1 Ma o lenei sa oo i le tausaga e sefulu ma le ono mai le taimi o le afio mai o Keriso, na maua ai e Lakoneu, le kovana o le laueleele, se tusi mai le taitai ma le kovana o lenei vaega o faomea; ma o upu nei na tusia, fai mai:

2 I lau afioga mamalu Lakoneu, ma le kovana sili o le laueleele, faauta, ou te tusi atu lenei tusi ia te oe, ma avatu ia te oe le viiga tele ona o lou mausalī, ma le mausalī foi o ou tagata, i lo outou tausi pea o le mea ua outou manatu o la outou aia ma lo outou saolotoga; ioe, ua outou mautu lelei, e peiseai ua lagolagoina outou e le aao o se atua, i le puipuiga o lo outou saolotoga, ma a outou meatotino, ma lo outou atunuu, po o mea ua faapea ona outou ta’ua.

3 Ma e foliga mai o se mea ou te alofa ai, lau afioga mamalu Lakoneu e, ona ua e matuā valea tele ma fiasili i lou manatu e mafai ona outou tutulai faasaga mai i le toatele naua o tagata totoa o e ua i ai i la’u faatonuga, o e o lo ua tutulai i le taimi nei ma a latou auupega, ma o loo faatalitali ma le naunau tele mo le upu—O ifo i luga i a sa Nifaē ma faaumatia i latou.

4 Ma o a’u, i lo’u iloa o lo latou agaga le mafaatoilaloina, ona ua ou faamaonia i latou i le tafa o taua, ma i lo’u iloa o lo latou ita e faavavau ia te outou ona o mea sese e tele na outou faia ia te i latou, o lea afai latou te o ifo e faasaga ia te outou, o le a latou asia outou i le faafanoga atoa.

5 O lea ua ou tusia ai lenei tusi, ma faamaufaailogaina i lo’u lava lima, ma le manatu mo lo outou manuia, ona o lo outou maumaututu i le mea ua outou talitonu ua sa’o, ma lo outou agaga totoa i le tafa o taua.

6 O lea ua ou tusi atu ai ia te oe, ou te manao ia outou tuu mai i lo’u nuu lenei, o outou aai, ma o outou laueleele, ma a outou meatotino, a le o lena o le a latou asiasi atu ia te outou i le pelu o le a faapea ona oo atu ai le faafanoga i o outou luga.

7 Pei se isi faaupuga, ia outou tuu mai outou lava ia te i matou, ma aufaatasi ma i matou ma faamasani ma a matou galuega faalilolilo, ma avea ma o matou uso ina ia mafai ona avea outou faapei o i matou—e le o ni a matou pologa, ae o o matou uso ma paaga iā matou mea uma.

8 Ma faauta, ou te tauto atu ia te oe, afai tou te faia lenei mea, i se tautoga, o le a le faaumatiaina outou; ae afai tou te le faia lenei mea, ou te tauto atu ia oe i se tautoga, o le masina a sau o le a ou faatonu ai ia o atu i lalo a’u autau e faasaga ia te outou, ma o le a latou le taofia lo latou lima ma o le a leai se tasi o o outou e faasaoina, ae o le a latou fasiotia outou, ma o le a latou faapa’ū ifo le pelu i luga ia te outou seia oo ina soloia outou.

9 Ma faauta, o a’u o Kitianae, ma o a’u o le kovana o lenei faapotopotoga lilo a Katianetona; o se faapotopotoga lea ma ana galuega ua ou iloa ua lelei; ma o ia mea ua mai anamua ma ua tuulima faasolo mai ia te i matou.

10 Ma ua ou tusi atu lenei tusi ia te oe, Lakoneu, ma ou te faamoemoe o le a outou tuu mai o outou laueleele ma mea ua outou umia, e aunoa ma le faamasaaina o le toto, ina ia mafai ai e lou nuu lenei, o e na faatuiese mai ia te outou ona o lo outou amioleaga i le taofi mai ia te i latou o a latou aia o le malo, ona toe maua a latou aia ma le malo, ma e vagana ai ua outou faia lenei mea, o le a ou tauia sese na outou faia ia te i latou. O a’u o Kitianae.

11 Ma o lenei sa oo ina ua maua e Lakoneu lenei tusi sa matua ofo tele o ia, ona o le lotoa o Kitianae i le faatonu mai ia tuu atu ia te ia le pule i le laueleele o sa Nifaē, ma i le faamata’u mai foi i le nuu ma le tauia o sese o i latou o e sa lei faia i ai se sese, vagana ai lo latou lava sese i lo latou faatuiese ma o atu ai aufaatasi ma ia faomea amioleaga ma fai mea inosia.

12 O lenei faauta, o lenei Lakoneu, o le kovana, o se tagata amiotonu o ia, ma sa le mafai ona fefe i ni faatonuga ma ni faamata’uga a se faomea; o lea na le faalogo ai o ia i le tusi a Kitianae, le kovana o le au faomea, ae sa ia faatonu atu i lona nuu e tatau ona tagi atu i le Alii mo le malosi i le taimi e o ifo ai le au faomea e osofaia i latou.

