13. Eb’ lix b’eenik li Apostol aj Pablo jo’ taqlanb’il aj k’anjel

Gasa Laj Felipe kijultikan aatin chirix li Kristo ut kixkub’si xha’ jun moos aj Etiopia naq yoo chi b’eek toj Gasa (Hech. 8:26–39).

Jerusalen Chi’ilmanq li reetalil ch’och’ 12 re xnawb’al k’a’ru kik’ulman Jerusalen.

Jope Laj Pedro kiril sa’ jun li k’utb’esinb’il matk’ naq li Dios xk’e li maatan re li jalb’a-k’a’uxlej reheb’ laj Gentil (Hech. 10; 11:5–18). Laj Pedro kixwaklesi li xTabita sa’ xyanqeb’ chaq li kamenaq (Hech. 9:36–42).

Samaria Laj Felipe kik’anjelak Samaria (Hech. 8:5–13), ut laj Pedro ut laj Jwan moqon ke’jultikan aatin arin (Hech. 8:14–25). Chirix naq ke’xk’e li maatan re li Santil Musiq’ej, laj Simon aj tuul kixsik’ xloq’b’al li maatan a’in rik’ineb’ (Hech. 8:9–24).

Cesarea Arin, chirix naq jun li anjel kirula’ani jun centurion aj Kornelio xk’ab’a’, laj Pedro kixkanab’ a’an chi kub’siik xha’ (Hech. 10). Arin laj Pablo ki’aatinak re xkolb’al rib’ chiru laj Agripa (Hech. 25–26; chi’ilmanq ajwi’ JS—R 1:24–25).

Damasko Li Jesus kixk’ut rib’ chiru laj Sawlo (Hech. 9:1–7). Chirix naq laj Ananias kixk’e wi’chik chi ilok laj Sawlo, a’an kikub’siik xha’ ut kixtikib’ lix k’anjel (Hech. 9:10–27).

Antiokia (sa’ Siria) Kristiano kiyeeman reheb’ li tzolom xb’een wa arin (Hech. 11:26). Laj Agabo kixye jo’ profeet naq taawanq we’ej (Hech. 11:27–28). Kiwan li nimla jachok-ib’ aran Antiokia chirix xsetb’al xtz’uumal li tz’ejwalej (Hech. 14:26–28; 15:1–9). Sa’ Antiokia laj Pablo kixtikib’ li xkab’ xtaqlanb’il k’anjel rochb’een laj Silas, laj Bernabe, ut laj Judas Barsabas (Hech. 15:22, 30, 35).

Tarso Xtenamit laj Pablo; laj Pablo kitaqlaak aran xb’aaneb’ li komon re xkolb’al lix yu’am (Hech. 9:29–30).

Chipre Chirix naq ke’rahob’tesiik, wankeb’ laj santil paab’anel li ke’eelelik toj sa’ li ch’och’ a’in sa’ xyi li palaw (Hech. 11:19). Laj Pablo kinume’ Chipre sa’ li xb’een xb’eenik jo’ taqlanb’il aj k’anjel (Hech. 13:4–5), ut jo’kan ajwi’ ke’xb’aanu moqon laj Bernabe ut laj Markos (Hech. 15:39).

Pafos Laj Pablo kixmajewa jun aj tuul arin (Hech. 13:6–11).

Derbe Laj Pablo ut laj Bernabe ke’xjultika li evangelio sa’ li tenamit a’in (Hech. 14:6–7, 20–21).

Listra Naq laj Pablo kixk’irtesi jun li winq yeeq roq, a’an rochb’een laj Bernabe ke’k’ule’ jo’ dioseb’. Laj Pablo kikutiik chi pek ut kikanab’aak chanchan kamenaq, a’ut kiwakli ut ki’ok wi’chik chi jultikank aatin (Hech. 14:6–21). A’in xtenamit laj Timoteo (Hech. 16:1–3).

Ikonio Sa’ li xb’een xtaqlanb’il k’anjel, laj Pablo ut laj Bernabe ke’jultikan aatin arin ut kiyeechi’iman xkamsinkileb’ chi kutinb’il pek (Hech. 13:51–14:7).

Laodicea ut Kolosas Laodicea a’an jun ruq’ li Iglees kiwulak wi’ laj Pablo ut kixk’ul li hu taqlanb’il xb’aaneb’ (Kol. 4:16). A’an ajwi’ jun reheb’ li wuqub’ chi tenamit eetalinb’il sa’ li hu Apokalipsis (eb’ li jun ch’ol chik a’aneb’ Efeso, Esmirna, Pergamo, Tiatira, Sardes, ut Filadelfia; chi’ilmanq Apok. 1:11). Kolosas 18 kiloom xnajtil rik’in Laodicea sa’ xjayal li releb’aal saq’e. Laj Pablo kixtz’iib’a li hu rik’ineb’ laj santil paab’anel li wankeb’ aran.

Antiokia (sa’ Pisidia) Sa’ li xb’een xtaqlanb’il k’anjeleb’, laj Pablo ut laj Bernabe ke’xk’ut chiruheb’ laj Judio naq li Kristo kichal chaq rik’in li riyajil laj David. Laj Pablo kixyeechi’i li evangelio reheb’ laj Israel, ut chirix a’an reheb’ laj Gentil. Laj Pablo ut laj Bernabe ke’rahob’tesiik ut ke’isiik chaq (Hech. 13:14–50).

