1 At ngeni aku, i Nephi, pupupusan ku na ing pamanula ku kekayu, kaluguran kung kapatad. At eku makasulat nune ditak karing bage, a balu ku dapat malyari; ni makasulat ku nune ditak karing amanu ning kapatad ku i Jacob.

2 Anya pin, ding bage asulat ku ustu no kaku, maliban mu kareng ditak a amanung dapat kung sabian tungkul king doktrina nang Cristo; anya pin, magsalita kung malino kekayu, agpang king kamalinawan na ning kakung pamanula.

3 Uling ing kaladua ku matula ya king kamalinawan; uling king paralan a ini ya megobra ing Guinung Dios kareng anak da ring tau. Uling ing Guinung Dios bibiye yang sala keng pamanintindi; uling magsalita ya karing tau agpang kareng salita ra, king karelang pamanintindi.

4 Anya pin, buri ku aganaka yu a migsalita ku kekayu tungkul ketang propeta a pepakit na kaku ning Guinu, a dapat maminiag king Cordero ning Dios a dapat maglako karing kasalanan na ning yatu.

5 At ngeni, nung ing Cordero ning Dios, ya bilang banal, dapat ya pa muring mabinyag king danum, bang tuparan ing anggang kayapan, O kanita, no anti pa kaya itamu, bilang e banal, ing mas kailangang mabinyag, wa, anggiyang king danum?

6 At ngeni, mangutang ku kekayu, kaluguran kung kapatad, makananung ing Cordero ning Dios tinupad yang eganaganang kayapan king pangabiniag na king danum?

7 Eyu wari balu ing banal ya? Dapot anggiyang banal ya, pepakit na kareng anak da ring tau a, agpang king laman migpakumbaba ya king sarili na king arapan ning Ibpa, at petutuan na king Ibpa a maging mapamintu ya kea king pamanupad kareng kautusan na.

8 Anya pin, kaibat nang mebiniag king danum ing Espiritu Santo tinipa ya king tulid na king ubug na ning patipati.

9 At pasibayu, pepakit na karing anak da ring tau ing kakiputan na ning dalan, at ing kakitiran na ning pasbul, a nung nukarin la lungub, ya bilang pepakit alimbawa karela.

10 At sinabi na kareng anak da ring tau: Tukian yu ku. Anya pin, kaluguran kung kapatad, atukian taya i Jesus nung etamu laus lub tupad kareng kautusan na ning Ibpa?

11 At ing Ibpa sinabi na: Sumisi kayu, sumisi kayu, at pabiniag kayu king lagiu ning kanakung Kaluguran a Anak.

12 At makanian mu naman ing siwala na ning Anak dinatang kaku, a sasabing: Ya a mebiniag king lagiu ku, kea ibiye ne ning Ibpa ing Espiritu Santo, anti kaku; anya pin, tukian yu ku, at gawan yo ring bage ikit yung gewa ku.

13 Anya pin, kaluguran kung kapatad, balu ku nung tukian ye ing Anak, king mitmung kapagnasan ning pusu yu, alang pamagkunwari at pamamurait arapan ning Dios, dapot king tune kapagnasan, sisisi kareng kasalanan yu, magpatutu king Ibpa a buri yeng dalan ing lagiu nang Cristo, king binyag — wa, king pamanuki king kekayung Guinu at kekayung Tagapagligtas king lalam ning danum, agpang king keang amanu, tutu, kanita tanggapan ye ing Espiritu Santo; wa, kanita datang ya ing pamaminiag ning api at ning Espiritu Santo; at kanita makapagsalita kayu king amanu da ring angeles, at gulisak kayung papuri king Banal a Metung ning Israel.

14 Dapot, makiramdam, kaluguran kung kapatad, king makanian dinatang ya ing siwala na ning Anak kaku, a sasabing: Kaibat yung sinisi kareng kasalanan yu, at migpatutu king Ibpa a bisa kong tupad kareng kautusan ku, king binyag king danum, at tinggap ye ing binyag ning api at ning Espiritu Santo, at makapagsalita na king bayung amanu, wa, anggiyang king amanu da reng angeles, at kaibat na nini lingad mu ku, mas mayap pa para keka ing emu ku abalu.

15 At mekaramdam kung siwala manibatan king Ibpa, a sasabing: Wa, ding amanu na ning kakung Kaluguran tutu la at matapat. Ya a mibata anggang kapupusan, ya murin ing miligtas.

16 At ngeni, kaluguran kung kapatad, balu ku kanini a anggang ing tau e mibata anggang kapupusan, king pamanuki king alimbawa na ning Anak na ning mabie Dios, eya miligtas.

17 Anya pin, gawan yo ring bage sinabi ku kekayung ikit kung gewa ning kekayung Guinu at Manatbus; uling, iti ing sangkan nung bakit pepakit da kaku, bang abalu ye ing pasbul a luban yu. Uling ing pasbul a dapat yung luban yapin ing pamanisi at pamaminiag king danum; at kaibat datang ya ing kapatawaran kareng kasalanan yu king api at king Espiritu Santo.

18 At kanita atiu na kayu kening makiput at makitid a dalan a papunta king alang anggang bie: wa, mekalub na kayu king pasbul; gewa yu agpang karing kautusan ning Ibpa at ning Anak; at tinggap yu ne ing Espiritu Santo, a magpatutu king Ibpa at king Anak, king pamanupad king pangakung gewa na, a nung linub kayu king paralan a ita tanggap kayu.

19 At ngeni, kaluguran kung kapatad, kaibat yung milub kening makiput at makitid a dalan, ikutang ku nung ing eganagana megawa na? Tutu, sasabian ku kekayu, Ali; uling eko pa miras nung e king amanu nang Cristo a maki e maugun a kasalpantayanan kea, a mamasang kabilugan king kayapan na a mayupaya para magligtas.

20 Anya pin, kailangan kayung sumulung king pamaglakad a maki katatagan kang Cristo, a maki sakdal a sala ning pag-asa, at lugud king Dios at kareng anggang tau. Anya pin, nung sumulung kong lumakad, a magsaya kareng amanu nang Cristo, at mibata anggang kapupusan, tutu, sinabi na pin ning Ibpa: Mika bie kang alang angga.

21 At ngeni, makiramdam, kaluguran kung kapatad, oini ing dalan; at alang aliwang dalan o lagiung mibiye lalam ning banua bang ing tau miligtas ya king kayarian ning Dios. At ngeni, makiramdam, ini ing doktrina nang Cristo, at ing kabud at tutung doktrina ning Ibpa, at ning Anak, at ning Espiritu Santo, a metung a Dios, a alang kapupusan. Amen.