1 At ngeni aku, i Nephi, eko asulat ngan ding bage mituru kareng kanakung tau; ni masikanan ku king pamanyulat, a anti mo king pamagsalita; uling neng ing tau magsalita ya king upaya ning Espiritu Santo, ing upaya ning Espiritu Santo darala ne iti karing pusu da ring tau.

2 Dapot lawan, dakal la reng papasias kareng pusu da laban king Banal a Espiritu, a iti ala yang lugal karela; anya pin, dakal la inugse kareng bage misulat at alagan dong alang kuwentang bage.

3 Dapot aku, i Nephi, asulat ku na nung nanu ing asulat ku, at paulagan ku iti anting maragul a ulaga, at laluna para kareng tau ku. Uling balaus kung manalangin para karela neng aldo, at kikiyak ku neng bengi, uli da; at mamaus ku king kakung Dios king kasalpantayanan, at balu ku damdaman na ing kakung aus.

4 At balu ku ing Guinung Dios gawan nalang sagradu ding panalangin ku para king kayapan da reng tau ku. At ding amanung asulat ku king kainan magawa lang masikan karela; uling amuyutan da lang gawang mayap; papabalu do karela ing tungkul kareng ninunu da; at magsalita la kang Jesus, at amuyutan da lang maniwala kea, at mibata anggang kapupusan a yang bie alang angga.

5 At iti magsalita yang masakit laban king kasalanan, agpang king kamalinawan na ning katutuan; anya pin, alang taung mimua kareng amanung sinulat ku maliban mu nung ing espiritu ning demonyu atiu kea.

6 Pupuri ku king kamalinawan; pupuri ku king katutuan; pupuri ku king kakung Jesus, uling inatbus ne ing kaladua ku king infierno.

7 Atin kung pamagkawanggawa para kareng tau ku, at maragul a kasalpantayanan kang Cristo a dakal ku akit a kaladuang alang musing king keang piukuman.

8 Atin kung pamagkawanggawa para kareng Judio — sasabian ku Judio, uling buri kung sabian ila a pibatan ku.

9 Atin ku namang pamagkawanggawa para kareng Gentil. Dapot lawan, metung man kareni ala kung pagasa maliban mu nung makipagkasundu la kang Cristo, at lungub la king makitid a pasbul, at lumakad king makiput a dalan a papunta king bie, at misundung lumakad king dalan angga king kapupusan ning aldo ning kapagsubukan.

10 At ngeni, kaluguran kung kapatad, at ding Judio mu naman, at ikayu ngang sepu ning yatu, makiramdam kayu karening amanu at maniwala kang Cristo; at nung e kayu maniwala karening amanu maniwala kayu kang Cristo. At nung maniwala kayu kang Cristo maniwala kayu karening amanu, uling ilang amanu nang Cristo, at biniye no kanaku; at tuturu do reng eganaganang tau a dapat lang gawang mayap.

11 At nung ela amanu nang Cristo, atulan yu — uling ipakit nang Cristo kekayu, maki upaya at maragul a glorya, a deti amanu na la, king tauling aldo; at ika at aku talakad katang miyarapan king arapan ning keang piukuman; at abalu yu ing inutus naku para isulat la rening bage a reti, sumangid na ning kakung kainan.

12 At manalangin ku king Ibpa king lagiu nang Cristo a dakal kekatamu, nung e man eganagana, miligtas la king keang kayarian ketang dakila at tauling aldo.

13 At ngeni, kaluguran kung kapatad, detang eganaganang kayabe king bale nang Israel, at ikayung sepu na ning yatu, magsalita ku kekayu bilang siwala na ning metung a mamaus manibatan king alikabuk: Mamun na ku angga ketang dakilang aldo a daratang.

14 At ikayung e makidake king kayapan ning Dios, at gagalang kareng amanu da reng Judio, at karen mu namang amanu ku, at kareng amanung lumual king asbuk ning Cordero ning Dios, oini, sasabian ku kekayu ing alang kapupusan a pamun, uling dening amanu parusan da kayu king tauling aldo.

15 Uling nung nanu ing tetakan ku king yatu, yang midala laban kekayu king piukuman, uling makanian ing inutus na ning Guinu kanaku, at dapat kung mamintu. Amen.