Mataupu 1

“Ina ia Ola Faatasi ma Ia i se Aso”

E na o le pau le auala e mafai ona tatou maua ai le olioli, upumoni, ma le faamalieina, o le ola lea e tusa ai ma le fuafuaga a le Tama Faalelagi.

Mai le Soifuaga o Spencer W. Kimball

E fiafia tagata uma o le Ekalesia i le lalolagi atoa i le pese a le Peraimeri “O A’u o se Atalii o le Atua,” faapea ma lona savali faigofie ae loloto pe o ai i tatou, aisea ua tatou i ai iinei i le lalolagi, ma le mea ua folafola mai e le Alii ia i tatou pe afai tatou te faamaoni. Na tusia e Tuafafine Naomi W. Randall ia upu o le pese i le 1957, a o avea ia Elder Spencer W. Kimball ma se sui o le Korama a Aposetolo e Toasefululua. O le taimi lena, sa faai’u le tali o le pese i upu “Aoao mai mea e ao ona ou iloa, ia ou toe foi atu ai”

A o asiasi atu o ia i se konafesi a se siteki, sa faalogo Elder Kimball i se vaega o tamaiti Peraimeri o usuina le “O A’u se Atalii o le Atua.” E le’i leva lena ae faaali sona manatu e uiga i le pese i se talanoaga ma se sui o le Aufono Aoao a le Peraimeri. “Ou te fiafia i le pese a tamaiti,” na ia saunoa atu ai, “ae tasi le upu lea e faalavelave lava ia te au. Pe i ai se afaina ia Tuafafine Randall pe a suia le upu iloa i le upu fai?”¹

Sa malie ia Tuafafine Randall e sui le pese. O lea ua faai’u ai nei le tali o le pese i upu “Aoao mai au i mea e ao ona fai ia ou toe foi atu ai.”² O nei upu o loo atagia mai ai se mataupu faavae sa faamamafaina e Peresitene Kimball i lana auaunaga atoa: “O le olaga faaselesitila e mafai ona maua e agaga uma o e o le a faataunuuina ia tulaga manaomia. E le lava le na ona iloa. E tatau i le tagata ona fai. E taua le amiotonu ma e manaomia ia sauniga.”³ Na ia aoao atu faapea o le talalelei o se “ala o le olaga, o le fuafuaga o le faaolataga o le tagata lava ia, ma e faalagolago lea i le tiutetauave a le tagata ia. Ua atinaeina mo le tagata, le atalii/afafine o le Atua. O le tagata o se atua i lona afuafua mai ma o loo ia te ia le tulaga e mafai ona avea ma atua, e na te mafaia, pe afai o le a ia ola ia ausia ona faatulagaga.”⁴

Aoaoga a Spencer W. Kimball

I lo tatou muai olaga, sa aoaoina i tatou e le Tama Faalelagi i Lana fuafuaga mo lo tatou faaeaga.

A o avea i tatou ma ni agaga, sa faatulagaina atoatoa ma mafai ona mafaufau ma suesue ma malamalama ia te ia, sa fetalai mai ai lo tatou Tama Faalelagi ia i tatou, i se fetalaiga e foliga faapenei: “O lenei, la’u fanau pele, i lo outou tulaga faaleagaga, ua outou alualu ai i luma i le mamao tou te mafaia. Ina ia faaauauina la lo outou tuputupu a’e, tou te manaomia ni tino faaletino. Ua i ai lo’u faamoemoe e tuuina atu se fuafuaga o le a mafai ai ona faaauauina lo outou tuputupu ae. E pei ona outou iloa, na pau le mea e tuputupu a’e ai le tagata o le faatoilaloina lea o se mea.

“O lea,” na fetalai ai le Alii, “o le a tatou aveina mea o loo i ai ma faatulaga ai se lalolagi, ma tuu i ai ni laau ma ni manu, ma faatagaina outou ina ia outou o ifo ai i lalo. O le a avea lena ma nofoaga e suesueina ai outou. O le a matou tuuina atu ia te outou se lalolagi tamaoaiga, o le a faapea ona i ai mea uma lava ua saunia mo outou mo lo outou lelei ma ia outou fiafia ai, ma o le a se’i vaai pe faamaonia lo outou faamaoni ma faia mea e poloaiina ai outou. O le a ou osia se feagaiga ma outou. Afai o le a outou malilie mai nei o le a outou pulea o outou manao ma faaauau pea lo outou tuputupu ae ma agai atu ai i le faaatoatoaina ma le tulaga faaleatua i le fuafuaga o le a ou tuuina atu, o le a ou tuuina atu ia te outou se tino o aano ma ivi ma se lalolagi tamaoaiga ma tele mea o i ai, faapea ma le la, o vai, vaomatua, u’amea, eleele, ma isi mea uma e manaomia e fafagaina ma faalavalava ma faanonofo ai outou ma tuu atu ia te outou soo se fiafiaga lava e fetaui mo lo outou lelei. Ae le gata i lea, o le a ou faia foi ia mafai mo outou ona toe taliu mai ia te au i se taimi mulimuli ane ai a o outou faaleleia atili o outou olaga, i lo outou faatoilaloina lea o faafitauli ma toatuga, ma agai atu ai i le atoatoa.”

