Diyin bizaad
1 Nephi 1
Ahit’áád Hóyahdi Na’asdzoh

Hide Footnotes

Saad Bik’ehgo Nda’anishí

Nephi Binaaltsoos Áłtséhígíí

Naatʼáanii dóó naʼnitiní nilínę́ędą́ą́ʼ

Lehi dóó beʼesdzáán, Sariah, dóó beʼashiiké dį́įʼgo, (alą́ąjįʼígíí bee hodeesʼáago) éí Laman, dóó Lemuel, dóó Sam, dóó Nephi, daolyéego baa haneʼ. Háálá Lehi diné bibąąhági átʼéii náasjįʼ ádabidoohłíłígíí yee yichʼįʼ yáłtiʼ dóó diné bizééʼ ndeiʼáago bąą, Bóhólníihii Lehi Jerusalemdóó dah didíínééł yidííniid. Baʼáłchíní doo kééhatʼínígi yił yinéełgo tááʼ yiską́. Nephi dóó bikʼisóó Jerusalemgóó Jew dineʼé binaʼasdzooígíí yíká nináskai. Tiʼdahoozniiʼígíí baa haneʼ. Ishmael bitsiʼ danilínígíí yił ahidahidiiʼáázh. Baʼáłchíní doo kééhatʼínígóó yił dah diikai. Doo kééhatʼínígi tiʼdahoozniiʼígíí dóó bichʼįʼ ndahwiisnáʼígíí baa haneʼ. Haitʼáo yíkaiígíí baa haneʼ. Tónteel bąąhdi yíkai. Nephi bikʼisóó ńdadiilteeʼ. Yił hoyííłʼaad, dóó tsin naaʼeeł áyiilaa. Ákweʼé Kéyah Hwiináago yee dahóózhiʼ. Tónteel dóó kéyah ahaʼdeetʼánę́ęjįʼ tséʼnaa niikai, dóó nááná kótʼéego. Díí éí Nephi baa haneʼ bikʼehgo ályaa; éí doodago kótʼáo ádíshní, shí, Nephi, díí naʼasdzooígíí íishłaa.

Wóltaʼii 1

Nephi bidineʼé yaa naʼazogo hahoolzhiizh—Lehi diyinkʼehgo bił áhoodzaago kǫʼ yaatʼiʼgo yiyiiłtsą́ dóó naaltsoos náásgóó baa haneʼii bikáaʼgo yiyííłtaʼ—Diyin God yaa haznih, Messiah doogáałgo yaa hoolneʼ, dóó náásgóó Jerusalem doochxǫǫłgo yaa hoolneʼ—Jew dineʼé atídabiłʼį́į́ ńtʼę́ę́ʼ. Díí tʼah doo Jesus biʼdichíhę́ędą́ą́ʼ 600 yihahą́ądą́ą́ʼ nahalzhiishgo ádahóótʼįįd.

1 Shí, Nephi, amá dóó azhéʼé yáʼátʼéehgo naaʼaashgo, éí bąą shizhéʼé kʼasdą́ą́ʼ tʼáá ałtsoní bił bééhózinígíí yee nashineeztą́ą́ʼ; dóó tʼóó ahayóídi shichʼįʼ nahwiisnáaʼgo shíiníłką́, ákótʼée ndi, Bóhólníihii tʼáá íiyisíí shikʼijídlíigo shíiníłką́; aooʼ, tʼóó ahayóí Diyin God biyáʼátʼéehii dóó bitʼáá aaníinii tʼah doo ííshją́ą́ álnéehii shił bééhózin, éí bąą shíiníłkánígíí nááháasdzogo áshłééh.

2 Aooʼ, díí nináʼásdzohígíí éí shizhéʼé bizaadígíí bikʼehgo áshłééh, éí éiyá Jew dineʼé baa haneʼígíí dóó Egypt dineʼé bizaad éí bikʼehgo áshłééh.

3 Dóó shił bééhózin díí nináʼásdzoh áshłéhígíí éí tʼáá aaníí átʼé; dóó tʼáá shí shílaʼ bee áshłééh; dóó shił béédahózinígíí bikʼehgo áshłééh.

