Hugna 6

Pagtudlo ug Pagtuon pinaagi sa Espiritu

Nagkinahanglan kita og giya sa Espiritu Santo samtang magtuon sa ebanghelyo ug samtang magtudlo kita sa uban.

Gikan sa Kinabuhi ni Wilford Woodruff

Samtang nangandam si Elder Wilford Woodruff alang sa komperensya niadtong Oktubre 1855, nag-ampo siya nga giyahan, nangutana kon unsay ilang itudlo sa mga katawhan. Agig tubag sa iyang pag-ampo, nakadawat siya sa mosunod nga pagpadayag: “Papaninguhaa ang akong mga sulugoon nga makaangkon sa Espiritu Santo ug magpabilin ang Espiritu uban kanila, ug kini motudlo kanila unsay itudlo sa mga katawhan kanunay; ug motudlo sa akong mga katawhan nga magpadayon ang akong Espiritu uban kanila, ug sila makasabut sa pulong sa Ginoo kon itudlo na kini kanila.”¹

Uban sa malahutayong pagpamatuod niini nga baruganan, si Presidente Woodruff kanunayng mosugod sa iyang mga pakigpulong sa komperensya pinaagi sa pagpahayag og tinguha sa pagtudlo pinaagi sa gahum sa Espiritu Santo. Dugang niini, kanunay niyang gipahinumduman ang mga Santos sa ilang katungdanan sa pagpaminaw ug pagkat-on pinaagi sa samang gahum. Miingon siya makausa, “kitang tanan nagsalig sa Espiritu sa Ginoo, sa pagpadayag, sa inspirasyon, sa Espiritu Santo, aron mahimong angayan sa pagtudlo sa katawhan nga maoy pasultihan ninyo, ug kon ang Ginoo dili mohatag kanako sa Balaan nga Espiritu niining hapona, mosaad ako ninyong tanan [nga] wala kaayo kamoy makuha gikan ni Brother Woodruff.”²

Mga Pagtulun-an ni Wilford Woodruff

Kinahanglang kita motudlo lamang sa ebanghelyo kon kita nadasig sa Espiritu Santo.

Dili ako makahimo, ni si bisan kinsang tawo makahimo sa pagtudlo sa mga anak sa tawo ug makahatag og kaayohan kanila sa Ebanghelyo ni Jeuskristo nga wala ang Balaan nga Espiritu, nga wala ang pagpadayag, nga wala ang inspirasyon sa Makagagahum nga Dios. Busa, nagkinahanglan ako sa pagtuo sa mga Santos sa Ulahing mga Adlaw, ug usab sa ilang mga pagampo. Nagkinahanglan ako sa Espiritu sa Dios sa pagtabang kanako, ingon man usab sa tanang tawo nga naningkamot sa pagtudlo sa mga butang sa gingharian sa langit.³

Sa akong pagtuo nga walay tawo, karon, o sa bisan unsang henerasyon, nga makahimo sa pagtudlo ug paglig-on sa mga lumulupyo sa yuta nga wala ang inspirasyon sa Espiritu sa Dios. Isip mga katawhan gipahimutang kita … nga nakatudlo, sa tanan natong pagpangalagad ug mga paningkamot, ang panginahanglan sa pagila sa gahum sa Dios sa tanang mga butang. Atong gibati ang panginahanglan karon. Nasayud ako nga dili ako sarang nga motudlo sa mga Santos sa Ulahing mga Adlaw o sa kalibutan kon wala ang Espiritu sa Dios. Nagtinguha ako niini … ug usab sa inyong pagtuo ug mga pag-ampo, aron ang akong hunahuna magiyahan sa paghunahuna nga makaayo kaninyo. Sa akong pagtudlo sa publiko wala nako tuguti ang akong hunahuna nga mosunod sa bisan unsang pamaagi gawas nianang gidiktar sa Espiritu kanako, ug mao kini ang pagkabutang natong tanan kon kita makigmiting sa mga Santos, o kon kita mosangyaw sa ebanghelyo.⁴

Ang Ginoo miingon, nakigsulti ngadto ni Joseph Smith: “Ug bisan unsa ang ilang ipamulong kon nadasig pinaagi sa Espiritu Santo mahimo nga kasulatan, mahimo nga kabubut-on sa Ginoo, mahimo nga hunahuna sa Ginoo, mahimo nga pulong sa Ginoo, mahimo nga tingog sa Ginoo, ug ang gahum sa Dios ngadto sa kaluwasan. [D&P 68:4.] Ngano kini? Tungod kay ang Espiritu Santo usa sa Dios nga Kapangulohan [Godhead], ug kon ang usa ka tawo mamulong pinaagi sa Espiritu Santo, kini pulong sa Dios. Kinahanglang maningkamot kita nga maangkon ang Espiritu nga makig-uban kanato sa tanang higayon ug mahimong baruganan sa pagpadayag ngari kanato.⁵