I le tali atu i lena ofo silisili e pei ona ta’ua i luga, o i tatou o ni atalii ma ni afafine o le Tama Faalelagi, sa tatou tali atu ma le agaga faafetai.⁵

Sa manino ona faataoto mai e le Alii le ata o le fiafia ma ona tuutuuga ma faamanuiaga. … O le a tuuina mai le faitalia i le tagata ina ia mafai ai ona faia ana lava filifiliga.

O le olaga sa fuafuaina i ni vaega po o ni tofi se tolu: muai olaga, olaga faaletino, ma le tino ola pea. … O mea e faatino i le isi tofi o le a matuai aafia ai lava le tofi po o tofi o loo mulimuli mai. Afai e tausia e se tagata lona uluai tofi, o le a faatagaina o ia i le lona lua po o le olaga faaletino e avea o se isi vaitau o tofotofoga ma aafiaga. Afai na te faalautele lona tofi lona lua, lona aafiaga i le lalolagi, o le a faatalitali mai le ola faavavau mo ia.⁶

E ui i le le mafai ona toe manatuaina lo tatou muai olaga, ae sa tatou malamalama uma lava i le faamoemoega o lo tatou i ai iinei, ae tatou te le’i o mai. O le a faamoemoe tatou te maua le malamalama, aoaoina i tatou, ma faatonutonu i tatou lava. E ao ona tatou puleaina o tatou naunautaiga ma manaoga, pulea ma faafoe o tatou faanaunauga, ma faatoilalo o tatou vaivaiga laiti po o le tetele foi. E ao ina tatou aveesea ia agasala o le le faia o mea e tatau ona fai, ma le faia o mea e le tatau ona fai ae mulimuli i tulafono ma poloaiga ua tuuina mai ia i tatou e lo tatou Tama. …

Sa tatou malamalama foi a mavae se vaitaimi e amata mai lava i le sekone e oo i le fia sefulu tausaga o le olaga faaletino, o le a tatou oti, o le a toe foi atu o tatou tino i le Tina o le Eleele lea na foafoaina mai ai i tatou, ae o atu o tatou agaga i le lalolagi o agaga, lea o le a toe saga aoaoina ai i tatou mo lo tatou taunuuga faavavau. A mavae se vaitaimi, o le a i ai se toetutu po o le toe tuufaatasia o le tino ma le agaga, lea o le a maua ai e i tatou le tino ola pea ma mafai ai ona tatou toe faaauau agai atu i le tulaga atoatoa ma le avea ma atua. Ua mafai ona maua e i tatou lenei toetu e ala i le taulaga a le Alii o Iesu Keriso, Le na foafoaina lenei lalolagi, ma faia lenei auaunaga e le ma faatusalia mo i tatou—o se vavega e le mafai ona tatou faatinoina mo i tatou lava. Sa faapea ona tatalaina ai le ala tatou te maua ai le tino ola pea ma—afai tatou te faamaonia atu lo tatou agavaa—o le taunuuga o le faaeaga lea i le malo o le Atua.⁷

Na tatou malamalama foi a o lei taitai ona tatou oo mai i lenei vanu o loimata, o le a i ai faanoanoaga, o le le fiafia, galue malosi, toto, afu, ma loimata; ae ui i na mea uma, sa tatou vaavaai ifo ma iloa ai lenei lalolagi ua saunia mo i tatou, ma sa tatou faapea atu, “Ioe, le Tama e, e ui i na mea uma ae o loo mafai ona ou iloa atu faamanuiaga silisili e mafai ona oo mai ia te au o se tasi o ou atalii po o afafine; i le i ai o so’u tino e mafai ona ou iloa o le a i ai se taimi o le a ou ola ai pea lava e pei o lau afio, ma ia ou faatoilaloina aafiaga o le agasala ma ia faaatoatoaina, o lea ua ou naunau ai lava e alu i le lalolagi i le avanoa muamua.” Ma o le ala lea na tatou o mai ai.⁸

O le olaga faaletino o le taimi lea e saunia ai e fetaiai ma le Atua.