4 Háálá áádóó Zedekiah, Judah binaatʼáanii, tʼóó áłtsé dah neezdáádóó, (shizhéʼé, Lehi, Jerusalemgi tʼéí kééhatʼíí ńtʼę́ę́ʼ); dóó ákweʼé yihahgo tʼóó ahayóí Diyin God yá dahalneʼii niheeskai, niheʼiinaʼ łahgo áńdaahdlééh, éí doodago náásgóó díí kintah ayóó átʼéii Jerusalem doochxǫǫł daaníigo dahalneʼ.

5 Ákohgo áádóó shizhéʼé, Lehi, yigáałgo Bóhólníihii yichʼįʼ sodoolzin, aooʼ, bijéí tʼáá ńtʼę́ę́ʼ yee, bidineʼé yá sodoolzin.

6 Áádóó Bóhólníihii yichʼįʼ sodilzingo, kǫʼ yadiitʼiʼ hadíínáád dóó bidáahgi tsé yikáaʼgi yiizįʼ; dóó ląʼída yiyiiłtsą́ dóó yidiiztsʼą́ą́ʼ; dóó tʼáadoo leʼé yiyiiłtsą́ dóó yidiiztsʼą́ʼígíí biniinaa bitah hodiisnááʼ dóó tʼáá íiyisíí bitah hoditłidgo ábiilaa.

7 Áádóó Jerusalemdi bighangi nádzá; dóó bitsáskʼeh bikáaʼjįʼ ádee iijoolghaal, Iiʼsizíinii dóó tʼáadoo leʼé yiyiiłtsánę́ę naaʼabííłmááz.

8 Dóó Iiʼsizíinii bikʼi hooleʼgo biniinaa, hoł ánááhoodzaa, dóó yáʼąąsh ąą ádzaago yiyiiłtsą́ ndi, dóó Diyin God bikááʼdahʼasdáhí yikááʼ dah sidá jiniizį́į́ʼ, tʼóó ahayóí diyin yá ndaalʼaʼii bináztʼiʼgo biDiyin God yá dahataał dóó yaa dahaniihgo ajiiłtsą́.

9 Áádóó Łaʼ yáʼąąsh biyiʼdę́ę́ʼ adah joogáałgo yiyiiłtsą́, ałníʼníʼą́ągo adinídíín biláahgo bitsʼádiʼńlíidgo yiyiiłtsą́.

10 Dóó hastóí naakitsʼáadah bikééʼ yikahgo ałdóʼ yiyiiłtsą́, sǫʼ yádiłhiłdi dah naaznilígíí bilááh átʼáo bitsʼádaʼdeezdíingo.

11 Dóó adaakai dóó nahasdzáán yikááʼgóó dah diikai; dóó áłtsé yigáłę́ę shizhéʼé yaa níyá dóó yidááhdóó yiizįʼ, dóó naaltsoos léiʼ beiníʼą́, dóó yídííłtah bidííniid.

12 Áádóó yiʼniiłtaʼgo, Bóhólníihii biiʼSizíinii hwiiʼ hooleʼ.

13 Dóó kóníigo, yiyííłtaʼ: Yíi, yíi, Jerusalem tʼóó baaʼihgo nihił áhodoonííł, háálá tsʼídá aláahdi joodláhígíí nihitsʼą́ą́ʼ yiiłtsą́! Aooʼ, dóó shizhéʼé ląʼída Jerusalem bídéétʼiʼígíí yiyííłtaʼ—éí doochxǫǫłgo, dóó yił kéédahatʼíinii ląʼída bééshhał yee dadínóonééł, dóó ląʼída Babylonjígo dahoʼdisnah.

