Hugna 7

Ang Pag-ula ni Jesukristo

Ang Pag-ula ni Jesukristo mao ang sukaranang baruganan [fundamental principle] sa kaluwasan ug ang hinungdan sa paglaum sa tanang katawhan.

Gikan sa Kinabuhi ni Wilford Woodruff

Sa dihang nagsugod si Elder Wilford Woodruff sa iyang pangalagad isip usa ka Apostol, siya ug ang iyang mga kaigsoonan nagtrabaho sa Estados Unidos ug England sa mga tawo nga nagtahud ni Jesukristo nga Anak sa Dios ug Manunubos sa katawhan. Sa kahibalo nga ang ilang mga tigpaminaw aduna nay pagtuo sa Pag-ula ni Jesukristo, ilang gitumong ang ilang pagtudlo sa mga hilisgutan sama sa pagkatawag ni Propeta Joseph Smith, sa pagtungha sa Basahon ni Mormon, ug sa pagpahiuli sa priesthood.¹ Hinoon, sa dihang ang mga tawo mihagit sa doktrina sa Pag-ula, si Elder Woodruff misupak sa ilang gituohan uban sa gahum ug katin-aw. Nagpamatuod siya nga “ang tumong sa misyon ni Kristo sa yuta mao ang paghalad sa iyang kaugalingon isip usa ka sakripisyo sa pagtubos sa katawhan gikan sa mahangturong kamatayon.”²

Niadtong 1845 usa ka miyembro sa Simbahan sa British Isles mimantala og pamphlet naningkamot nga mapamatud-an nga wala na kinahanglana nga si Jesukristo mag-antus ug magpakamatay alang sa katubsanan sa katawhan. Si Elder Woodruff, kinsa nag-alagad isip tigdumalang awtoridad sa Simbahan sa British Isles, misupak sa iyang gituohan pinaagi sa usa ka artikulo nga gimantala alang sa publiko nga giulohan og “Rationality of the Atonement.” [Pagkamakatarunganon sa Pag-ula]. Sa pagmantala niining artikulo, iyang gilauman nga masiguro “nga ang pagsabut [sa Simbahan] sa maong hilisgutan hustong masabtan sa tanan, ug nga ang mga Santos sa Dios makaandam sa pagbarug sa mga pang-ataki sa pinakabantugang kaaway sa kaluwasan, ingon man usab magpabiling natubag ang maong pangutana sa mga hunahuna niadtong mituo sa mga pagpadayag sa Dios.”³ Ang iyang mga pulong, nagkondinar sa bakak nga pagtulun-an ug sa pagdayeg sa Manluluwas, nagpakita sa iyang walay katapusang gugma sa Ginoo ug sa iyang dakong pasalamat alang sa plano sa katubsanan.

Mipadayag siyag kasubo sa tawo nga misulat sa pamphlet “nga sa iyang hunahuna nalupig sa mga gahum sa kangitngit, nga nakapalayo kaayo gikan sa lagda ug tambag sa gingharian sa Dios.” Miingon siya, “Mas maayo pa alang sa usa ka tawo nga walay talento, kay sa mosulay nga mopamatuod nga ang pag-ula ni Kristo wala kinahanglana.”⁴

Si Elder Woodruff mikuha sa kadaghanan sa iyang artikulong mga kinutlo gikan sa mga kasulatan, nagpakita og “daghang pagpamatuod” gikan sa karaang mga propeta ug gikan sa Ginoo mismo.⁵ Miingon siya nga ang doktrina sa Pag-ula “dili lamang hilisgutan nga gustong isangyaw sa karaang mga propeta ug mga sulugoon sa Dios, pero mao ang hinungdan sa ilang tanang mga paglaum, ug ang tinubdan nga kakuhaan sa ilang kusog ug suporta.”⁶

Mga Pagtulun-an ni Wilford Woodruff

Sumala sa kabubut-on sa Iyang Amahan, si Jesukristo mianhi sa yuta aron sa pagtubos kanato gikan sa mga epekto sa Pagkapukan.