O i tatou o tagata ua faitino o loo nonofo nei i lenei lalolagi, ua tatou i ai nei i lo tatou tofi lona lua. O lo tatou i ai i lenei olaga i ni tino faaletino e ta’u mai ai le mea moni faapea sa tatou “tausia” lo tatou uluai tofi. Sa faavavau o tatou agaga, ma sa nonofo faatasi ma le Atua, peitai sa faatulagaina i ni tino faaleagaga e lo tatou Tama Faalelagi. Sa uia e o tatou tino faaleagaga se vaitaimi umi o le tuputupu ae ma le atiina ae ma aoaoga, ma ina ua tatou manumalo i le suega, o le mea lea na i’u ai ina faataga i tatou e o mai i lenei lalolagi ma le olaga faaletino.

O le faamoemoega autu e tasi na o mai ai o tatou agaga i lenei lalolagi ma maua ai le tofi faaletino, o le mauaina lea o se tino faaletino. Sa fuafua ia oo i lenei tino ia vaivaiga uma, o faaosoosoga, aleu ma toatuga o le olaga faaletino, ma e ao ona fetaia’i ma lu’itau lenei tino o le a oo atu i vaivaiga uma, o faaosoosoga uma, o le le atoatoa faapea ma tapulaa o le olaga faaletino, ma e ao ona feagai ma le lu’i ia manumalo le tagata ia te ia lava.⁹

Na auina mai oe i lenei lalolagi e le na ona maua o se taimi fiafia pe na o le faamalieina o tuinanauga po o manaoga … ma maua le “manaia” lea o loo ta’ua ai e le lalolagi.

Na auina mai oe i lenei lalolagi ma se faamoemoega taua tele. Ua auina mai oe i le lalolagi, mo lena faamoemoega, e amata mai o se pepe meamea ma tuputupu ae ai i ni tulaga e faigata ona talitonuina o le atamai, faamasinoga tonu, malamalama, ma le mana.¹⁰

O se tasi o vaivaiga sili ona leaga i tagata uma lava o le faatuutuu lea, o le le naunau e talia ia tiutetauave e faatatau i le tagata lava ia i le taimi nei. Na oo mai tagata i le lalolagi ma le malamalama ina ia aooga, ia aoaoina ma atiina ae, ma ia faaatoatoaina i latou lava, ae peitai ua toatele ua faatagaina i latou lava ina ia taitaiese mai le mea moni … ma tupu ai le paie faalemafaufau ma le faaleagaga, ma naunau ai i fiafiaga o le lalolagi.¹¹

O lenei olaga faaletino o le taimi lea e sauniuni ai e fetaiai ma le Atua, o lo tatou uluai tiutetauave lea. Ina ua uma ona maua o tatou tino, lea ua avea ma apitaga mautu mo o tatou agaga e oo atu i le faavavau, ua tatau nei loa ona tatou aoaoina o tatou tino, o o tatou mafaufau, ma o tatou agaga. O le mea e silisili ai, o lo tatou faaaogaina lea o lenei olaga e faaatoatoaina ai i tatou lava, ina ia faatoilaloina le tino, ia gauai atu le tino i le agaga, ia faatoilaloina vaivaiga uma, ia puleaina lou lava tagata ina ia mafai ona tuuina atu le taitaiga i isi, ma faatinoina sauniga talafeagai uma.¹²

O le talalelei a Iesu Keriso e tapasaina ai lo tatou auala e toe foi atu ai i lo tatou Tama Faalelagi.

Ina ia maua se taunuuga tatou te lei oo muamua i ai, e masani lava ona tatou vaavaai i se faafanua. … Ua tuuina mai e le Alii o Iesu Keriso, lo tatou Togiola ma le Faaola se faafanua ia i tatou—o se vaega o tulafono ma poloaiga lea e mafai ai e i tatou ona maua le atoatoa ma oo ai ina avea ma atua. O lenei vaega o tulafono ma sauniga ua ta’ua nei o le talalelei a Iesu Keriso, ma e na o le pau lea o le fuafuaga o le a faaeaina ai le tagata. O loo i ai i le Ekalesia a Iesu Keriso o le Au Paia o Aso e Gata Ai lenei polokalama taua i lona tulaga atoatoa, lea ua saunia mo i latou o e taliaina.¹³

