Asiasiga a Moronae

Sa faaauau pea sauaga ae sa le mafai Iosefa ona faafiti sa vaai o ia i le Atua. I le aso 21 o Setema, ina ua mavae sana malologa i lona moega, sa tatalo atu Iosefa ina ia iloa e ia lona tulaga i luma o le Alii. Ona faaali mai ai lea o le agelu o Moronae ia te ia.

I le afiafi po o le aso luasefulu ma le tasi o Setema, ina ua ou taoto i lo’u moega o le a ou moe, sa oo ina ou nofo ae i luga ma tatalo ma aioi atu i le Atua e Ona le malosi uma, ia faamaglaoina au agasala uma ma ou sese, ma ia tuuina mai foi se faaaliga ia te au ia ou iloa ai lo’u tulaga i ona luma; aua sa ou talitonu ma lo’u loto atoa, o le a ia tuuina mai ia te au se faaaliga paia e pei o le faaaliga na muai oo mai ia te au.

The Prophet Joseph Smith sitting on his bed in the Smith farm house. Joseph has a patchwork quilt over his knees. He is looking up at the angel Moroni who has appeared before him. Moroni is depicted wearing a white robe. The painting depicts the event wherein the angel Moroni appeared to the Prophet Joseph Smith three times in the Prophet's bedroom during the night of September 21, 1823 to inform him of the existence and location of the gold plates, and to instruct him as to his responsibility concerning the plates.

E tolu tausaga ina ua mavae le Uluai Faaaliga ia Iosefa Samita, sa auina mai ai e le Atua le agelu o Moronae e aoao Iosefa e uiga i le toefuataiina o le talalelei a Iesu Keriso.

A o ou tatalo atu i le Atua, sa oo ina ou iloa ua oo mai se malamalama i lou potu, ma sa faateleina lea malamalama seia oo lava ina sili atu lona pupula nai lo le aoauli, ma sa le i pine lava ae tu mai loa se tagata i tafatafa o lo’u moega, ma sa tu o ia i le ea e le i pa’i ona vae i le fola o le fale.

Sa ofu o ia i se ofu talaloa e matua sinasina lava. Sa matua sili atu le sinasina o lona ofu nai lo soo se mea o lenei lalolagi ua ou vaai i ai; ma ou te le talitonu foi e i ai se isi mea o le lalolagi e mafai ona faia ia faapea lona sinasina ma lona pupula. Sa le ufitia vaega o ona lima e amata mai ona tamatamailima seia oo i luga ae teisi o tapulima; ma sa faapea foi ona le ufitia vaega o ona vae e amata mai ona tamatamaivae seia oo i luga ae teisi o tapuvae. Sa le ufitia foi lona ao ma lona ua. Sa ou iloa foi sa leai se isi ona ofu sa na o lona ofu talaloa lava, aua sa matala ma sa ou iloa atu ai lona fatafata.

Sa le gata ina matua sinasina lava lona ofu talaloa, ae sa matua mamalu tele foi lona tino atoa e le mafaamatalaina, ma sa matua susulu foi ona fofoga faapei o le pupula o le malamalama o le emo mai o le uila. Sa matua malamalama tele le potu, ae sa le tutusa ma le susulu tele o le malamalama sa siomia ai o ia. Sa oo ina ou fefe ina ua ou faatoa vaai atu ia te ia; ae sa le pine ae mavae atu lo’u fefe.

Ona ia ta’u mai lea o lo’u igoa ma fai mai ia te au o ia o se avefeau ua auina mai e leAtua ia te au, ma o lona igoa o Moronae; ma o loo o i ai se galuega o loo finagalo le Atua ou te faia; ma o le a tauleleia ma tauleagaina foi lo’u igoa i nuu uma, ma ituaiga uma, ma gagana eseese; po o tagata uma lava.

Sa ia fai mai o loo i ai se tusi ua teuina, ma ua tusia lea tusi i ni papatusi auro, o loo i ai se tala o tagata sa nonnofo anamua i le konetineta lenei (konetineta o Amerika), atoa ma le mea na latou tupuga mai ai. Sa ia fai mai foi o loo i ai i lea tusi le atoatoaga o le Talalelei e faavavau, e pei ona avatu e le Faaola i tagata anamua;

Ma sa ia fai mai o loo i ai foi ni maa se lua ua siomia o la itu uma i le siliva, o loo teuina faatasi ma papatusi—ma o ia maa, sa faamauina i se ufi fatafata, ua taua o le Urima ma le Tumema—ma o se tagata sa i ai ia te ia ia maa ma ia faaaogaina, sa ta’u e tagata anamua o “tagata vaai”; ma ua saunia e le Atua ia maa mo le faaliliuina o le tusi.