Nagtuo ako nga ang Makagagahum nasayud unsay Iyang buhaton niini nga kalibutan sa wala pa kini Niya buhata. Nasayud Siya unsang matanga sa mga espiritu ang mopuyo niini, ug unsang matanga sa buhat nga himoon aron sa pagluwas sa Iyang mga anak nga moanhi sa yuta. Ug ang pagbasa sa kasaysayan sa pagpakigsandurot sa Dios ngadto sa tawo, gikan sa pagkalalang sa kalibutan hangtud niini nga dispensayon, atong makita ang Amahan nga naningkamot sa pagpanalangin sa Iyang mga anak. Iyang gihatag ang Iyang bugtong Anak nga magpakamatay aron sa pagtubos sa kalibutan––usa ka sakripisyo nga ang Dios lamang gayud ang makahatag. Ug niining katapusang mga adlaw Iyang gisugdan ang organisasyon sa importante ug katapusang dispensasyon––ang labing talagsaon sa tanang mga dispensasyon.⁷

Gipahibalo kita sa Manluluwas mismo, unsay tumong sa iyang Amahan sa iyang pag-anhi sa kalibutan. “Kay gihigugma gayud sa Dios ang kalibutan nga tungod niana gihatag niya ang iyang bugtong Anak, aron ang tanan nga mosalig kaniya dili malaglag kondili may kinabuhing dayon: Kay gipadala sa Dios ang iyang Anak nganhi sa kalibutan, dili aron ang kalibutan iyang pagahukman sa silot, kon dili aron ang kalibutan maluwas pinaagi kaniya.” [Juan 3:16–17.]

Ang mga pagpadayag nga gihatag sa Dios sa tawo, nagmatuod gayud nga ang Dios ug ang mahangturong mga kalibutan gidumala sa celestial nga balaod; ug aron nga ang tawo makaangkon sa samang himaya sa iyang kaugalingon, gikinahanglan nga siya mosunod usab sa samang balaod, “kana nga gidumala pinaagi sa balaod mao usab ang gitipigan pinaagi sa balaod ug gihingpit ug gibalaan pinaagi sa mao.” [D&P 88:34.] Pero ang tawo, nga nakalapas sa balaod sa Dios, makiangayon nga mahiagom ang iyang kaugalingon sa tunglo sa pagkamasinupakon, nga dili siya makahimo sa pagtubos sa iyang kaugalingon, walay bisan kinsa nga ubos niining walay katapusang sakripisyo nga makatubos sa iyang pagkapukan.

Ang epekto sa pagkamasinupakon sa tawo, nga nahibaloan na, mao ang kamatayon, ug kini nga tunglo moabut sa tanang kaliwat ni Adan. Hinumdumi nga ang tawo, samtang modawat niini nga silot, midawat nga walay madala bisan unsa nga gahum, mag-inusara, sa iyang kaugalingon sa pagtuman sa iyang pagkabanhaw ug pagpahiuli ngadto sa atubangan sa Dios ug sa iyang himaya. Siya karon ubos sa gahum ug pagmando sa kamatayon, ug aron makab-ot ang kadaugan gikan sa kamatayon gikinahanglan nga dunay usa nga mas balaan ug putli kay sa tawo nga nahimong malapason mosulod sa iyang dominyon sa kamatayon, aron iyang mabuntog kana nga dominyon; ug kon dili kini mahimo, ang pagmando nga anaa sa kamatayon mahimong hangtud sa hangtud. Nagkinahanglan kini og gamay nga pagprobar nga ang Anak sa Dios, sa tanang paagi, adunay katakus sa paghimo niini nga buluhaton, tungod sa pagkaputli, pagkabalaan, ug walay mansa; ug nga siya mao ang tawo nga gitudlo sa paghimo niini, hingpit nga gilig-on sa pagpamatuod ni Juan mahitungod kaniya––“Tan-awa, mao kana ang Kordero sa Dios, nga magakuha sa sala sa kalibutan” [tan-awa sa Juan 1:29]—nga “Kay maingon nga diha kang Adan ang tanan mangamatay, maingon man usab diha kang Kristo ang tanan mangabuhi.” [1 Mga Taga-Corinto 15:22.]…

