Mataupu 24

Fetufaai Atu le Talalelei

E tatau ona faalautetele a tatou laa i le faasoaina atu o le talalelei i isi.

Mai le Soifuaga o Spencer W. Kimball

I le taimi o sana malaga i Quito, Ekuetoa, a o avea ma se tasi o le Korama a le Au Aposetolo e Toasefululua, sa i ai Elder Spencer W. Kimball i le faleaiga o se fale talimalo faatasi ma se vaega na aofia ai ma ni faifeautalai talavou se toafa. “Sa ia talanoa atu i isi e faapea o le alii o loo tautuaina i latou o se alii talavou aulelei ma e ono avea ma se faifeautalai lelei mo le Ekalesia. Sa okaina e Elder Kimball se falaoa ma le susu, ona fesili atu lea o ia i le tama faigaluega pe i ai sana fanau i le fale. ‘E toatasi lo’u atalii,’ o le tali lea a le tama faigaluega. ‘O le falaoa ma le susu e tino maloloina ai o ia,’ sa faapea atu ai Elder Kimball, ‘ae o le a sili atu lona ola maloloina pe afai e te fafagaina o ia i meaai e mafai ona tuuina atu e alii talavou nei.’ Sa le mautonu le tama faigaluega. Ona faamalamalama atu lea e Elder Kimball e faapea, o ia alii talavou o ni faifeautalai e tatau ona latou aoaoina atu le talalelei a Iesu Keriso. Sa faaalia e le tama faigaluega lona fiafia e talia faifeautalai e aoao o ia.”¹

Sa masani ona talanoa Peresitene Kimball e uiga i le poloaiga a le Faaola e faapea e tatau ona aveina atu le talalelei “i le lalolagi uma” (Mareko 16:15). Sa ia talosaga mo nisi faifeautalai faamisiona se toatele, aemaise lava i alii talavou ma ulugalii matutua, ma sa ia faamanatu mai i tagata uma lava o le Ekalesia ina ia auai faatasi i lenei galuega na tofia mai le lagi. Sa ia aoao mai, “o le mea ua tatou manaomia tele ma o so tatou valaauga sili, o le avatu i tagata o lenei lalolagi le sulu po o le malamalama e faamalamalamaina ai o latou auala mai le pouliuli ma le pogisa ina ia maua ai e i latou le olioli, filemu, ma upumoni o le talalelei.”²

Aoaoga a Spencer W. Kimball

Ua folafola mai e le Alii ia i tatou ia faamanuiaga sili a o tatou faasoa atu le talalelei.

O loo i ai se sailiga fiafia faaleagaga i le faia o le galuega faafaifeautalai, i le tuuina atu o igoa o tagata e aoao, i le o atu faatasi ma faifeautalai ao latou tuuina atu lesona. E faagaeetia loto ma tauia. O itula, o taumafaiga uma, o manatunatuga, e aoga uma lava e tusa lava pe na o se toatasi se agaga e faailoa mai le agaga salamo ma le faatuatua ma se naunautaiga ina ia papatisoina. Manatu i le fiafia o le a e lagonaina pe a latou faapea mai, “A e i ai iinei, ma tatou talatalanoa e uiga i nei mea, e pei lava ua ou toe manatuaina mea sa ou iloaina muamua,” po o le, “E le mafai ona oulua o ese atu ma iinei sei vagana ua oulua faamatalaina uma mai ia i matou mea lua te silafiaina e uiga i le Ekalesia toefuataiina.”³

O le faasoaina atu o le talalelei e aumaia ai le filemu ma le fiafia i o tatou lava olaga, o le a faatupu atili ai lo tatou alolofa atu i isi, faateleina ai lo tatou lava faatuatua, faamalosia ai lo tatou sootaga ma le Alii, ma faateleina ai lo tatou malamalama i upumoni o le talalelei.⁴

