Pi Chep nib Thothup
1 Nephi 7


Guruy Ni 7

Pagael ni fak Lehi e ra suloed nga Jerusalem ngar pininged Ishmael nge chon e tabinaew rokʼ ngar uned ngoraed ko milekag roraed—Laman nge boech e gidiiʼ e ra togopluw gaed—Nephi e ning chilen ngakʼ walagen ni nge michaenʼraed ngakʼ Somoel—Ramʼaged ko gaf mar puruyʼ niged e gafgow ni ngan tay ngakʼ—Me puf e mʼag rokʼ u gelingin e mich—Walagen e ri ninged e manʼaegfan—Lehi nge ulung rokʼ e ra urufiyed e gamanman ngar piiʼed ni maligach. Napʼan 600–592 M.K.

1 Ere chiney e gube athapeg ni ngam nanged, ni tomuren ni ke muʼ e chitamag, i Lehi, i prophesy nag morngaʼagen pifak, me yibi buch niki non Somoel ngakʼ bayay, ni be yoeg ni demʼag ngakʼ, niʼir Lehi, e nge fek chongin e tabinaew rokʼ nga wuruʼ e binaw ni yigoʼ yaed; ya pagael ni fak e thingar feked e ppin ngar leʼengiyed, me yog ni ngar chuguliyed e bitir nga dakean e tirokʼ Somoel banʼen u lan e fare nam nni michmicheg.

2 Me yibi buch ni motochiyel nag Somoel ngakʼ ni gag, Nephi, nge walageg, e thingar gu suloed bayay ko nam nu Jerusalem, nggu feked Ishmael nge chongin e tabinaew rokʼ nga wuruʼ e binaw.

3 Me yibi buch ni gag, Nephi, nge walageg, e gu waroed bayay nga wuruʼ e binaw iyaen nga Jerusalem.

4 Me yibi buch ni gu waroed gu taw gaed nga tafen Ishmael, ma baʼadag Ishmael dakeanmaed, ere aramfan ni yog nug weliyed e thin rokʼ Somoel ngakʼ.

5 Me yibi buch ni munguy nag Somoel e gumʼirchaʼ rokʼ Ishmael, nge chongin e tabinaew rokʼ, ere aramfan ni yog ni ngar ʼuned nggu milekag gaed nga wuruʼ e binaw iyaen ko tent rokʼ e chitamangmaed.

6 Me yibi buch u napʼan ni gamaed be milekag iyaen u wuruʼ e binaw, me Laman nge Lemuel, nge lʼagruw i ppin ni fak Ishmael, nge lʼagruw i pagael ni fak Ishmael nge tabinaew rorow, e ra togopluw gaed ngomaed; arragon, ngomaed ni arame gag, Nephi, nge Sam, nge chitamangraed, i Ishmael, nge leʼengin, nge ku dalip i ppin ni fak.

7 Me yibi buch u napʼan ni kar togopluw gaed, mi yaed finey ni ngar suloed ko binaw nu Jerusalem.

8 Ere chiney e gag, Nephi, e kug kirbaenʼ ni bachan e gumʼirchaʼ rorow nib ʼelʼel, ere gunon ngorow, nug gaʼar, arragon, ni gunon ngakʼ Laman nge Lemuel: Amguyew gimew walageg ni gimew biʼilal, ere mang e rinʼ ma kar mu ʼelʼel nigew gumʼirchaʼmew, ma karim maʼew nigew e tafnaey romew, nib tʼuf romew, ni gag, walagmew nib bitir, e nggu non ngomew, arragon, ma nggu dag e wok nib felʼ ngomew?

9 Mang e rinʼ ma deyog ni ngam motoyil gow ko thin rokʼ Somoel?

10 Mang e rinʼ ma kam pagew talin ni kam guyew ba angel rokʼ Somoel?

11 Arragon, nge mang e rinʼ ma kam pagew talin e pinʼen ni falelʼ ni ke rinʼ Somoel ni fan ngodaed, ni ke chuweg daed u paʼ Laban, nge fapi chep ni yog ni ngad feked?