Ua toefuatai mai e le Alii lona malo i nei aso, faatasi ai ma ona meaalofa ma mana ma faamanuiaga uma. Soo se lotu ua e iloa e mafai ona aveina oe i se malaga umi, ma avatu ia te oe sina vaega o le filemu ma le fiafia ma faamanuiaga, ma e mafai ona latou aveina atu oe i se mamao e mafai ai i lenei olaga, ona tia’i ai lea o oe i le veli po o le oti aua ua leai se isi mea e toe mafai ona fai. O le Ekalesia a Iesu Keriso e tauaveina oe i lenei itu o le veli, ma afai e te ola ai i ana poloaiga, na te tauaveina oe i le isi itu e pei e le o i ai se veli, ma oo atu ai i le faavavau i le faaeaga.¹⁴

O le talalelei a Iesu Keriso o le fuafuaga faavavau lea o le faaolataga. O le fuafuaga na fuafuaina ma faasilasila mai e le Atua, le Tama Faavavau, mo le faaolataga o i latou uma o e o le a talitonu ma usitai.¹⁵

Ina ia mafai ona ausia le sini o le ola faavavau ma le faaeaga ma avea ma atua, e tatau i le tagata ona ulu atu i le malo e ala i le papatisoga, e faia i le ala sa’o; e tatau i se tasi ona maua le Agaga Paia e ala lea i le faaee atu o lima ua i ai le pule; e tatau i se alii ona faauuina i le perisitua e i latou o loo umia le perisitua ma ua faatagaina; e tatau i le tagata ona maua ona faaeega paia ma faamauina i le maota o le Atua e le perofeta o loo umia ki po o se tasi o i latou ua uma ona faamatuu atu i ai ki; ma e tatau i le tagata ona ola i se olaga amiotonu, taualeleia, mama ma ia auauna atu. E leai se tasi e mafai ona ulu atu i le ola faavavau i se isi lava faitotoa sei vagana o le faitotoa sao—o Iesu Keriso ma ana poloaiga.¹⁶

Na faaatoatoaina e Iesu lona soifua ma avea ai ma o tatou Keriso. Na faamaligiina le toto taua e le mafaatauina o se atua, ma avea ai o ia ma o tatou Faaola; na foaiina mai lona soifua atoatoa, ma avea ai o ia ma o tatou Togiola; o lana togiola ua mafai ai e i tatou ona toe foi atu i lo tatou Tama Faalelagi.¹⁷

O le aoga sili ma le matagofie ma le ofoofogia o le togiola a le Faaola, e le mafai ona tatou maua lona aafiaga lavea’i atoatoa sei vagana ua tatou salamo.¹⁸

Tatou te faafetai tele ona ua faamanuiaina i tatou e lo tatou Tama Faalelagi i le talalelei o le salamo. E totonugalemu i mea uma o loo faia ai le fuafuaga o le talalelei. O le salamo o le tulafono lea a le Alii mo le alualu i luma, o lana mataupu faavae o le atiina ae, ma lana fuafuaga mo le fiafia. E matuai loloto lo tatou faafetai ona ua tatou maua lenei folafolaga mautinoa e faapea o le mea sa i ai le agasala ma le sese, e mafai ona mulimuli mai ai le salamo faamaoni ma ua lava ma totoe o le a tauia i le faamagaloga.

“Ia outou o mai ia te au, o outou uma o e tigaina ma mafatia i avega, o au foi e malolo ai outou,” na fetalai ai le Matai. (Mataio 11:28.)

O le mea e sili ai ona mamalu lenei mataupu atoa lava e uiga i le salamo ona o loo tumu tusitusiga paia i faamautinoaga a le Alii e faapea o le a ia faamagaloina e pei foi ona tumu i ana poloaiga mo i tatou ina ia salamo, ia suia o tatou olaga ma aumaia ina ia ogatasi atoatoa ma ana aoaoga matagofie.