Ua folafola mai e le Alii ni faamanuiaga matalasi mo i tatou pe a tatou talai atu lana talalelei. Tatou te maua le fesoasoani mai le isi itu o le veli i le i ai o vavega faaleagaga. Ua tautino mai e le Alii o le a faamagaloina a tatou agasala pe afai tatou te aumaia ni agaga ia Keriso ma tumau i le molimau atu i le lalolagi, ma e moni lava o i tatou uma lava o loo tatou tau saili mo nisi fesoasoani e faamagalo ai a tatou agasala. (tagai MFF 84:61). I se tasi o mau maoae o le talaiga, o le mataupu e 4 o le Mataupu Faavae ma Feagaiga, ua tau mai ai ia i tatou, afai tatou te auauna atu i le Atua i galuega faafaifeautalai “ma o [tatou] loto atoa, manatu atoa, mafaufau atoa, ma le malosi atoa,” o le a tatou “tutu i luma o le Atua ma le le pona i le aso gataaga” (fuaiupu e 2).

Ma, na faaauau ona fetalai mai le Alii e faapea:

“Afai foi e faapea ona outou galulue i o outou aso uma i le ala-gaina o le salamo i lenei nuu, ma aumaia, tau lava o se agaga e toatasi ia te au, faauta i le tele o lo outou olioli faatasi ma ia i le malo o lo’u Tama!

“Ma o lenei, afai o le a tele lo outou olioli faatasi ma se agaga e toatasi ua oulua aumaia ia te au i le malo o lo’u Tama, faauta i le sili atu o lo outou olioli pe afai lua te aumaia ni agaga e toatele ia te a’u!” (MFF18:15–16.)

Afai e auauna se tasi i aso uma o lona olaga ma aumai se agaga e tasi! Faauta i le fiafia! I se agaga e tasi! E matua taua! Faauta, pe a tuuina mai e le Atua ia i tatou lena ituaiga o alofa mo isi agaga!⁵

Ua tuuina mai e le Alii i tagata uma o le Ekalesia se tiutetauave e avea ma Ana avefeau.

Maimau pe ana mafai ona matou faamautuina atili ma le faamaoni i loto o tagata uma o le Ekalesia le malamalamaaga e faapea, a oo loa le matua o le tagata e avea ai ma se tasi o le Ekalesia, ua lava foi lona matua e avea ai ma se faifeautalai; ma e tau le vaetofiaina lava aemaise lava mo le valaauga lena. Ua i ai i tagata uma o le Ekalesia le tiutetauave ma le valaauga e faasoa atu le talalelei i tagata uma o siomia o ia. Matou te loto ina ia faataunuuina e alii, tamaitai, ma tamaiti uma lenei tiutetauave tatau. E matuai taua tele. Aua o le savali lenei o le talalelei: Tatou te maua faamanuiaga mai le talalelei, ona tatou o atu ai lea ma faasoa atu na faamanuiaga i isi.

O nei aso, ua tuatuagia tele i tatou; ae peitai, e lei fetalai mai le Alii, “E mafai ona e talaiina le talalelei pe a maua sou taimi avanoa.” Ua fetalai mai o Ia, “O lea ia taitoatasi ai le tagata ma aoaoina lana tiute” (MFF 107:99) ma “Faauta … e tatau foi i tagata uma ua uma ona lapataiina ona lapatai i lona tuaoi.” (MFF 88:81)

E tatau ona tatou manatua tatou te au ma le Atua i lenei galuega. O Ia o lo tatou fesoasoani. O le a Ia tatalaina le ala aua na Ia tuuina mai le poloaiga.⁶

Faauta i se mea ina a faagaeetia loto, ou uso e ma tuafafine pele, o e ua avea ma uso a tagata o le malo o le Atua, ina ia tofiaina e le Alii e avea ma avefeau o Lana afioga i o tatou uso ma tuafafine o e le o auai i le Ekalesia. Sei tatou manatu la mo sina taimi, e faafesuiai ia matafaioi—a faapea o oe e le o se tagata o le Ekalesia ae o lou tuaoi o loo i ai nei o se tasi o le Au Paia o Aso e Gata Ai. Faamata e te manao ia faasoa atu e ia le talalelei ia te oe? Faamata la o le a e olioli i upumoni ua e aoaoina? Faamata la o le a faateleina lou alofa ma lou ava i lou tuaoi o le na faasoaina mai nei upumoni ia te oe? O le mea tonu lava lea, o le tali i nei fesili uma o le: Ioe!⁷

