Pene 9

Faaore i te hapa a vetahi ê ma to tatou aau ato‘a

Ua faaue mai te Fatu ia tatou ia faaore i te hapa a vetahi ê ia faaore-ato‘a-hia ho‘i ta tatou mau hara e ia roaa te hau e te oaoa ia tatou.

No roto mai i te oraraa o Spencer W. Kimball

Ia haapii te peresideni Kimball no ni‘a i te titauraa i te faaoreraa hara, ua haapapû ato‘a oia i te parau tumu faufaa roa o te faaoreraa i te hara a vetahi ê. Ua ti‘aoro oia i te mau taata ato‘a ia rohi no te faatupu i te varua faaore hara, e ua faati‘a mai oia i teie ohipa i tupu:

« Te imi ra vau i te rave‘a no te faatitiaifaro i te hoê pe‘ape‘a i roto i te hoê paroita na’ina’i… i te mea e, e piti na taata ti‘araa maitai, e na taata arata‘i taata teie, ua paari roa raua i roto i te hoê pe‘ape‘a hau ore. Na te tahi mau mea taa ore i rotopu ia raua i faaatea ê roa ia raua ma te inoino rahi. A ma‘iri noa ai ho‘i te mahana, te hepetoma e te ava‘e, ua haere noa’toa te fifi i te aanoraa. Ua haamata ato‘a te utuafare o teie na taata i te ô i roto i teie pe‘ape‘a, e i te pae hopea, fatata te taato‘araa o te mau taata i roto i te paroita ua ô ato‘a i roto i te reira pe‘ape‘a. Ua parare te parau e ua tupu te inoino te tahi i te tahi, e ua riro te tihotiho parau mai te arero auahi ra te huru e tae roa’tu ua tupu te hoê amaha rahi i roto i te mau taata o taua oire ra. Ua tonohia vau i reira no te faatitiaifaro i taua ohipa ra… Ua tae atu vau i roto i taua oire pe‘ape‘a ra i te hora 6 i te ahiahi, i te po Sabati, e i taua ihoa taime ra, ua haamata vau i te paraparau i na taata pe‘ape‘a tumu.

« Ua rohi matou ! Ua taparu vau, e ua faaara e ua tatarahapa e ua faaitoito ! Mai te mea ra, aita hoe mea e nehenehe e taui ia raua. Na taata pe‘ape‘a toopiti ato‘a ra, ua papû maitai roa raua e, ua ti‘a raua e aita hoê mea e nehenehe e faataui i to raua mana‘o.

Te tere noa ra te hora—ua ma‘iri roa te hora ahuru ma piti i te pô, e mai te mea ra e, ua haamata ato‘a te mana‘o i te paruparu; Te vai noa ra te inoino e te iria. Aita e rave‘a e ore ai te etaeta. Area râ, ua tupu a‘e ra te reira. Ua iriti faahou a‘era vau i ta‘u buka fafau, e inaha, te vai noa nei i mua ia‘u. E rave rahi taime to‘u tai‘oraa i te reira i te mau matahiti i ma‘iri, e aita i hiti mai te hoê auraa taa ê. I teie râ pô, o te pahonoraa ïa. Ua riro te reira ei piiraa, ei ti‘aororaa, e ei aroraa, e mai te mea ra e, no ô roa mai te reira i te Fatu ra. Ua tai‘o vau i te [tuhaa 64] mai te irava 7, aita râ na taata pe‘ape‘a i tuu noa a‘e e tae roa’tu ta‘u tai‘oraa i te irava iva. I reira, ua ite a‘era vau ia raua i te tauiraa i te huru, te hitimahutaraa, te maereraa. Ua tano anei taua parau ? Te parau mai nei te Fatu ia tatou—ia tatou paato‘a—‘No reira, te parau atu nei au ia outou e, e mea ti‘a roa ia outou ia faaore outou te tahi i ta te tahi ra hapa.’

« E faaheporaa teie. Ua faaroo a‘e nei raua i te reira na mua a‘e nei. Ua faahiti raua i te reira i roto i te pure a te Fatu. Tera râ i teie nei:’… no te mea o oia o tei ore i faaore i te hapa a to’na ra taea‘e ua vai faahapahia oia i mua i te Fatu… ’

« I roto i to raua aau, te na ô ra paha raua e: ‘Na reira, e faaore au i ta’na hapa mai te mea e, e tatarahapa mai oia, e e ani mai ia faaorehia ta’na hara, tera râ, na’na e haere mai na mua.’ I reira te parau o te reni hopea e ta‘iri ai ia raua: ‘No te mea tei roto noa ia’na te hara rahi a‘e.’

