Diyin God Bizaad
Alma 34


Wóltaʼii 34

Saad bee yisdáʼdoodáłígíí éí Christ bitsʼą́ą́dę́ę́ʼ níigo Amulek haadzííʼ—Bąąhági átʼéii bikʼé naʼílyáago tʼéiyá, diné doo ałtso dínóonéeł da—Moses bibeehazʼáanii tʼáá átʼé Diyin God biYeʼ nááhidoonihgo bichʼįʼ aheeztʼiʼ—Díí hoolʼáágóó nináʼílyé bohootʼááł éí oodląʼ dóó iiná łahgo álnéhígíí bá silá—Atsʼíís dóó iiʼsizíinii bikʼihojídlí bíká sohodizin—Díí iiná éí nihookááʼ dineʼé Diyin God yaa hidookah biniiyé hashtʼeʼádaʼdílnééh—Diyin God béédaałdzidgo yisdádooháłígíí bindaałnish. Díí éí tʼah doo Jesus biʼdichíhę́ędą́ą́ʼ 74 yihahą́ądą́ą́ʼ nahalzhiishgo ádahóótʼįįd.

1 Áádóó kʼad Alma ałtso haadzíiʼgo niʼgóó neezdá, áádóó Amulek yiizįʼ dóó neidíníitą́ą́ʼ, kóníigo:

2 Shikʼisóó, Christ doogááł haʼníigo baa haʼoodzíʼígíí tsʼídá tʼáadoo baa dahosidiitsʼą́ą da didoohniiłígíí éí doo bihónéedzą́ą da nisin, éí Diyin God biYeʼ átʼį́ diiʼníigo bee naʼniitin; aoo, díí éí ląʼída bee nanihiʼdineestą́ąʼgo shił bééhózin tʼah doo nihitsʼánóhkáhą́ądą́ą́ʼ.

3 Dóó shikʼis ayóí ánihííníshʼníinii, tiʼdahoohníhígíí biniinaa, haalá dadiiʼnííł lá dabididiiʼniił danohsin; dóó nihíniʼ hashtʼedaahłééh níigo nihichʼįʼ haadzííʼ; aooʼ, tʼáá íiyisíí daʼiinohdlą́ dóó hadaʼíínółní nihidííniid—

4 Aooʼ, niheʼoodląʼ hólǫ́ǫgo saad nihijéí biyiʼdi kʼidohłé nihidííniid, áko biyáʼátʼéhígíí bídanoohtááh.

5 Dóó nihił bééhózingo éí tsʼídá aláahdi nihíniʼ biyiʼdi ndaʼídółkidígíí éí Diyin God biYeʼ daatsʼí bitsʼą́ą́dóó saad silá, éí doodago daatsʼí Christ doo hólǫ́ǫ da.

6 Dóó shikʼis, ląʼída ałʼąą átʼéego, nihichʼįʼ ííshją́ą́ áyiilaa, Christ bitsʼą́ą́dę́ę́ʼ saad bee yisdáʼdoodáłígíí silá.

7 Shikʼis Zenos saad yee haadzíʼę́ę yee haadzííʼ, nináʼílyáii Diyin God biYeʼ biníkááʼ góneʼ tʼéiyá silá, áádóó Zenock bizaad ałdóʼ yee haadzííʼ; Moses bizaad ałdóʼ yee haadzííʼ, díí tʼáá aaníí ádaatʼé nihił ííshjání ádoolnííł biniiyé.

8 Jó, dóó kʼad, tʼáá shí ánihidideeshniił díí tʼáá aaníí ádaatʼé. Jó, ánihidishní, Christ diné yitah doogáłígíí, dóó bidineʼé bibąąhági ádaatʼéii ákʼiididootʼáłígíí shił bééhózin, dóó nihookááʼ dineʼé bibąąhági ádaatʼéii yikʼé nináʼdoodlééł; háálá Bóhólníihii Diyin God yee haadzííʼ.

9 Háálá tsʼídá bąąhági átʼéii bikʼé nináʼdoolyéełgo bee nihootʼą́; háálá Hoolʼáágóó Diyin God binahatʼaʼ ayóó átʼéii bikʼehgo éí tsʼídá bąąhági átʼéii bikʼé nináʼdoolyéełgo ályaa; éí doodago éí nihookááʼ dineʼé tʼáá ałtso dínóonééł; aooʼ, tʼáá ałtso daastłʼis; aooʼ, tʼáá ałtso adaheezhtłizh dóó yóó aheeskai, dóó dazhdínoonééł tʼáá hazhóʼó bąąhági átʼéii bikʼé há nináʼílyáago tʼéiyá díí ákódoolníiłgo bee nihootʼą́.