Uso e ma tuafafine, faamata o tatou faia mea uma e mafai ona tatou faia. Pe o tatou malilie ea i lo tatou tofiga o le aoao atu o le talalelei i isi? Pe ua tatou saunia ea e faalautetele a tatou laa? E faamamao la tatou vaai?⁸

Ua oo mai ma o nei lava le aso e aveina atu ai le talalelei i le tele ma le tele o atunuu ma tagata. E ao ina tatou manatu i la tatou matafaioi o le faasoaina atu o le savali, ae le o le faapea sei o tatou avanoa. O valaauga mai le Alii e seasea ona avanoa. Ua oo mai le taimi ua tatau ai ona avea le ositaulaga o se vaega sili atu le taua i le Ekalesia. E ao ina faateleina lo tatou maelega ina ia mafai ona tatou faia le galuega ua tuuina mai e le Alii ia i tatou e fai. … O fetalaiga faaiu a le Matai i Ana Au Aposetolo a o lei Afio A’e, “O atu ia outou i le lalolagi uma, ina talai atu ai le talalelei i tagata uma lava.

“O le faatuatua ma papatisoina, e faaolaina ia; a o le le faatuatua, e faasalaina.” (Mareko 16:15–16.)

E le tatau ona tatou tau tevateva pe vaivai e faia mea lelei. E tatau ona faalautetele a tatou laa. Ua le na o lo tatou manuia e faavavau o loo tatou taumafai i ai, a e mo le manuia foi e faavavau o le toatele o o tatou uso ma tuafafine o e lei auai i le Ekalesia moni lenei. Ou te fiafia tele i upu a le perofeta o Iosefa Samita i se tusi na ia auina atu i le ekalesia mai Navu i le aso 6 o Setema, 1842 e faapea: “O le a tatou le faia pea ea lenei galuega sili? Ia agai i luma. … Ia loto toa … ma ia agai atu, agai atu pea i le manumalo!”(MFF 128:22.)⁹

O a tatou uunaiga ma taumafaiga amiotonu, e mafai ai ona tatou fesoasoani atu i isi ia maua le talalelei toefuataiina.

O galuega faafaifeautalai a tagata o le Ekalesia o le ki lea i le tuputupu ae o le Ekalesia i le lumanai.¹⁰

Ou te lagona ua tuuina mai e le Alii i se auala e masani ai, i totonu o a tatou lio o uo ma e masani, ni tagata se toatele o e ua saunia e auai i lana Ekalesia. Matou te faapea atu, ia outou sailia ma le agaga tatalo ia na tagata, ona ole atu lea mo le fesoasoani a le Alii e fesoasoani atu ia te oe e faailoa atu i latou i le talalelei.¹¹

E tatau ona manino ia i tatou o le tulaga masani lava e tatau ona avea i tatou ma ni uo lelei a o tatou tuaoi ae tatou te lei lapataiina i latou i le auala tatau. E tatau ona iloa e o tatou tuaoi la tatou faauooga faamaoni ma le faaaumea. Matou te mananao i tagata o le Ekalesia ina ia faatauanau atu i tuaoi, ae le o le otegia po o le faafefe o i latou.¹²

E moni le talalelei. E ala i le suesueina ma le ola ai i ona mataupu faavae ma le sailia o le fesoasoani a le Agaga Paia, soo se tagata sailiili faamaoni lava e mafai ona iloa mo ia lava e moni [le talalelei]. Ae faauta i le faigofie atu ona malamalama ma talia, pe afai e mafai e i latou o loo sailia le upumoni ona vaaia foi le galueaina o mataupu faavae o le talalelei i olaga o isi o e ua talitonu i ai. E leai lava se isi auaunaga sili atu e mafai ona tuuina atu i le valaauga faafaifeautalai o lenei Ekalesia nai lo le avea ma faataitaiga i le ola i uiga Kerisiano lelei i o tatou olaga.¹³

