1 Ne kuakalua kabidi mu matuku a Kome baprofete ba bungi, ne bakamba mêyi a buprofete pa dibutuka dia bantu banena abu pa kumbusha bobu bakudimuna mutshima, ne bakudimuka kudi Mukalenga, ne bakalekela dishibeya dia bantu ne bubi buabu.

2 Ne biakalua ne bantu bakabenga baprofete, ne bakanyemena kudi Kome bua bukubi, bualu bantu bakakeba bua kubashipa.

3 Ne bakamba mêyi a buprofete kudi Kome pa bintu bia bungi; ne wakabeneshibua mu tshishadila tshia matuku enda onsu.

4 Ne uvua ne moyo tô ne ku bidimu bia bununu bukumbana, ne wakalela Shibiloma; ne Shibiloma wakakôkesha pa muaba wenda. Ne muanabu ne Shibiloma wa baluma wakamutombokela, ne kuakabanga kuikala mvita mikola mu bulaba bonsu.

5 Ne biakalua ne muanabu ne Shibiloma wa baluma wakashipesha baprofete bonsu bavua bamba mêyi a buprofete pa dibutuka dia bantu;

6 Ne kuvua dikenga dipita bukola mu bulaba bonsu, bualu bavua bajadika ne mulawu mukola neulua pa mutu pa bulaba, ne pa bantu kabidi, ne nekuikala dibutuka dinena munkatshi muabu, dia buena divua kadiyi dianji kuikala pa mpala wa buloba to, ne mifuba yabu neilua bu mudi mishiki ya buloba pa mpala wa bulaba pa kumbusha bobu bakudimuna mutshima bua bubi buabu.

7 Ne kaba kumvuila dîyi dia Mukalenga to, bua bipungidi biabu bibi; bua nanku, kuakabanga kuikala mvita ne makokangana mu bulaba bonsu, ne biyola ne bipupu bia bungi kabidi, mua ne kuvua dibutuka dikola, dia mushindu uvuabu kabayi banji kumona pa mpala wa buloba to; ne bionsu ebi biakalua mu matuku a Shibiloma.

8 Ne bantu bakabanga kukudimuna mutshima bua malu mabi abu; ne monsu muvuabu benza nanku Mukalenga uvua ne lusa kudibu.

9 Ne biakalua ne bakashipa Shibiloma, ne bakatuala Sheta mu bukuatshibu, ne wakasomba matuku enda onsu mu bukuatshibu.

10 Ne Ahaya, muanenda wa baluma, wakangata bukalenga; ne wakakôkesha bantu mu matuku enda onsu. Ne wakenza mushindu yonsu wa malu a bubi mu matuku enda onsu, kuakamatshishishaye mashi a bungi; ne matuku enda avua mikala makesa.

11 Ne Eteme, muvuaye kankanunuina ka Ahaya, wakangata bukalenga; ne wakenza penda tshivua tshikala tshibi mu matuku enda.

12 Ne biakalua ne mu matuku a Eteme kuakalua baprofete ba bungi, ne bakamba mêyi a buprofete kabidi kudi bantu; eyowa, bakamba mêyi a buprofete ne, Mukalenga neababutula bonsu pa mpala wa buloba pa kumbusha bobu bakudimuna mutshima bua malu mabi abu.

13 Ne biakalua ne bantu bakapapisha mitshima yabu, ne bakabenga kumvuila mêyi abu; ne baprofete bakabungama ne kumbuka munkatshi mua bantu.

14 Ne biakalua ne Eteme wakalumbuluisha mu bubi matuku enda onsu; ne wakalela Molona. Ne biakalua ne Molona wakakôkesha pa muaba wenda; ne Molona wakenza tshivua tshikala tshibi kumpala kua Mukalenga.

15 Ne biakalua ne kuakajuka buntomboji munkatshi mua bantu, bua tshipungidi tshia mu musokoku atshi tshivua tshiasa bua kupeta bukalenga ne makasa; ne kuakajuka munkatshi muabu muntu wa bukitu mu malu mabi, ne wakela Molona mvita, ivuaye mutonkola tshia bibidi tshia bukalenga; ne wakalama tshiabibidi tshia bukalenga bua bidimu bia bungi.

16 Ne biakalua ne Molona wakamutonkola, ne wakangata bukalenga kabidi.

17 Ne biakalua ne kuakajuka muntu wa bukitu mukuabu; ne uvua kankanunuina ka muanabu ne Yalede wa baluma.

18 Ne biakalua ne wakatonkola Molona ne wakangata bukalenga; bua nanku, Molona wakasomba mu bukuatshibu bua tshishadila tshia matuku enda tshionsu; ne wakalela Koliantolo.

19 Ne biakalua ne Koliantolo wakasomba mu bukuatshibu matuku enda onsu.

20 Ne mu matuku a Koliantolo kuakalua kabidi baprofete ba bungi, ne bakamba mêyi a buprofete pa bintu binena ne bia dikema, ne wakabila kudi bantu bua bakudimuna mutshima, ne Mukalenga Nzambi neabakosela tshitungu bua dibutuka dijima diabu, pa kumbusha bobu bakudimuna mutshima;

21 Ne bakamba dîyi dia Nzambi ne Mukalenga neatuma anyi neatuala bantu bakuabu bua kuasa mu bulaba, ku bukola buenda, ku mushindu wakatualaye batatuabu.

22 Ne bakabenga mêyi onsu a baprofete, bua tshisumbu tshiabu tshia mu musokoku ne bua malu mapita bubi abu.

23 Ne biakalua ne Koliantolo wakalela Etele, ne wakafua, mumana kusomba matuku enda onsu mu bukuatshibu.