1 In ahkyohkye, kahs luhn Leum El fahk nuh sihk: Kom eis sie pwepuh lihmlihm raun yohk, ac sihmihs kac ke soko pen nuhtin sie mwet, kacl Maher-shalal-hash-baz.

2 Ac nga eis nuh sihk mwet loh ma luhlahlfongi in suhmuhslah, Uriah suc mwet tol, ac Zechariah wen nahtuhl Jeberechiah.

3 Ac nga som nuh yurun muhtwacn pahluh; ac el pihtuctucyak ac oswelah sie wen. Na Leum El fahk nuh sihk: Pahngon inel, Maher-shalal-hash-baz.

4 Tuh liye, tuhlihk fuhsr sac el ac fah tiac etuh in tuhng, pahpah tuhmuhk, ac ninac kiyuck, met liki mwe kahsruhp luhn acn Damascus ac mwe kahsruhp yohk luhn acn Samaria ac fah itucklac liki ye muhtuhn tohkohsrah luhn acn Assyria.

5 Leum El sifilpac sramsram nuh sihk, fahk:

6 Yohkna oacna ke mwet inge srahngwesr kof luhn Shiloah ma kahklah kahkahsrihk, ac kaksakihn wen nahtuhl Rezin ac Remaliah;

7 Ke ma inge, liye, Leum El sang nuh selos kof ke infacl uh, fokoko ac oasr suhna, finne tohkohsrah luhn acn Assyria ac wolacna nuhkwewa lal; ac el fah tuhkuh nuh ke inyoac nuhkwewa lal, ac som nuh ke luhluh nuhkwewa lal.

8 Ac el fah sahslah ke acn Judah, el fah kahklah ac osrwaclihk, el fah mayak sun inkwacwac ah; ac laknwelihk luhn mwe sohksohk lal fah apuhnlah acn suwos, O Immanuel.

9 Kowos in ueni, O kowos mwet uh, ac kowos fah muhsahlwelihk nuh ke ip srihsrihk; ac porongo kowos nuhkwewa ke acn loesuhllah; loangwe kowos, ac kowos fah muhsahlwelihk nuh ke ip srihsrihk; loangwe kowos, ac kowos fah muhsahlwelihk nuh ke ip srihsrihk.

10 Tuhkweni kihsen akacsruhi, ac e fah wacngihn srihpac; sruhmuhn kahs uh, ac e fah tiac tu na; tuh God El wi kuht.

11 Tuh Leum El sramsram ohinge nuh sihk ke sie po fokoko, ac sapkihn nuh sihk tuh nga enenuh in tiac fahsr ke ohiyac luhn mwet inge, fahk:

12 Nikmet kowos fahk, sie un mwet, nuh selos nuhkwewa suc mwet inge fah fahk, sie un mwet; kowos in tiac fosrngah ke mwe fosrngah lalos, kuh sahngweng.

13 Ahkmuhtahlye sifacna Leum luhn Un Mwet Mweun, ac lwelah Elan mwe fosrngah lowos, ac lwelah Elan mwe sahngweng lowos.

14 Ac El fah sie acn in monglac; tuhsruhk nuh ke sie yot in tikuclkucl, ac nuh ke sie yot in tahfonglac nuh sin mwet Israel nuhkwewa, nuh ke sie pa ac sie mwe sruhf nuh sin mwet muhta Jerusalem.

15 Ac puhs inmahsrlolos fah tikuclkucl ac puhtatlac, ac muhsahlwelihk, ac srohoh, ac utucklac.

16 Karuhnguhnwacng na kahs in luhlahlfongi, siliyac masap uh inmahsrlon mwet tuhmuhk lutlut.

17 Ac nga fah sano na Leum, suc okanlah Muhtahl liki tuhlihk nahtuhl Jacob, ac nga fah Sokol.

18 Liye, nga ac tuhlihk suc Leum El use nuh sihk pa mwe akucl ac ma usrnguck Israel sin Leum luhn Un Mwet Mweun, suc muhta ke Ohl Zion.

19 Ac ke elos fah fahk nuh sum: Sokolos suc etuh ke nguhn uh, ac nuh sin mwet inutnut ma mahmah srihsrihk ac mungulngul—yac mwet uh tiac enenuh in suk God lalos tuh mwet moul in lohng sin mwet misac?

20 Nuh ke masap ac nuh ke kahs in luhlahlfongi; ac elos fin sramsram tiac fal nuh ke kahs inge, ma ke srihpen wacngihn kahlwem yohrohlos.

21 Ac elos fah sahslah we soenna arulacna ullac ac masrinsrwacllah; ac ma inge fah sikyak tuh ke elos fah masrinsrwacllah, elos fah sifacna fosrngah, ac selngawi tohkohsrah lalos ac God lalos, ac ngwetwack nuh lucng.

22 Ac elos fah ngweti nuh infohkoh ac liye mwe ongaiyac, ac lohsr, lohsrlohsr luhn kweok, ac fah lihllihllac nuh in lohsr uh.