im kar ^akauweik e kōnke eaar jab keememej n̄an ^bkūr ioon etan Irooj.

15 Im ļeo jein im jatin Jered eaar ukeļo̧k jān nana eo eaar kōm̧m̧an, im kar kūr ioon etan Irooj kōn ro jein im jatin ro raar pād ippān. Im Irooj eaar ba n̄an e: Inaaj jeorļo̧k am̧ bōd im ro jeiūm̧ im jatūm̧ jān jero̧wiwi ko aer; a kwōnaaj jab bar jero̧wiwi, bwe kwōnaaj keememej bwe ^aJetōb eo Aō e jamin naaj ^bpād ippān armej; kōn menin, eļan̄n̄e kom̧ naaj jero̧wiwi m̧ae ami naaj kanooj kalo naaj bukweļo̧k kom̧ jān im̧aan mejān Irooj. Im erkein rej ļōmņak ko Aō kōn āneo Iaar lewōj n̄an kom̧ n̄an ami jolōt; bwe enaaj juon āneo ^cemake ioon aolep bar āne ko jet.

16 Im Irooj eba: Kwōn ilo̧k n̄an jerbal im jekjek, āinwōt baaj ko kwaar jino jek i m̧oktaļo̧k. Im ālikin men kein ļeo jein im jatin Jered eaar ilo̧k n̄an jerbal, im barāinwōt ro jein im jatin, im kar jek i baaj ko ilo̧kan wāween eo rekar jek i, ekkar n̄an ^atōl ko an Irooj. Im rekar iddik, im rekar mera ioon dān, em̧ool āinwōt mera in juon bao ioon dān.

17 Im rekar jekjek ilo̧kan wāween eo rekar ^adim otem dim, em̧ool bwe ren kar dāpij dān āinwōt jāpe ekilōk; im kapier raar dim āinwōt jāpe ekilōk; im jeban ko aer raar ekkan̄; im tulōn̄ier rekar dim āinwōt juon jāpe ekilōk; im aetokaer eaar aetokan juon wōjke; im kōjām ko aer, n̄e rej kilōk, raar dim āinwōt juon jāpe ekilōk.

18 Im ālikin men kein ļeo jein im jatin Jered eaar kūr n̄an Irooj, im ba: O Irooj, iaar kōm̧m̧ane jerbal eo Kwaar jiron̄ eō, im iaar kōm̧m̧ani baaj ko ekkar n̄an āinwōt Kwaar tōl eō.

19 Im lo, O Irooj, ilowaer ejjeļo̧k meram; ia kōm naaj jebwābweļo̧k? Im barāinwōt kōm naaj jako, bwe ilowaer kōm jamin menono, ijello̧kun menono mejatoto eo ej ilowaer; kōn menin kōm naaj jako.

20 Im Irooj eba n̄an ļeo jein im jatin Jered: Lo, kwōnaaj kōm̧m̧an juon ron̄ ilo ioon, im barāinwōt ilo kapene; im n̄e kwōnaaj jabjab kōn mejatoto kwōnaaj kōpeļļo̧k ron̄ eo n̄an bōk mejatoto. Im eļan̄n̄e enaaj āindein bwe dān ej itok ioomi, lo, kom̧ naaj pinej ron̄ eo, bwe kom̧in maron̄ jab jako ilo ibwijleplep.

21 Im ālikin men kein ļeo jein im jatin Jered eaar kōm̧m̧an āinwōt, ekkar n̄an āinwōt Irooj eaar jiron̄.

22 Im eaar bar kūr n̄an Irooj im ba: O Irooj, lo iaar kōm̧m̧an āinwōt Kwaar jiron̄ eō; im iaar kōpooj baaj ko n̄an armej ro aō, im lo ejjeļo̧k meram ilowaer. Lo, O Irooj, Kwōn kōtļo̧k ke bwe kōmin naaj kijoone dān in eļap ilo marok jilōn̄lōn̄?

23 Im Irooj eba n̄an ļeo jein im jatin Jered: Ta kwo kōņaan bwe in kōm̧m̧an bwe en wōr ami meram ilo wa ko? Bwe lo, ej jab maron̄ wōr ami wūntō, bwe renaaj pedakilkil im tipdikdik; im kom̧ij jab maron̄ bōk kijeek ippemi, bwe kom̧ naaj ban ilo̧k kōn meram in kijeek.

24 Bwe lo, kom̧ naaj āinwōt juon raj ilo ibuļōn lo̧jet; bwe toļ in ņo ko renaaj pedakilkil ioomi. Mekarta, Inaaj bar bōklōn̄tak kom̧ jān m̧wilaļ ko in lo̧jet; bwe ^akōto ko raar ilo̧k jān lo̧n̄iiū, im barāinwōt ^bwōt ko im ibwijleplep ko Iaar jilkinļo̧k.

25 Im lo, Ij kōpooj eok ņae men kein; bwe kom̧ij jab maron̄ kijoone m̧wilaļ in eļap ijello̧kun n̄e Ij kōpooj kom̧ ņae ņo ko in lo̧jet, im kōto ko raar ilo̧k, im ibwijleplep ko renaaj itok. Kōn menin ta kwo kōņaan bwe In kōpooj n̄an eok bwe kom̧ maron̄ romrom n̄e oran̄ļo̧k kom̧ ilo m̧wilaļ ko in lo̧jet?