1 Tuh liye, pacl se ac tuhkuh tuh ac fah fihrihr oacna sie oven; ac mwet inse fuhlwact nuhkwewa, ahok, ac elos nuhkwewa ma oruh ma koluk, fah oacna mah paho; ac pacl se ac tuhkuh tuh elos fah isisyak, Leum luhn Un Mwet Mweun El fahk, tuh ac fah wacngihn okah kuh lah luhlah.

2 Tuhsruhk nuh suwos suc sahngweng ke Inek, Wen nuhtin Suwohswohs fah sikme ac unwelah oasr ke lulin pahol; ac kowos fah som ac kapkapwack oacna kaho fuhsr ke kalkal uh.

3 Ac kowos fah longyac mwet koluk; tuh elos fah mulutlac ye niowos ke pacl se ma Nga ac fah oruh ma se inge, Leum luhn Un Mwet Mweun El fahk.

4 Kowos esam masap lal Moses, mwet kuhlwacnsap Luhk, suc Nga tuh sapkihn nuh sel fin acn Horeb tuh sin Israel nohfohn, ke masap ac mwe nuhnuhnkuh.

5 Liye, Nga fah suhpwacloht mwet pahluh Elijah met liki tuhkuh luhn lwen na yohk ac ahksahngweng se luhn Leum;

6 Ac el fah furohklah insiacn pahpah nuh sin tuhlihk uh, ac insiacn tuhlihk uh nuh sin pahpah tuhmwaclos, fin tiac Nga ac tuhkuh ac srihngihl facluh ke sie selngawi.