Ang mga hunahuna niini nga katawhan kinahanglan nga tudloan kanunay, ug kitang tanan magsalig sa Balaan nga Espiritu ug sa Ginoo sa patudlo sa atong mga hunahuna gikan sa dili mahutdan nga tuburan sa kaalam nga nagagikan sa Dios, kay dili kita makakuha og kaalam gikan sa laing tinubdan aron ipasulod sa imortal nga hunahuna sa tawo.⁶

Ang tawo kinahanglang adunay espiritu nga molahutay sa kahangturan, usa ka espiritu nga nagagikan sa Dios, ug kon dili kini katudloan gikan sa samang tinubdan o gahum nga naglalang kaniya dili siya matagbaw.⁷

Kon wala kanato ang Espiritu Santo kinahanglang dili kita motudlo.⁸

Samtang magtudlo kita sa ebanghelyo, kinahanglang hinumduman nato nga ang pinakatataw ug pinakayano nga mga kamatuoran nga maoy makahatag og kaayohan.

Ang mga pagpadayag ni Jesukristo nagtudlo kanato nga ang Manluluwas natawo sa mortalidad, ug ang Amahan miingon nga siya wala mohatag kaniya sa kahingpitan sa sinugdanan pero nakaangkon og grasya ug dugang pa nga grasya hangtud iyang nadawat ang kahingpitan ug gitawag og Anak sa Dios tungod kay wala siya makadawat sa kahingpitan sa sinugdanan [tan-awa sa D&P 93:12–14]; kita usab kinahanglang maningkamot kutob sa atong mahimo nga motubo diha sa grasya, kahayag ug kamatuoran, nga sa tukma nga higayon makadawat kita sa kahingpitan [tan-awa sa D&P 93:20].

Ang Ginoo nagtagana og daghang mahinungdanong mga baruganan para kanato, ug ang pinaka mahinungdanong mga baruganan nga gitagana alang kanato mao ang labing yano ug tataw. Ang unang mga baruganan sa ebanghelyo nga makahatag kanato sa kinabuhing dayon mao ang pinakayano ug gani walay labaw pa ka mahimayaon o ka importante ngari kanato. Ang mga tawo mahimong maningkamot sa pagpakita og ngilngig nga talento, kaalam ug kahibalo sa pagsulat o sa pagsangyaw, mahimong mosangyaw sila sa mga misteryo ug mopahayag og butang nga katingalahan, importante ug talagsaon, ug mahimo nila kining paningkamutan pag-ayo, pinaagi sa espiritu ug kusog sa tawo nga walay tabang sa Balaan nga Espiritu sa Dios ug sa gihapon ang mga tawo wala kahatagig kaayohan ug ang ilang pagsangyaw dili makahatag og katagbawan. Ang pinakayano ug sa pinakatataw nga mga butang ang makahatag nato og kaayohan, kon gitudlo pinaagi sa Espiritu sa Dios, ug walay laing mas importante o makaayo ngari kanato. Kon anaa kanato ang Espiritu, kon mag-uban kini kanato kanunay, naglamdag sa atong mga hunahuna adlaw ug gabii—anaa kita sa luwas nga dalan.⁹

Gusto kong mosulti sa akong kasinatian niini nga Simbahan, nakakita akog mga tawo, matag karon ug unya nahimong bantugan ug mga sulugoon sa Dios. Naningkamot sila nga mopasabut sa mga butang nga wala nila mahibaloi, aron ingnon nga sila maantigo. Adunay daghan niining matanga niining panahona. Dihay nagunang mga Elder sa Simbahan nga nangatubang sa mga tawo ug misangyaw sa mga baruganan. Si Joseph nakadungog niini ug gusto nga ipresentar niya ang doktrina pinaagi sa pagsulat niini. Gisulat niya kini, ug sa dihang nahuman na iya kining gibasa ngadto sa Propeta. Nangutana siya ni Joseph unsay iyang hunahuna niini. “Ngano,” miingon si Joseph, “nindot na nga sistema, dunay usa lang ka sayop nga akong nakita niini––” “Unsa kana Brother Joseph?” miingon si Joseph––“Dili kana tinuod.” Mao nga miingon ako, may higayon nga kon ang usa ka tawo nagtuo nga siya maalamon, mosulay sa pagtudlo og butang nga wala sa Doktrina ug mga Pakigsaad ug sa mga buhat sa Simbahan, ug kini dili tinuod. …

… Itudlo ang kamatuoran sumala sa imong pagsabut niini. Ayaw pagpangagpas sa mga butang nga wala nimo mahibaloi, kay wala kiniy ikahatag nga kaayohan. Kon maminaw kamo sa bakak nga mga doktrina tintalon kamo sa dautan nga mga espiritu. Hinumdumi ug sunda kini, ug dili na ikaw mahasol. Padayon sa dalan sa kamatuoran, ug maayo ra ang tanan alang kanimo.¹⁰

Kon kita magpundok aron sa pagtuon sa ebanghelyo, nagkinahanglan kita sa Espiritu sama sa magtutudlo.

