E nāhea vau e tauturu i te hō’ē ta’ata ’ia putapū i te here, ’ia faufa’ahia ’e ’ia ’ite ē tē hina’arohia nei ’oia ?

’Ua hōro’a mai te peresideni Jean B. Bingham i teie mana’o : « Hō’ē o te mau rāve’a faufa’a roa e nehenehe tātou e fa’ahotu ’e e fa’a’ite i te here nō tō tātou ta’ata tupu, e mea nā roto ïa i te fa’a’itera’a i tō tātou ’ā’au maita’i i roto i tō tātou mau mana’o ’e tā tātou mau parau… E mana māere tō te parau, nō te patura’a ’e nō te ha’amou ho’i. Tē ha’amana’o ra paha tātou pā’āto’a i te mau topara’a parau teimaha tei ha’aparuparu ia tātou, ’e te tahi atu mau parau tei fa’ahitihia nā roto i te here ’e tei fa’a’oa’oa i tō tātou vārua. ’A maiti i te parau noa i te mau mea maita’i nō ni’a i te ta’ata—’e i ni’a i te ta’ata—e fa’ateitei ho’i te reira ’e e ha’apūai ho’i i te feiā e hā’ati nei ia tātou, ’e e tauturu te reira ia vetahi ’ē ’ia pe’e i te ’ē’a o te Fa’aora (« E hōpo’i mai au i te māramarama o te ’evanelia i roto i tō’u fare », Liahona, Novema 2016, 6, 7).

Tē fa’ata’a nei te tuahine Sharon Eubank ē tē vai nei te ta’ata ma teie mana’o ē ’aita ’oia i fāri’ihia ’aore rā ’aita ’oia i tano roa : « Tē fa’a’ite nei te Faufa’a ’Āpī i te tauto’ora’a ’ū’ana a Iesu nō te toro i te rima i te mau huru ta’ata ato’a : te mau lēpera, te mau telona, te mau tamari’i, tō Galilea, te mau tai’ata, te mau vahine, te mau pharisea, te feiā hara, tō Samaria, te mau vahine ’ivi, te mau fa’ehau nō Roma, te feiā fa’aturi, te feiā vi’ivi’i ’ia au i te ture ’āti Iuda. Fātata roa i roto i te mau ’ā’amu ato’a, e fa’atoro ’oia i tōna rima i te hō’ē ta’ata au-’ore-hia e te sōtaiete i terā ra tau. ’Ua riro te reira ’ei tītaura’a ’āueue ’ore nō te mau pipi keresetiano e te feiā mo’a i te mau mahana hope’a nei ’ia fa’a’ite i te here mau te tahi i te tahi (« Te Mesia : Te māramarama e ’ana’ana i roto i te pōiri », Liahona, Mē 2019, 74).