…Naestablisar gayud kini sa hingpit nga dili na malalis, gikan sa daghang pagpamatuod … gikan sa mga pagpadayag sa Dios, nga gihatag sa lain-laing mga dispensasyon ug panahon sa kalibutan, ug sa lain-laing mga bahin sa kalibutan, nga ang tumong sa misyon ni Kristo nganhi sa yuta mao ang paghalad sa iyang kaugalingon isip sakripisyo sa pagtubos sa katawhan gikan sa mahangturon nga kamatayon, ug nga kini tukma nga pinasubay sa kabubut-on sa Amahan nga ang maong sakripisyo kinahanglang himoon. Hingpit siyang misunod sa kabubut-on sa iyang Amahan sa tanang mga butang gikan sa sinugdanan, ug miinom sa kopa nga pait nga gihatag kaniya. Tungod niini gidala ngadto sa kahayag, himaya, dungog, pagkaimortal, ug kinabuhi nga dayon, uban nianang gugma nga putli nga mao ang mas importante pa sa pagtuo o paglaum, kay ang Kordero sa Dios nakapahigayon sa butang nga dili mahimo sa [tawo] sa iyang kaugalingon.⁸

Makadawat kita sa gasa sa kahimayaan pinaagi lamang sa Pag-ula ni Jesukristo ug sa atong pagkamasulundon ngadto sa mga balaod ug mga ordinansa sa ebanghelyo.

Kinahanglan nga kita, isip mga katawhan, makaamgo sa kamatuoran nga ang atong Amahan sa Langit mihimo sa tanan niyang mahimo alang sa kaluwasan sa tawhanong pamilya. Iyang gipahibalo ang mga balaod nga gikinahanglan alang sa kahimayaan ug himaya sa tawo ug nakahimo sa tanan nga mahimong himoon sa balaod. … Nagpakamatay si Jesus aron tubson ang tanang mga tawo; pero aron nga sila makaangkon og kaayohan sa Iyang kamatayon, ug nga ang Iyang dugo makalimpyo kanila gikan sa tanang personal nga sala nga nahimo sa unod, kinahanglang mosunod sila sa balaod sa ebanghelyo. Gitubos kita gikan sa mga sala nga nahimo ni Adan pinaagi sa dugo ni Kristo; ug aron makaangkon og kaluwasan kinahanglang magmasulundon kita ug magmatinud-anon sa mga lagda sa ebanghelyo.⁹

Kon maangkon nako ang hingpit nga kaluwasan tungod kini sa akong pagsunod sa mga balaod sa Dios.¹⁰

Ang hustisya sa laing bahin nangayo sa bahin niini, ug ang mga pulong sa Dios napamatud-an––“Kay sa adlaw nga mokaon ka niini, mamatay ka gayud.” [Tan-awa sa Genesis 2:17.] Mao, nga sa laing bahin, ang kalooy gihatag, ug ang gugma sa Dios gipakita pinaagi sa pagbugto sa mga higot sa kamatayon, diin ang mga espiritu ug mga lawas sa mga tawo hiusahon pag-usab. Ang mga espiritu sa makiangayon makadawat og kahimayaan sa atubangan sa Dios ug sa Kordero––sa sama nga mga tabernakulo [pisikal nga mga lawas] nga maoy naningkamot, nagtrabaho, ug nag-antus samtang dinhi pa sa yuta, nga kon wala kini nga paghiusa imposible sa mga kalag sa tawo nga makadawat og kahingpitan sa himaya. Adunay himaya nga konektado niini, nga maoy mahangturong tinubdan sa kalipay sa kada lumulupyo sa celestial nga gingharian. Ang mga espiritu, sa laing bahin, kadtong misalikway sa Ebanghelyo ni Jesukristo ug mibiaybiay sa iyang mga kalooy, mobalik ngadto sa ilang mga lawas sa katapusang pagkabanhaw aron modawat sa ilang silot sa sama nga mga tabernakulo nga ilang gipuy-an samtang nakig-away batok sa Dios. Pinaagi niini mopasidaan kami sa tanang mga tawo nga makadungog sa tingog niining mga pulonga, sa paghinulsol sa ilang mga sala ug sa pagsunod sa Ebanghelyo sa Anak sa Dios.¹¹