Nanghinaut ako nga ang Espiritu sa Dios mag-uban dili lamang niadtong mamulong ug motudlo …, pero ngadto usab niadtong naglingkod ug naminaw.¹¹

Gikinahanglan natong tanan ang imspirasyon sa Makagagahum …, magsangyaw man kita o maminaw.¹²

Moingon ako sa akong mga kaigsoonan, atong paningkamutan ug andamon ang atong mga hunahuna pinaagi sa pag-ampo sa atubangan sa Ginoo, aron makaangkon kita og kahayag sa Espiritu ug impluwensya sa Espiritu Santo, aron makakita ug mapatunhay sa dalan sa kinabuhi, ug kon kita makadawat sa mga pagtulun-an ug mga tambag sa mga sulugoon sa Dios, nga kita mahinumdom niini sa atong mga kasingkasing ug gamiton kini sa atong mga kinabuhi.¹³

Kon aduna kita niana nga tipik sa Espiritu sa Dios nga mao ang atong pribilihiyo nga matagamtaman, ug sa pagpalambo sa atong calling, atong maangkon kana nga pagpamatuod nga kinahanglang atong maangkon, kon dunay bag-ong doktrina nga ipahayag, o ang daang doktrina hingpit nga gipasabut. Niining paagiha makakuha kitag kaayohan sa mga pagsangyaw sa atong mga kaigsoonan, ug mahatagag bili ang mga baruganan sa kinabuhing dayon.¹⁴

Manghinaut ako ug mag-ampo nga samtang magpundok kita atong matagamtam ang Espiritu sa Dios ug ang atong mga kasingkasing magkahiusa sama sa kasingkasing sa usa ka tawo; aron ang atong mga pag-ampo mapadayag ngadto sa Ginoo, aron ang Iyang mga panalangin atong maangkon ug nga kadtong kinsa namulong ngari kanato mobuhat sa ingon pinaagi sa inspirasyon sa Espiritu Santo ug sa gahum sa Dios.¹⁵

Kinahanglan nga atong ipakita ang atong pagpaminaw, mga pag-ampo, pagtuo ngadto sa [titser], ug kon buhaton nato kini daghan ang atong madawat gikan sa iyang kasingkasing kadtong mga butang nga makatabang kanato.¹⁶

Kon adunay Kapangulohan niini nga Simbahan, o sa Korum sa Napulog Duha ka mga Apostoles, o si bisan kinsa nga mga Elder nga mobarug … nga mamulong, kining mga tawhana misalig kaniya, ug naglaum nga maangkon nila ang Balaan nga Espiritu nga igo nga makasulti og butang nga makaayo kanila; hapit ang tanang mga tawo nagpaabut niini. Sa laing bahin moingon ako nga ang Kapangulohan, ang Napulog Duha ug ang mga Elder … nagpaabut nga ang mga tawo makabaton [usab] sa Espiritu sa Ginoo aron sila makasabut, ug mao kini ang gikinahanglan, nga sila makasabut unsay gisulti ngadto kanila ingon man gikinahanglan kini sa mga kaigsoonan nga mamulong sa pagtudlo sa doktrina, baruganan, kamatuoran ug sa mga pagpadayag ni Jesukristo.

Kon ang mga hunahuna sa tawo makasabut, ug malamdagan sa gahum sa Dios ug sa gasa sa Espiritu Santo nga ilang mahimut-an ug hatagag bili ang mga baruganan sa mahangturong kamatuoran ug ang mga pagpadayag nga gihatag sa Dios … nan andam sila nga makadawat og kaayohan sa mga panalangin nga gibu-bu diha kanila. Si kinsa kaninyo ang nakasinati niini nga panalangin, nagtuo ako nga ang tanan nakasinati niini usahay, nahibulong nianang higayona sa ilang kinabuhi nga dunay kalainan sa ilang mga hunahuna. Nasayud ako niini nga mao kini ang nahitabo sa akong kaugalingon ug nagtuo ako nga mao usab ang uban.

Dihay mga panahon nga ang panan-awon sa akong hunahuna nabuksan aron makasabut sa pulong sa Dios ug sa mga pagtulunan sa iyang mga sulugoon.—Ang panan-awon sa akong hunahuna gibuksan ug nakasabut sa gahum sa Dios ug sa gasa sa Espiritu Santo. Mao nga sa akong paglingkod dinhi ug nakadungog sa Kapangulohan, ug sa mga sulugoon sa Dios nga mitudlo sa baruganan sa pagkamatarung, ug sa pulong sa Dios ngari kanato, gibati nako ang kakusog, ang gahum ug ang kaimportante niining mahangturong mga kamatuoran nga ilang gipahayag sa atong mga hunahuna, bisan sa laing mga panahon ang sama nga mga kamatuoran tingali gitudlo, pero kini milabay nga wala makahatag og samang impresyon sa akong hunahuna.

