1 Ne biakalua ne matuku a avua mu matuku a Koliantumela; ne Koliantumela uvua muikala mfumu wa bulaba bonsu.

2 Ne Etele uvua muikala muprofete wa Mukalenga; pananku Etele wakalua mu matuku a Koliantumela, ne wakabanga kuamba mêyi a buprofete kudi bantu, bualu kabavua mua kumukandika to bua Nyuma wa Mukalenga uvua muikala munda muenda.

3 Bualu wakabila kumbukila mu dinda, mena tô ne ku dibuela dia diba, ukankamija bantu bua kuitabuja Nzambi tô ne bakudimuna mutshima bua kabalu kubutuka to, ubambila ne bintu bionsu bidi bikumbajibua ku ditabuja—

4 Bua nanku, ewu yonsu udi witabuja Nzambi bushuwa udi ne tshia kutekemena buloba bulenga kupita, eyowa, mena muaba ku tshianza tshia baluma tshia Nzambi, ditekemena didi dikala diluila ku ditabuja, didi dikala bu mudi longu lua anyima ya bantu, ludi lubenzeja bua bakamakana ne basuminyina, bavudija bienzedi bimpa diba dionsu, bikala balombodibua bua kutumbisha Nzambi.

5 Ne biakalua ne Etele wakambila bantu mêyi a buprofete pa bintu binena ne bia dikema, biakabengabu kuitabuja, bualu bua kabakabimona to.

6 Ne mpindiewu, mema, Moloni, ndi musua kuakula kakesa bitangila bintu ebi; ndi musua kuleja kudi ba pa buloba ne ditabuja didi bintu bidi bitekemena ne kabiyi bimona to; bua nanku, kanuedi mpata to bualu bua kanuena numona to, bualu kanuena nupeta njadikilu to tô ne kunyima kua ditêta dia ditabuja dienu.

7 Bualu nku ditabuja kuakadilejila Kilisto kudi batatuetu, kunyima kua yeya mubîka ku bafua; ne kakadileja kudibu to tô ne kunyima kua pakikalabu ne ditabuja kudiye; bua nanku, bidi ne tshia kuikala ne bamua bantu bavua ne ditabuja kudiye, bualu kakadileja kudi ba pa buloba bonsu to.

8 Kadi bua ditabuja dia bantu wakadileja kudi ba pa buloba, ne wakatumbisha dîna dia Tatu, ne wakalongolola njila bua kudiwu bakuabu bamona mua kuikala bapetshi ba dipa dia mu diûlu, bua bamona mua kutekemena bua bintu bivuabu kabayi bamona to.

9 Bua nanku, nudi penu mua kuikala ne ditekemena, ne kuikala bapetshi ba dipa, kadi amu panuikala ne ditabuja.

10 Monayi nku ditabuja kuakabikidibua bantu ba ku kala bilondeshila ku mulongu wa tshijila wa Nzambi.

11 Bua nanku, nku ditabuja kuakafidibua mikenji ya Mose. Kadi ku dipa dia Muanenda wa baluma Nzambi udi mulongolola njila udi mutamba buimpa; ne nku ditabuja ki idiyi mikumbajibua.

12 Bualu bu koku kakuyi ditabuja munkatshi mua bana ba bantu to Nzambi kena mua kuenza tshishima nansha tshimua munkatshi muabu to; bua nanku, kakadileja to tô ne kunyima kua ditabuja diabu.

13 Monayi, nditabuja dia Alama ne Amuleke diakakuluisha buloko panshi.

14 Monayi, nditabuja dia Nefi ne Lehi diakenzeja dishintuluka kudi Bena Lamana, bua ne bakatambuishibua ne kapia ne Nyuma wa Tshijila.

15 Monayi, nditabuja dia Amona ne bana babu diakenzeja tshishima tshipita bunena munkatshi mua Bena Lamana.

16 Eyowa, ne mena bonsu bakenza bishima bakabienza ku ditabuja, mena bavua kumpala kua Kilisto abu ne kabidi bavua kunyima abu.