10 Háálá éí tsʼídá ádoonííł éí tsʼídá ayóó átʼéego dóó akéeʼdi náádiʼyoonih; aooʼ, doo éí diné nááhidoonih da, dóó ałdóʼ doo éí naaldlooshii da, dóó ałdóʼ doo éí naatʼaʼii da; háálá doo éí nihookááʼ dineʼé nááhidoonih da; ndi doo nineelʼą́ą́góó dóó hoolʼáágóó dinaʼgo nááʼiidoonih.

11 Kʼad doo éí diné bidił yee nááná łaʼ diné bibąąhági ádaatʼéii yee yá yikʼé nináʼ doodléeł da. Áko kʼad, diné iisxį́įgo, jó daʼ nihibeehazʼáanii, éí éí tʼáá ákogi átʼéésh, bikʼis beʼiinaʼ yaa néididoodlééł? Shí ánihidishníigo éí, Dooda.

12 Ndi beehazʼáanii éí iisxíinii tʼáá bí beʼiinaʼ yee yikʼé nináʼdoodlééł ní, ákohgo doo bíighahí da tʼáá hazhóʼó hoolʼáágóó nináʼílyáhígíí tʼéiyá nihookáaʼgi bąąhági átʼéii hólónígíí bíighah dooleeł.

13 Éí bąą, tsʼídá ayóó átʼéego dóó akéeʼdi náádiʼyoonihgo áhodoonííł, índa kótʼée dooleeł, éí doodago kótʼée doo ńtʼę́ę́ʼ, dił naasdzasę́ę ndootʼih; índa Moses bibeehazʼáanii ałtso biʼdoolnííł; aooʼ, tʼáá ałtso biʼdoolnííł, tʼáá ałtso áłtsʼíísíjįʼ dóó dah łizhinjįʼ, dóó doo łaʼ tʼáá géed da dooleeł.

14 Jó áádóó, díí éí tʼáá átʼé óolyé beehazʼáanii, tʼáá ałtso áłtsʼíísíjįʼ tsʼídá akéeʼdi dóó ayóó átʼáo náádiʼyoonihígíí yichʼįʼ dah daʼastsih, dóó díí tsʼídá akéeʼdi dóó ayóó átʼáo nááhidoonihígíí éí Diyin God biYeʼ; aooʼ, doo nineelʼą́ą́góó dóó hoolʼáágóó nilį́įgo.

15 Dóó ákótʼáo tʼáá ałtso bízhiʼ yoodlánígíí yisdáʼiildééh yeidoolééł; díí éí biniiyé tsʼídá akéeʼdi náádiʼyoonih, ajoobaʼ ndoolyééł biniiyé, éí tʼáá ákogi átʼáo nihwiitʼaah yiláahgo bidziil, dóó binahjįʼ diné daʼiidoodląął doo beʼiinaʼ łahgo áńdeidoodlííł.

16 Dóó ákótʼáo ajoobaʼ tʼáá ákogi átʼáo nihwiitʼaah yinízinígíí yiʼdoolííł, dóó agaan aa áhályáanii bińdoochił, áko doo daʼoodláanii beʼiinaʼ doo łahgo ánéídléhígíí éí tʼáá ákogi átʼáo nihwiitʼaah yinízinígíí ałtso bee haa hwíídínóotįįł; éí bąą tʼáá háiida oodląʼ bee beʼiinaʼ łahgo áyiilaago tʼéiyá nahatʼá hoolʼáágóó dóó ayóó átʼáo nináʼílyáhą́ą ályaaígíí bikʼéstiʼ dooleeł.

17 Éí bąą shidineʼé, Diyin God nahá hwiidoołʼaał, áko niheʼoodląʼ nabídanohtaahgo hahodoolzhish binahjįʼ niheʼiinaʼ łahgo áńdadoohdlííł, áko bichʼįʼ sodadołzingo hahodoolzhish, áko nihaa joobaʼ dooleeł.