O tagata amiotonu o le Ekalesia, o loo ola i le talalelei e ala i faataitaiga, e ala foi i mataupu faavae, o le faasalalauga faalauiloa sili lea a le Ekalesia.¹⁴

O le mea e tatau ona fai e tagata uma o le Ekalesia, e ala i faataitaiga lelei ma le tuuina atu o molimau, o le faaali atu lea i tagata e le auai i le Ekalesia le olioli o le ola ma le malamalama i le talalelei, ma o le a fesoasoani ai e aumai i latou i le tulaga o le a latou taliaina ai le tele o si aoaoga faatulagaina.¹⁵

O le sini moni lava mo le talaiga sologa manuia, o le faia lea e tagata o le Ekalesia o le sailiga ae aoao e faifeautala faamisiona…. Afai e fai e tagata o le Ekalesia le sailiga, o le a fiafia ai i latou i le galuega o le faaaumeaina, o le a toaitiiti foi tagata sailiili e leiloloa atu a o lei papatisoina, ae o i latou o e papatisoina e faasolo ina tumau le toaaga [i le Ekalesia].¹⁶

O la tatou sini e tatau ona i ai, o le saili lea i se taimi vave lava e mafai ai po o ai fanau a lo tatou Tama Faalelagi ua saunia faaleagaga e agai atu seia oo i le papatisoina i le malo [o le Atua]. O se tasi o ala sili lava ona lelei e maua ai o le vave faailoa atu lea o au uo, tagata o ou aiga, tuaoi, ma e masani i faifeautalai faamisiona.¹⁷

O nisi taimi e galo ia i tatou e sili atu le tau faaletonu laitiiti o se fesootaiga ma se uo nai lo le taofia mai ia te ia o le ola e faavavau e ala i lou gugu pea.¹⁸

Aua le faatali mo le faaaumeaina mo se taimi umi po o le taimi tonu foi ua tatau ai. O le mea e tatau ona e faia o le saili lea pe o i latou o ni tagata ua filifilia. “E faalogo i lo’u leo e ua [ou] filifilia e le faamaaaina foi o latou loto” (MFF 29:7) Afai latou te faalogo ma faaavanoaina o latou loto i le talalelei, o le a vave lava ona iloa. Afai latou te le faalogo ma faamaaa o latou loto i faitioga po o faamatalaga tetee, e lei saunia i latou. I lea la tulaga, ia alolofa pea ia i latou ma faaaumea i latou ma faatalitali mo le avanoa e sosoo ai e saili ai pe ua saunia i latou. O le a le motusia la outou faauoga. O le a faaaloalo pea i latou ia te oe.

O le mea moni, e i ai tulaga e lotovaivai ai, peitai e leai lava se tulaga e le mafai ona le manumalo ai. E leai se tasi e motusia sa la faauoga ma sana uo ona e le manao e faaauau pea ia feiloaiga ma faifeautalai. E mafai e le tagata o le Ekalesia ona faaauau pea la laua fegalegaleaiga e aunoa ma le motusia o le la faauoga po o se mafutaga faapitoa ma lena aiga. O nisi taimi e tele atu se taimi e alu i nisi e o mai ai i le Ekalesia nai lo isi. E tatau i le tagata o le Ekalesia ona faaauau pea ona faaaumea ma toe taumafai i se isi aso e faaliliu mai ai. Ia aua le lotovaivai ona o le leai o se alualu i luma i se taimi le tumau. E faitau selau tala e uiga i le taua o le faapalepale i le galuega faafaifeautalai.¹⁹

O le galuega faafaifeautalai e aofia ai le alofa ma le faaaumeaina pea o tagata faatoa liliu mai ma tagata ua le toaaga.

