1 Ere chiney e gag, Nephi, e nggu ʼulʼul i yoloey e chep nga dakean e yungi plate ney ni morngaʼagen e pinʼen ni kuʼug rinʼ, nge lung rog nge muruwel rog; ere, nggu ʼulʼul ko birog e chep, ma thingar gu tabolngin riy ko pinʼen rokʼ e chitamag, nge ku arragon ngakʼ pi walageg.

2 Ya musap, yibi buch u tomuren ni ke muʼ e chitamag i weliy e pi thin ko likʼay rokʼ, nge athamgil niki piiʼ nga laniyaenʼ row ni ngar yunʼuyew gubin banʼen, me non ngorow ni morngaʼagen fapi Jews—

3 U tomuren ni kan gatheayraed, nge fare nam nu Jerusalem, ma boʼor e piʼin ni bay ni fekraed ni kalbus iyaen nga Babylon, ma rogon e ngiyalʼ nib mʼag u waenʼ fare Somoel, e bay kur suloed riy bayay, arragon, rriyulʼ yira chuwegraed u kalbus; ma tomuren ni kan sulwegraed u kalbus ma bay kur suloed bayay nga dakean e nam nib milsuwon ngoraed.

4 Arragon, rriyulʼ ni nelʼ miriʼay e duw ko ngiyalʼ ni chuw e chitamag u Jerusalem, ma baʼ ba profet ni bayi chuguliy Somoel ni Got u fithikʼ fapi Jews—riyulʼ, ba Messiah, ara, ngan pingeg i yoeg min gaʼar, Tathapeg ko fayleng.

5 Ma ki weliy morngaʼagen fapi profet, ni kub yoʼor i yaed niki i micheg e pinnʼey, ni morngaʼagen ere Messiah ney, ni ireray ni ke weliy morngaʼagen, ara re Tabiyul ney ko fayleng.

6 Ere, gubin e gidiiʼ ma kar mul gaed ka ranoed ra awgaed nga ba dodow ni kar malog gaed u fithikʼ e minaenʼ, ma faʼanra nge yog ni ngar thap gaed ma thingar tagaʼ gaed ngakʼ ere Tabiyul ney.

7 Ma kinon nibe weliy morngaʼagen ba profet thingari yib u mʼon ko fare Messiah, ni nge yibi yarmiy woʼen fare Somoel—

8 Arragon, ri bay iyaen nibe yoeg u lan wuruʼ e binaw nibe gaʼar: Mu yarmiyed woʼen fare Somoel, ma gimed kʼikʼiyeg e kanawoʼ rokʼ; ya bay beeʼ u fithikʼmed ni damnanged ko miniiʼ; niʼir e bagaʼ ngog ni dab gubung ni nggu pithig togfan e sus rokʼ. Ma boʼor banʼen ni weliy e chitamag ni morngaʼagen e pinnʼey.

9 Ma chitamag e yoeg ni yira tawfe u Bethabara, u wuruʼ yu Jordan; ma ki yoeg ni yira tawfe ko raen; nriyulʼ ni yira tawfe nag fare Messiah ko raen.

10 Ma tomuren ni ke muʼ i tawfe nag fare Messiah ko raen, ma bayi guy me yoloey e chep riy ni ke tawfe nag fare Saaf ku Got, niʼir e ra chuweg e pi denen nu fayleng.

11 Me yibi buch u tomuren ni ke muʼ e chitamag i yoeg e pi thin ney, me weliy ngakʼ walageg morngaʼagen fare gospel ni thingar ni machib nag u fithikʼ fapi Jews, nge ku morngaʼagen e mul ko mich ni tay fapi Jews. Ma tomuren ni kar liiʼed fare Messiah ngemʼ, niʼir e bay yib, ere tomuren ni kan liiʼ ngemʼ ma bayi fos ko yamʼ, ma bay yibi mʼug u dakean fare Kan ni Thothup ngakʼ fapi Gentiles.

