1 Ac inge, liye, Nga fahk nuh suwos, tuh kowos enenuh in suk ma inge. Ahok, sie masap Nga usot nuh suwos tuh kowos in insacnweacng in suk ma inge; tuh wolacna kahs lal Isaiah.

2 Tuh pwacyena el sramsram ke ma nuhkwewa ke mwet Luhk suc pa mwet Israel; ke ma inge enenuh se na tuh el enenuh in sramsram pac nuh sin mwet Gentile.

3 Ac ma nuhkwewa ma el sramsramkihn ma sikyak tari ac ma ac fah sikyak, finne in fal nuh ke kahs ma el tuh sramsramkihn ah.

4 Ke ma inge lohacng nuh ke kahs Luhk; suhmuhslah ma suc Nga fahk nuh suwos; ac in fal nuh ke pacl ac kena luhn Pahpah ma inge ac fah som nuh yurun mwet Gentile.

5 Ac kuhtwena mwet suc fah porongo kahs Luhk ac auliyak ac pacptaislac, mwet sacn pacna fah moliyucklac. Suk mwet pahluh, tuh puhslac mwet pahluh fah fahkwack ke ma inge.

6 Ac na tukun ma inge ke Jisus El fahklah kahs inge El sifilpac fahk nuh selos, tukun El ahkuhtweyac ma suhmuhslah nuhkwewa nuh selos ma elos tuh eis ah, El fahk nuh selos: Liye, Nga kena tuh kowos in sihmihs ma suhmuhslah sahyac, ma soenna oasr yuruwos.

7 Ac tukun ma inge El fahk nuh sel Nephi: Use ma sihmlac ma kom karihngihn an.

8 Ac ke Nephi el use ma sihmlac, ac likiyac ma inge ye muhtahl, El ngwetwacng liye ma inge ac fahk:

9 Pwacyena Nga fahk nuh suwos, Nga sapkihn nuh sin mwet kuhlwacnsap Luhk Samuel, mwet Laman, tuh elan fahkwack nuh sin mwet inge, tuh ke pacl se ma Pahpah El fah kaksakihn inel Keik tuh puhslac mwet luhlahlfongi suc fah moulyak liki misac, ac fah sikyak nuh sin mwet pucspucs, ac fah luti nuh selos. Ac El fahk nuh selos: Yac tiac ohinge?

10 Ac mwet tuhma lutlut Lal tohpohkohl ac fahk: Ahok, Leum, Samuel el tuh palye fal nuh ke kahs Lom, ac ma inge nuhkwewa ahkpwacyeiyucklac.

11 Ac Jisus El fahk nuh selos: Fuhkah tuh kowos soenna suhmuhslah ma se inge, lah mwet luhlahlfongi pucspucs tuh moulyak ac sikyak nuh sin mwet pucspucs ac tuh luti nuh selos?

12 Ac tukun ma inge Nephi el esam lah ma se inge soenna sihmihsyucklac.

13 Ac tukun ma inge Jisus El sapkihn tuh ma inge in sihmihsyucklac; ke ma inge tuh sihmihsyucklac oacna ke El sapkihn.

14 Ac na tukun ma inge ke Jisus El tuh ahkuhtweyac ma suhmuhslah nuhkwewa nuh sie, suc elos suhmuhslah, El sapkihn nuh selos tuh elos enenuh in luti ma suc El tuh ahkuhtweyac nuh selos.