1. Ar emidi an Nefi, an paba neiy owisosadba na sunmakoe, we yob soisa, Osé selesgusa Ehipto sega.

2. Tehegi, wegihidba, eh napiraguadba nega owisosa mimmimar pela yoho nonimaloedgala; ar bur idshe owisolesa ibmar nue abelegedi, eh narmasbali. Tehegine anmar gi eh sunmaisa, al anmar mimmimar tanimar mogoedgi sunmasbali; Ar we narmailesa esnunmadaregedgine.

3. Al an paba, Osé gi sunmaged pergusgua, Lamán masmala, eh sisgan se godsa, ar ga soide: Wegi, pemar an masmala, an sisgana, ar an mashi sailagined emimmigana, an kaiya purba sunmakoed, pitigiba pemar ittosmalana tibeye.

4. Tehgi Paba, tule tummad soisa: Ar pemar an igar maidba nanamalale, we yargi nasgumaloe; ar pemar an igar maidba tasurmalale, an asabin parmel-led maloe.

5. An Masmala, an sisgan ye, tehgine, na kwen purgebisuli, yoho purba nuegan pemar ga na uke; tehegine an wisi igar nued maid na wismalale, bar nanamaloe, mel-legi intaimaloe.

6. Tehegi obal-lesmardibe, we gihidba igar nuegan na pemarga obehe, ar mer isguhed pemargi naguhegala, tehegine pemar pabgan nuggin kuoe.

7. Ar, tule tummad kuen pemar opurgo surmala, al pemar ga purba nuegan an uisad ulala; unnila wile pemar takoe tehegine, teyob sadegumaloe peh mimmimala.

8. Wegihidba an paba; Lamán mimmigan ga sunmasgua, Lemuel masmala, esisgan se kol-lesmarmoga.

9. Ar ga weyobi sunmailesa: Wegi pemar anmasmala, an sisgana, ar an Machi abargi ned mimmimala, pemar ga na purbanuegan obemosunna, Lamán mimmimarga soisa sunnaguadi; tehegine, mel-legi pela prguhegala, ar yohedse peh mimmimar, igar nuegan akingamogoe.

10. Tehegi, ar an paba eh marga sunmaked pergusgua, al Ismael mimmimar ga teyob sunmaidebali, eye pela eh negginmaladgala.

11. Al sunmaked pergusgua, Sam ga sunmaide, ar ga soide: Peh kuage nuedi, peh mimmimar, peh kwenad Nefi sunnaguad, peh ga yala uilemogoe; ar peh ba wagan yoho epinsalemogoe; pedi eh sunnaguad kumogoe, peh wagan, peh sunnaguad kumarmogoe, ar peh ga ibmar nuegan uilegoe, pehibagangine.

12. Ar pela neggweburga we yob na soisa, eh kuage pinsaedbali, tehegine Paba purba nued se ubo nonikidbali, an paba nue seredgudsunna, tehegi wegihidba purgisa, ar tíylesa.

13. Tehegine an paba purgisad sorbali, Lamán, Lemuel, ar Ismael mimmimar anse uludmala, tule tummad ga ibmar soisanbali.

14. Al ani, Nefi, an osunmaisasunna, eh kaiya purba bali; ar ibmar pukidar ba angar sunmaisa, an paba teyob sunmasmoga eh purgoed iduale; tehgi we kaiya purkidar sunmaisad an na narmaisa megisa, wegihidba immar kusmalad narmailesa.

15. Ar an sanpurba gi na narmaisa, tehgi esnunmadaregedgi pukidar narmailesa kaiya purba. Al ibigala an sanpurba werguhe kaiya purba narmakedgine, ar kuager na gi pinsae, tehgi na narmake an mimmimar oturtakegala, ar an mimmigan pentakegala.

16. Tehegihidba, an sanpurba na yeher ittoe tule tummad ibmarbali, a an kuage na pinsae, ibmmar taisadgine, ar ittoshadbali.