Mileto Naq kiwan arin sa’ li rox xtaqlanb’il k’anjel, laj Pablo kixtijeb’ li xb’eenil re li Iglees naq eb’ li “josq’ aj xojb’” te’ok sa’ li teep chi karneer (Hech. 20:29–31).

Patmos Laj Jwan kiwan choq’ preex sa’ li ch’och’ a’in sa’ xyi li palaw naq kixk’ul li k’utb’esinb’il matk’ li wan anajwan sa’ li hu Apokalipsis (Apok. 1:9).

Efeso Laj Apolo kijultikan aatin arin rik’in wankilal (Hech. 18:24–28). Laj Pablo, sa’ li rox xtaqlanb’il k’anjel, kik’utuk aatin sa’ Efeso chiru wiib’ chihab’, ut kixjaleb’ xch’ool naab’al (Hech. 19:10, 18). Arin kixk’e li maatan re li Santil Musiq’ej rik’in xk’eeb’al li uq’ej (Hech. 19:1–7) ut kixb’aanu k’iila sachb’a-ch’oolej, jo’ risinkileb’ li maa’us aj musiq’ej (Hech. 19:8–21). Arin eb’ li neke’loq’onink re li xArtemisa ke’xwaklesi jun nimla choqink chirix laj Pablo (Hech. 19:22–41). Jun raqal li hu Apokalipsis b’eresinb’il re li Iglees sa’ Efeso (Apok. 1:11).

Troada Naq kiwan arin laj Pablo sa’ li xkab’ xb’eenik jo’ taqlanb’il aj k’anjel, kiril sa’ matk’ jun li winq aj Macedonia li yoo chixpatz’b’al xtenq’ankil (Hech. 16:9–12). Naq kiwan arin sa’ li rox xtaqlanb’il k’anjel, laj Pablo kixwaklesi laj Ewtiko sa’ xyanqeb’ chaq li kamenaq (Hech. 20:6–12).

Filipos Laj Pablo, laj Silas, ut laj Timoteo ke’xjal xch’ool jun li ixq xLidia xk’ab’a’, ke’risi jun li maa’us aj musiq’ej, ut ke’rape’ (Hech. 16:11–23). Ke’tenq’aak chalen chaq sa’ choxa re te’xkol rib’ chiru li tz’alam (Hech. 16:23–26).

Atenas Laj Pablo, naq wan sa’ li xkab’ xtaqlanb’il k’anjel aran Atenas, kijultikan aatin sa’ li Tzuul re Marte (Areopago) chirix li “dios ink’a’ nawb’il ru” (Hech. 17:22–34).

Korinto Laj Pablo xko’o Korinto sa’ li xkab’ xtaqlanb’il k’anjel, ut kikana aran rik’in laj Akila ut li xPriscila. Kijultikan aatin aran ut kixkub’siheb’ xha’ naab’al (Hech. 18:1–18). Chalen chaq Korinto laj Pablo kixtz’iib’a lix hu rik’ineb’ laj Romano.

Tesalonika Laj Pablo kijultikan aatin arin sa’ li xkab’ xb’eenik jo’ taqlanb’il aj k’anjel. Li jun ch’uut chi taqlanb’il aj k’anjel xkoheb’ Berea chirix naq eb’ laj Judio ke’xyeechi’i xrahob’tesinkileb’ (Hech. 17:1–10).

Berea Laj Pablo, laj Silas, ut laj Timoteo ke’xtaw li chaab’il aamej re te’xtzoleb’ sa’ li xkab’ xb’eenik laj Pablo jo’ taqlanb’il aj k’anjel. Eb’ laj Judio aj Tesalonika ke’xtaaqeheb’ ut ke’xrahob’tesiheb’ (Hech. 17:10–13).

Macedonia Laj Pablo kik’utuk aatin arin sa’ li xkab’ ut sa’ li rox xb’eenik (Hech. 16:9–40; 19:21). Laj Pablo kixb’antioxi lix chaab’ilaleb’ chi k’ehok eb’ laj santil paab’anel aj Macedonia, li ke’k’ehok k’a’aq re ru re a’an ut reheb’ laj santil paab’anel li neb’a’eb’ aran Jerusalen (Rom. 15:26; 2 Kor. 8:1–5; 11:9).

Melita (Malta) Laj Pablo kikana sa’ li ch’och’ a’in sa’ xyi li palaw naq kisach lix jukub’ naq yoo chi xik Roma (Hech. 26:32; 27:1, 41–44). Kitiwe’ xb’aan jun li k’anti’ chi maak’a’ kixk’ul, ut kixk’irtesi naab’al li yaj li wankeb’ Melita (Hech. 28:1–9).

Roma Laj Pablo kijultikan aatin arin chiru wiib’ chihab’ naq ramb’il chi elk sa’ rochoch (Hech. 28:16–31). Jo’kan ajwi’ kixtz’iib’aheb’ li hu rik’ineb’ laj Efesio, eb’ laj Filipenses, ut eb’ laj Kolosenses, ut re laj Timoteo ut laj Filemon naq wan sa’ tz’alam aran Roma. Laj Pedro kixtz’iib’a li xb’een xtaqlanb’il hu chalen chaq “Babilonia,” li k’oxlanb’il naq a’an Roma, ka’ch’in chik chirix naq laj Neron kixrahob’tesiheb’ laj Kristiano sa’ 64 chihab’ xyo’lajik li Kristo. Nak’oxlaman naq laj Pedro ut laj Pablo ke’kamsiik sa’ xk’ab’a’ xpaab’aaleb’ arin.