Fuafua le Tolauapiga
“Ia outou faatulaga tatau outou lava; ia saunia mea manaomia uma” (MF&F 109:8).
O le tolauapiga e tatau ona faigofie ma maua ai e tamaitai talavou le taimi e aafia ai i foafoaga a le Atua ma “ia filemu” (MF&F 101:16). O tolauapiga e le tatau ona faamatalaina pe aofia ai faatinoga, o mea e tutupu, po o teuteuga e faalavelave ai mai le faamoemoega o le tolauapiga. Ia aloese mai foi i aafiaga lea e ono faaseseina ai tamaitai talavou i lagona malolosi e pei o le faanoanoa po o le ofo mo le lagonaina o le Agaga. O gaoioiga talafeagai, faafiafia, ma fegalegaleaiga lelei o le a valaaulia ai le Agaga Paia.
O le tolauapiga e tatau ona faia i se nofoaga filemu lea e mafai ai e tamaitai talavou ona lagona le Agaga, faasoa molimau, aoao tomai, ma maua le fiafia.
O le tiutetauave o taitai matutua ma autalavou ina ia iloilo ma le faaeteete ma tulimatai faamatalaga uma o le tolauapiga ma manaoga ma le saogalemu o tagata auai uma.
-
10.8.6 Tolauapiga a Tamaitai Talavou
-
10.8.9 Faatupeina o Gaoioiga ma Mea e Fai
-
13.2.4 Tulaga Faatonuina
-
13.6.8 Gaoioiga Faasu’e Tupe
-
13.6.9 Inisiua
-
13.6.12 Gaoioiga e Faasoloatoa ma le Po
-
13.6.13 Faatagaga a Matua
-
13.6.17 Totogiina o Fale e Le o Ni Fale o le Ekalesia mo Gaoioiga
-
13.6.20 Lapataiga mo le Saogalemu ma le Tali Atu ma le Lipotia o Faalavelave
-
13.6.24 Femalagaaiga
Ia faaaofia tamaitai talavou uma i tiutetauave ma tofiga o le tolauapiga (tagai i le Tusitaulima 2, 3.3.4). A o maua ai e tamaitai talavou ia avanoa e auauna atu ai, kuka, faamama, faatulaga, ma taitai, o le a latou aoao tomai faalefaalapotopotoga ma faaletaitai lea o le a faaauau pea ona faamanuia ai o latou aiga ma le Ekalesia. Ia mautinoa ua faaaogaina mataupu faavae o sauniuniga faaleagaga ma le taitaiga e faapei o Keriso ma auaunaga i tulaga uma o le fuafuaina.
Filifili se Nofoaga ma le Aso o le Tolauapiga
O le a eseese nofoaga o le tolauapiga a Tamaitai Talavou e tusa ai ma la outou eria ma manaoga. E masani lava, e faia tolauapiga i se nofoaga i fafo i se nofoaga saogalemu e ese mai le aiga. Tusa lava poo a nofoaga, o le tolauapiga e tatau ona faia i se nofoaga filemu lea e mafai ai e tamaitai talavou ona lagona le Agaga, faasoa molimau, aoao tomai, ma maua le fiafia. I eria lea e faigata ai pe taofia ai ona tolauapi i le po atoa, o le fuafuaina o se tolauapiga i le ao e mafai ona avea o se isi [fuafuaga]. O tolauapiga i le ao e mafai ona faia i se nofoaga e latalata i fale o tamaitai talavou, e pei o paka, eria o pikiniki, po o tua o se fale.
O tolauapiga e mafai ona na o tamaitai talavou mai i la outou uarota e faaaofia ai, pe e mafai ona faaaofia ai tamaitai talavou uma i le siteki. E mafai ona e fuafuaina se tolauapiga mo soo se taimi o le tausaga, ae ia mautinoa ia mafaufau i le tau, vaitau, ma le ituaiga o tolauapiga e manao oe ma tamaitai talavou ia aafia ai. I tulaga sololelei, o tolauapiga a Tamaitai Talavou e faa-tasi ona faia i le tausaga, ae atonu e manaomia ona itiiti le tupu soo e taulimaina ai manaoga o le lotoifale. O le tolauapiga masani e le umi atu i le lima aso, e le tatau ona faia i le aso Sapati, ma e masani lava e le faia i le aso Gafua. Ia mautinoa o la outou tolauapiga e mulimuli i tulafono uma o le lotoifale mo tolauapiga o le po atoa mo le autalavou.