Unsa ang ebanghelyo nga gitudlo mismo ni Jesus? Ang una gayud nga baruganan mao ang hugot nga pagtuo diha sa Mesiyas; mao kini ang unang baruganan nga gitudlo sa tawo. Sa dihang si Adan, human giabug gikan tanaman sa Eden, miadto sa Adam-ondi-Ahman aron mohalad og sakripisyo, ang anghel sa Ginoo nangutana kaniya nganong gibuhat niya kini. Si Adan mitubag nga wala siya masayud, pero ang Ginoo misugo kaniya sa pagbuhat niini. Giingnan siya nga ang dugo sa mga toro ug mga kanding, ug sa karnero kinahanglang ipaagas diha sa altar isip simbolo sa importante ug katapusang sakripisyo nga ihalad alang sa mga sala sa kalibutan. [Tan-awa sa Moises 5:4–7.] Ang unang baruganan, nga gitudlo ngadto sa Amahang Adan mao ang pagtuo ni Mesiyas, nga moanhi sa kinatung-an sa panahon aron sa paghalad sa iyang kinabuhi alang sa katubsanan sa tawo. Ang ikaduhang baruganan mao ang paghinulsol. Ug unsa ang paghinulsol? Ang pagbiya sa sala. Ang tawo nga maghinulsol, kon siya tigpanumpa, dili na manumpa; o usa ka kawatan, dili na mangawat; mobiya siya sa tanang mga sala ug dili na mobuhat niini. Dili paghinulsol ang pag-ingon, maghinulsol ako karon, ug dayon mangawat ugma; mao kana ang paghinulsol sa kalibutan, nga dili makapahimuot sa panan-aw sa Dios. Ang paghinulsol mao ang ikaduha nga baruganan.

Nakadungog ako og daghang mga tawo nga moingon nga walay mga ordinansa nga gikinahanglan, nga ang pagtuo lamang sa Ginoong Jesukristo ang gikinahanglan aron maluwas. Wala ako makahibalo niana gikan sa bisan unsang pagpadayag sa Dios ngadto sa tawo, ni sa karaan o sa moderno. Pero sa laing bahin, ang hugot nga pagtuo ni Kristo, paghinulsol, ug bunyag alang sa kapasayloan sa mga sala gitudlo sa mga patriyarka ug mga propeta ug ni Jesukristo ug sa Iyang mga apostoles. Ang bunyag alang sa kapasayloan sa mga sala usa ka ordinansa sa ebanghelyo. Miingon ang usa ka tawo, ang bunyag dili mahinungdanon sa kaluwasan. Si Jesus wala lamang motudlo niini, pero misunod mismo niana nga panginahanglan, dili aron bunyagan siya alang sa kapasayloan sa mga sala––pero, sama sa iyang giingon, “aron sa pagtuman sa tibuok pagkamatarung,” sa ingon, sama sa laing mga bahin mihatag og ehemplo aron sundon sa tanan [tan-awa sa Mateo 3:15.] Kon kining mga baruganan sa ebanghelyo tumanon, ang tawo takus nga modawat sa Espiritu Santo; ug kining balaan nga gasa gihatag karon sama kaniadto, pinaagi sa pagpandong sa mga kamot sa mga tawo nga adunay awtoridad sa pagpangalagad sa mga ordinansa sa ebanghelyo. Mao kini ang unang mga baruganan sa ebanghelyo nga gituohan nato nga mga Santos sa Ulahing mga Adlaw ug itudlo ngadto sa atong isig ka tawo.¹²