« Eaha ? Te auraa ra, na‘u anei e faaore i te hapa noa’tu e, e faaea to‘eto‘e noa to‘u enemi e te tau‘a ore e te ino ? Aita hoê hape i roto i taua parau.

« Te vai nei tera mana‘o hape e, e titauhia i te taata tei faatupu i te hara ia tatarahapa e ia faahaehaa ia’na i raro i te repo hou a titauhia ai te faaoreraa hara. Oia mau roa, te taata tei faatupu i te ino, e mea ti‘a ïa ia’na ia faatitiaifaro i te reira, tera râ, no te taata tei faainohia, ua titauhia ia’na ia faaore i te hapa a te taata tei faatupu i te ino, ma te hi‘o ore i te huru o te tahi. I te tahi taime, e mea oaoa rahi na te taata ia ite i to’na enemi ia tuturi i raro e ia nee i ni‘a i te repo, tera râ, e ere te reira i te faanahoraa a te evanelia.

Ma te maere rahi, ua faaetaeta maira raua i to raua tino, ua faaroo maira, e ua feruri hohonu a‘era, e ua haamata ihora i te farii. Na teie irava e tae noa’tu i te tahi atu mau tai‘oraa, i tuu i to raua turi i raro. Hora piti i te tu‘iraa pô, teie e piti na enemi etaeta te aroha rima nei, te ataata nei e te faaore nei i te hapa e te ani nei i te faaoreraa hapa. Teie e piti na taata te tauahi papû nei. Ua riro taua hora ra ei hora mo‘a. Te mau inoino tahito, ua faaorehia ïa e ua haamo‘ehia, e ua riro faahou te enemi ei hoa. Aita hoê faahou e paraparau no ni‘a i te mau fifi. Ua hunahia te taato‘araa o te ino, e ua ponaohia te afata vairaa ivi maro, e ua ta‘uehia te taviri o te afata, e ua faati‘a-faahou-hia te hau ».¹

I roto i te roaraa o ta’na tau faatereraa, ua faaitoito te peresideni Kimball i te mau melo o te Ekalesia ia faaore i te hapa: « Mai te mea e, te vai ra te tahi mau taa-ore-raa, a haamaramarama i te reira, a faaore i te hapa, e a haamo‘e i te reira, eiaha e vaiiho i te mau inoino tahito ia taui i to outou varua e ia faaino i te reira, e ia haamou i to outou here e to outou oraraa. A faanahonaho i to outou utuafare. A here te tahi i te tahi e a here i to outou mau taata tupu, to outou mau hoa, te mau taata e ora ra i piha‘i iho ia outou, i te mea e, ua horo‘a te Fatu i te reira mana i roto ia outou ».²

Te mau haapiiraa a Spencer W. Kimball

E mea ti‘a ia tatou ia faaore i te hapa ia faaore-ato‘a-hia mai ta tatou.

No te mea ho‘i e, e mea titau tuutuu-ore-hia te faaoreraa hapa no te farii i te ora mure, e feruri te taata e: Nahea e roaa ai ia‘u te faaoreraa hapa ? E ti‘a ‘oi‘oi noa mai te hoê o te mau rave‘a tumu, oia ho‘i: E faaore te hoê taata i te hapa ia faaore-ato‘a-hia mai ta’na.³

« Ia faaore ho‘i outou i ta vetahi ê ra hapa, e faaore ato‘a mai to outou Metua i te ao ra i ta outou:

« Ia ore râ outou ia faaore i ta vetahi ê ra hapa, e ore ato‘a to outou Metua e faaore mai i ta outou hapa » (Mataio 6:14–15).

E mea teimaha anei te reira ia rave ? Oia ïa. Aita te Fatu i fafau mai i te hoê haere‘a ohie, aita ho‘i Oia i horo‘a mai i te hoê evanelia ohie, aita ato‘a i horo‘a mai i te mau ture raro roa, aita ato‘a i te mau arata‘iraa haehaa. E mea teitei te hoo, tera râ, te tao‘a e roaa mai, e hoonaraa maitai ïa to ratou hoo. Te Fatu iho tei huri atu i te tahi paparia; Oia iho tei mamae i te ta‘iriraa e te faainoraa; ua mamae oia i te mau huru ino ato‘a, noa’tu râ i te reira, aita Oia i faahiti i te hoê noa a‘e parau faahapa. E teie Ta’na uiraa ia tatou paato‘a: « No reira, eaha to outou huru e au ai ? » E teie Ta’na pahonoraa ia tatou: « Mai to‘u nei ïa » (3 Nephi 27: 27).⁴

Ei faaoreraa hapa ta tatou ia vetahi no roto roa mai i te aau e ma te hope roa

Te faaueraa ia faaore i te hapa e te faautu‘araa e topa mai ia ore e haapa‘ohia te reira faaueraa, aita’tu ïa e faahitiraa hau atu i te maramarama i tei faahitihia i roto i te heheuraa no teie anotau i te peropheta Iosepha Semita:

« Ua imi ta‘u mau pĭpĭ, i mutaa ihora, i te rave‘a ia pari te tahi i te tahi e aita ho‘i ratou i faaore i ta te tahi ra hara i roto i to ratou ra mau aau; e no taua ino ra ratou i roohia’i i te ati e i faautu‘a-roa-hia’i ho‘i.