17. Tehginiguale tule tummad, wile tulemar take, ar eh ibiyobi ibmar tummagan imaisad oyoge; kuager na pinnsulidgi na kode: ¡Ibiyobi na tule wilegedi! Eye an kuage naipi ittosa, an san taed bali, an widsur taedba, an sanpurba nue wile ittoge.

18. An na taide isguhedgi na noedsuli, tehgi na basursunna pinsaed galege.

19. Tehegi na wergubiele, an kuage di nue wile ittoe, an isgudihidbali; tehginiguar na nue wisi toase koloe.

20. An Pabtummad an arsosa; an idudihi nanasoh nega tule sulidbali; tehegine timarba nue an sehsa.

21. An sabedba, purba nuegan anga ulubsega oubosa, an san purbegine.

22. An isdarmalad ibmar akgu ittoe imaisa, asabin tobedba owawan makuishi imaisa.

23. Wegihid ba, eh an ittosa, an kaiya purba se kodsagua, neiy ibgine, mutikidba an owisosa, ibiya abulusgua.

24. Ibgine eh se kodsadgi an okannosa nuedgine; Eye, ar an kaiya purba de nibneise ittolesa; tehegine anger mar aidesnonimala, an pentaisamala.

25. Tehgi an sangina, eh purba nued ba seled kusa, yar tummagan pirsega, ar an ibiya ibmar tummagan taisa. Eye ibiyobi tummagana tulemargala; tehegine an ga soisa mel-legi narmakoye.

26. Al eye ibmar tummagan taisa, eye Pab tule tummad wile tule mimmimar takedba, sabedbali, arbi. ¿Ibiga an kuage pohe, ar wile ittogedba nanadkusa, tehegine an san nol-lo ittosa, ar wile ittogedba, an kanguhed de pergúdsunna?

27. Ar ¿ibigar sunna an san ibmar isguhed ga na uke? Eye, ¿al ibiga isguhed an obelogoe, an kuage gi isguhed togele welidarad ani obelogoe an san purba nue pukid pinsae? ¿Ibiga istar malad ebo an urwe?

28. ¡An san purba kuisguhe! Mel-legi isguhed an gi obine. ¡An kuage weherguhe! Mel-le tule istarmalad ga an san purba bar uke.

29. Mer bar urwe an istar malad ehbogua, an kantik ittoed obelogedi, pukib pinsaedbali.

30. ¡An kuage werguhe! Tule tummad se na kole, ar soge; ¡Tule tummad, peh nuga otummoe ar tehgi kadeguoe! Eye, an san purba ulub gi werguhe, ¡An Pabtummad ar an pentakedi!

31. ¿Pab tule tummad an pentakee? ¿Istar an taimalad gi peh anonoe? ¿Isguhed asabin, peh an okuisguoe?

32. ¡Soho nega an ga eh yawak peh odue, ar an kuage wile ittoe, an purba isguhed mie! Paba mel-legi igar napiraguadgi an oturtake, peh igargan nuegan maidba nuenanadih saegala, tehegi peh igar mar sogedba ib imakegala.

33. ¡Paba, peh igargan nuegan, inniggiguad ba an sehe! ¡Paba anga igar nutake, an istarmalad gi wakinnegala! ¡An asabin, igar nutake! An igarba mel-legi ib isgana urbe, unnila igargan isgana anga, peh obane, tehegine mer an igar idshoe, unnila an istar malad peh obane.

34. ¡Tule tummadi, na peh ginbi nue pinsae. Ar tehgi sadegua! Tule argangi mer nue pinsaoe; an na wisi par mel-ledoe (ukab salegoe) tule wargwen na san ginbi pinsaele. Eye, par mel-ledoe tule na tukin pinsaele, ar san tukin bi pentakele.

35. Eye, an wisi, Pabtummad pentakoe, ese ibmar egisele. Eye, Paba anga ibmar ukoe, se nuedgi egisele. Tehegine an kaiya purba na pese koloe eye, na pese koloe, an Paba, eye an okannoedi igar inniggiguadbali. Wegihidba an kaiya purba palibali na pese koloe an okannoedi, a an Paba kadeguadi. Tehgin Kadin ye.