14 Áádóó shizhéʼé tʼóó ahayóí tʼáadoo leʼé tsʼídá ayóó ádaatʼéego dóó baa dahaʼniihgo yaa ííłtaʼ dóó yiyiiłtsą́, Bóhólníihii tʼóó ahayóí tʼáadoo leʼé yee yichʼįʼ yááłtiʼ; díigi átʼáo: O Bóhólníihii Diyin God Ayóó Átʼéii, tsʼídá ayóó átʼéii dóó baa haʼniihii ninaanish! Yáʼąąsh aghánáhóóʼá sínídáadi, dóó neʼadziilii, dóó niyáʼátʼéehii, dóó neʼajoobaʼii nihookááʼ dineʼé tʼáá ałtso beinílá; dóó, jiiníbaʼígíí biniinaa, naa heeskaígíí doo nitsʼą́ą́ʼ yóó ahidookah da!

15 Dóó kótʼáo shizhéʼé biDiyin God yaa haznih; aooʼ, Bóhólníihii bił ííshją́ą́ áyiilaaígíí, tʼáadoo leʼé yiyiiłtsánígíí biniinaa, bitsʼíís dóó biyiʼsizíinii bił hóózhǫǫd, dóó bijéí tʼáá ńtʼę́ę́ʼ biiʼ hadéébįįd.

16 Dóó kʼad shí, Nephi, doo tʼáá ałtso tʼáadoo leʼé shizhéʼé nááyíizo yę́ę áshłéeh da, háálá yiyiiłtsánę́ę dóó bił áhoodzaa yę́ę tʼóó ahayóí nááyíizogo biniinaa; dóó tʼóó ahayóí náásgóó ádahodooníłígíí dóó baʼáłchíní yee yichʼįʼ hahaasdzíʼígíí ałdóʼ nááyíizo, eii é, doo tʼáá ałtso nááhídéesoh da.

17 Ndi shíiníłkánígíí éí baa hodeeshnih. Jó, béésh óola éí tʼáá shí shílaʼ bee íishłaaígíí bikáaʼjįʼ, shizhéʼé baa haneʼ áłtsʼíísígo ahiih nááháasdzogo áshłééh; ákohgo, shizhéʼé baa haneʼ áłtsʼíísígo ahiih nááháasdzo íishłaago índa sheʼiinaʼ baa hashneʼgo ádeeshłííł.

18 Éí bąą, díí nihił bééhodoozįįł nisin, aooʼ, Bóhólníihii ląʼída tsʼídá nizhónígo Jerusalem doochxǫǫłígíí shizhéʼé, Lehi yił ííshją́ą́ áyiilaaígíí bikʼehgo, diné yitahgóó nikidiiyá, dóó náásgóó ádahodooníłígíí yaa ahoʼniilneʼ dóó yiyiiłtsánę́ę dóó yidiiztsʼą́ʼígíí yee yił ahoʼniilneʼ.

19 Áádóó tʼáadoo leʼé yee yichʼįʼ yááłtiʼígíí biniinaa Jew dineʼé atídabiilaa; háálá bąąhági átʼéii yaa naakaiígíí dóó tsiʼnaakaiígíí tʼáá aaníí yaa yáłtiʼgo; dóó tʼáadoo leʼé yiyiiłtsánígíí dóó yidiiztsʼą́ʼígíí, dóó ałdóʼ tʼáadoo leʼé naaltsoos biyiʼ yaa ííłtaʼígíí, índa Messiah doogáłígíí, dóó ałdóʼ nahasdzáán bikááʼdóó yá nináʼídláhígíí yaa nahasneʼ.

20 Dóó Jew dineʼé díí deidiiztsʼą́ąʼgo hachʼįʼ bá dahóóchįįd; aooʼ, ałkʼidą́ą́ʼ Diyin God yá dahalneʼii ádayiilaaą́ągi átʼáo, éí éí chʼídeineeskaad, dóó tsé yee ndeistseed; dóó hódóʼ dahwidiyiilyééł daniizį́į́ʼ. Jó ndi, shí, Nephi, nihił ííshją́ą́ ádeeshłííł Bóhólníihii bibee ajoobaʼ tʼáá ałtso yikʼidadiilniiʼígíí yaa yiizlá, háálá bedaʼoodląʼ chodayoołʼínígíí binahjįʼ adziilii yee náásgóó yisdáhidookah.