« No reira, te parau atu nei au ia outou e, e mea ti‘a roa ia outou ia faaore outou te tahi i ta te tahi ra hapa; no te mea o oia o tei ore i faaore i te hapa a to’na ra taea‘e ua vai faahapahia oia i mua i te Fatu; no te mea tei roto noa ia’na te hara rahi a‘e.

« E faaore au, o te Fatu, i te hara a ratou ta‘u i hinaaro i te faaore atu, ia outou râ ua titauhia’tu ra outou ia faaore i te hapa a te taata ato‘a » (PH&PF 64:8–10).

Ua au teie haapiiraa no tatou i teie mahana. E rave rahi taata, ia tupu ana‘e te faatitiaifaroraa e te tahi atu mau taata, e parau ratou e, e faaore râtou i te hapa, tera râ, e tape‘a noa ratou i te riri, e tamau noa i te pari i te tahi atu taata, e tamau noa ratou i te ti‘aturi ore i te aau parau-ti‘a o te tahi. E hara te reira, i te mea, ia oti ana‘e te faahauraa, e ia faahiti-ana‘e-hia te tatarahapa, e faaore te taata tata‘i tahi i te hapa a te tahi e te tahi e e haamo‘e roa i te reira, e e patu faahou i te ti‘aturiraa tei haamouhia e ia faatupu faahou i te auraa maitai.

Mai te mea ra e, ua faahiti te mau pĭpĭ, i mutaa ihora, i te mau parau no te faaoreraa hapa, e ua rave i te tahi mau faatitiaifaroraa i titauhia, e mea na ni‘a ê noa râ, « aita râ i faaore i te hapa a vetahi ê i roto i to ratou aau ». E ere te reira i te faaoreraa hapa, te tahi te reira huru o te haavarevare, o te haavare e o te rave‘a pi‘o. Mai tei faaitehia i roto i te pure a te Mesia ra, ia riro te faaoreraa hapa ei ohipa no roto roa mai i te aau e ia riro ato‘a ei tamâraa i te feruriraa o te hoê taata[a hi‘o Mataio 6:12; a hi‘o ato‘a i te mau irava 14–15]. Te faaoreraa hapa o te haamo‘eraa ïa. I roto i te hoê amaa, « ua imi te hoê vahine i te mau rave‘a » no te faahau i te pe‘ape‘a, ua faaite oia i te reira na roto i te hoho‘a e te parau, e ua faahiti roa i te mau parau o te faaoreraa i te hapa. I muri iho, ma te mata tu‘atu‘a, teie ta’na parau, « E faaore au i ta’na hara, tera râ, e au to‘u roro mai to te elephani te huru. Eita roa e mo‘ehia ia‘u ». Tera faahauraa ta’na i rave, aita ïa e faufaa, mea faufaa ore. Te vai noa ra te inoino i roto ia’na. Ta’na mau parau faahoaraa, e au ïa mai te fare hiro te huru, te mau mea ta’na i patu faahou, e au ïa mai te aihere te huru, e ua vai noa te mamae i roto ia’na e aita e hau to roto i te feruriraa. Te mea ino roa’tu, « ua vai faahapahia oia i mua i te Fatu », e tei roto noa ia’na te hara rahi a‘e, hau atu i tei roto i te taata ta’na e parau ra e, ua faaino ia’na.

Aita teie vahine riri i ite e, aita roa’tu oia i faaore i te hapa. Ua faahua faaore hapa noa oia. To’na noa vaha tei rahi, area te ohipa ra, aita roa ïa hoê noa a‘e mea i ravehia. I roto i te irava i faahiti i ni‘a nei, tera parau e i roto i to ratu aau, e auraa hohonu to’na. Ia riro ïa ei tamâraa i te feruriraa e i te mau mana‘o e i te oto. E mea faufaa ore te parau ana‘e.

« Inaha ho‘i, ia hopoi mai te taata ino i te mea horo‘a noa ra, ua na reira mai oia ma te nounou; no reira ua haapa‘ohia atura ïa na’na mai te mea e ua tape‘a-mau-hia e ana; no reira ua haapa‘ohia’tu ïa taua taata ra ei mea ino i mua i te Atua » (Moroni 7:8).