Kon ang mga tawo tawagon sa paghinulsol sa ilang mga sala, ang tawag alang sa ilang kaugalingong mga sala, dili sa mga kalapasan ni Adan. Unsay gitawag nga orihinal nga sala gitubos pinaagi sa kamatayon ni Kristo nga wala magkinahanglan og aksyon sa kabahin sa tawo; ang indibidwal usab nga sala gitubos sa samang sakripisyo, pero sa kondisyon sa iyang pagkamasulundon sa plano sa kaluwasan sa ebanghelyo kon kini gisangyaw na kaniya.¹³

Ang tanang mga anak sa tawo kinsa [miabut na] sa tuig nga may tulubagon sa pagkamakasasala, tungod kay ang tanan makasala gayud. “Unsay atong buhaton aron maluwas” mao ang pangutana sa mga tawo nga nakadungog sa pagsangyaw ni Pedro sa adlaw sa Pagkunsad sa Espiritu Santo [tan-awa sa mga Buhat 2:37], ug pareha ra ang ikasulti nga magamit sa tanang mga tawo sa tanang henerasyon. Ang tubag mao, sunda ang balaod sa Ebanghelyo. Mao kini ang luwas nga paagi alang sa kaluwasan sa tawhanong pamilya.¹⁴

Akong gibati nga kita isip mga katawhan kinahanglang maglipay; ug kinahanglan nga atong hatagag bili kini nga mga gasa ug mga panalangin nga gihatag kanato sa Dios, ug kinahanglang maningkamot kita sa pagpalambo sa atong mga calling, ug isip mga katawhan motuman sa gusto sa atong Amahan sa Langit, ug sa gilauman niadtong nag-una na kanato.…

…Ang Ebanghelyo ni Kristo maoy usa sa labing dako nga mga panalangin nga ikahatag sa tawo. Kinabuhing dayon, miingon ang Ginoo, mao ang labing mahinungdanon nga gasa sa Dios [tan-awa sa D&P 14:7]. Makaangkon kita niana, pinaagi lamang sa pagsunod niini nga Ebanghelyo. Kini, mga kaigsoonan, mao ang atong panalangin.¹⁵

Ang kinasingkasing nako nga pag-ampo mao nga ang mga panalangin sa Dios atong madawat niining kinabuhia, nga kon mamatay na kita ug moadto sa sunod nga kinabuhi, atong nabuhat ang tanan nga atong gikinahanglan, ug makaandam sa pagpuyo uban sa balaan ug nahingpit pinaagi sa dugo sa Kordero.¹⁶

Tungod sa bili sa Pag-ula, mahingpit kita pinaagi ni Kristo.

Walay laing tawo nga adunay gahum sa pagluwas sa mga kalag sa mga tawo ug mohatag kanila og kinabuhing dayon, gawas ni Ginoong Jesukristo, ubos sa sugo sa Iyang Amahan.¹⁷

Mao gayud unta kana ang atong tun-an pag-ayo ang pagmahal sa mga pulong sa kinabuhi aron kita motubo diha sa grasya ug magtubo sa kahibalo sa Dios ug mahimo nga hingpit diha ni Kristo Jesus, aron kita makadawat sa kahingpitan ug mahimong manununod sa Dios ug isig ka manununod ni Jesukristo. [Tan-awa sa Mga Taga-Roma 8:16–17.]¹⁸