Afai tatou te papatisoina se tasi, o se agasala le tuua o i latou e toe se’ese’e lemu atu lava i fafo o le Ekalesia ma fafo atu o le talalelei ona o le leai o se faaaumea. O le faaaumea o se tiutetauave taua. E tatau ona tatou faaaumeaina tagata uma lava e o mai i totonu o le Ekalesia. O le mafuaaga lena matou te mananao ai i tagata o le Ekalesia e faia le galuega faafaifeautalai ma maua mai se fesoasoani mai faifeautalai. Matou te mananao i tagata… e o atu ma faia lenei galuega aua o loo tumau pea le avea o i latou ma tuaoi pe a uma ona papatiso le tagata. E mafai pea ona latou faaaumeaina i latou; e mafai pea ona latou valaau atu ia i latou ma avatu i latou i le lotu perisitua; e mafai pea ona latou faamalosiauina i latou ma fesoasoani ia i latou i a latou afiafi faaleaiga ma mea uma faapena.²⁰

E le mafai ona matou faamamafaina tele atu le tatau ona faia o le galuega faafaifeautalai i totonu o le faamaopoopoga a le perisitua ina ia faaaumeaina ai tagata e sailiili ma faamasani i polokalama a le Ekalesia i se auala e vave ai ona avea i latou ma ni tagata toaaga ma le faamaoni. O lona uiga la, o se tasi lenei o auala e mafai ai ona auai malosi e le aunoa tagata uma o le Ekalesia i le galuega faafaifeautalai—e ala i le faaaumeaina mai, faauo atu i ai, ma le faamalosiauina o tagata fou o le Ekalesia.²¹

O se mea tatau lava ona vave tofia ni faiaoga o aiga mo i latou o e ua papatisoina o ni tagata liliu mai, ma o i latou ia o le a faaaumeaina ia tagata i se tulaga vavalalata ma le manatunatu mamafa i ai. O nei faiaoga o aiga e galulue faatasi ma o latou taitai perisitua, e tatau ona tagai ua tuuina atu i tagata matutua liliu mai se gaoioiga luitauina faapea foi ma se avanoa ma se faamalosiauga e faatuputeleina ai lona malamalama i le talalelei. E tatau ona fesoasoani atu ia te ia i le faavaeina o fegalegaleaiga tau le vafealoai faatasi ma tagata o le Ekalesia ina ia ona le lagonaina le tuua toatasi a o ia amataina lona olaga o se tagata toaga o le Au Paia o Aso e Gata Ai.²²

O se musumusuga ma se olioliga le vaavaai atu … i le Au Paia o opoopo mai ma fesoasoani ma soosoo tauau atu ma tatalo mo i latou o e ulufale mai i aso taitasi i le malo o lo tatou Alii. Ia faaauau pea ona aapa atu le tasi i le isi—faapea ma le toatele o isi o le a ulufale mai i le Ekalesia. Ia talia ma alolofa ma faaaumea i latou.²³

O la tatou tiutetauave i le avea ai o ni uso ma tuafafine o le Ekalesia, o le fesoasoani lea i e atonu ua leiloloa, ia toe maua lo latou ala, ma fesoasoani ia i latou ua le iloa le mea ua sili ona pele ina ia toe maua la latou oa. Ua aoao manino mai i tatou e tusitusiga paia, ua i tagata uma o le Ekalesia le matafaioi o le faamalosi i ona uso a tagata.

Na faamamafaina mai e le Faaola lenei mea ma le alofa ma le manino, ina ua ia fetalai atu ia Peteru, “Pe a liua mai oe, ona e faamalosi ai lea i ou uso” (Luka 22:32). Ou te fia ta’u atu foi lea lava tulaga e tasi ia te outou taitoatasi: Pe a liua mai oe, faamolemole ia faamalosi i ou uso ma tuafafine. E toatele naua [tagata] ua matelaina, o nisi taimi e le iloa ai le mafuaaga o lo latou matelaina. O loo i ai upumoni faaleagaga ma mataupu faavae e mafai ona avea ma faavae malosi i o latou olaga, saogalemu i o latou agaga, filemu i o latou loto ma mafaufau pe afai o le a liliu atu a tatou tatalo ma popole moni mo i latou. …

Atonu o le a i ai se tasi e faapea mai, “Ia matou te iloa se alii po o se tamaitai o le e le mafai lava ona ootia lona loto.” E mafai lava ona ootia o ia. E mafai lava ona faamanuiaina ma fesoasoani atu ia te ia i soo se taimi. O loo i ai le folafolaga o i tusitusiga paia. E faitauina faapea, “E le uma le alofa.” (1 Korinito 13:8). E le uma! O le alofa mama, afai e umi ona faatinoina, e le mafai lava ona toilalo i le faia o ana vavega, a le o totonu o le tagata lava ia, o totonu o i tatou, po o totonu o i tatou uma, po o totonu foi o nisi o loo siomia lena tagata.