Teie ta Henry Ward Beecher i parau no ni‘a i taua mana‘o ra: « E nehenehe ta‘u e faaore i te hapa, eita râ ta‘u e nehenehe e haamo‘e, te tahi teie huru no te parau e, eita ta‘u e nehenehe e faaore i te hapa ».

Te hinaaro nei au e parau e, ia ore te hoê taata ia faaore i te mau hapa a to’na taea‘e ma to’na aau ato‘a aita e ti‘a ia’na ia amu i te oro‘a mo‘a.⁵

E vaiiho tatou na te Fatu e haava.

No te riroraa ei taata parau-ti‘a, e mea ti‘a ia tatou ia faaore i te hapa, e e na reira tatou ma te hi‘o ore e, ua tatarahapa anei to tatou enemi e aore râ aita, e aore râ, ua taui anei oia i to’na huru ma te aau tae mau, e aore râ, ua ani mai anei oia ia tatou ia faaore i ta’na hapa. E pee tatou i te hoho‘a e i te haapiiraa a te Fatu, tei na ô mai e: « … E mea ti‘a roa ia outou ia parau mai i roto i to outou mau aau e–e tuu atu i te Atua ia haavâ ia taua, e ia faautu‘a ia oe mai te au i ta oe mau ohipa ra » (PH&PF 64:11). Tera râ, e mea pinepine te taata i te ore e vaiiho na te Fatu e rave, no to ratou paha taiâ o te rahi roa te aroha o te Fatu, o te ore te Fatu e faaetaeta mai te au i te titauhia i roto i taua fifi ra.⁶

Te vai ra te tahi mau taata eita ta ratou e nehenehe e faaore i te hapa e aore râ, eita roa’tu ratou e faaore e e haamo‘e i te mau hara a vetahi ê; e ere râ i te reira ana‘e, e mea ino roa’tu te ohipa ta ratou e rave, inaha, e faaino tamau noa ratou i te taata hara. Ua farii au e rave rahi rata e e rave rahi niuniu na te mau taata o tei opua ma te tuutuu ore ia faatupu i te parau-ti‘a na roto i to ratou iho puai, e ua faariro i te reira ei haaraa na ratou ia faautu‘ahia ihoa te taata rave hara. Teie te parau a te hoê vahine, « Ia hurihia taua taata ra i rapae i te Ekalesia e ti‘a ai. Eita vau e faaea e tae roa’tu e ua ravehia te reira ». Te na ô ra te tahi e, « Eita ta‘u e nehenehe e faaea, mai te mea e, e vai noa mai â taua taata ra i roto i te Ekalesia » E te na ô faahou ra te tahi e: « Eita roa’tu vau e tomo i roto i tera fare pureraa mai te mea e, e faarii-noa-hia â taua taata ra ia tomo mai i roto. Te hinaaro nei au ia haavahia vau no to‘u ti‘araa melo ». Te vai ra hoê taata tei tere roa e rave rahi taime i Salt Lake City e tei papa‘i roa e rave rahi rata roroa no te pato‘i i te episekopo e i te peresideni tĭtĭ no te oreraa e ravehia te faatitiaifaroraa no te hoê taata, i ta’na parauraa, tei ofati i te ture a te Ekalesia.

No te mau taata e hinaaro nei e faaohipa i te ture na roto i to ratou iho puai, te tai‘o faahou atu nei matou i te parau papû a te Fatu: « … tei roto noa ia’na te hara rahia a‘e » (PH&PF 64:9). Te na ô faahou ra te heheuraa e: « E mea ti‘a roa ia outou ia parau mai i roto i to outou mau aau e–e tuu atu i te Atua ia haavâ ia taua, e ia faautu‘a ia oe mai te au i ta oe mau ohipa ra » (PH&PF 64:11). Mai te mea e, e faaitehia’tu i te feia faatere o te Ekalesia, te hara i itehia, eiaha te taata e haapa‘o faahou i te reira, e vaiiho râ i te reira hopoi‘a na te feia faatere o te Ekalesia e haapa‘o. Mai te mea e, e vaiihoa noa te feia faatere i taua hara ra, ua riro ïa te reira ei hopoi‘a teimaha na ratou, e haavâhia ratou no te reira.⁷

E haavâ te Fatu ia au i te faito ta tatou i faito ra. Mai te mea e, mea etaeta tatou, eiaha ïa tatou e ti‘aturi i te tahi atu huru faito maori râ, te faito etaeta. Mai te mea e, ua faaite tatou i te aroha i te feia tei hamani ino mai ia tatou, e faaite ato‘a mai oia i te aroha ia tatou i roto i to tatou mau hape. Mai te mea e, e aau faaore hara ore to tatou, e vaiiho ato‘a oia ia tatou ia vai noa na i roto i ta tatou mau hara.

