Te u kau fēfē atu ki he meʻa ʻoku fakahoko ʻi he Siasí?

ʻOku talitali lelei nai ʻa e tokotaha kotoa ki he houalotu sākalamēnití, ngaahi houalotu kehe ʻo e Sāpaté, pea mo e ngaahi polokalama fakasōsiale ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku lahi ha ngaahi founga ke kau atu ai ʻi he siasí, tatau pē ʻi he ngaahi fakatahaʻanga ʻo e Sāpaté pea ʻi he ngaahi meʻa kehé, hangē ko ha ngaahi uiuiʻi mo ha ngaahi kōmiti. ʻOku poupouʻi koe ke kau mai, longomoʻui, mo fekumi ki ha ngaahi faingamālie ke vahevahe ho ngaahi talēnití mo e taukeí ʻaki ʻi hoʻo ngāue ʻi ho uōtí mo e siteikí.

ʻOku fiemaʻu ʻa kinautolu kotoa pē ʻoku kau maí ke fakaʻehiʻehi mei ha fakamoveuveu pe tohoakiʻi ʻa e tokangá ʻa ia ʻoku fepaki pea mo e lotú pe ngaahi taumuʻa kehe ʻo e fakatahá.

Koeʻuhí ʻoku kehekehe lahi ʻa e ngaahi tūkunga ʻo e uooti takitaha mo e tokotaha kotoa pē, ʻoku fealeaʻaki ʻa e kau pīsopé mo e kau palesiteni fakasiteikí mo e Kau Palesitenisī faka-ʻĒliá ke ʻilo ʻa e founga ke tokoni ʻi he ongoʻingofua ʻa e ngaahi tūkunga fakafoʻituituí, hangē ko hono fakaʻaongaʻi ʻo e ngaahi falemālōloó mo e kau atu ki he ngaahi fakatahaʻanga mo e ʻekitivitī kehekehe.

Ko e lahi taha ʻo e ngaahi ngāue ʻi he Siasí mo ha ngaahi ouau lakanga fakataulaʻeiki ʻe niʻihi ʻoku ʻikai fakapatonu ki ha tafaʻaki. ʻOku kau he ngaahi sīpinga ko ʻení ʻa e papitaiso mo e hilifakinima, maʻu ʻo e sākalamēnití, mo hono maʻu ʻo e ngaahi tāpuaki ʻo e lakanga fakataulaʻeikí. Ka neongo ia, ko e fakanofo ki he lakanga fakataulaʻeikí mo e ngaahi ouau ʻo e temipalé ʻoku maʻu ia ʻo fakatatau mo e tuʻunga tangata pe fefine ʻi he taimi naʻe fāʻeleʻi aí.