1 Ka sa yaco ni sa bula mai na nona mavoa ko Korianatuma, sa tekivu me nanuma lesu na ^aveivosa ka a vosataka vua ko Ica.

2 A sa raica ni ra sa vakamatei oti ena iseleiwau e voleka ni rua na milioni na nona tamata, ka sa rarawa sara kina na lomana; io, era sa mate e rua na milioni na tamata qaqa, kei ira tale ga na watidra kei na luvedra.

3 A sa tekivu me veivutunitaka sara na ca e a cakava; a sa nanuma lesu na nodra vosa na parofita, ka kila ni sa vakayacori vakaidina na ka kecega era a tukuna me yacova mai na gauna oqo; a sa rarawa sara kina na yalona ka bese ni vakacegui.

4 Ka sa yaco ni sa vola e dua na ivola vei Sisi ka kerea vua me vakabulai ira na tamata, ka kaya ni na qai solia yani na matanitu ena vuku ni nodra bula na tamata.

5 Ka sa yaco ni sa wilika na ivola ko Sisi, sa vola e dua na ivola vei Korianatuma ka kaya, ni kevaka ena soli koya me na vakamatei koya ko Sisi ena nona iseleiwau vaka i koya, ena qai vakabulai ira na tamata.

6 Ka sa yaco ni ra sa sega ni veivutunitaka na nodra cakacala ko ira na tamata; era sa vakayavalati na tamata i Korianatuma ka ra sa cudruvi ira na tamata i Sisi; ka ra sa vakayavalati na tamata i Sisi ka ra sa cudruvi ira na tamata i Korianatuma; o koya era sa valuti ira kina na tamata i Korianatuma ko ira na tamata i Sisi.

7 Ia ni sa raica ko Korianatuma ni sa voleka ni druka, sa drotaki ira na tamata i Sisi.

8 Ka sa yaco ni sa yaco ki na wai ko Ripilianikumu, a kena ibalebale, na levu se siviti ira kece; era sa birika na nodra vale laca e bati ni wai; a sa birika voleka ekea na nona vale laca ko Sisi; ia ena mataka era sa ia tale na ivalu.

9 Ka sa yaco ni ra a vala ena dua na vala kaukauwa sara, ka a vuetaki tale kina ko Korianatuma, a sa cibati koya ni sa dave vakalevu na nona dra.

10 Ka sa yaco ni ra sa kabai ira vakaukauwa sara na mataivalu i Sisi ko ira na mataivalu i Korianatuma ka vakadrukai ira kina ka ra sa dro kina; a ra sa dro ki na vanua ena ceva ka birika na nodra vale laca ena vanua ka vakatokai ko Okaca.

11 Ka sa yaco ni ra sa birika na nodra vale laca ena delana ko Rama, ko ira na mataivalu i Korianatuma; na delana vata ga ka a ^avunitaka kina ko Momani na tamaqu na ivolatukutuku tabu ki vua na Turaga.

12 Ka sa yaco ni ra sa soqoni ira vata na tamata kecega era se sega ni mate ena dela ni vanua taucoko, ka vakavo duadua ga ko Ica.

13 Ka sa yaco ni sa raica vinaka tu ko Ica na veika kece era sa kitaka na tamata; a sa raica ni ra sa laki to vata kei na mataivalu i Korianatuma ko ira era duavata kei Korianatuma, ka ra sa laki to vata kei na mataivalu i Sisi ko ira era duavata kei Sisi.

14 Erau sa vakasoqoni ira vata tiko na tamata ena dela ni vanua taucoko ena loma ni va na yabaki, erau sa dui segata me ra lewe levu ka kaukauwa na nodrau ito.

15 Ka sa yaco ni ena gauna era sa soqoni vata taucoko kina, na tamata yadua ki na mataivalu era dui via to kina, kei na watidra kei na luvedra—era sa vakaiyaragi ena iyaragi ni valu na tagane, na yalewa kei na gone lalai—a ra sa vakaisasabai, ena ^apeleti ni seredra kei na uludra, era sa vakaisulu ena isulu ni vala—era sa lako yani me ra vala; era sa vala ena siga taucoko ko ya ka sega ni qaqa.

16 Ia ka sa yaco ni sa bogi mai, era sa oca vakalevu, ka ra lako ki na nodra itikotiko; ia ni ra sa lako ki na nodra itikotiko, sa rogo cake na nodra osi kei na lele me baleti ira na wekadra era sa bale mate; ka sa rogo levu sara na nodra tagi, na nodra osi kei na lele, ka ra sa dresuka na liwa lala ena kaukauwa ni nodra tagi.