Mga kaigsoonan, dili ba kita mga anak sa Dios, ug kon magpakita siya, kon kita matinud-anon, dili ba kita pareho kaniya? [Tan-awa sa 1 Juan 3:2.] Oo; ug kon ang mahimayaong adlaw moabut kita adunay pribilihiyo sa pagbarug pag-usab niini nga yuta ug magpundok sa kalipay ug pasalamat … ang uban nga liboan kansang mga saput nahugasan nga puti pinaagi sa dugo sa Kordero, ug kinsa, pinaagi sa bili sa Iyang pag-ula, gidihugan mahimong mga hari ug mga pari ngadto sa Dios, ug uban Kaniya mohari nga nahimaya [exalted] sa Iyang gingharian. Hinaut nga kitang tanan makita nga takus niini nga ganti; ug karon, samtang magpakabuhi kita niini nga kalibutan sa kausaban ug kasubo, hinaut nga atong himoon nga ehemplo ang mga kinabuhi sa matarung … ug, labaw sa tanan, sunda ang mga lakang sa bantugang Ehemplo sa tanang pagkamatarung, ang atong Ginoong Jesukristo, kansang grasya magauban kaninyo kanunay.¹⁹

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Unsa ang gipadayag sa istorya sa mga pahina 73–74 mahitungod sa mga pagbati ni Presidente Woodruff ngadto ni Jesukristo?
Ribyuha ang mga pagtulun-an sa mga pahina 74–76. Unsa ang gitudlo ni Presidente Woodruff mahitungod sa atong panginahanglan sa Pag-ula sa Manluluwas?
Paklia ang hugna ug tun-i ang pipila ka mga kasulatan nga gilista sa ubos niini nga pahina. Sa imong pagbuhat niini, pangitaa ang mga pulong nga naghulagway kon unsay gilahutay ni Jesukristo aron sa pagluwas natong tanan gikan sa pisikal nga kamatayon ug sa pagtanyag kanato og kaluwasan gikan sa atong mga sala. Unsay imong gibati samtang mamalandong ikaw kon unsay gihimo sa Manluluwas alang kanimo?
Unsay inyong isulti sa tawo nga moingon nga “walay ordinansa ang gikinahanglan, nga ang pagtuo lamang sa Ginoo nga si Jesukristo ang gikinahanglan aron maluwas”? (Tan-awa sa mga pahina 77–78).
Basaha ang katapusang seksyon niini nga hugna (pahina 81, hatagi og espesyal nga atensyon ang pulong “ang mga bili sa Iyang Pag-ula.” Dayon tun-i ang 2 Nephi 2:6–8 ug Alma 22:14. Sa unsa nga paagi nga kini nga mga pagtulun-an makadugang sa inyong pagsabut sa Pag-ula?
Sa unsa nga paagi nga ang inyong pagpamatuod sa Pag-ula sa Manluluwas nakaimpluwensya sa inyong kinabuhi?

May Kalabutan nga mga Kasulatan: Sa artikulo nga gihisgutan sa mga pahina 73–74, si Elder Woodruff mikutlo o migamit sa mosunod nga mga tudling sa kasulatan mahitungod sa Pag-ula ni Jeuskristo: Job 19:25; Mateo 26:28; 27:52; Juan 1:29; 3:16–17; Mga Buhat 2:23; 4:12; 20:28; Mga Taga-Roma 3:24–25; 1 Mga Taga-Corinto 15:22; Mga Taga-Galacia 3:17–24; Mga Taga-Efeso 1:7; Mga Taga-Colosas 1:19–20; Mga Hebreohanon 9:28; 10:7–10, 29; 11:26, 35; 1 Pedro 1:18–21; 1 Juan 2:2; Pinadayag 1:5; 5:9–10; 13:8; 1 Nephi 10:5–6; 11:32–33; 2 Nephi 2:26; 9:3–14; 26:23–24; Jacob 6:8–9; Mosiah 3:11, 16–18; 15:19–20; 18:2; Alma 7:12; 11:42; 21:9; 34:8–15; 42:13–17; 3 Nephi 11:9–11; 27:14; Mormon 9:13; Ether 3:14; Moroni 10:33; D&P 18:10–11; 19:16–19; 35:2; 38:4; 45:3–4; 88:34