Te faaite maitai ra te mau papa‘iraa mo‘a e, e faitohia te taata i te faito ta’na i faito i to’na ra taata tupu, area râ, te faitoraa i te hoê haavâraa, noa’tu e, ua papû maitai te reira, e ere ïa na te mau melo o te Ekalesia e rave i te reira, na te mau ti‘a faatere râ o te Ekalesia e o te fenua. Na te Fatu e rave i te haavâraa hopea…

E nehenehe te Fatu e haavâ i te taata ia au i to ratou mau mana‘o, e ia au ato‘a i ta ratou parau e i ta ratou ohipa, no te mea, ua ite oia i te mau mana‘o o to ratou aau; area te taata ra, aita ïa e ti‘a ia’na ia na reira. Te faaroo nei tatou i te parau a te taata, te ite nei tatou i te ohipa ta ratou e rave nei; no te mea râ e, eita tatou e nehenehe e ite i to ratou mana‘o e aore râ i ta ratou opuaraa, e mea pinepine tatou i te haavâ hape noa mai te mea e, e tamata tatou i te feruri mana‘o noa i te auraa e i te mau tumu i rave ai ratou i tera e tera ohipa, e i reira, a tuu atu ai tatou i ta tatou iho tatararaa.⁸

Noa’tu e e mea fifi, e nehenehe ta tatou e faaore i te hapa.

I roto i te parau no te varua faaore hapa, ua ui mai te hoê taea‘e maitai ia‘u, « Oia mau, tera ïa te mea e ti‘a ia rave, tera râ, nahea oe ia rave i te reira ? Eita anei te reira e titau i te hoê puai taa ê ? »

Na ô atura vau e, « Oia, tera râ, ua faauehia ia tatou ia riro ei taata puai taa ê. Na ô maira te Fatu, ‘Ia maitai roa ho‘i outou mai to outou Metua i te ao e maitai roa ra.’ (Mataio 5:48). E atua hou tatou, e te titau mai nei te Fatu ia maitai roa tatou ».

Na ô maira oia e, « Oia mau, ua faaore te Mesia i te hapa a te feia tei haamauiui ia’na, tera râ, ua hau atu oia i te taata noa nei ».

Teie ta‘u pahonoraa: « Tera râ, mea rahi roa te taata tei itehia e nehenehe ta ratou e rave i teie ohipa hanahana ».

Mai te mea ra e, e rave rahi te taata mai teie taea‘e maitai roa, te tape‘a noa nei â ratou i teie feruriraa e, te varua faaoreraa hapa… no te mau taata ana‘e ïa i roto i te mau papa‘iraa mo‘a e aore râ, no te mau taata i roto i te moemoea, eiaha râ no te mau taata i roto i te ao nei. E ere ïa mai te reira.⁹

Ua ite au i te hoê metua vahine apî tei pohe te tane. E mea veve roa taua utuafare ra, e e 2,000 tara ana‘e te moni paruru i aufauhia, tera râ, ua riro te reira mai te hoê tao‘a horo‘a no te ra‘i mai. Ua aufau ‘oi‘oi mai te Taiete i taua tino moni ra i muri a‘e i te haapapû-raa-hia te poheraa. Ua faaoti ihora taua metua vahine ra e, e haaputu oia i te reira moni no te mau taime fifi, e no reira, ua tuu atura i te reira i roto i te fare moni. Ua ite a‘era te tahi mau taata i taua tino moni haaputu ra, e ua haere maira te hoê fetii to’na e taparu ia’na ia horo‘a tarahu i taua 2,000 tara ia’na ra, i te hoê moni taime maitai roa.

Ua ma‘iri a‘era e rave rahi matahiti, e aita oia i farii i ta’na iho moni tumu e tae noa’tu i te moni taime apî. Ua ite a‘era oia e, te ape nei te taata i tarahu ia’na, e ia ani atura oia ia’na i taua moni ra, ua fafau maira te taata tarahu i te tahi mau fafauraa papû ore. I teie taime, te hinaaro nei oia i taua moni ra, e aita te reira e noaa mai.

Ua parau maira oia iau e, « E inoino rahi to‘u ia’na ! » Ua itehia te riri u‘ana i roto i ta’na parau, e i roto i to’na mata. Hoê taata tino itoito, e eia i te hoê vahine ivi e utuafare to’na ! « mea riri rahi na‘u o’na ! » ta’na ïa parau faahiti tamau noa. I muri iho, ua faati‘a’tu vau ia’na i te hoê aamu, e aamu ïa no te hoê taata tei faaore i te hapa a te taata tei taparahi pohe roa i to’na metua tane. Ua faaroo maite oia. Ua ite au e, ua putapû roa oia. E i te pae hopea, ua tahe to’na roimata, e ua muhumuhu maira oia e: « Mauruuru. Mauruuru maitai. E mea papû maitai e, o vau ato‘a, e mea ti‘a ato‘a ia‘u ia faaore i te hapa a to‘u enemi. I teie nei e tamâ vau i to‘u aau i te mau inoino ato‘a. Aita roa’tu vau e titau nei i te moni, te vaiiho nei râ vau i te taata tei hamani ino mai ia‘u i roto i te rima o te Fatu ».

