Ri
Vuj richin ri
Mormon

Quereʼ cʼa, jareʼ jun molaj retal tzʼibanic richin ri ruvinakul ri Nefi y chukaʼ quichin ri Lamaniʼ. Reʼ tzʼiban cʼa can chique ri Lamaniʼ, ri e jun rutzʼakat ri rujayul ri Israel, y chukaʼ chique ri e aj Judá y ri Gentiliʼ. Tzʼiban cʼa can reʼ roma jun pixaʼ yaʼon can. Xbanatej cʼa xa roma ri uxlabel richin ri yabel lokʼolej rutzijol y chukaʼ ri uxlabel richin ri kʼalajirisanic. Tzʼiban cʼa can, tzʼapin cʼa can, y evan cʼa can riqʼuin ri Ajaf, richin queriʼ man nivulatej ta. Cʼo cʼa chi xtelesex pe chic roma ri lokʼolej rusipanic y ri ruchukʼaʼ ri Dios, richin queriʼ xtikʼaxex cʼa ri rutzij. Reʼ tzʼapitajinek can roma ri Moroni y evan can riqʼuin ri Ajaf, richin queriʼ xtel cʼa pe chic cupan jun kʼij apon coma ri Gentiliʼ. Xtikʼaxex cʼa ri tzij riʼ roma ri lokʼolej rusipanic ri Dios.

Ré rucʼuan chukaʼ jun molaj retal tzʼibanic ri cʼamon pe cʼa chupan ri Vuj richin ri Eter. Jariʼ jun tzijonic quichin ri ruvinakul ri Jared ri xequirex el tok ri Ajaf xuxol ri quichʼabel ri vinakiʼ pa ri kʼij tok yetajin chupabaxic jun mamalej tzʼurutzʼic jotolibel, richin queriʼ xeʼapon ta cʼa chicaj. Banon cʼa can reʼ richin queriʼ yerukʼ alajirisaj chiquivech ri rutzʼakat ri Rujayul ri Israel ri nimalej tak samaj ri e rubanon ri Ajaf pa quiviʼ ri catiʼt quimamaʼ, y chukaʼ richin queriʼ xtiquetamaj ri cʼulanan tzij ri e rubanon can ri Ajaf quiqʼuin, y chi rijeʼ man e xilkʼotin ta can junelic. Chukaʼ richin chi xtuben chi ri e aj Judaʼ y ri Gentiliʼ xtiquinimaj chi ri Jesus can ja vi rijaʼ ri Cristo, ri Jumul Dios, ri nukʼalajirisaj riʼ chiquivech conojel tinamit. Vacami cʼa, vi e cʼo chupan re etal reʼ ri man utz ta quibanon can, riʼ xa roma xesachlan jubaʼ ri achiʼaʼ chubanic. Roma cʼariʼ, man queʼixutuj cʼa ri xa e richin ri Dios, richin queriʼ manek itzʼilol chuvech ri rukʼatbel tzij ri Cristo.