18 Aooʼ, ajoobaʼ bíká bichʼįʼ sodadołzin; háálá yisdáʼádooniłgo yee bidziil.

19 Aooʼ, hojoobaʼgo ádaʼdółnééh, dóó tʼáá áłahjįʼ bichʼįʼ sodadołzin.

20 Nihikéyah bikáaʼgi naahkaigo yéigo bichʼįʼ sodadołzin, aooʼ, nihilį́į́ʼ tʼáá ałtso bá.

21 Yéigo nihighan góneʼ bichʼįʼ sodadołzin, aooʼ, bił nihighanígíí tʼáá ałtso bá, abínígo, ałnéʼéʼaahgo, doo eʼeʼaahgo.

22 Aooʼ, yéigo niheʼenaʼí bibee adziilii bikʼijįʼ bichʼįʼ sodadołzin.

23 Aooʼ, yéigo chʼį́įdii beʼiiníziinii bikʼijįʼ bichʼįʼ sodadołzin, tʼáá ákogi ádaatʼéii tʼáá ałtso yikʼijįʼ nilíinii.

24 Yéigo dáʼákʼehgóó kʼidadooláhą́ą bá bichʼįʼ sodadołzin, áko ląʼígo ńdadíʼnóołtʼį́į́ł.

25 Yéigo nihikéyahgóó nihilį́į́ʼ ndaakaígíí bá sodadołzin, áko ląʼída dooleeł.

26 Ndi doo díí tʼéiyá da; nihighan biyiʼ áhoołtsʼíísí hazʼą́ góneʼ yéigo sodadołzin, dóó nahonitʼin nahazʼánídi, dóó doo kééhatʼínídi sodadołzin ałdóʼ.

27 Aooʼ, doo Bóhólníihii bichʼįʼ sodadołzingo, bíniʼ nihijéí biiʼdóó, áłahjįʼ Diyin God bichʼįʼ ádá sodadołzin, dóó tʼáá ałtso diné nihinaagóó hólóonii ałdóʼ.

28 Dóó kʼad jó, shikʼisóó ayóí ánihííníshʼníinii, ánihidishní, díísh tʼáá ákódí tʼáadoo nohsiní, háálá díí ałtso ádaoohłaago, bichʼįʼ ańdahaztʼiʼígíí, dóó beʼééʼ ádaadinígíí doo bíká oojééʼgóó, dóó bitah dahoneezgaiígíí dóó bichʼįʼ ndahwiiʼnánígíí doo baa danohkááhgóó, dóó tʼáadoo leʼé nihee hólǫ́ǫ́dą́ą́ʼ, háiida bee ádaadinígíí doo bee bíká oołyeedgóó—ánihidishní, díí tsʼídá doo ádaahtʼį́į́góó, jó, nihisodizin éí tʼáadoo biniiyéhé da, dóó doo nihíká adoolwoł da, dóó diné tʼóó ádahoʼdilʼíní éí oodląʼ doo deinízinígíí ndahonohłin.

29 Éí bąą, diyingo ayóó óʼóʼní doo béédaohłniihgóó, béésh bąąh nahjįʼ dilyį́hígíí nohłį́, éí béésh yidiłhį́įhii chʼídayiiłtłʼiid, (eii éí doo bą́ą́h ílíinii átʼéego) dóó diné tʼóó yikʼi naakai dooleeł.

30 Dóó kʼad, shikʼisóó, nihá kwíínísin, ląʼída woohłtsą́ągo índa, Diyin God bizaad díí yaa halneʼgo bá ákonohsin, wóshdę́ę́ʼ ninohkááh niheʼiinaʼ łahgo áńdaahdleʼígíí bee.

31 Aooʼ, wóshdę́ę́ʼ nihidoohkahą́ą nihá nisin dóó tʼáadoo nihijéí ńdaohłtłʼisí; jó áko, yisdádooháałjįʼ oʼoolkid dóó ayííłką́; dóó éí bąą, niheʼiinaʼ łahgo áńdaahdléehgo dóó doo nihijéí dasoołtłʼisgo, tʼáadoo hodinaʼí nináʼílyáii ayóó átʼáo hashtʼeelyaaígíí nihí dooleeł.

32 Jó áko, díí iiná biyiʼ éí diné Diyin God yaa doogáłígíí yiniiyé hashtʼeʼádiʼdoolnííł biniiyé hooʼaʼ, aooʼ, jó díí iiná yitʼihígíí bijį́ éí diné ndoolnish biniiyé ooʼááł.

33 Dóó kʼad, bee nihił hweeshneʼę́ę bikʼehgo, ląʼída daoołtsą́ągo, éí bąą, baa nánihooshkąąh tʼáadoo iiná ałtso ádaałeʼ bijį́įdi índa niheʼiinaʼ łahgo ádaoohłeʼé; háálá díí jį́ iiná yitʼihígíí ałtsogo; hoolʼáágóó iiná bichʼįʼ hashtʼeʼádadidiilnííł biniiyé nihaílyá, jó, díí iiná biyiʼ doo hazhóʼó hashtʼeʼádadiilnéehgo, éí bikééʼdę́ę́ʼ tłʼéeʼgo chahałheeł éí biyiʼ naanish ádooníłígíí ádin.