E rave rahi hepetoma i muri mai, ua haere faahou mai oia e farerei ia‘u e ua fa‘i maira oia e, ua riro te mau hepetoma i ma‘iri ra ei mau hepetoma hau roa a‘e i te oaoa o to’na oraraa. Ua haatihia oia e te hoê hau apî e ua ti‘a ia’na ia pure no te taata hamani ino, e ia faaore i ta’na hapa, noa’tu e, aita hoê a‘e tara ta’na i faaho‘ihia mai.¹⁰

Ia faaore ana‘e tatou i te hapa a vetahi ê, te faati‘amâ ato‘a ra ïa tatou ia tatou i te riri e te inoino

No te aha te Fatu e ani ai ia outou ia here i to outou enemi e ia faaho‘i te ino i te maitai ? Ia roaa ia outou te haamaitairaa o te reira. Ia riri ana‘e outou i te hoê taata, eita te reira e faaino i te taata ta outou i riri rahi, mai te mea hoa râ e, tei te atea ê roa oia ia outou, e aita oia e farerei ia outou, tera râ, e faaino roa te riri e te inoino i to outou aau faaore hapa ore…

Penei a‘e paha ua farerei o Petero i te mau taata tei tamau noa i te faaino ia’na, e ua ui oia e:

« E te Fatu, ia tuatapapa tau taea‘e i te hamani ino mai ia‘u, ia hia a‘u faaoreraa’tu i ta’na hara ?…

E ua parau atura te Fatu:

« Aore au i parau atu ia oe e, ia hitu; ia hitu râ ahuru i te hituraa » (Mataio 18:21–22).

… Mai te mea e, ua tatarahapa ratou e ua tuturi no te ani mai i te faaoreraa hara, e nehenehe te rahiraa o tatou e faaore i te hapa, tera râ, ua titau mai te Fatu ia faaore tatou i te hapa noa’tu e, aita ratou i tatarahapa e aita ho‘i i ani mai ia tatou ia faaore i ta ratou hapa…

Ia papû maitai ia tatou e, e mea ti‘a ia tatou ia faaore i te hapa ma te haamăta‘u ore e ma te tahoo ore, no te mea, e rave te Fatu i te mea e titauhia no tatou… E faaino te inoino i te taata e tape‘a i te reira; na te reira e faaetaeta e faaiti e e faaino roa.¹¹

E mea pinepine te faainoraa i te ravehia ma te ore te taata faaino e ite i te reira. Ua parau oia e aore râ ua rave oia i te hoê mea tei hape te feruriraa o te tahi atu mau taata, e aore râ, aita i taa-maitai-hia te auraa. Ua tape‘a maite te taata tei faainohia i te faaino i roto i to’na aau, ma te amui atu i te tahi mau mea o tei faarahi roa’tu i te auahi e o te faatano i te mau hopearaa o te reira. Penei a‘e teie paha te hoê o te mau tumu te Fatu i titau ai i te taata tei faainohia ia rave i te taahiraa matamua no te faatupu i te hau.

« E mai te mea e faahapa to taea‘e e aore râ, to tuahine ia oe na, e afai ïa oe ia’na ra, te tane e aore râ, te vahine, i te hoê vahi ei reira orua ana‘e; e mai te mea e fa‘i mai oia te tane e aore râ, te vahine e hau ïa orua i reira » (PH&PF 42:88).

E haapa‘o anei tatou i te reira faaueraa e aore râ, e faaea noa anei tatou i roto i to tatou inoino, ma te tia‘i ia ite mai to tatou taata faaino i te reira inoino to tatou, e ia faahaehaa mai i mua ia tatou ma te tatarahapa ? ¹²

E riro paha tatou i te riri i to tatou na metua, e aore râ, i te hoê orometua, e aore râ, i te episekopo, e i reira, haamo‘e atu ai ia tatou iho eiaha ia ite-faahou-hia mai, ma te morohi e te otohe i roto i te taero o te inoino e te riri u‘ana. Te ora noa ra te taata faainohia i to’na oraraa ma te ore roa’tu e ite mai i te ati o te taata riri, area te taata riri ra, te faaino noa ra ïa oia ia’na iho.