E lelei le Atua. E naunau o Ia e faamagalo. E finagalo o Ia ina ia tatou faaatoatoaina i tatou lava ma faatumauina pea lo tatou pulea o i tatou lava. E le finagalo o Ia e pulea e Satani ma isi ia o tatou olaga. E tatau ona tatou iloa o le tausia o poloaiga a lo tatou Tama Faalelagi o le faatusa, ua na o le pau lea o le auala e pulea atoatoa ai i tatou lava, e na o le pau lea o le auala e maua ai le olioli, upumoni, ma le faamalieina i lenei olaga ma le faavavau.¹⁹

O faitotoa o faleteuoloa o le fiafia e tatalaina mai ia te i latou o e ola i le talalelei a Iesu Keriso i lona atoatoa ma le faigofie. … O le mautinoa o le fiafia silisili, o le mautinoa o se olaga faamanuiaina iinei ma le faaeaina ma le ola faavavau atali, e oo mai ia i latou o e fiafia ina ia ola i o latou olaga ia ogatasi atoatoa ma le talalelei a Iesu Keriso—ona mulimuli ai lea e le aunoa i le alafua ua latou fuafuaina.²⁰

E na o e totoa ma faamaoni o le a faaeaina.

Afai tatou te faamaoni ma faatuatua, o le a tatou tutulai, e le na o le tino ola pea ae faapea foi i le ola faavavau. O le tino ola pea o le ola lea e faavavau i se malo ua atofaina. O le ola faavavau o le mauaina lea o le faaeaga i le lagi sili ona maualuga ma ola ai i le iunite faaleaiga.²¹

Na faapea mai se tasi tagata i se tasi aso, e na o le pau le mea e le fiafia ai i le Lotu Mamona ona e faapea mai ua na o i latou lava le auala e mafai ona faasaoina ai se tagata. Sa ou fai atu, “Oi, e leai, matou te le faia se faamatalaga faapena. Matou te faapea atu o tagata lelei uma e lolotu ma soo se tagata lelei e le talitonu i ni lotu, o le a faasaoina ae e i ai tikeri o le faaolataga. … ”²²

O i latou o e sa ola e tusa ai ma faiga a le lalolagi o le a o atu i se malo telesitila o lona mamalu e pei o fetu.

O i latou o e sa tausaafia ma tauagafau ma faamaoni ma sa ola i ni olaga lelei ma le faaaloalogia, o le a o atu i se malo terasitila o lona mamalu e pei o le masina.

O i latou o e sa talitonu ia Keriso, o e na lafoai ese le lalolagi, o e sa avea le Agaga Paia ma o latou taiala ma sa naunau e avatu a latou mea uma i luga o le fata faitaulaga, o i latou o e sa tausia poloaiga a le Atua—o le a o atu i se malo selesitila o lona mamalu e pei o le la.²³

O loo faailoga manino mai le ala o le ola e tusa ai ma le faamoemoega paia, ua i ai le faafanua o le talalelei a Iesu Keriso mo tagata malaga, o loo faatulaga manino mai ai foi le taunuuga o le ola e faavavau. O loo faatalitali mai lo tatou Tama Faalelagi i lena taunuuga ma le faamoemoe e faafeiloaia lana fanau o le a toe foi atu ia te ia. Ae paga lea, e toatele i latou o le a le taunuu atu i ai.²⁴

Aisea o le a toaitiiti ai i latou e ausia le faaeaga i le malo selesitila? E le faapea e le’i faaavanoaina atu ia i latou, e le faapea latou te le’i iloaina lona avanoa, e le faapea ona e le’i tuuina atu le molimau ia i latou, ae ona e leai se taumafaiga sa latou tuuina atu ina ia mamanuina ai o latou olaga ma ia avea e pei o le soifuaga o le Faaola ma matua’i faatulaga lelei i latou ina ia le se ese seia oo i le iuga.²⁵

O loo toatele … tagata o le Ekalesia e le popole i se mea ma faatalale, ma o loo tumau pea i le faatuutuu. Latou te ola i le talalelei ae le manatu mamafa i ai. Latou te usitaia nisi o tulaga manaomia peitai e leai se agaga naunau. Latou te le faia ni solitulafono matuia ae ua na ona latou le faia lava o mea e manaomia—o mea e i ai le totogi o le sefuluai, o le ola i le Upu o le Poto, faia o tatalo faaleaiga, anapogi, auai i sauniga, auauna atu. …

… O le a le faaliliuina e le Alii ni faamoemoega ma manaoga ma moomooga lelei o se tasi e avea ma ni galuega. E tatau ia i tatou uma taitoatasi, ona faia lena mea mo le tagata lava ia. …

Na o i latou lava e lototetele o le a faaeaina ma maua le mamalu sili ona maualuga, o lea “e toatele e ua valaauina ai, ae toaitiiti e ua filifilia.” (MFF 121:40.) E pei ona faaupuina e le Faaola, “… aua e vaaapiapi le faitotoa, e lauitiiti foi le ala e tau atu i le ola, e toaitiiti foi i latou o e maua.”… Ae i le isi itu, aua e lautele le faitotoa, e lautele foi le ala e tau atu i le malaia ma e toatele foi i latou o e ui ai.” (Mataio 7:13, 14.)