34 Ánoonééł baa nooyáadi, doo kódidoohniił da, sheʼiinaʼ łahgo ádeeshłííł, áko shiDiyin God baa ńdeeshdááł. Dooda, doo éí kódidoohniił da; háálá tʼáá éí iiʼsizíinii tʼah doo náándiilyéhę́ędą́ą́ʼ nihitsʼíís yiyiʼ hólónę́ę, tʼáá éí iiʼsizíinii adziilii bee hólǫ́ǫgo nihitsʼíís nayiiłnáa dooleeł hoolʼáágóó iiná bił hazʼą́ądi.

35 Jó áko, tʼah doo niheʼiinaʼ łahgo áńdaahdléehgo náánihiʼdiilyáajįʼ ayííłką́ągo, jó, chʼį́įdii beʼiiníziinii biiʼsizíinii nanihiloʼ dooleeł, dóó bíjístłʼǫ́ǫ dooleeł; éí bąą, Bóhólníihii biiʼSizíinii nitsʼą́ą́dóó ádin dooleeł, dóó doo nihiyiʼ hólǫ́ǫ da dooleeł, dóó chʼį́įdii beʼiiníziinii tʼáá ałtsojįʼ nihikʼi bidziil dooleeł; dóó díigi átʼéego éí doo yáʼádaashóonii akéeʼdi bił hazʼą́ą dooleeł.

36 Dóó díí shił bééhózin, háálá Bóhólníihii éí ání doo hooghan yáʼátʼéehii éí doo biiʼ honishłǫ́ǫ da, ndi diné yáʼátʼéehii éí bijéí biiʼ honishłǫ́; aooʼ, ałdóʼ ádííniid yáʼátʼéehii éí shił hazʼą́ądi dah dínóobįįł, dóó doo chʼéédoodáał da; ndi beʼééʼ éí Dibé Yázhí bidił bee niłtólígo łigai ádoolníił dooleeł.

37 Dóó kʼad, shikʼisóó ayóí ánihííníshʼníinii, díí béédaohłniih dooleeł nisin, dóó Diyin God bińdaałdzidgo yisdádadoohkahígíí binaałnish dooleeł, dóó Christ éí doo doogáał da tʼáadoo dadohníní;

38 Áko tʼáadoo Iiʼsizį́ Diyinii bikʼijįʼ naałdzilí, bíniʼ nihiyiʼ hólǫ́ǫ dooleeł, dóó Christ bízhiʼ ákʼidadohtʼaah; áko tʼáá íiyisíí hojoobaʼ ídaʼdółnéehgo niʼjįʼ ntsidahidoohgeeh, dóó Diyin God bichʼįʼ sodadołzin, tʼáá naaháágóó, dinohsinígíí dóó tʼáá aaníinii nihił bééhózinígíí binahjįʼ, dóó tʼáá ákwíí jį́ bichʼįʼ ahééh danohsin, yee nihaa joozbaʼígíí dóó yee nihikʼihojisdliʼígíí bee bichʼįʼ ahééh nohsin.

39 Aooʼ, áádóó ałdóʼ tʼáá íiyisíí ánihidishní, shikʼisóó danohłíinii, tʼáá áłahjįʼ sodizin bee ádaa áhółyą́, áko chʼį́įdii beʼiiníziinii yee nanihintaahígíí doo yee yóó anihidínóoʼah da, áko doo nihikʼehdidoodleeł da, áko ałtso iiyííłką́ągo doo nanihiloʼ da dooleeł; jó áko, yáʼátʼéehii éí doo łaʼ nihaidooléeł da.

40 Dóó kʼad shikʼisóó ayóí ánihííníshʼníinii, haʼólní nihee hólǫ́ nihidishní, dóó áko tʼáá ałtso achʼįʼ nahwiiʼnáanii bichʼįʼ nihidziil; dóó ayóó nihaa dahojoobáʼígíí biniinaa chʼídanihiistłʼídígíí tʼáadoo bikʼijįʼ danohłíní, háálá ákódaahdzaago éí bígi átʼáo beehazʼáanii kʼídayiitíhí danohłį́į dooleeł;

41 Ndi hadaʼíínółní, dóó achʼįʼ ndahwiiłnáanii bichʼįʼ danihidziil, dóó háadishį́į́ tʼáá ałtso bee nihichʼįʼ ndahwiiʼnáanii biiʼ hadiikah dóó háádadiilyįh danohsingo hadaʼíínółní.