Chongerung El Babier Er A Nephi

1 Elecha tara klebesei e ngak el Nephi er a bochak merek el lolsisechakl er a rebebil er ngak, ea demmam el Lehi a dirrek el milngedecheduch a bebil er a tekoi el mo er tir, e ulemeklatk er tir er a meklou el tekoi el Rubak a mla remuul el mortir, er a loltobed er tir er a beluu er a Jerusalem.

2 E dirrek el millekoi er tir er a ultekengir er a kimngara daob, me a klechubechub er a Dios mete silobel, el dimlak el le ngemed er a daob.

3 E dirrek el millekoi er tir el kirel a beluu er a telbiil el bla lenguu, ng meral chubechub chad a Dios el di mla mesubed er kemam, me a kitilobed er a beluu er a Jerusalem.

4 Ng dilul el kmo, kamosang akmla mesa er a ues me ak medengei el kmo, a Jerusalem a mla meriou, malsekum e kerdi mlar ngii, e kid a di mlo nguemed.

5 Meng merael betok el ringel a deblo erngii, endi kid tial mla mei er a beluu er a telbiil el ngii a ngaruchei er a rokui el beluu; ng beluu el ngii a Rubak el Dios a dilur ngak el kmo ng mo blurrir a rengelekek. Oi, a Rubak a mla meskak ngak me a rengelekek tial beluu el mo cherechar, e dirrek el mor tirkel Rubak a mo omekrael er tir er a ngodech el beluu el mei.

6 Misei e ngak el Lehi omlaoch ele a Reng el ngar ngak a kmo, ng diak a ngodech el me er tial beluu, e ndi merekmoel tirkel chimal a Dios a mo omekrael er tir el mei.

7 Me chelechang e tial beluu, a mla mechedaol mo er ngikel ngii a nguu el mei. Eal sekum temo mesiou er ngii loltirakl a llechul el bla lebesterir, eng mo beluu er a budech el mo ertir; meng diak le bol sibai, meng di mo kenterir a mo ngodechii, le alsekum temo dengrenger ea beluu a mo medebeakl el kirir, ea bo le mekedung eng mo mukngeltengat el diak a ulebengelel.

8 E chelchang bleketakl el kmo tial beluu a diak le kirel mo mocholt er mo er a bebil er a beluu, ele betok el beluu a lemei ete sokedii, meng mo diak a blingeled.

9 Me chelcha e ngak el Lehi me a Dios a bla kimrengedii a telbilam el kmo, alsekum tirkel ngii a mellai er tir er a Jerusalem a mo oltirakl a llechul eng mo ungil beserir er tial beluu, e diak a ngodech el beluu el mei, me tia kmal di mo belurrir el ditir el tang. Eael sekum temo oltirakl a llechul, e temo ngeltengat er tial beluu, e diak a me oldechelakl er tir, me a lechub e bo lorribech a kloklir, me temo kiei el ngara budech el mo cherechar.

10 Endi chelchael sekum ea tara klebsei e te merael mo diak loumerang, e obes aikel meklou el klengeltengat el mla er a chimal a Rubak – me te mla mo medengelii a uchelel a beluulechad; me a rechad, ma klemedengei er a meklou e mengasireng el urerel a Rubak er a uchelel a blebelel a beluulechad, e mla nguu a klisiich el meruul a betok el tekoi loba klemrang; e cholab a rokui le llach el mlara kot luchul, e mlechetakel er a diak a ulebengelel klungiolel a rengul el mer tial meringel chad el beluu er a telbiil, e elechang ak subedemiu el kmo, alsekum ea tara klebesei e temo chotngeklii a Ditael Edaol er a Israel, el Merael losobel, el Ngii Osobelir e Dios er tir, e seia mo uchul ea olbedabel er a ngii el melmalt a mo obengkangek er bebrir.

11 Oi, ngmo ngmai el mei a ngodech el beluu, e mesterir a klisiich, e ngemai er tir aikel ngii a chetemir, me temo obriid e modechelakl.

12 Oi, sel el ngara tang el mo er a tara cheroll, eng mo erngii a rasech el mo mechoit, me a ongarm a mer tir; miseia uchul me ak melekoi er kemiu e rengelkei, me llak mobes e bom moltirakl a tikingek.

13 Mei me bekiis; bekiis er tiael lobraod el cheliuaiu el mngar ngii, Oi, el ngii a cheliuaiu er a ilkolk, e mngubet a ikal bombatel el ngii omak er kemiu, el ngii el bombatel omak er a rengalk el chad, me te mekurs el mo chelsimer er a diak a ulebengeled deliobech er a ringel me a kodall.

14 Bekiis, bekiis er a chutem e merenges a tekingel a mechitechetong el delmiu, el di kmedung mo er a debull, el ngii a diak a mong el lemuut er ngii; ngdi kesai kuel klebesei e ak mo er a chutem.