17 Ne nku ditabuja kuakapetela bayidi basatu mulayi wa ne kabakulabula lufu to; ne kabakapeta mulayi to tô ne kunyima kua ditabuja diabu.

18 Ne nansha diba kayi muntu nansha umua kavua muenza bishima to tô ne kunyima kua ditabuja diabu; bua nanku diambedi bakitabuja Muana wa Nzambi.

19 Ne kuvua ba bungi bena ditabuja divua dikala dikola menamena, mena kumpala kua Kilisto kuluaye, bavua kabayi mua kupangishibua bua kumona munda mua tshibuikilu to, kadi bulelela bakamona ne mesu abu bintu bivuabu bamona ne disu dia ditabuja, ne bakasangala.

20 Ne monayi, tudi bamona mu mifundu eyi ne umua wa ku aba uvua muanabu ne Yalede wa baluma; bualu ditabuja dienda kudi Nzambi divua dipita bunena, bua ne pakapatula Nzambi munu wenda kavua mua kuwusokoka ku mesu a muanabu ne Yalede wa baluma to, bua dîyi dienda divuaye mumuambila, dîyi divuaye mupetela ku ditabuja.

21 Ne kunyima kua muanabu ne Yalede wa baluma mumona munu wa Mukalenga, bua mulayi uvua muanabu ne Yalede wa baluma mupeta ku ditabuja, Mukalenga kavua mua kupala tshintu nansha tshimua ku mesu enda to; bua nanku wakamuleja bintu bionsu, bualu kavua kabidi mua kupangishibua bua kumona munda mua tshibuikilu to.

22 Ne nku ditabuja kuakapetela batatuanyi mulayi ne, bintu ebi nebilua kudi bana babu kupitshila ku Bena Bisamba bia Benda; bua nanku Mukalenga, eyowa, mena Yezu Kilisto wakampesha mukenji.

23 Ne ngakamuambila ne: Mukalenga, Bena Bisamba bia Benda nebaseka bintu ebi bua bualu bua buteketa buetu bua difunda; bualu Mukalenga udi mutufuka ne bukitu ku mêyi ku ditabuja, kadi kuena mutufuka ne bukitu ku difunda to; bualu udi mufuka bantu bonsu aba bua ne bikala mua kuakula bikola, bua Nyuma wa Tshijila uwudi mubapesha;

24 Ne wakatufuka bua ne tumona mua kufunda amu kakesa, bua dikonyangala dia bianza bietu. Mona, kuakatufuka bua tuikala ne bukitu ku difunda bu muvua muanabu ne Yalede wa baluma muikala to, bualu wakenzeja ne bintu biakafundaye bikala ne bukitu mena bu muwudi muikala, tô ne ditamba bukola dia muntu bua kubibala.

25 Uvua muenza kabidi mêyi etu makola ne manena, mena bua ne katuena mua ku’afunda to; bua nanku, patudi tufunda tudi tumona buteketa buetu, ne tudi tutetuka bua dituangaja dia miaku yetu; ne ndi ntshina ne Bena Bisamba bia Benda kabalu kuseka miaku yetu.

26 Ne pangakamba nanku, Mukalenga wakangambila, wamba ne: Bapota badi baseka, kadi nebadila; ne ngâsa wanyi udi mukumbana bua bapola, bua ne kabanumuenenyi bua buteketa buenu to;

27 Ne bialua bantu kundi nembaleja buteketa buabu. Ndi mpesha bantu buteketa bua ne bikala badipuekeshi; ne ngâsa wanyi udi mukumbana bua bantu bonsu badi badipuekeshi kumpala kuanyi; bualu biadipuekeshabu kumpala kuanyi, ne kuikala ne ditabuja kundi, pashisha nengenza ne malu mateketa alua a makanda buabu.