13 Ioe, sa ia auina atu se folafolaga i tagata uma, e tatau ona latou faapotopoto faatasi o latou fafine, ma a latou fanau, ma a latou lafu ma a latou fagaga, ma a latou mea uma, vagana ai lo latou laueleele, i se nofoaga e tasi.

14 Ma sa ia faatonu atu e tatau ona fausia ni olo faataamilo ia te i latou, ma ia matua malolosi lava ia olo. Ma sa ia faatonu atu ia tuu faataamilo autau, o sa Nifaē ma sa Lamanā uma, po o autau uma a i latou o e ua faitauina faatasi i totonu o tagata sa Nifaē, o ni leoleo e leoleoina i latou, ma puipui i latou mai le au faomea i le ao ma le po.

15 Ioe, sa ia fai atu ia te i latou: E pei ona soifua le Alii, vagana ai ua outou salamo ia outou amioletonu uma, ma tagi atu i le Alii, e leai se ala o le a mafai ona laveaiina ai outou mai lima o ia faomea a Katianetona.

16 Ma sa matua silisili ma ofoofogia upu ma valoaga a Lakoneu sa oo ina oo mai ai le matau i luga o tagata uma; ma sa latou taumafai ma lo latou malosi e faia e tusa ma upu a Lakoneu.

17 Ma sa oo ina tofia e Lakoneu ni kapeteni sili i luga o autau uma a sa Nifaē, e taitai i latou i le taimi e o ifo ai mai le vao le au faomea e faasaga mai ia te i latou.

18 O lenei sa tofia ai se kapeteni silisili ma se taitai au sili mai totonu o kapeteni sili uma o autau uma a sa Nifaē, ma o lona igoa o Kitekitonae.

19 O lenei sa avea lava o se tu masani i totonu o tagata sa Nifaē uma le tofia e avea mo o latou kapeteni silisili (vagana ai taimi o lo latou amioleaga) se tasi ua i ai le agaga o faaaliga ma le agaga o valoaga; o lea, o lenei tagata o Kitekitonae sa avea o se perofeta sili i totonu ia te i latou, ma sa avea foi ma faamasino sili.

20 O lenei sa fai mai le nuu ia Kitekitonae: Ina tatalo atu ia i le Alii, ma sei o tatou o a’e i luga o mauga ma totonu o le vao, ina ia mafai ona tatou osofai i le au faomea ma faaumatia i latou i o latou lava laueleele.

21 Peitai sa fai atu Kitekitonae ia te i latou: Ua faasaina e le Alii lenei mea; ona afai tatou te o a’e e faasagatau ia te i latou, o le a tuu atu i tatou e le Alii i o latou lima; o lea o le a tatou sauniuni ai i tatou lava i le lotolotoi o o tatou laueleele, ma o le a tatou faapotopoto faatasi a tatou autau uma, ma o le a tatou le o atu e faasagatau ia te i latou, ae o le a tatou faatalitali seia latou o mai e faasaga mai ia te i tatou; o lea e pei ona soifua le Alii, afai tatou te faia lenei mea, o le a ia tuuina mai i latou i o tatou lima.

22 Ma sa oo i le lona sefulu ma le fitu o tausaga, i le taufaaiuiuga o le tausaga, sa oo atu ai le folafolaga a Lakoneu i luga o le laueleele atoa, ma sa latou ave a latou solofanua, ma a latou kariota, ma a latou povi, ma a latou lafu uma, ma a latou fagaga, ma a latou saito, ma a latou mea uma, ma savavali atu taitoaafe ma taitoasefulu afe, seia oo ina latou o atu uma i le nofoaga lea na faatonuina e tatau ona latou faapotopoto faatasi i ai i latou lava, e puipui ai i latou lava mai o latou fili.

23 Ma o le laueleele na faatonuina o le laueleele lea o Sara’emila, ma le laueleele lea sa i le va o le laueleele o Sara’emila ma le laueleele o Nuumau, ioe, e oo atu i le laina tuaoi sa i le va o le laueleele o Nuumau ma le laueleele o Tuufua.

24 Ma sa i ai le tele o afe o tagata o e sa ta’ua i latou o sa Nifaē, o e sa latou faapotopoto faatasi i latou lava i lenei laueleele. O lenei sa faatonu atu Lakoneu e tatau ona latou faapotopoto faatasi i latou lava i le laueleele i saute, ona o le fetuu tele lea sa i ai i le laueleele i matu.

25 Ma sa latou tu’iolo malolosi i latou lava e tetee atu i o latou fili; ma sa latou nonofo i le laueleele e tasi, ma i se tino e tasi, ma sa latou matatau i upu na tautalaina e Lakoneu, sa oo ina latou salamo ia latou agasala uma; ma sa latou tuu atu a latou talosaga i le Alii lo latou Atua, ina ia ona lavea’ia i latou i le taimi e o ifo ai o latou fili e faasaga mai ia te i latou i le taua.

26 Ma sa latou matua’i faanoanoa tele ona o o latou fili. Ma sa faatonu atu Kitekitonae e tatau ona latou faia auupega uiga eseese o taua, ma ia faamalosia i latou i ofutau, ma talita, ma fusitau, e tusa ma ana faatonuga.