… Giisip nako nga importante nga maningkamot kita nga makaangkon sa Espiritu, nga magkadugang kini ngari kanato ug kini magauban kanato nga kon kita makadungog og pagtulun-an ang atong mga hunahuna andam sa pagdawat niini. …

Moingon ako karon kay tungod daghan kanato ang midawat sa ebanghelyo ug nagpundok uban sa mga Santos sa Dios, importante nga maningkamot kita karon, nga magpuyo kita ubos sa impluwensya niana nga Espiritu nga magpadayon kini sa pagtubo ug sa pagdumala kanato sa atong mga buhat diha sa mga anak sa tawo.— Karon kon ang Espiritu Santo anaa sa tawo ug makadungog sa yano, tataw nga mga kamatuoran sa kaluwasan mas bililhon kini kay sa bisan unsa pa, ug andam siya sa pagsakripisyo sa tanang yutan-ong butang aron masiguro ang iyang kaluwasan, pero kon mangitngitan ang mga hunahuna sa katawhan, mawala kanila ang Balaan nga Espiritu ug ang ka biliIhon sa ebanghelyo, ug dili nila maamgohan ang pribilihiyo ug dungog nga makauban ang mga Santos sa Dios …, ni magpadayon sila sa ilang pagdapig ngadto sa ilang Langitnong Amahan, ug motahud sa iyang pangalan dinhi sa yuta o hatagan og bili ang ilang panag-uban niadtong naghupot sa balaan nga priesthood, ug mao nga sila nasum-ok sa kangitngit. … Matingala ug mahibulong kita sa higayon nga kita gilamdagan sa Espiritu sa Dios ug sa mga pagpadayag nga iyang gihatag ngari kanato, ug kon kita makaalinggat sa pagkaimportante niining mga butanga og sa higayon nga atong makita ang epekto ug sangputanan niini ngari kanato, dili lamang sa pag-andam sa atong mga hunahuna nga moadto sa kalibutan sa mga espiritu, pero sa pag-andam kanato nga makahimamat sa atong Amahan sa Langit.¹⁷

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Basaha ang mga pamahayag ni Presidente Woodruff sa unang duha ka mga paragrap niini nga hugna (pahina 63). Unsa ang gipasabut niini nga mga pamahayag mahitungod kaniya? Unsa nga mga pagpasabut ang gihatag niini mahitungod sa pagtudlo ug pagtuon?
Unsay inyong nakat-unan gikan sa mga pulong ni Presidente Woodruff mahitungod sa pagtudlo pinaagi sa gahum sa Espiritu? (Tan-awa sa mga pahina 63, 65; tan-awa usab sa 2 Nephi 33:1–2.) Sa unsa nga paagi nga kita makaandam sa pagdawat sa giya sa Espiritu Santo kon kita motudlo?
Unsay inyong mga kasinatian sa pagtudlo ug pagkat-on pinaagi sa Espiritu?
Ribyuha ang seksyon nga nagsugod sa pahina 66. Nganong peligro ang pagbanabana sa mga butang nga wala nato masabti? Nganong mahatagan kita og kaayohan pinaagi sa yano ug tataw nga mga kamatuoran?
Unsa ang mga katungdanan sa nagtuon? (Tan-awa sa mga pahina 68–70.) Sa unsa nga paagi nato makuha ang pinakadako nga kaayohan gikan sa leksyon sa ebanghelyo o sermon? Palandunga o hisguti ang mga paagi aron kamo makaandam nga matudloan sa Espiritu.
Ribyuha ang unang paragrap sa pahina 69. Sa inyong mga kasinatian sa pagtudlo sa ebanghelyo, sa unsa nga paagi nga nakakuha kamog kaayohan gikan sa “pagpaminaw, mga pag-ampo ug pagtuo” niadtong inyong gitudloan?
Sa unsang paagi nga ang mga baruganan niini nga hugna makatabang kanato sa atong pagtuon niining libroha? (Tan-awa usab sa mga pahina v–x.) Sa unsang paagi nga kining mga baruganan magamit samtang magtuon ug magtudlo kita sa ebanghelyo sa atong panimalay?

May Kalabutan nga mga Kasulatan: Mga Hebreohanon 4:2; 2 Pedro 1:21; 2 Nephi 31:3; Alma 17:2–3; D&P 11:18–21; 42:14; 50:13–22; 52:9; 100:5–8