… Ou te talitonu e leai se tasi e le mafai ona le liua—pe ou te faapea atu foi, e toe faatoagaina—pe afai e faia e le tagata sa’o le faiga sa’o, i le taimi sa’o i le auala sa’o i le agaga sa’o. Ou te iloa o le a i ai ia faamanuiaga a lo tatou Tama oi le Lagi, ia tatou taumafaiga, pe afai tatou te saunia i tatou lava, ma pe afai o le a tatou ola ma le fiafia i mataupu o le talalelei, ma pe afai o le a tatou sailia le fesoasoani a lo tatou Tama Faalelagi. …

Ia tuu atu i faiaoga o aiga a korama o le perisitua, faiaoga asiasi o le Aualofa, tane ma ava, o matua ma fanau, ma tagata uma o le ekalesia i soo se mea, o e alolofa i le Alii ma naunau e faia lona finagalo, e liliu atu ma le alofa ma le musuia e faia galuega alofa o loo manaomia e ala i le fesoasoani atu i tagata o loo manaomia le fesoasoani. O le fiafia ma le naunautai puupuu o le a le ausiaina ai faamoemoega na o loo manaomia. Ae, e mafai ona maua ia faamoemoega na manaomia, ma o le a maua mai e le aunoa, nai lo se mea na tatou mafaufauina, pe afai o le a tatou faateleina ma le agaga tatalo a tatou taumafaiga. O le a le gata ina oo mai faamanuiaga e tele a le Alii i o outou olaga ma olaga o isi, a e o le a tatou latalata atili atu ai foi i le Alii ma lagona ai Lona alofa ma Lona agaga.²⁴

E tatau i matua ona fesoasoani ia latou fanau e sauniuni mo le auaunaga faafaifeautalai.

Ua tatou manaomia ia alii talavou o le Ekalesia ua oo i le matutua e avea ai ma faifeautalai, ina ia o mai ia toatele atu nai lo le mea o loo i ai nei, ina ia mafai ona latou faataunuuina o latou tiutetauave sa’o, avanoa, ma faamanuiaga i le avea ma auauna a le Alii i le galuega faafaifeautalai. O le a faamalosia i tatou ma i latou, pe afai o le a saunia uma e alii talavou i latou lava mo le galuega a le Alii!²⁵

Afai ou te talosaga atu mo nisi faifeautalai faaopoopo, ou te le o talosaga atu mo nisi faifeautalai e leai ni molimau pe le agavaa. O loo ou talosaga atu ina ia tatou vave amata ona aoaoina a tatou faifeautalai ia sili atu i paranesi uma ma uarota uma i le lalolagi. O se tasi lena o lu’i—ina ia malamalama tagata talavou o se avanoa maoae le alu i se misiona ma e tatau ona latou malolosi faaletino, malolosi faalemafaufau, malolosi faaleagaga, ma “e le mafai lava le Atua ona silasila i le agasala ma sina alofa itiiti.” [Alema 45:16.]

O loo ou talosaga atu mo faifeautalai o e ua aoaoina lelei i mataupu faavae o le talalelei ma aoaoina i le aiga ma faalapotopotoga o le Ekalesia, ma o i latou e o mai i le misiona ma le naunautai tele. O loo ou talosaga atu … ia sili atu le lelei, ia vave atu, ia umi atu ona tatou aoaoina a tatou faifeautalai faamoemoeina, ina ia nonofo faatali i latou taitoatasi mo a latou misiona, ma le olioli tele.²⁶

E tatau ona tatou mafaufau i ni numera e sili atu. E tatau ona tatou saunia ia sili atu le lelei o a tatou faifeautalai, e le gata i le gagana ae faapea foi i tusitusiga paia ae faasilisili ai ia i ai se molimau ma se afi mumu e faamamanaina a latou upu.²⁷