12 Arragon, riyulʼ ni chitamag e boʼor banʼen ni weliy ni morngaʼagen fapi Gentiles, nge ku morngaʼagen e gidiiʼ ku Israel, ni bay ni tataʼareb nagraed ko gakʼiy ni olive, ni bayi mʼing papaʼngin me garar u dakean e fayleng.

13 Ere, yoeg ni rib tʼuf ni thingar ni powiʼiydaed u fithikʼ e taʼarebaenʼ u taʼabang iyaen ko fare nam nni michmicheg, me muguʼul e thin ni yoeg Somoel, ni bay da garar gaed u dakean gaʼangin yang e fayleng.

14 Me tomuren ni ke garar e gidiiʼ ku Israel u fayleng ma bay kur suloed nga taʼabang bayay; fa, aram ko tomur, u tomuren ni ke yog ngakʼ fapi Gentiles fare Gosple ni poloʼ, ma fayupaʼ i papaʼngin fare ke gakʼiy ni olive, ara tin ni ke magaey ko fapi gidiiʼ ku Israel, e bay ni puthuyraed ko fare ke gakʼiy, ara yibi tamilang laniyaenʼraed ni fare Messiah e ba riyulʼ, niʼir e Somoel roraed nge Tabiyul roraed.

15 Ere tomuren ni ireray rogon e thin ni prophesy nag me weliy e chitamag ngakʼ walageg, nge ku boech banʼen nib yoʼor ni dab gu yoloey nga langgin e kaney e babyor; ya kug muʼ i yoloey boech nib yoʼor ni gube guy nib gaʼfan ngog, nga langgin yug baken e babyor rog.

16 Ma gubin e pinnʼey, ni kug muʼ i weliy morngaʼagen, e ni muguʼuliy u lan e tent, u lan e loway ku Lemuel.

17 Me yibi buch u tomuren ni gag, Nephi, e kug rungʼag gubin e thin rokʼ e chitamag, ni morngaʼagen fapinʼen nni piliyeg e changar rokʼ nge guy, nge fapinʼen ni weliy u dakean gelingin fare Kan ni Thothup, nib gelingin ni yoeg ngakʼ u dakean e mich rokʼ ngakʼ fachaʼ ni Fak Got—ma fachaʼ ni Fak Got e fare Messiah ni bay yib—Gag, Nephi, e kug baʼadag ni gura guy, mug rungʼag, ni nggu nang e pinnʼey, u dakean gelingin fare Kan ni Thothup, niʼir e tawaʼath rokʼ Got ngakʼ gubin e piʼin ni yaed be gay, ni boed rogon ni kakrom nge madaʼ ko ngiyalʼ ni bay yibi mʼug ngakʼ gubin e gidiiʼ.

18 Ya ire taʼareb rogon fowap, nge dabaʼ, nge gubinfen; ma kan bing e woʼ ngakʼ gubin e gidiiʼ ni aram ko sommʼon nni sunmiy e fayleng, ni faʼan yaedra keruʼuy e denen roraed miyaed yib ngakʼ.

19 Ya chaʼan ra i gay e ra pirʼeg; ma pi llowaenʼ rokʼ Got nib miith e bay ni dag ngoraed, u dakean gelingin fare Kan ni Thothup, ni boed rogon e chiney e ku aram rogon ni kakrom, ni boed rogon ni kakrom, e ku aram rogon ko tin ni bay kiyib e rran nga mʼon; ere, yalen woʼen Somoel e taʼareb ni dar thil.

20 Ere mu tayed u wunʼmed, O pi gidiiʼ ni gubin, ya gubin e pi ngongol romed e yira fekmed riy ko pufthin.

21 Ere, faʼanra kuʼum rinʼed e pi ngongol ni kireb u lan e pi rran romed, min pirʼeg ni gimed ba kireb u tagilʼ e pufthin rokʼ Got; ma dariy banʼen nib alit ni ra yog ni paer rokʼ Got; meʼere thingar ni chuwegmed ni manemus.

22 Ma fare Kan ni Thothup e kepiiʼ matʼawog ni thingar gu weliy e pinnʼey, ma dabiyog ni nggu sabalbalyang nigeg riy.