1 Im ālikin men kein Sez, eo eaar juon bwijjin Het—bwe Het eaar jako jān n̄ūta eo, im aolep m̧weo im̧ōn ijello̧kun wōt Sez—kōn menin, Sez eaar jino kalōk bar juon alen juon armej retipdikdik.

2 Im ālikin men kein Sez eaar keememej ko̧kkure an ro jemān, im eaar kalōk juon aelōn̄ ejim̧we; bwe eaar keememej ta Irooj eaar kōm̧m̧an ilo bōktok Jered im ļeo jein im jatin^aioon m̧wilaļ eo; im eaar etetal ilo iaļ ko an Irooj; im eaar keotak m̧aan ro im kōrā ro nejin.

3 Im ļeo jein erūtto tata eo etan eaar Sez, rekar kōpata ņae e; mekarta, Sez eaar metak jān pein riko̧o̧t eo, kōnke an kanooj m̧weie, eo eaar bōktok aenōm̧m̧an bar juon alen n̄an jemān.

4 Im ālikin men kein jemān eaar kalōk elōn̄ jikin kwelo̧k ko ioon mejān āneo, im armej ro raar bar jino in ajeeded ioon aolepān mejān āneo. Im Sez eaar mour n̄an juon dettan eo erūtto; im eaar keotak Riplakis. Im eaar mej, im Riplakis eaar irooj ilo ijo jikin.

5 Im ālikin men kein Riplakis eaar jab kōm̧m̧an men eo e jim̧we ilo im̧aan mejān Irooj, bwe eaar wōr elōn̄ pāleen kōrā im ^akonkubain ko, im eaar likūt ioon aeran armej men eo eaar eddo n̄an ineek; aaet, eaar ewōj er kōn ewōj ko reddo; im kōn ewōj ko eaar kalōk elōn̄ m̧ōko reļļap.

6 Im eaar kajutak n̄an e tūroon eo em̧m̧an otem em̧m̧an; im eaar kalōk elōn̄ kalbuuj ko, im jabdewōt eo eaar jab pād ium̧win ewōj ko eaar joļo̧k ilo kalbuuj; im jabdewōt eo eaar jab maron̄ kōļļā ewōj eaar joļo̧k ilo kalbuuj; im eaar kōm̧m̧an bwe ren jerbal wōt n̄an rejetak eo aer; im jabdewōt eo eaar m̧akoko n̄an jerbal eaar kōm̧m̧an bwe ren leļo̧k n̄an mej.

7 Kōn menin eaar bōk aolep jerbal mājedik ko an, aaet, em̧ool gold mājedik ko an eaar kōm̧m̧an bwe ren kōm̧anm̧anļo̧k ilo kalbuuj; im aolep wāween eļtan pā ko remājedik eaar kōm̧m̧an bwe ren jerbali ilo kalbuuj. Im ālikin men kein eaar kaen̄taan armej ro kōn jerbal in ļōn̄ ko im mennin jōjō ko an.

8 Im ke eaar irooj kōn tōrean in en̄oul im ruo iiō ko armej ro raar jutak ilo kōpata ņae e; im eaar jino wōr juon tariņae bar juon alen ilo āneo, jon̄an Riplakis eaar mej, im ro bwijjin kar lukwarkwareļo̧k er jān āneo.

9 Im ālikin men kein ālikin tōrean in elōn̄ iiō ko, Moriantōn, (eaar juon bwijjin Riplakis) eaar aintok ippān doon juon jarin tariņae in ro riatajinemjen, im eaar ilo̧k im leļo̧k tariņae n̄an armej ro; im eaar bōk maron̄ ioon elōn̄ jikin kwelo̧k ko; im tariņae eo eaar kanooj kabbūrom̧ōjm̧ōj otem kabbūrom̧ōjm̧ōj, im eaar bōk tōrean in elōn̄ iiō ko; im eaar bōk maron̄ ioon aolepān āneo, im eaar kajutak e make kiin̄ ioon aolepān āneo.

10 Im ālikin eaar kajutak e make kiin̄ eaar kameraik eddo an armej ro, jān men in eaar lo jouj ilo mejān armej ro, im rekar kapit e n̄an aer kiin̄.

11 Im eaar kōm̧m̧an jim̧we n̄an armej ro, a jab n̄an e make kōnke jerbal in ļōn̄ ko an rellōn̄; kōn menin kar bukweļo̧k e jān im̧aan mejān Irooj.

12 Im ālikin men kein Moriantōn eaar kalōk elōn̄ jikin kwelo̧k ko, im armej ro rekar erom m̧weie otem m̧weie ium̧win an irooj, jim̧or ilo m̧ōko, im ilo gold im silver, im ilo kallib grain, im ilo mennin mour ko reddik, im mennin mour ko reļļap, im men kein kar kōjepļaakļo̧k n̄an er.

13 Im Moriantōn eaar mour n̄an dettan eo eļap otem ļap, innām eaar keotak Kōm; im Kōm ar irooj ilo ijo jikin jemān; im eaar irooj ruwalitōk iiō, im jemān eaar mej. Im ālikin men kein Kōm ar jab irooj ilo jim̧we, kōn menin eaar jab lo jouj jān Irooj.

14 Im ļeo jatin eaar jutak ilo kōpata ņae e, eo jān eaar bōk e ilo jipo̧kwe; im eaar pād ilo jipo̧kwe aolep raan ko an; im eaar keotak m̧aan ro im kōrā ro nejin ilo jipo̧kwe, im ilo dettan erūtto eaar keotak Livai; im eaar mej.

15 Im ālikin men kein Livai eaar jerbal ilo jipo̧kwe ālikin mej eo an jemān, kōn tōrean eo en̄oul im ruo iiō ko. Im eaar kōm̧m̧ane juon tariņae ņae kiin̄ eo an āneo, eo jān eaar bōk n̄an e make aelōn̄ eo.