Ia auina atu a outou fanau tama i misiona. O le minute lava tou te sapaia ai i latou i o outou lima, ia amata loa lava ona aoao i latou. Latou te faalogoina a outou tatalo, i le po ma le taeao. Latou te lagonaina a outou tatalo i le Alii ina ia fesoasoani e tatala faitotoa i malo uma. Latou te faalogo e uiga i le galuega faafaifeautalai. Latou te faalogo i a outou tatalo mo o outou epikopo ma o outou peresitene o misiona ma i latou uma o e o loo outou auauna faatasi, ma o le a tuputupu ae lemu lava i o latou mafaufau.²⁸

Toeitiiti lava i taimi uma ou te vaai ai i se tamaitiiti, ou te faapea atu, “O le a avea oe ma se faifeautalai maoae, a ea?” E te totoina le fatu i lona mafaufau. E pei lava o laau toto ma isi laau ola. E ola ma ola pea, ma afai e talanoa se tama ma se tina i a la’ua fanau tama laiti … e uiga i le o atu i le misiona—a o laiti i latou, e toetoe lava—a tupu ma ola ae loa lava lena fatu.²⁹

E lelei i matua ona amata sauniuni a latou fanau tama ina ia faaputu se tupe a o laiti o latou olaga. Ia tuu atu ia i latou le agaga o le teuina o tupe. Ia tuu atu foi ia i latou le agaga o le suesue ma tatalo e uiga i le talalelei, ia iloa mo i latou lava pe faapefea ona galue le talalelei i o latou lava olaga ma olaga o i latou o siomia i latou. Ia tuu atu ia i latou le agaga o le auauna atu i o latou olaga tuputupu ae faapea ma aafiaga o le fesoasoani atu i isi e talanoaina olioliga o le savali o le talalelei i o latou olaga. Tuu atu ia i latou e faaaoga o latou aafiaga mai vasega seminare ma le inisitituti, o se aoaoga mo le mauaina o le poto faaleagaga e matua aoga ia i latou lava faapea ma isi. Ia tuu atu ia i latou ia saunia e ala i le tausia o o latou olaga ia mama ma agavaa ma ia mananao ma o latou loto atoa e fesoasoani i le Alii e ave atu le talalelei ia i latou ua saunia i ai.³⁰

Ou te faamoemoe o loo faia e aiga uma ia afiafi faaleaiga i afiafi uma o Aso Gafua e aunoa ma le faaletonu. O le galuega faafaifeautalai o le a avea ma se tasi o vaega malosi o le a talanoaina ai; ma o le tama ma le tina ma le fanau pe a oo mai lo latou avanoa e fai ai tatalo o le a faapea ona tutotonu i lenei mataupu taua—ina ia mafai ona tatalaina faitotoa o atunuu ia i tatou, lona lua, ina ia naunau ia faifeautalai, alii ma tamaitai talavou o le Ekalesia, e faataunuu na misiona ma aumaia tagata i le Ekalesia.³¹

E manaomia e le Ekalesia ia ulugalii e galulue faamisiona.

Pe a talafeagai ai ma le lelei o o la soifua maloloina ma isi tulaga, e mafai foi e matua ona tulimatai atu i se aso e mafai ai foi e i laua ona galulue auauna atu faamisiona.³²

Ua tauau ina galo ia i tatou, o i tatou le au matutua, o e ua litaea ma ua maua se nofoaga faigofie tatou te malaga i ai ma a tatou mea mo tolauapiga, faatasi ai ma isi o tatou avanoa. Ua tatou mauaina se auala faigofie e faamalieina ai o tatou lava manatu ma o tatou lava mafaufau e faapea e tatau ona agai pea i luma le galuega—tatou te faapea ifo, o le a auina atu a matou fanau tama.