E moni lava e toatele le Au Paia o Aso e Gata Ai, ua uma ona papatisoina ma faamau o ni tagata o le Ekalesia, ma o nisi ua maua o latou lava faaeega paia ma ua faaipoipo ma faamauina i totonu o le malumalu paia, ua i ai lo latou manatu ua mautinoa lo latou mauaina o faamanuiaga o le faaeaga ma le ola faavavau. Ae le o le tulaga lea. E lua tulaga faavae e manaomia e tatau i agaga uma ona faataunuuina a leai o le a le mafaia ona ausia faamanuiaga silisili o loo ofoina mai ai. E tatau ona ia mauaina sauniga ma e tatau ona faamaoni, ma ia faatoilaloina ona vaivaiga. O lea la, e le o tagata uma o e faapea mai o ni Au Paia o Aso e Gata Ai o le a faaeaina.

Ae mo na tagata lototetele o le Au Paia o Aso e Gata Ai, o e faataunuuina tulaga manaomia ma le faamaoni ma le atoatoa, [ua i ai] folafolaga e silisili ona mamalu e le mafaamatalaina:

“Ona avea ai lea o i la’ua ma atua, aua e leai so la’ua iuga; o lea o le a i ai i la’ua e faavavau faavavau lava, aua e tumau pea i la’ua; o lea, e aupito i luga lava i la’ua i mea uma, aua e pule i la-’ua i mea uma. Ona avea ai lea o la’ua ma atua, aua ua maua e i la’ua mana uma, ma e auauna agelu ia te i la’ua.” (MFF 132:20.)²⁶

Afai e malamalama lelei se tasi i le telē naua, le tamaoaiga ma le mamalu ma le paia o mea “uma” lava ua folafola mai e le Alii na te tuuina mai i e faamaoni, ua matua talafeagai lelei ma le tau o le onosai, faatuatua, taulaga, afu ma loimata. O faamanuiaga o le faavavau e pei ona folafolaina mai i nei mea “uma” lava, o le a aumaia ai i tagata le tino ola pea ma le ola e faavavau, tuputupu ae e faavavau, avea ma taitai faalelagi, alualu i luma e faavavau, tulaga atoatoa, ma o tua atu o nei mea uma lava, o le tulaga faale-atua lea.²⁷

Fautuaga mo Suesuega ma Aoaoga

Mafaufau i manatu nei a o e suesueina le mataupu po o lou saunia foi e aoao atu. Mo nisi fesoasoaniga faaopoopo, tagai i itulau v–ix.

Iloilo le parakalafa lona tolu o loo i le itulau 2 ma le parakalafa atoa lona tolu i le itulau 3, lea o loo faamatala mai ai e Peresitene Kimball la tatou tali atu i le muai olaga i le fuafuaga a le Tama Faalelagi. O le a sou manatu, aisea na tatou tali atu ai faapena?
Ia toe iloilo atoa parakalafa lona lua ma le tolu o loo i le itulau 4. O le a le mea e te faia ina ia maua ai le fiafia i le olaga e aunoa ma le tepa ese mai ou “faamoemoega taua”?
Suesue aoaoga a Peresitene Kimball e uiga i faamoemoega o le olaga faaletino o loo i le itulau 3–5. O le malamalama ai i nei aoaoga, o le a sou manatu aisea ua avea ai le faatuutuu ma se tasi “o vaivaiga sili ona leaga i tagata”? E mafai faapefea ona tatou faatoilaloina lenei suiga?
Na aoao mai Peresitene Kimball faapea o le talalelei a Iesu Keriso e pei o se faafanua e taitai atu ai i tatou i le faaeaga (itulau 5–7). Mafaufau po o fea nei ua e oo i ai i lenei faigamalaga, ma pe o le a se mea e mafai ona e faia ina ia tumau ai lou alualu i luma.
O le a sou manatu o le a le uiga o le lototele i le talalelei? (Mo nisi faataitaiga, tagai itulau 7–9 ma le tala o loo i le itulau 1.) Aisea ua le lava ai le auai i le Ekalesia ma le malamalama i le talalelei e faamautinoa ai le faaeaga i le malo selesitila?

Mau e Faatatau I Ai: Iakopo 1:22; Alema 34:30–41; 3 Nifae 27:13–22; MFF 76:50–93; Aperaamo 3:22–26