… Ia faaru‘e ana‘e tatou i te Ekalesia no te faaino noa i te feia faatere e aore râ, no te faaite i te mau mana‘o inoino, te faaino noa ïa tatou ia tatou iho.¹³

I roto i tera e tera ta‘iraa taa ê te tahi e te tahi o te riri u‘ana, o te inoino e o te tahoo e faaroo-pinepine-hia nei i teie mahana, ua riro ïa te nota mărû o te faaoreraa hapa mai te raau faaora ra te huru. E to’na maitai i ni‘a i te taata e faaore i te hapa, e ere ïa i te mea na’ina’i.

Ia faaore ana‘e tatou i te hapa a vetahi ê ra, e roaa te oaoa e te hau ia tatou.

Na roto i te faaururaa a te Fatu ra o Iesu Mesia, ua horo‘a mai o Paulo ia tatou i te rave‘a no te mau fifi o te oraraa nei, inaha, e titau taua mau fifi ra i te iteraa e te faaoreraa hapa. « Ia hamani maitai outou ia outou iho, ma te aau mărû aroha noa, ma te faaore ho‘i i te hara te tahi e te tahi, mai ta te Atua i faaore mai i ta outou i te Mesia ra » (Ephesia 4:32). Ahiri teie varua hamani maitai, te aau mărû aroha noa, te faaore i te hara te tahi e te tahi, e nehenehe e tuuhia i roto i te mau utuafare ato‘a, e mo‘e ê ïa te aau pipiri, te ti‘aturi ore, e te inoino, teie ho‘i te mau fifi e vavahi nei i te mau utuafare e rave rahi, e i reira ïa te taata e ora ai i roto i te hau.¹⁵

Ua riro te faaoreraa hapa ei rave‘a semeio no te faatupu i te au maite e te here i roto i te utuafare e aore râ, i roto i te paroita. Ia ore te reira, e vai ïa te tama‘iraa. Ia ore te haroaroaraa e te faaoreraa hapa, e tupu ïa te aroraa, apeehia mai e te oreraa e vai te au maite, e na te reira e faatupu mai i te haapa‘o ore i roto i te utuafare, i roto i te amaa e i roto i te paroita. Area te faaoreraa hapa ra, e faatupu te reira i te au maite i te varua o te evanelia, i te Varua o te Mesia. Te reira te varua te ti‘a ia tatou paato‘a ia titau, mai te mea e, e hinaaro tatou ia farii i te faaoreraa i ta tatou iho mau hara, e ia riro ei mea pora‘o ore i mua i te Atua.¹⁶

Pinepine te te‘ote‘o i te paruru i to tatou e‘a a riro mai ai ei ofa‘i turori no tatou. E ti‘a râ ia tatou tata‘i tahi ia ui ia tatou iho e: « Mea faufaa a‘e anei to oe te‘ote‘o i to oe hau ? »

Mea pinepine te hoê taata o te rave i te mau ohipa faahiahia i roto i te oraraa nei e i te horo‘a ato‘a mai i te mau mea maitai roa, e vaiiho oia i te teoteo ia faa‘ere ia’na i te haamaitairaa tao‘a rahi te ti‘a ia’na ia farii. E ahu tamau maite tatou i te ahu oto e te rehu auahi o te aau faaore hapa e te varua oto, ma te hinaaro tamau noa i te faahaehaa i te aau mai te telona i na reira ra[a hi‘o Luka 18:9–14], e ia ani i te Fatu ia tauturu mai ia tatou ia faaore i te hapa.¹⁷

Vaivai a‘e â te tahuti nei, e tamau noa ato‘a tatou i te ora e i te rave i te ohipa i rotopu i te feia hara; e vai tamau noa ato‘a â te ite ore o te taata nei, te faainoraa, e te haapeperaa i te feia mana‘o mărû. E mea pinepine te mau mana‘o maitai roa i te taaore-hia. E mea oaoa ia ite i te mau taata e rave rahi, i roto i to ratou aau maitai, tei faatitiaifaro i to ratou feruriraa, tei horomii i to ratou te‘ote‘o, tei faaore i te hapa no te mau mea ta ratou i mana‘o e, ua faainohia ratou. E rave rahi tei haere na te e‘a fifi, te mo‘emo‘e, te ati, i roto i te ino rahi hopea, e i te pae hopea, ua farii ratou i te faatitiaifaroraa, ua farii i to ratou mau hape, ua tamâ i te inoino i roto i to ratou aau, e ua farii faahou i te hau, taua hau ra o te ite-papû-hia ia ma‘iri ana‘e oia. I muri a‘e i te riri o te faaino, te inoino, e te faataa-ê-raa, ua tupu mai te mahanahana e te maramarama e te hau.¹⁸

