11. Te Abe ae Tabu ni Bongin te Nu Tetemanti

Turo ao Titon Iesu e kabotaua Koratin ao Betetaita nakon Turo ao Titon (Mat. 11:20–22). E kamarurunga natin ainen Tientaire ae te aine (Mat. 15:21–28).

Maunga ni Bitaki Iesu e onikaki imatan Betero, Iakobo, ao Ioane, ao a karekei kiingin te abanuea (Mat. 17:1–13). (Tabeman a kakoaua te Maunga ni Bitaki bwa bon te Maunga are Oman; tabeman a kakoaua bwa bon te Maunga are Tabor.)

Kaitareia Biribi Betero e kaota koauan ae Iesu bon te Kristo ao e beritanaki nakoina kiingin te abanuea (Mat. 16:13–20). Iesu e a kaman taekina oin matena ao Mangautina (Mat. 16:21–28).

Aonon Kariraia Iesu e kabanea angiin maiuna ao Ana mwakuri ni ibuobuoki i Kariraia (Mat. 4:23–25). Ikai are E anga te Kabwarabwara i aon te Maunga (Mat. 5–7); e kamarurunga te rebera (Mat. 8:1–4); ao e rineia, e katabuia ao e kanakoia Abotoro ake Tengaun ma Uoman, ao mai buakoia bon ti Iuta Itekariota ae tiaki te I-Kariraia (Mar. 3:13–19). I Kariraia Kristo are tia ni uti e kaoti nakoia Abotoro (Mat. 28:16–20).

Naman Kariraia, rimwi riki e aranaki bwa Naman Tiberia Iesu e anga reirei man ana boti Betero (Ruka 5:1–3) ao e wetea Betero, Anterea, Iakobo, ao Ioane bwa taan akawaia aomata (Mat. 4:18–22; Ruka 5:1–11). E katoka naba te angibuaka (Ruka 8:22–25), e anga reirei n taian taetae ni kaikonaki man te boti (Mat. 13), nakonako i aon taari (Mat. 14:22–32), ao e kaoti nakoia Ana reirei i mwin Mangautina (Ioane 21).

Betetaita Betero, Anterea, ao Biribo a bungiaki i Betetaita (Ioane 1:44). E nako Iesu n ti ngaia ma Abotoro i rarikin Betetaita. Aomata aika uanao a rimwina, ao E kamwarakeia 5,000 (Ruka 9:10–17; Ioane 6:1–14). Ikai are Iesu e kamarurunga te mwaane ae mataki (Mar. 8:22–26).

Kaberenaum Aio bon mwengan Betero (Mat. 8:5, 14). I Kaberenaum, are e aranna Mataio bwa “oin ana kaawa” Iesu, e kamarurunga te nakibaina Iesu (Mat. 9:1–7; Mar. 2:1–12), katoka aorakin ana tia mwakuri mataniwiin are tebubua, kamrurunga tinan buun Betero (Mat. 8:5–15), wetea Mataio bwa e na riki bwa temanna Ana Abotoro (Mat. 9:9), kaurea matan te mataki, kanakoa te taimonio (Mat. 9:27–33). kamarurunga te aomata ae mate baina n te Tabati (Mat. 12:9–13), e anga te kabwarabwara i aon te kariki ni kamaiu (Ioane 6:22–65), ao e kariaia bwa e na kabwaka te angabwai, n tuanga Betero bwa e na karekea te mwane man win te ika (Mat. 17:24–27).

Maketara Aio bon mwengan ngkoa Maria are te I-Maketara (Mar. 16:9). Iesu e roko ikai i mwin kamwarakeaia 4,000 (Mat. 15:32–39), ao Bwaritaio ao Tarukaio a bubuti bwa E na kaota nakoia te kanikina mai karawa (Mat. 16:1–4).

Kana Iesu e bita te ran nakon te wain (Ioane 2:1–11) ao e kamarurunga natin ana mataniwi te uea are e mena i Kaberenaum (Ioane 4:46–54). Kana bon mwengan ngkoa Natanaera (Ioane 21:2).

Natareta Te katanoata nakon Maria ao Iotebwa e karaoaki i Natareta (Mat. 1:18–25; Ruka 1:26–38; 2:4–5). I mwin okiia mai Aikubita, Iesu E tiku ikai n ataeina ao kairakena (Mat. 2:19–23; Ruka 2:51–52), E katanoata bwa bon ngaia te Mesia, ao e aki butimwaeaki irouia ake oin Ana aomata (Ruka 4:14–32).

Ieriko Iesu e angan te aomata ae mataki te nooraba (Ruka 18:35–43). E amwarake naba ma Takaio, “mataniwiia taan rikoi ana mwane te uea” (Ruka 19:1–10).

Betabara Ioane te Tia Bwabetito e kakoaua bwa ngaia bon “bwanan temanna are e taetae n te rereua” (Ioane 1:19–28). Ioane e bwabetitoa Iesu n te Karaanga are Ioretan ao e kakoaua bwa Iesu bon Ana Tiibu te Teei te Atua (Ioane 1:28–34).

Rereuan Iutea Ioane te Tia Bwabetito e kabwarabwara n te rereua aio (Mat. 3:1–4), ike e aki mamatam iai Iesu 40 te bong ao e kaririaki (Mat. 4:1–11).

Emmauti Kristo are tia n uti e nakonako n te kawai nako Emmauti ma uoman Ana reirei (Ruka 24:13–32).

Betebake Uoman ana reirei a uota te aati nakon Iesu are E toka i aona n rin ma te tokanikai i Ierutarem (Mat. 21:1–11).

Betania Aio bon mwengan Maria, Mareta, ao Rataro (Ioane 11:1). Maria e ongo ana taeka Iesu, ao Iesu e taetae nakon Mareta ibukin rinean te “itera ae raoiroi” (Ruka 10:38–42); Iesu e kauta Rataro man te mate (Ioane 11:1–44); ao Maria e kabira waen Iesu (Mat. 26:6–13; Ioane 12:1–8).

Beterem Iesu e bungiaki ao e kaweneaki ni nen kanaia maan (Ruka 2:1–7); anera a uota rongorongon bungiakin Iesu nakoia taan kawakin tiibu (Ruka 2:8–20); a kairaki taan rabaka n te itoi nakon Iesu (Mat. 2:1–12); ao Erote e tiringiia ataei (Mat. 2:16–18).