15 Kamosang, a Rubak a mlasebelii a delbengek er a beluu er a ringel; Ak mla mesa klebkellel, me a chimal a beltik el reng er ngii a mengeluolu er ngak.

16 Meng soak chobo molatk e moltirakl a llechul me a uldesuel a Rubak; tiaikid sel luuchul a kentil a renguk er a uchei el mei.

17 Meng di blechoel ngar ngii a mekngit er a renguk, le kdi bekikl el kmo, a delcherecherel a rengemiu a mo uchul ea Rubak a mochoitii a ngesechel a rengul mer kemiu me komo medort e chobriid el mo cherechar.

18 Me a lechub ea dellebeakl a mer kemiu el mo er a betok el cheroll; kom di mo blechoel losiuek a saider me a bosech a meldingel, me kemiu a mo cheraro er a re betok, el le bo longetakel er kemiu a diablong el moer sel soal le komla mo sibil.

19 Rengelkei, cholkum a ikael tekoi a diak le mer kemiu, e bai le borngii a beltik el reng er a Rubak el mer kemiu, e bom ngellitel er a rengul. Endi sel uldesuel a mo mekedmokl; le omrellel a melemalt el mo cherchar.

20 E ngii a mla dmuel kmo: Alsekum e komoltirakl a llechuk, eng mo ungil besemiu er tial bluu; endi alsekum eng diak bo moltirakl a llechuk e komo er cheroid er medak.

21 Elecha ditael rolel eng mo er ngii a budech me a deuel reng er ngak el kiriu er a uchei er a bo kikrii tial bluulechad, meng diak bora debull el ngara klengit el reng, alsekum komekiis er a chutem el mo chad, e bo lultebechel a rengmiu el mo tael luldasu, e ta rengemiu er a rokui el tekoi, meng diak obom sibai.

22 Mellak leko er kemiu a klou el dellebeakl; e dirrek el lak mongesechii a rengul a melemalt el Dios, me le bo luuchul a telmelliu, Oi, sel diak a ulebengelel tellemall el mo er a delbenged me a bedenged.

23 Ka bekiis e rengelkei; e mnguu a bilel a llemalt el nguu el loiang. Mkedoked a bombatel el melechet er kemiu, e mem tobed er a ilekolk, e bekiis er a chebechab.

24 Klem mluut lomtok er a ochelliu, el ungil a uldesuel, e ultirakl a llechul a Dios er a detobed er a Jerusalem el mer chelchang, el Dios ousbech er ngii el chimal lobekid el mera beluu er a telbiil, ele le mlak ngii e kede mlad er a kall er a chelsel choreomel; e kemiu chokor e leko ko momekewad er ngii; Oi, ng kmal betok el ringel me a chelbuul a le bloerngii el kemiu a uchul.

25 Me a kumritel er a dakt el bekikl le komo le lemuut lodelcheklii; kemiu tial loltelechakl er ngii el kmo ngosiik a klisiich e soal mo merreder er kemiu; endi ngak a medengel kmo, ng diak losiik a klisiich me a omerreder, ng bai osiik odanges el mo er a Dios, me a mo cherechar el klungioliu.

26 E kemiu a mengiremerum leng ngii el di beches el melekoi er kemiu. Kom kmuel kmo ng kmal meringel a tikingel, e mlo kesib a rengul; endi a meringel el tekoi a rengelel a klisiichel a tekingel a Dios el mla er ngii, me a ngasech reng el molekoi er ngii a klemrang, el ngii a ngara Dios, meng dimlak el sebechel lorkedii, meng mle chemolt er kemiu el kirel a kentemiu.

27 Meng meral ngar ngii a klisiichel a Dios lobang, me a uchul sel lollach eng kiriu lorrenges. Meng diak le ngii, ng Reng er a Rubak lobengekel a mekngii a ngerel e melekoi meng diak el sebechel di lmuk.

28 Elecha kimiu el ngelkek er a Laman me a Lemuel me a Sam me a rengelekek el ngelekel a Ishmael el sechal, alsekum e komorrenges a tikingel a Nephi, endiak bom ngemed. Alsekum ko morrenges er ngii e ak mo meskemiu sel kot el klengeltengat el kubang.

29 Ealesekum eng diak bo morrenges er ngii, eak nguu sel kot el klengeltengat el kubang el msang.

30 Elecha kau el Zoram, a kulekoi er kau; kau a mesiungel a Laban, endi kau a tilobed er a Jerusalem el mei, me a kmedengei el kmo kau a meral sechelil a ngelkek er a Nephi el mor medad.

31 Me kau tial mle mesisiich a klaumera er kau, me a rengelekem a mo ngmai a klengeltengat ngii me a rengelekel meng mo ungil a klengar er tir er tial beluu, ngdi mo kenterir a mouchul eng mo remiid a klungiolel a delengcheklir er tial beluu el mo cherchar.

32 Mal sekum e ko moltirakl a llechul a Rubak, ea Rubak a mla choterkeklii tial beluu el blurir a rengelkem tir me a rengelekir a re ngelekek.