9. Aonaba n te O Tetemanti

Maunga are Ararata Te tabo are e ataaki n te aba are e tiku iai ana ake Noa (KB 8:4). E aki ataaki raoi te tabo.

Ura Ana moan maeka Aberaam, i rarikin win te Iuberetiti, ike e kuri n riki bwa te karea ae te aomata, e noora ana anera Iehova, ao e reke irouna te Urim ao Tamim (KB 11:28–12:1; Abe. 1; 3:1). (E riai naba n ataaki bwa e kona ni iai riki te tabo teuana ibukin Ura i Metobotamia meang.)

Bwaburon, Bwabera (Tina) E moan maekanaki iroun Kuti, are natin Am, ao iroun Nimrota. Te aono are a moan mena iai Iaretaite ni bongin te Taua are Bwabera n aba ake aoraoi i Tina. Rimwi bon kautun ana burawinti Bwaburonia ao aia tabo ni maeka uean Bwaburonia, ni ikotaki ma Nebukaneta are e uotiia nako Iutaia aika bati bwa ana bure nakon te kaawa aio i mwin uruakakin Ierutarem (587 I.K.), I-Iutaia a tiku n tauaki i Bwaburon i nanon 70 te ririki ni karokoa ana bong te Uea ae Tairati, are e kariaia I-Iutaia bwa a na oki nako Ierutarem ni manga katea aia tembora. Taniera are te Burabeti e maeka naba ikai i aan Nebukaneta, Beretiata, ao Taraiati Ⅰ (KB 10:10; 11:1–9; 2Uea 24–25; Iere. 27:1–29:10; Etek. 1:1; Tani. 1–12; Omi. 1:22; Ita 1:33–43).

Tutian (Tutia) Kautun kawan Uean Botia i aan ana tautaetaka Tairati Ⅰ (Tairati te Korakora). Eketieti(Aatueruti), ao Atatokititi, Ana maeka te Uea n Aina ae Etita, are ninikoriana ao ana onimaki e kamaiuia Iutaia. Taniera ao i mwina Neemia a beku ikai (Neem. 1:1; 2:1; Etita 1:1; Tani. 8:2).

Aba ae Aoraoi i Rura Tiateraka, Metiaka, ao Abete-neko a teweaki nako nanon te tabo ni kanaiai ae uramwaaka ngke a rawa n taromauria te bouananti ae koora are e karaoia Nebukaneta; Natin te Atua e kawakiniia, ao a otinako man te tabo ni kanaiai n akea ikoakiia (Tani. 3).

Aturia Atura bon moan kautun kawan Aturia, i mwina Ninewe. Taan tautaeka i Aturia aika Tiaremanetera Ⅴ ao Tarekon Ⅱ a taua Abanuean Iteraea ake i Meang ao a uotia nako baronga ake tebwina bwa aia bure n 721 I.K. (2Uea 14–15; 17–19). Aturia bon te bwai ni kakamaku nakon Iuta ni karokoa 612 I.K., ngke e tauaki Aturia iroun Bwaburon.

Ninewe Kautun kaawan Aturia. Aturia e buakana te aba ae Iuta n ana tai n tautaeka Etekia ao n ana tai ni mwakuri ni ibuobuoki te burabeti ae Itaia. Ierutarem, kautun kaawan Iuta, e kamimi kamaiuana ngke a tiringaki 185,000 tautian Aturian iroun te anera (2Uea 19:32–37). Te Uea e tuanga te burabeti ae Iona bwa e na wetea te kaawa aei bwa a nakon te rairannano (Iona 1:2; 3:1–4).

Aran Aberaam e maeka ikai n te tai ae aki maan i mwain ae nako Kanaan. Taman Aberaam ao tarina a tiku ikai. Rebeka (buun Itaaka), ao Rakera, Rea, Birea, ao Tirebwa (buun Iakobwa), a roko man te aono aei (KB 11:31–32; 24:10; 29:4–6; Abe. 2:4–5).

Karekemiti Bwarao Nekoe konaaki ikai iroun Nebukaneta, are toki iai mwaakan Aikubita i Kanaan (2Rong. 35:20–36:6).

Titon Te kaawa aei e bon kateaki iroun Titon, tibun Am te mwaane, ao bon aia kabanea ni kaawa mai meang I-Kanaan (KB 10:15–20). Bon mwengan Ietebera, are e karokoa taromaurian Bwaara i Iteraera (1Uea 16:30–33).

Turo Aio bon kaawan Turia ae kakawaki n te iokinibwai ao te matabaiawa. Airam ae te I-Turo e kanakoa te tiira ao te koora ao taan mwakuri mwaane bwa a na buoka Toromon ni katea ana tembora (1Uea 5:1–10, 18; 9:11).

Tamateko Aberaam e kamaiua Rota n uakaan ma te tabo aei. Bon boton kaawan Turia. N ana tai n tautaeka te Uea ae Tawita, I-Iteraera a taua te kaawa. Eria e kabira Ataera bwa e na uea i aon Tamateko (KB 14:14–15; 2Tamu. 8:5–6; 1Uea 19:15).

Kanaan Aberaam, Itaaka, Iakobwa, ao kanoaia a anganaki te aba aio bwa abaia n aki toki (KB 17:8; 28).

Maunga are Tinai (Oreba) E taetae te Uea nakon Mote man te kai ae buakoako ae ura (Otin. 3:1–2). E anganaki Mote te Tua ao Tua ake Tebwina (Otin. 19–20). E taetae te Uea nakon Eria n te bwana ae maraara n rau (1Uea 19:8–12).

Etion-kebera Te Uea ae Toromon e kaba te “nna ni kaibuke” i Etion-kebera (1Uea 9:26). Tao n te matabaiawa aei are uean Tieba te aine e roko bwa e na nooria, i mwin are e ongo tanoatan taekan Toromon (1Uea 10:1–13).

Aikubita Aberaam e mwananga nako ikai ibukin te rongo ae korakora i Ura (Abe. 2:1, 21). Te Uea e tuanga Aberaam bwa e na reireinia I-Aikubita te bwai are e tia ni kaotia nakoina (Abe. 3:15). I mwin kabonakoan Iotebwa irouia tarina nakon te tautoronaki (KB 37:28). Iotebwa e riki bwa te tia tautaeka n ana auti Botibara ikai. E teweaki nako nanon te uma ni kaikain. E kabwara nanon min Bwarao ao e anganaki te nakoa ni mataniwi i Aikubita. Iotebwa ao tarina a ikotaki. Iakobwa ao ana utu a mwaing nako ikai (KB 39–46). Natin Iteraea a maeka i Koten n aia tai n tiku i Aikubita (KB 47:6).

A rikirake mwaitiia I-Iteraera “ao a rikirake n rangi ni korakora”, ngkanne a katukaki n toronaki irouia kaain Aikubita (Otin. 1:7–14). I mwin aoraki aika a kamamate aika bati ao Bwarao e a kariaia Iteraera bwa a na kitana Aikubita (Otin. 12:31–41). E kairaki Ieremia nako Aikubita (Iere. 43:4–7).

Kabetora (Kirete) Abaia ngkoa I-Minoa.