Fuafua Sini o le Tolauapiga
A o e fefautuaai ma isi ma filifili sini mo la outou tolauapiga, fesili ifo ma le agaga tatalo ia te oe lava le fesili lenei: O le a le mea e finagalo le Tama Faalelagi ia tupu i olaga o tamaitai talavou o se taunuuga o lenei tolauapiga? O le tali o le fesili lenei e tatau ona avea ma lau sini o le tolauapiga. O lenei sini o le a taiala ai isi uma faaiuga e te faia e uiga i le tolauapiga.
Filifili se Autu o le Tolauapiga
O se autu o le tolauapiga o le a fesoasoani ia te oe e tumau ai le taulai atu i sini o le tolauapiga. O le autu e tatau ona faaleagaga, e faamanatu i tamaitai talavou se mataupu faavae o le talalelei, ma uunaia i latou e ola i tulaga faatauaina a Tamaitai Talavou. O taitai faaleperisitua e tatau ona faamaonia lenei autu ae e te le’i faia fuafuaga e faaaoga ai i le tolauapiga.
O se autu e mafai ona musuia i le:
-
O le autu o le Mutuale faaletausaga.
-
O se Mau.
-
O se faamatalaga mai se perofeta po o se aposetolo.
-
O se viiga.
-
O le tamaitusi Mo Le Malosi o le Autalavou .
Filifili Gaoioiga
“Ou te tuu atu ia te outou se poloaiga, a outou faapotopoto faatasi, ia outou aoao ma faagaeetia le tasi i le isi, ina ia outou iloa le ala tou te faia ai” (MF&F 43:8).
Fefautuaai faatasi ma le au peresitene o Tamaitai Talavou ma taitai matutua ma [taitai] autalavou e fuafua gaoioiga saogalemu, ma anoa o le a ausia ai sini mo le tolauapiga. O gaoioiga sili ona lelei o tolauapiga ua fetuunai i manaoga ma tomai o tamaitai talavou ma mafai ai e i latou ona lagona ma iloa le Agaga ao latou atiae faauoga, faataitai tomai faaletaitai, faalautele a latou taleni, faaleleia lo latou soifua maloloina e ala i gaoioiga faaletino, po o le aoao e uiga i ma saunia mo faalavelave faafuasei.
O nisi o gaoioiga lea e taulimaina ai tuutuuga nei ua lisiina atu i le vaega “Manatu mo Gaoioiga o Tolauapiga” o lenei taiala. Filifili se faapaleniina o gaoioiga faaleagaga, faaagafesootai, faaletino ma le faalemafaufau. O fesili nei e mafai ona fesoasoani ia te oe e iloilo ai a outou gaoioiga na fuafuaina.
-
E faapefea e lenei gaoioiga ona ausia ai la matou sini o le tolauapiga?
-
O a lesona taua o le a aoaoina e tamaitai talavou mai i lenei gaoioiga?
-
O a tomai o le a fesoasoani ai lenei gaoioiga i tamaitai talavou e atiae?
-
O le a faapefea ona faamalosia e lenei gaoioiga ia tamaitai talavou, i o latou fale, ma o latou aiga?
-
Faamata o lenei gaoioiga e i ai le sili atu nai lo le averesi o le tulaga lamatia o gasegase po o manuaga? Pe ua matou faia le lava o fuafuaga e tuuitiitia ai na tulaga lamatia?