16 Im ālikin an kar bōk n̄an e make aelōn̄ eo eaar kōm̧m̧an men eo e jim̧we ilo mejān Irooj; im armej ro raar jeraam̧m̧an ilo āneo; im eaar mour n̄an juon dettan eo erūtto, im keotak m̧aan ro im kōrā ro; im eaar barāinwōt keotak Korom, eo eaar kapit e kiin̄ ilo ijo jikin.

17 Im ālikin men kein Korom eaar kōm̧m̧ane men eo em̧m̧an ilo mejān Irooj aolep raan ko an; im eaar keotak elōn̄ m̧aan ro im kōrā ro; im ālikin eaar kar lo elōn̄ raan ko eaar jako, em̧ool āinwōt n̄an aolepān laļ; im Kis eaar irooj ilo ijo jikin.

18 Im ālikin men kein Kis eaar jako barāinwōt, im Lib eaar irooj ilo ijo jikin.

19 Im ālikin men kein Lib eaar barāinwōt kōm̧m̧ane men eo em̧m̧an ilo mejān Irooj. Im ilo raan ko an Lib ^ajedpānit ko rōbaijin raar jako. Kōn menin rekar ilo̧k ilo āneo irōk, n̄an kakijen n̄an armej ro iāneo, bwe āneo eaar meno̧kno̧k kōn mennin mour ko in bukun wōjke ko. Im Lib eaar barāinwōt erom juon rikakidudu eļap.

20 Im raar kalōk juon jikin kwelo̧k eļap iturin kōnwaan eaidik in āneo, iturin jikin eo ijo lo̧jet ej ajeje āneo.

21 Im rekar kōjparok āneo irōk n̄an juon āne jem̧aden, n̄an kakidudu. Im aolepān mejān āneo iōn̄ eaar meno̧kno̧k kōn armej.

22 Im rekar waan otem waan, im raar wiaik im wiakake im jilkinto-jilkintak m̧weiuk n̄an doon, bwe ren maron̄ bōk ļapļo̧k.

23 Im rekar jerbale wāween ore otemjeļo̧k, im rekar kōm̧m̧an gold, im silver, im ^aaen, im brass, im aolep wāween metal ko otemjeļo̧k; im rekar kūbwij e jān bwidej; kōn menin, rekar kūbwij ejoujik in bwidej n̄an bōk ore, jān gold, im jān silver, im jān aen, im jān kōba. Im rekar jerbali aolep wāween jerbal ko otemjeļo̧k remājedik.

24 Im rekar wōr aer silk, im nuknuk aidik iden; im rekar jerbal aolep wāween nuknuk otemjeļo̧k, bwe ren maron̄ ņa ballier jān aer keelwaan.

25 Im rekar kōm̧m̧an aolep wāween kein jerbal ko otemjeļo̧k n̄an kalbwin bwidej, jim̧or n̄an plow im n̄an kallib, n̄an m̧adm̧ōd im n̄an rarō, im barāinwōt n̄an liklik.

26 Im rekar kōm̧m̧an aolep wāween kein jerbal ko otemjeļo̧k ko kaki rekar jerbal ippān mennin mour ko aer.

27 Im rekar kōm̧m̧an aolep wāween kein jerbal ko in tariņae. Im rekar jerbali aolep wāween otemjeļo̧k in eļtan pā ko remājedik otem mājedik.

28 Im ejjan̄in wōr juon armej eaar jeraam̧m̧an jān kar er, im kar jeraam̧m̧anļo̧k jān pein Irooj. Im rekar pād ilo āneo eaar makeļo̧k ilōn̄ in aolep āne ko, bwe Irooj eaar kōnono men in.

29 Im ālikin men kein Lib eaar mour elōn̄ iiō ko, im keotak m̧aan ro im kōrā ro; im eaar barāinwōt keotak Heartom.

30 Im ālikin men kein Heartom eaar irooj ilo ijo jikin jemān. Im ke Heartom eaar irooj ron̄oul im emān iiō ko, lo, aelōn̄ eo kar bōk jān e. Im eaar jerbal elōn̄ iiō ko ilo jipo̧kwe, aaet, em̧ool aolep bwe in raan ko an.

31 Im eaar keotak Het, im Het eaar mour ilo jipo̧kwe aolep raan ko an. Im Het eaar keotak Aron, im Aron eaar jokwe ilo jipo̧kwe aolep raan ro an; im eaar keotak Amnaikadda, im Amnaikadda eaar barāinwōt jokwe ilo jipo̧kwe aolep raan ko an; im eaar keotak Koriantōm, im Koriantōm eaar jokwe ilo jipo̧kwe aolep raan ko an; im eaar keotak Kom.

32 Im ālikin men kein Kom ar kan̄ōlļo̧k jimattan in aelōn̄ eo. Im eaar irooj ioon jimattan in aelōn̄ eo en̄oul im ruo iiō ko; im eaar ilo̧k n̄an kōpata ņae kiin̄ eo, Amkid, im rekar ire ium̧win tōrean in elōn̄ iiō ko, iien eo Kom eaar bōk maron̄ ioon Amkid, im kar bōk maron̄ ioon bwe in aelōn̄ eo.

33 Im ilo raan ko an Kom eaar jino wōr riko̧o̧t ro ilo āneo; im rekar kōmour karōk in etto ko, im kar liļo̧k ^akallim̧ur ko ālikin wāween eo jān etto, im bar kappukot n̄an ko̧kkure aelōn̄ eo.

34 Kiiō Kom eaar ire ņae er eļap; mekarta, eaar jab anjo̧ ņae er.