Ua ia i tatou uma taitoatasi lenei tiutetauave. E le faapea o i tatou uma e mafai ona o, ae o le toatele lava o i tatou e mafai.³³

E mafai ona matou faaaogaina le fia selau o ulugalii, o ulugalii matutua e pei o outou na, o e ua matutua a latou fanau, o e ua litaea mai a latou pisinisi, o e e mafai ona o … e aoao atu le talalelei. E mafai ona matou faaaogaina le fia selau o ulugalii. Na ona outou o lava e talanoa ma o outou epikopo—pau lava lena o le mea e manaomia ona outou faia. Ta’u atu ia te ia, “Ua ma saunia e o, pe afai e mafai ona outou faaaogaina i maua.” Ou te manatu atonu o le a maua so oulua valaauga.³⁴

O le galuega lenei a le Alii. O loo tatou i ai i lana galuega. Ua ia poloaiina faapitoa i tatou, ae peitai e le iloa i tatou e le toatele o le lalolagi. Ua oo mai le taimi e sulu ai o tatou sulugatiti ma tatou agai i luma ma se tautinoga fou i lenei galuega maoae. Ua uma ona tatou osi feagaiga, o oe ma au, ta te faia. Tau ina tatou fai atu faatasi ma lena alii talavou, na maua atu i le malumalu e ona matua popole, i le totonugalemu o le au aoao, “E tatau ona ou i ai i le galuega a lo’u Tama.” [Luka 2:49]³⁵

Fautuaga mo Suesuega ma Aoaoga

Mafaufau i manatu nei a o e suesueina le mataupu po o lou saunia foi e aoao atu. Mo nisi fesoasoaniga faaopoopo, tagai i itulau (v–ix).

O a ni auala e avea ai le galuega faafaifeautalai o se “sailiga fiafia faaleagaga” itulau 287. A o tatou faasoaina atu le talalelei, o a ni aafiaga “fiafia ma le tauia” e mafai ona tatou maua? (Mo se faataitaiga, tagai i le tala i le itulau 286–287).
Toe faitau itulau 287–288, e saili ia faamanuiaga tatou te maua pe a tatou faasoa atu le talalelei. O anafea na oo ai ia te oe se tasi o nei faamanuiaga?
Faitau atoa le parakalafa lona tolu i le itulau 290. O le a sou manatu o le a le uiga o le “faalautetele a tatou laa” ma le “faamamao la tatou vaai”? E faapefea ona tatou mulimuli i lenei fautuaga i le galuega faafaifeautalai?
Toe faitau le vaega o loo amata i le itulau 290. Ia mafaufau pe talanoaina fautuaga faapitoa e te maua e uiga i le faasoaina atu o le talalelei i aiga ma uo. Mo se faataitaiga: (a) O le a se mea tatou te faia e “faauo lelei atu ai i o tatou tuaoi”? (e) O a ni auala e ono avea ai i tatou ma “faasalalauga faalauiloa” mo le Ekalesia? (i) O a nisi o itu e leaga ai le faatalitali mo “le taimi sao” e faasoa atu ai le talalelei? (o) E faapefea ona tatou tali atu pe afai e le taliaina e tagata o o tatou aiga ma uo le valaaulia e aoao e uiga i le talalelei?
O a nisi o tulaga manaomia e tagata fou o le Ekalesia? e tagata le toaaga? O a ni mea e mafai ona tatou faia e fesoasoani ai ia i latou? (Tagai itulau 293–295.)
O a ni uiga e sailia e taitai o le Ekalesia i faifeautalai faamisiona? (Mo ni faataitaiga, tagai i itulau 295–297.) O a ni mea e mafai ona faia e matua ma isi e fesoasoani ai i fanau ia atiina ae nei uiga? O a nisi o auala e mafai ona mulimuli ai matua ma fanau i le fautuaga a Peresitene Kimball e teu tupe mo misiona?
Ua uunaia e Peresitene Kimball ia ulugalii matutua e auauna atu i ni misiona (itulau 297–298). O a nisi o filifiliga ma avanoa e tuuina atu e le Ekalesia i ulugalii faamisiona? O a ni mea e mafai ona fai e ulugalii e sauniuni ai e auauna atu? O faapefea ona e faia le galuega faafaifeautalai i le tulaga o loo i ai nei lou olaga?

Mau e Faatatau I Ai: Mosaea 3:20; Alema 26:1–16; Helamana 6:3; Moronae 6:3–4; MFF 84:88