I eria lea sa auai ai tamaitai talavou i tolauapiga mo le tele o tausaga, atonu e i ai nisi o gaoioiga, pese, ma aga masani ua faia pea i tausaga taitasi ma ua avea ma tu masani. Toe iloilo ma le faaeteete nei tu masani ia mautinoa ai e talafeagai i latou ma e ausia ai le faamoemoega ma manaoga o le tolauapiga.
O se faataitaiga lenei o se aso masani i se tolauapiga a Tamaitai Talavou. O nisi o gaoioiga o loo lisi atu i lalo atonu e le mafai ona fai i la outou eria. Mulimuli i le Agaga a o e fatuina se faatulagaga o taimi mo lau oe lava tolauapiga o loo fetuunai i au tamaitai talavou ma lou siosiomaga.
Faataitaiga o le Faatulagaga o Taimi mo se Aso Masani i le Tolauapiga
7:00–7:30 Faimalaga i le tolauapiga, po o le taimi e ala ai i le tolauapiga.
7:30–9:00 Saunia ma laulau le ‘aiga o le taeao. Faamama pe a uma le taumafataga.
9:00–9:15 Fai le faigalotu o le taeao, lea e aofia ai se viiga, se mau, ma se tatalo.
9:15–9:30 Fai faaaliga mo gaoioiga ma talanoaina tofiga ma le saogalemu.
9:30–12:00 Auai i gaoioiga: aoao e uiga i le faamamaina o le vai, fesoasoani muamua, ma malutaga o faalavelave faafuasei.
12:00–1:30 Saunia ma laulau le ‘aiga o le aoauli. Faamama pe a uma le taumafataga.
1:30–2:30 Ia maua se taimi filemu mo le suesueina o tusitusiga paia, mafaufau loloto, ma le tusiina o api talaaga e faatatau i se autu faapitoa po o le autu.
2:30–5:00 Auai i gaoioiga: taaloga faavaega, tuuga aau, ma se savali sopo o le natura.
5:00–6:30 Saunia ma laulau le ‘aiga o le afiafi. Faamama pe a uma le taumafataga, ma faamama le tolauapiga.
6:30–7:30 Tuuina atu se faaaliga taleni.
7:30–9:00 Fai se faigalotu o le afiafi ma se sauniga molimau.
9:00–9:30 Tuu atu le taimi mo tatalo ma suesuega faaletagata lava ia.
9:30–10:00 Sauni e momoe. Feiloai taitai matutua ma taitai talavou e iloilo mea na fai o le aso ma sauni mo le aso e sosoo ai.
Faailoa ma Faaaofia Matua
O mea e aoaoina e tamaitai talavou i le tolauapiga e tatau ona faamalosia ai o ia ma faamanuia ai lona aiga. A o e sauni mo le tolauapiga, e mafai ona e valaaulia matua e faasoa atu poo a manaoga faaleagaga ma faamoemoe o ia i latou mo o latou alo tamaitai ma aumai foi ni manatu mo gaoioiga ma tomai o le a manuia ai o latou aiga. Atonu o nisi o matua o loo i ai le atamai ma tomai e tuuina mai. Faailoa i matua ia aso, nofoaga, tau, autu, ma gaoioiga ua e fuafuaina mo le tolauapiga. Faamatala i matua ma tamaitai talavou ia tulaga faatonuina o ofu ma amio o loo manaomia (tagai 1 Timoteo 4:12).
A o lei faia le tolauapiga, fai atu i matua taitoatasi e faatumu ma tuuina mai se Fomu Faatagaga a Matua po o le Tagata o Loo Vaaia ma le Tulaga Faasoifua Maloloina mo tamaitai talavou taitoatasi. E mafai ona maua le fomu i le safety.lds.org. E tatau ona e saunia faamatalaga auiliili e uiga i le tolauapiga ma gaoioiga ina ia tuuina mai e matua le faatagaga mo o latou alo tamaitai e auai ai (tagai Tusitaulima 2, 13.6.13).
Fuafua mo Sauniuniga o le Saogalemu ma Faalavelave Faafuase’i
“Ma a tatou maua se faamanuiaga mai le Atua, e maua i le usiusitai i lena tulafono ua faavae ai i luga” (MF&F 130:21).