17 Ka sa yaco ni ra sa cavutu tale ena mataka ka lako ki vala, a sa kaukauwa sara ka rerevaki na vala ena siga ko ya; ia e a sega ga e qaqa vei ira, ia ni sa bogi mai, era sa dresuka tale na liwa lala ena nodra tagi kei na nodra osi kei na lele ena vukudra na wekadra era sa bale mate.

18 Ka sa yaco ni a vola tale e dua na ivola vei Sisi ko Korianatuma ka kerea me sa kua ni mai vala tale, ia me sa taura ga yani na matanitu ka vakabulai ira na tamata.

19 Ia raica, sa mudu na nona dau vakauqeti ira tiko na Yalo ni Turaga, ka sa lewa na lomadra na tamata ko ^aSetani; ni ra sa vakamuria ga na kaukauwa ni lomadra kei na mataboko ni nodra vakasama me ra na qai vakarusai; a ra sa cavutu tale me ia na vala.

20 Ka sa yaco ni ra sa vala tiko ena siga taucoko ko ya, ia ni sa bogi mai, era sa moce vata kei na nodra iseleiwau.

21 Era sa vala tale ena mataka ka tarava me yacova na bogi.

22 Ia ni sa bogi mai era sa ^amateni ena cudru me vaka na tamata sa mateni ena waini; a ra sa moce vata tale kei na nodra iseleiwau.

23 Era sa vala tale ena mataka ka tarava; ia ni sa bogi mai, era sa bula ga e le limasagavulu karua na tamata i Korianatuma, ka le onosagavulu kaciwa na tamata i Sisi, ia era sa bale mate ena iseleiwau na kena vo.

24 Ka sa yaco ni ra sa moce vata kei na nodra iseleiwau ena bogi ko ya, ia ena mataka era sa vala tale, era sa vala vakaukauwa sara ena nodra iseleiwau kei na isasabai ena siga taucoko ko ya.

25 Ia ni sa bogi mai, era sa bula ga e tolusagavulu karua na tamata i Sisi, ka ruasagavulu kavitu na tamata i Korianatuma.

26 Ka sa yaco ni ra sa kana ka moce, ka ra vakavakarau me ra veivakamatematei tale ena mataka. Era sa tamata lelevu sara ka qaqa, ena kaukauwa vakatamata.

27 Ka sa yaco ni ra sa vala tiko ena tolu na auwa, ka ra sa malumalumu mai ni sa dave vakalevu na nodra dra.

28 Ka sa yaco ni ena gauna era sa kaukauwa tale mai kina na tamata i Korianatuma ka rawa me ra lako, ka sa vakarau me ra sa dro yani; ia raica, sa tu cake mai ko Sisi kei ira tale ga na nona tamata ka bubului ena nona cudru ni na vakamatei Korianatuma, se ena mate ko koya ena iseleiwau.

29 A sa cici muri ira yani, ia sa toboki ira ena mataka ka ra sa ia tale na vala ena iseleiwau. Ka sa yaco ni ra sa ^abale mate kece ena iseleiwau ka rau bula ga ko Korianatuma kei Sisi; ia sa malumalumu ko Sisi ni sa dave vakalevu na nona dra.

30 Ka sa yaco ni sa tautauri ena dia ni nona iseleiwau ko Korianatuma, ia ni sa cegu kina vakalailai, sa qai taya laivi na ulu i Sisi.

31 Ka sa yaco ni sa taya oti na ulu i Sisi, sa tatabaki e ligana ko Sisi ka duri cake mai, ka qai bale sobu; a sasaga cegu ka qai mate yani.

32 Ka sa yaco ni sa bale sobu ki na qele ko ^aKorianatuma ka vaka e sa mate.

33 A sa vosa vei Ica na Turaga ka kaya: Mo lako yani. A sa lako yani ko koya ka raica ni sa vakayacori taucoko na vosa ni Turaga; a sa tinia na nona ^aitukutuku (ka’u sa sega mada ga ni vola na kena i ka dua na drau) ka vunitaka ena vanua ka ra a qai kunea kina na tamata i Limiai.

34 Ia na iotioti ni veivosa ka vola o ^aIca sa vakaoqo: Ia e sega ni dua na ka vei au kevaka sa nona inaki na Turaga me’u kau cake bulabula se me’u sotava na veika dredre ni bula vakayago, ia me’u rawata ga na matanitu ni Kalou. Emeni.