12 Arragon, nge mang e rinʼ ma kam pagew talin ni Somoel e urngin banʼen ma rayog rokʼ u rogon ni baʼadag, ni fan ngakʼ e pi gidiiʼ, ni faʼan yaedra yulʼyulʼ ngakʼ? Ere, ngad yulʼyulʼ gaed ngakʼ.

13 Ma faʼan gadaed ra yulʼyulʼ ngakʼ, ma rayog fare nam nni michmicheg ngodaed; ma baʼ bingyalʼ ni bay mu nanged ni fare thin rokʼ Somoel ni morngaʼagen e mogothgoth nra aw nga Jerusalem e bayi taw ngay ni boed ni yoeg; ya gubin banʼen ni ke yoeg Somoel ni morngaʼagen e mogothgoth nra aw nga Jerusalem e rra buch.

14 Ya musap gow, fare Kan ni Thothup rokʼ Somoel e dab ki nʼuw napʼan me chuw roraed; ya kar piiʼed keruʼraed ko fapi profet, nge Jeremiah ni kar yinʼed nga kalbus. Ma kur gayed rogon ni ngar feked e pogofan rokʼ e chitamag, ni baʼaram nra tulufed nge chuw u lan binaw.

15 Ere chiney e musap gow, ni gu be yoeg ngomew ni faʼan gimew rasul nga Jerusalem ma gimew ra un ngoraed ngam mʼaed. Ma faʼanra kam melʼegew ni ngam marow ngaram ko gi binaw nem, mag tayew u wunʼmew e thin ni kugog ngomew, ni faʼan gimew ra yaen ma kagmew ra yimʼ; ya ri be yoeg e Kan ni Thothup rokʼ Somoel ngog ni nggog.

16 Me yibi buch u napʼan ni gag, Nephi, e gog e pi thin ney ngakʼ walageg, mar puwaenʼ gow ngog. Me yibi buch ni rabow ri koelew gag, ya amusap, kari gel e damomuw rorow, mar mʼagew gag ko gaf, ya yow be tafnaey nag ni ngar fekew e pogofan rog, ni gomanga yog ni ngar digeyew gag u wuruʼ e binaw nge longyeg e gamanman ni malboch.

17 Machane me yibi buch ni gu meybil ngakʼ Somoel, nug gaʼar: O Somoel, u rogon e mich rog ngom, e gube ning riy ni ngam ayuwegeg nge yog ni nggu chuw u paʼ walageg; arragon, mpiiʼ gelingig ni nge yog nug thʼaeb e yulʼi gaf ney ni kan mʼageg ngay.

18 Me yibi buch u napʼan ni kugog e pi thin ney, ma, arame puf e gaf u paʼag ngu tungunʼeg, mug sakʼiy nga pʼoewchen walageg, ma kug non ngorow bayay.

19 Me yibi buch ni kar puwaenʼ gow ngog bayay, ma kur gayew rogon ni ngar koelew gag; machane amusap, reb fapi ppin ni fak Ishmael, arragon, nge chitiningin, nge reb fapi pagael ni fak Ishmael, e ra wenig gaed ngakʼ walageg, ma arame ra munguy nigew gumʼirchaʼrow; mar tilegew i guy rogon ni ngar fekew e pogofan rog.

20 Me yibi buch ni ke kirbaenʼrow, ni bachan e kireb rorow, ni aramfan nra siroʼ gow ngog, mar wenig gow ngog ni nggu nʼaegfan e pi kireb ni kar rinʼew nib togopluw ngog.

21 Me yibi buch ni rug nʼaegfan gubin e pinʼen ni kar rinʼew, mug piiʼ e athamgil nga laniyaenʼrow ni ngar meybil gow ngakʼ Somoel ni Got rorow ni nge nʼaegfan rorow. Me yibi buch ni rinʼew ni aram rogon. Me tomuren ni kar muʼ gow ko meybil ngakʼ Somoel ma ka gamaed milekag bayay iyaen ko tent rokʼ e chitamangmaed.

22 Me yibi buch ni gubaed ko tent rokʼ e chitamangmaed. Ma tomuren ni gag nge walageg nge gubin chongin e tabinaew rokʼ Ishmael e kug taw gaed ko tent rokʼ e chitamag, mar pininged e magaer ku Somoel ni Got roraed; mar urufiyed e gamanman ngar piiʼed ni maligach ngakʼ.