Ina ua uma ona ia ta’u mai ia te au ia mea, ona amata lea ona ia faamatala mai valoaga o i le Feagaiga Tuai. Sa muamua ona faamatala mai se vaega o le mataupu lona tolu o le Tusi a Malaki; ma sa ia faamatala mai foi le mataupu lona fa po o le mataupu mulimuli o lea lava valoaga, ae sa i ai sina eseesega itiiti mai le faitauga o loo ia tatou Tusi Paia. Sa ia le faamatala mai le fuaiupu muamua e pei ona tusia ia tatou Tusi Paia, ae sa faamatala mai e ia faapea:

“Aua faauta, e oo mai le aso e mu ai e pei o se umu, ona fai ai lea ma tagutugutu o saito o e uma e faamaualuluga, ioe, atoa ma e uma e fai amioleaga; aua o le a susunuina i latou e i latou o le a o mai, ua fetalai mai ai Ieova o Au, e le faatoeina ai mo i latou se aa po o se la laau.”

I le ma lenei, sa ia faamatala mai foi le fuaiupu lona lima e faapea: “Faauta, o le a ou faaali atu ia te outou le Perisitua, e ala atu i lima o Elia le perofeta, a o le i oo mai le aso sili ma le matautia o le Alii.”

Na ese foi ona ia faamatala mai le fuaiupu na sosoo ai: “Ma o le a ia totoina foi i loto o fanau folafolaga na faia i tama, ma o le a liliu foi loto o fanau i o latou tama. A le faapea ona faia, o le a matua faaumatia lava le lalolagi atoa i lona afio mai.”

E le gata foi i ia mau, ae sa ia faamatala mai foi le mataupu lona sefulu ma le tasi o le Tusi a Isaia, ma fai mai ua lata ona faataunuuina. Sa ia faamatala mai foi le mataupu lona tolu o le Tusi o Galuega, fuaiupu lona luasefulu ma le lua ma le luasefulu ma le tolu, e pei lava ona tusia i le Feagaiga Fou. Na ia faapea mai o lena perofeta o Keriso lava lea; ae le i oo mai le aso e “vavaeeseina ai mai le nuu i latou o e e le faalogo i lona leo,” ae ua lata mai lava.

Sa ia faamatala mai foi le mataupu lona lua o le Tusi a Ioelu, e amata mai le fuaiupu lona luasefulu ma le valu, seia oo i le faaiuga. Na ia fai mai foi e le i oo ina faataunuuina lena mea, ae ua latalata lava. Ma sa ia fai mai foi, ua latalata mai lava ona oo mai taimi o le atoatoaga o Nuu Ese. E tele foi isi mau mai le Tusi Paia na ia faaamatala mai, ma e tele foi faamalamalamaga na ia tuuina mai, e le mafai ona tusia i lenei tala.

Sa ia toe fai mai foi ia te au, a oo ina tuuina mai ia te au papatusi ua ia taua—aua e le i oo i le taimi e tatau ona tuuina mai ai—ia aua lava nei ou faaali atu ia papatusi i se tasi; faapea foi ma le ufi fatafata ma le Urima ma le Tumema; ae ia tau lava na o i latou o e e poloaiina ai au ia faaali atu i ai; ma afai ou te le usiusitai i lea faatonuga, o le a faaumatia au. A o ia faamatala mai ia te au le tala e uiga i papatusi, sa oo ina oo ifo i lou mafaufau se faaaliga, sa ou vaai ai i le mea sa tuu ai ia papatusi, ma sa matua manino ma malamalama lelei i lo’u mafaufau lea faaaliga, sa ou iloa lelei ai lava le mea na teu ai ia papatusi, ina ua ou alu atu i ai.

Ina ua mavae lenei talanoaga, sa oo ina ou vaai atu ua amata ona maui malie atu le malamalama sa i totonu o le potu, ma siomia ai le na tautala mai ia te au, sa faapea lava ona faia seia oo ina toe pogisa le potu, vagana ai ona tafatafa sa malamalama; ona ou vaai loa lea, faauta foi, ua avanoa le lagi; ua alu ae foi o ia seia oo lava ina mou, ona toe pogisa ai lea o le potu e pei ona sa i ai, a o le i oo mai lea malamalama mai le lagi.

Sa oo ina ou taoto ma mafaufau i le taua o lea faaaliga, ma sa ou ofo tele i mea na ta’u mai ia te au, e lea avefeau uiga ese; ma, a o ou mafaufau loloto i ia mea, sa faafuasei lava ona ou iloa, ua amata ona toe malamalama lo’u potu, ma sa le i pine ae ou vaai atu ua toe tu mai foi lea lava avefeau mai le lagi, i tafatafa o lo’u moega.