28 Monayi, nendeja Bena Bisamba bia Benda buteketa buabu, ne nembaleja ditabuja, ditekemena ne bunangi bidi bibatuala kundi—mema, mpokolo wa buakana bonsu.

29 Ne mema, Moloni, mumana kumvua mêyi â, ngakapeta disamba, ne ngakamba ne: Ô Mukalenga, disua dieba diakana dienzeka, bualu ndi mumanya ne udi wenzela bana ba bantu tshintu bilondeshila ku ditabuja diabu;

30 Bualu muanabu ne Yalede wa baluma wakambila mukuna wa Zelina ne: Umbuka—ne wakumbushibua. Ne bu yeya kavua ne ditabuja to, kawuvua bua kumbushibua to; bua nanku udi wenza tshintu kunyima kua bantu bikala ne ditabuja.

31 Bualu ki muwakadileja kudi bayidi beba nanku; bualu kunyima kua kuikalabu ne ditabuja ne kuakulabu mu dîna dieba, wakadileja kudibu ne bukola bupita.

32 Ne ndi mvuluka kabidi ne udi muamba ne udi mulongolola nzubu bua muntu, eyowa, mena munkatshi mua bishikamenu bia Tatueba, kudi muntu mua kuikala ne ditekemena ditamba buimpa; bua nanku muntu udi ne tshia kutekemena, anyi kena mua kupeta bupianyi mu muaba uwudi mulongolola to.

33 Ne kabidi, ndi mvuluka ne uvua muamba ne wewa udi munanga ba pa buloba, mena ne ku difila dia moyo weba bua ba pa buloba, bua ne uwangata kabidi bua kulongolola muaba bua bana ba bantu.

34 Ne mpindiewu ndi mumanya ne dinanga edi diwuvua nâdi bua bana ba bantu bunangi; bua nanku, pa kumbusha bantu bikala ne bunangi kabena mua kupiana muaba uwudi mulongolola mu bishikamenu bia tatueba awu.

35 Bua nanku, ndi mumanya kupitshila ku tshintu etshi tshiwuvua muamba ne, pikala Bena Bisamba bia Benda kabayi ne bunangi to, bua buteketa buetu, neubatêta ne neunyenga ntalanta wabu, eyowa, mena tshidibu bapeta, ne neupesha kudi aba bikala nabi bivula kupita.

36 Ne biakalua ne ngakasambila Mukalenga bua ne apesha Bena Bisamba bia Benda ngâsa, bua ne bikala ne bunangi.

37 Ne biakalua ne Mukalenga wakangambila ne: Pikalabu kabayi ne bunangi to kabiena ne bualu kûdi to, wewa uvua muikala ne lulamatu; bua nanku, bilamba bieba nebikala ne mankenda. Ne bualu uvua mumona buteketa bueba newikala ne makanda, mena ne ku disomba panshi mu muaba umvua mulongolola mu bishikamenu bia Tatuanyi.

38 Mpindiewu, mema, Moloni, ndi ndaya Bena Bisamba bia Benda, eyowa, ne bana betu bandi munanga kabidi, tô ne patuasambakena kumpala kua nkuasa wa tshilumbuluilu wa Kilisto, kuamanya bantu bonsu ne bilamba bianyi kabiena ne katoba ka mashi enu to.

39 Ne pashisha nenumanya ne mvua mumona Yezu, ne uvua muakula nanyi ku mpala ne mpala, ne wakangambila bitangila bintu ebi ne didipuekesha dia patoka mu muakulu wanyi, mena bu mudi muntu wambila mukuabu;

40 Ne ndi mufunda amu bintu bikesa, bua buteketa buanyi mu difunda.

41 Ne mpindiewu, ndi musua kunulomba bua kukeba Yezu ewu uvua baprofete ne bapostolo bafunda buenda, bua ne ngâsa wa Tatu Nzambi, ne kabidi Mukalenga Yezu Kilisto kabidi, ne Nyuma wa Tshijila, udi ujadikilamu buabu, ikala ne ashala nuenu bua kashidi. Amena.