E nehenehe e rave mai te reira. E nehenehe ta te taata ia haavî ia’na iho. E nehenehe e upootia, E nehenehe te taata e faaore i te hapa a te mau taata ato‘a tei faaino mai ia’na e ia tamau noa no te farii i te hau i roto i to’na oraraa nei e i roto i te ora mure ore i roto i te ao a muri a‘e.¹⁹

Mai te mea e, e imi tatou i te hau, ma te faaoti e, e faatupu i te taa-ê-raa—mai te mea e, e faaore tatou i te hapa e e haamo‘e roa i te reira ma to tatou aau ato‘a—mai te mea e, e tamâ tatou i te hara, te inoino e te faahapa i roto i to tatou aau hou a taora ai i te ofa‘i e aore râ, hou a pari ai i te tahi—mai te mea e, e faaore tatou i te mau faaino tei tano e aore râ, tei ore e tano, hou a titau ai tatou i te faaoreraa o ta tatou iho mau hara—mai te mea e, e aufau tatou i ta tatou iho mau tarahu, te mea rahi e aore râ, te mea iti, hou a faahepo ai tatou i tei tarahuhia e tatou—mai te mea e, e imi tatou i te rave‘a ia tatara i te raau rahi e haapô ra i to tatou mata hou a faaite ai tatou i te aihere rii i roto i te mata o vetahi ê—aue ïa te hanahana o teie nei ao ! E iti roa mai ïa te faataa-ê-raa te tane e te vahine; aita ïa e ite-faahou-hia te haavâraa i te fare haavâraa; e au ïa te oraraa utuafare mai tei te ra‘i ra te huru; e tere vitiviti ïa te paturaa o te basileia; e na taua hau ra tei hau ê i te ite o te taata nei [a hi‘o Philipi 4:7] e hopoi mai ia tatou paato‘a nei i te poupou e te oaoa tei ore « e ô i roto i te aau o te taata nei ». [A hi‘o 1 Korinetia 2:9].²⁰

Ia haamaitai mai te Fatu ia tatou paato‘a ia ti‘a ia tatou ia tape‘a tamau noa i roto i to tatou aau i te varua tatarahapa e te faaore hara mau, e tae roa’tu i te taime e maitai roa ai tatou iho, ma te hi‘o tamau maite i te hanahana o te faateiteiraa e tia‘i mai ra i te feia haapa‘o papû.²¹

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa ai outou i te pene aore râ, a faaineine ai outou i te haapii. No te tahi atu tautururaa, a hi‘o i te mau api v–xi.

A hi‘o faahou i te aamu i ni‘a i te mau api 108–11 No te aha e mea fifi roa i te tahi taime no te tahi mau taata ia faaore i te hapa a te tahi e te tahi ? Eaha te auraa o te mau parau ra « no te mea tei roto noa ia’na te hara rahi a‘e » (PH&PF 64:9) no outou ?
A hi‘o faahou Mataio 6:14–15, faahitihia e te peresideni Kimball i ni‘a i te mau api 111–12. I to outou mana‘oraa, no te aha e mea ti‘a ia tatou ia faaore i te hapa a vetahi ê no te farii i te faaoreraa hapa a te Fatu ?
Eaha te tahi mau huru e te tahi mau ohipa o te faaite mai e, ua faaore tatou i te hapa a vetahi ê ma te aau tae mau e hope roa ? (A hi‘o i te mau api 112–14). No te aha ia riro te faaoreraa hapa ei « ohipa no roto roa mai i te aau » ?
A hi‘o faahou i te tuhaa o te haamata i te api 114. Eaha te mau haapiiraa o te evanelia o te nehenehe e tauturu ia tatou ia farii ia vaiiho na te Fatu e haavâ ?
Ia tai‘o outou i te aamu o te metua vahine apî i ni‘a i te mau api 116–17, a imi eaha te mea i tape‘a ia’na, i te haamataraa, ia faaore i te hapa, e eaha te mea i faati‘a ia’na i te pae hopea ia faaore i te hapa. Nahea tatou ia upootia i ni‘a i te mau tafifiraa o te haape‘ape‘a i to tatou hinaaro e ta tatou tautooraa no te faaore i te hapa a vetahi ê ?
Eaha te tahi mau hopearaa i te pato‘iraa i te faaore i te hapa ? (A hi‘o i te mau api 117–18). Eaha te mau haamaitairaa tei fariihia e outou i to outou faaoreraa i te hapa a vetahi ê ? A feruri e nahea e ti‘a ai ia outou ia faaohipa i te varua faaoreraa hapa i roto i to outou mau auraa e te tahi atu mau taata.

Te mau papa‘iraa mo‘a: Mataio 5:43–48; Luka 6:36–38; Kolosa 3:12–15; PH&PF 82:23