Ona amata lea ona ia toe faamatala mai mea uma na ia ta’u mai ia te au i lana asiasiga muamua, e aunoa ma sina eseesega; ma ina ua uma ona ia toe ta’u mai o ia mea, ona ia faamatala mai lea ia te au faamasinoga tetele o le a oo mai i le lalolagi, atoa ma faafanoga tetele e ala mai i le oge, ma le pelu, ma faamai tetele; ma o le a oo mai ia faamasinoga matautia i le lalolagi i le vaitaimi o augatupulaga nei. Ina ua uma ona ia ta’u mai o ia mea, ona ia toe alu ae ai foi lea e pei ona faia muamua.

The Book of Mormon prophet Moroni kneeling on snow covered ground as he prays. Moroni's hands are resting on the gold plates. There is a hole in the ground prepared for the burial of the plates. There are large trees growing in the background.

I le T.A. 421, sa tanumia ai e le perofeta o Moronae ia faamaumauga paia o lona nuu i le Mauga o Kumora. Ina ua toe foi mai i se taimi mulimuli ane o se tagata toetu, sa ia ta’u atu ia Iosefa Samita e uiga i faamaumauga anamua, o loo i ai le atoaga o le talalelei e pei ona tuuina atu e le Faaola i tagata anamua o le konetineta o Amerika. O lena tusi po o faamaumauga o le Tusi a Mamona.

Sa matua loloto mafaufauga na oo mai i lo’u mafaufau i lea taimi, ma o le mea lea na le mafai ai ona ou moe, ma sa ou taoto ma le lofituina i le ofo tele ona o mea na ou vaaia ma faalogoina. Ae peitai, o le mea sa sili ai ona ou ofo, ona sa ou toe vaaia lea lava avefeau i tafatafa o lo’u moega, ma ua ou faalogo atu ia te ia o toe faamatala mai mea uma lava na ia muai fai mai ai; ma sa lapataia foi au, ma tau mai, o le a taumafai Satani e faaosooso ia te au (ona o le tulaga mativa o le aiga o lo’u tama), ia ou aumai papatusi ia ou mauoa ai. Sa ia faaasa mai ia te au lea mea, ma fai mai ia aua lava nei i ai ia te au se isi lava manatu e uiga i papatusi, ae tau lava na o le manatu ia viia ai le Atua, ma ia aua lava nei tosina au i se isi lava manatu, nai lo le atinaeina o lona malo; afai e leai, o le a le tuuina mai ia te au papatusi.

Ina ua mavae lona tolu o asiasiga, sa toe alu ae o ia i le lagi e pei ona faia muamua, a ua tuua au e mafaufau i le uiga ese o mea na oo ia te au; ma sa le i pine lava ona alu ae o le avefeau i le lagi, ina ua uma nei asiasiga e tolu, ae vivini loa moa, ma sa ou iloa ai ua malama le taeao, ma atonu sa alu le po atoa o fai a ma talanoaga.

Ina ua mavae atu sina taimi, ona ou tulai ai lea mai lo’u moega ma ou alu atu e fai au galuega tatau o le aso e pei ona masani ai; ae ina ua faia au galuega ma ou taumafai e galue e pei ona ou masani ai, sa oo ina ou lagona ua leai lava so’u malosi, ma ua ou vaivai lava ua ou matua le lava. Sa oo ina iloa mai e lo’u tama, o le na ma galulue faatasi, o loo i ai se mea ua tupu ia te au, ma sa ia fai mai loa ia te au ou te alu i le fale. Sa ou alu loa ma le faamoemoe o le a ou alu i le fale; ae ina o ou tau sopoia le pa sa i tua ane o le fanua sa ma i ai, sa oo ina matua leai lava ma sou malosi na totoe, ona ou pau ai lea i le eleele, ma sa ou le iloa se mea mo sina taimi puupuu.

O le mea muamua lava ou te manatua, o se leo na tautala mai ia te au, ma tau mai lo’u igoa. Ona ou tepa ae lea ma ua ou vaai atu o loo tu mai i luga ae o lo’u ulu lea lava avefeau na oo mai ia te au i le po, ma ua siomia foi o ia i le malamalama e pei o taimi muamua na oo mai ai ia te au. Ona ia toe faamatala mai foi lea ia te au, o mea uma lava na ia tau mai ia te au i le po ua mavae atu, ma poloaiina au ia ou alu atu e faamatala i lo’u tama le faaaliga ma poloaiga ua tuuina mai ia te au.

Sa ou usitai lava; sa ou foi atu i lo’u tama i le faatoaga ma faamatala atu ia te ia mea uma. Sa oo ina tali mai lo’u tama ia te au, ua mai le Atua ia mea, ma sa ia fai mai ia te au ou te alu e fai e pei ona poloaiina ai e le avefeau. Sa ou tuua loa le faatoaga ae ou alu atu i le mea na ta’u mai e le avefeau o loo teu ai papatusi; ma ona o le manino lelei o le faaaliga sa oo ifo i lo’u mafaufau e uiga i le mea sa teu ai papatusi, o lea sa ou iloa lelei ai lava le mea sa i ai, ina ua ou taunuu i ai.