O se tasi o au tiutetauave aupito sili ona taua i le tolauapiga o le tausia o le saogalemu faaleagaga o tamaitai talavou, amio, lagona, ma faaletino a o latou o ese mai o latou aiga. O taitaiga ma fegalegaleaiga uma e tatau ona ogatusa ma tulaga faatonuina o le Ekalesia ma faaalia ai uiga faaKeriso. E le gata i lea, e mafai e taitai ona seti tulaga faatonuina faapitoa ma taiala mo le tolauapiga ia mautinoa ai le saogalemu ma fatu ai le siosiomaga e talafeagai e ausia ai sini o le tolauapiga. E tatau i matua ma tagata auai ona malamalama o le auai ai i se gaoioiga e le o se aia tatau ae o se avanoa e mafai ona toe faaleaogaina pe afai latou te faia ni amioga le talafeagai pe latou te tuu foi i latou lava po o isi i se tulaga lamatia. E tatau i taitai ona faailoa atu nei mea ua faamoemoeina i matua ma i latou e auai ma fefautuaai faatasi i auala e talanoaina ai ni popolega e ono tulai.
E manaomia le lava o fuainumera o taitai matutua e auai i le tolauapiga. Ia le itiiti ifo ma le toalua tagata matutua e tatau ona i ai e vaavaaia gaoioiga taitasi. O gaoioiga tetele atonu e manaomia ai le faaopoopo o taitai matutua. E manaomia ona i ai le toatasi po o le sili atu o le usoga o le Perisitua Mekisateko i taimi uma i le aluga o le tolauapiga e tuuina atu le lagolagosua ma le puipuiga (tagai Tusitaulima 2, 13.6.12). O taitai uma, alii ma tamaitai, e tatau ona aloese mai i tulaga e taitoasi ai ma se talavou sei vagana e iloa manino atu e taitai matutua o lata ane.
Ia vave lipoti atu i taitai perisitua soo se mea e tupu po o se manuaga ogaoga e manaomia ai le tele o togafitiga nai lo le fesoasoani muamua autu. O tagata uma e auai i le tolauapiga, aemaise lava o taitai matutua, ua fautuaina ina ia mataalia i soo se faailoga o le sauaina ma tuulafoaiina. O i latou e silafia sauaga faaletino, faalefeusuai, po o le faalelagona e tatau ona lipoti atu le mataupu i pulega faaletulafono tatau ma faafesootai vave le epikopo.
O tamaitai talavou ma taitai e tatau ona saunia mo manaoga faaletino o le tolauapiga. Faaitiitia tulaga lamatia e ala i le usitaia o tulafono o le lotoifale ma tulafono o la outou eria. Ia mautinoa o avanoa i taimi uma ia femalagaaiga ma fesootaiga. Afai e mafai, valaaulia se teine tausimai, fomai po o se isi tagata e i ai tomai o le taua o le fesoasoani muamua e auai i le tolauapiga. Aumai sapalai o le fesoasoani muamua. Tusi se lisi o tuatusi ma numera o telefoni mo fale mo vaaiga o fomai ma tagata e faafesootai i faalavelave faafuasei, e pei o pulega o tulafono i le lotoifale, o afi po o auaunaga o taavale o le falemai.
A o lei faia le tolauapiga, asiasi i matua o tamaitai talavou ma ia iloa manaomia tulaga ese a tamaitai talavou—e aofia ai manaoga o meaai, faafomai, ma faalelagona. Ia mataitu ma le mataalia amioga mea e fai soo pe a manaomia. O talanoaga ma amioga leaga, o taufaasese, ma isi [talanoaga ma amioga] le lelei, le mama, pe le migao e le taliaina. Malamalama ma talia le tiutetauave e fuafua mo le saogalemu ma le soifua manuia o le autalavou i lau tausiga. Faailoa mai, fesootai e uiga i, ma saunia auala e faaitiitia ai tulaga lamatia e te faamoemoe i ai i le tolauapiga.